| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
17. ஜா²னபச்சயனித்³தே³ஸவண்ணனா
17. Jhānapaccayaniddesavaṇṇanā
17. ஜா²னபச்சயனித்³தே³ஸே ஜா²னங்கா³னீதி த்³விபஞ்சவிஞ்ஞாணவஜ்ஜேஸு ஸேஸசித்தேஸு உப்பன்னானி விதக்கவிசாரபீதிஸோமனஸ்ஸதோ³மனஸ்ஸுபெக்கா²சித்தேகக்³க³தாஸங்கா²தானி ஸத்த அங்கா³னி. பஞ்சன்னங் பன விஞ்ஞாணகாயானங் அபி⁴னிபாதமத்தத்தா தேஸு விஜ்ஜமானானிபி உபெக்கா²ஸுக²து³க்கா²னி உபனிஜ்ஜா²னாகாரஸ்ஸ அபா⁴வதோ ஜா²னங்கா³னீதி ந உத்³த⁴டானி. தத்த² பச்சி²ன்னத்தா பன ஸேஸாஹேதுகேஸுபி ஜா²னங்க³ங் ந உத்³த⁴டமேவ. தங்ஸமுட்டா²னானந்தி இதா⁴பி கடத்தாரூபங் ஸங்க³ஹிதந்தி வேதி³தப்³ப³ங். வுத்தஞ்ஹேதங் பஞ்ஹாவாரே – ‘‘படிஸந்தி⁴க்க²ணே விபாகாப்³யாகதானி ஜா²னங்கா³னி ஸம்பயுத்தகானங் க²ந்தா⁴னங் கடத்தா ச ரூபானங் ஜா²னபச்சயேன பச்சயோ’’தி. அயங் தாவெத்த² பாளிவண்ணனா. அயங் பன ஜா²னபச்சயோ ஸத்தன்னங் ஜா²னங்கா³னங் வஸேன டி²தோபி ஜாதிபே⁴த³தோ குஸலாகுஸலவிபாககிரியவஸேன சதுதா⁴ பி⁴ஜ்ஜதி, புன பூ⁴மிவஸேன சதுதா⁴; ஏகதா⁴, சதுதா⁴, திதா⁴தி த்³வாத³ஸதா⁴ பி⁴ஜ்ஜதீதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
17. Jhānapaccayaniddese jhānaṅgānīti dvipañcaviññāṇavajjesu sesacittesu uppannāni vitakkavicārapītisomanassadomanassupekkhācittekaggatāsaṅkhātāni satta aṅgāni. Pañcannaṃ pana viññāṇakāyānaṃ abhinipātamattattā tesu vijjamānānipi upekkhāsukhadukkhāni upanijjhānākārassa abhāvato jhānaṅgānīti na uddhaṭāni. Tattha pacchinnattā pana sesāhetukesupi jhānaṅgaṃ na uddhaṭameva. Taṃsamuṭṭhānānanti idhāpi kaṭattārūpaṃ saṅgahitanti veditabbaṃ. Vuttañhetaṃ pañhāvāre – ‘‘paṭisandhikkhaṇe vipākābyākatāni jhānaṅgāni sampayuttakānaṃ khandhānaṃ kaṭattā ca rūpānaṃ jhānapaccayena paccayo’’ti. Ayaṃ tāvettha pāḷivaṇṇanā. Ayaṃ pana jhānapaccayo sattannaṃ jhānaṅgānaṃ vasena ṭhitopi jātibhedato kusalākusalavipākakiriyavasena catudhā bhijjati, puna bhūmivasena catudhā; ekadhā, catudhā, tidhāti dvādasadhā bhijjatīti evamettha nānappakārabhedato viññātabbo vinicchayo.
ஏவங் பி⁴ன்னே பனெத்த² சதுபூ⁴மகம்பி குஸலஜா²னங்க³ங் பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, ட²பெத்வா ரூபாவசரங் அவஸேஸங் ஆருப்பே ஸம்பயுத்தத⁴ம்மானஞ்ஞேவ ஜா²னபச்சயேன பச்சயோ. அகுஸலேபி ஏஸேவ நயோ. காமாவசரரூபாவசரவிபாகங் பவத்தே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, படிஸந்தி⁴யங் ஸம்பயுத்தத⁴ம்மானஞ்சேவ கடத்தாரூபஸ்ஸ ச, ஆருப்பவிபாகங் ஸம்பயுத்தத⁴ம்மானஞ்ஞேவ, யஞ்ச ஆருப்பே லோகுத்தரவிபாகங் உப்பஜ்ஜதி, தஞ்ச. பஞ்சவோகாரே பன தங் சித்தஸமுட்டா²னரூபஸ்ஸபி ஜா²னபச்சயேன பச்சயோ ஹோதி. தேபூ⁴மகம்பி கிரியஜா²னங்க³ங் பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச. யங் பனெத்த² ஆருப்பே உப்பஜ்ஜதி, தங் ஸம்பயுத்தத⁴ம்மானஞ்ஞேவ ஜா²னபச்சயேன பச்சயோதி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Evaṃ bhinne panettha catubhūmakampi kusalajhānaṅgaṃ pañcavokāre sampayuttadhammānañceva cittasamuṭṭhānarūpassa ca, ṭhapetvā rūpāvacaraṃ avasesaṃ āruppe sampayuttadhammānaññeva jhānapaccayena paccayo. Akusalepi eseva nayo. Kāmāvacararūpāvacaravipākaṃ pavatte sampayuttadhammānañceva cittasamuṭṭhānarūpassa ca, paṭisandhiyaṃ sampayuttadhammānañceva kaṭattārūpassa ca, āruppavipākaṃ sampayuttadhammānaññeva, yañca āruppe lokuttaravipākaṃ uppajjati, tañca. Pañcavokāre pana taṃ cittasamuṭṭhānarūpassapi jhānapaccayena paccayo hoti. Tebhūmakampi kiriyajhānaṅgaṃ pañcavokāre sampayuttadhammānañceva cittasamuṭṭhānarūpassa ca. Yaṃ panettha āruppe uppajjati, taṃ sampayuttadhammānaññeva jhānapaccayena paccayoti evamettha paccayuppannatopi viññātabbo vinicchayoti.
ஜா²னபச்சயனித்³தே³ஸவண்ணனா.
Jhānapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
