| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. ဇိဏ္ဏသုတ္တံ
5. Jiṇṇasuttaṃ
၁၄၈. ဧဝံ မေ သုတံ။ပေ.။ ရာဇဂဟေ ဝေဠုဝနေ။ အထ ခော အာယသ္မာ မဟာကသ္သပော ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော အာယသ္မန္တံ မဟာကသ္သပံ ဘဂဝာ ဧတဒဝောစ – ‘‘ဇိဏ္ဏောသိ ဒာနိ တ္ဝံ, ကသ္သပ, ဂရုကာနိ စ တေ ဣမာနိ သာဏာနိ ပံသုကူလာနိ နိဗ္ဗသနာနိ။ တသ္မာတိဟ တ္ဝံ, ကသ္သပ, ဂဟပတာနိ 1 စေဝ စီဝရာနိ ဓာရေဟိ, နိမန္တနာနိ စ ဘုဉ္ဇာဟိ, မမ စ သန္တိကေ ဝိဟရာဟီ’’တိ။
148. Evaṃ me sutaṃ…pe… rājagahe veḷuvane. Atha kho āyasmā mahākassapo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ mahākassapaṃ bhagavā etadavoca – ‘‘jiṇṇosi dāni tvaṃ, kassapa, garukāni ca te imāni sāṇāni paṃsukūlāni nibbasanāni. Tasmātiha tvaṃ, kassapa, gahapatāni 2 ceva cīvarāni dhārehi, nimantanāni ca bhuñjāhi, mama ca santike viharāhī’’ti.
‘‘အဟံ ခော, ဘန္တေ, ဒီဃရတ္တံ အာရညိကော စေဝ အာရညိကတ္တသ္သ စ ဝဏ္ဏဝာဒီ, ပိဏ္ဍပာတိကော စေဝ ပိဏ္ဍပာတိကတ္တသ္သ စ ဝဏ္ဏဝာဒီ, ပံသုကူလိကော စေဝ ပံသုကူလိကတ္တသ္သ စ ဝဏ္ဏဝာဒီ, တေစီဝရိကော စေဝ တေစီဝရိကတ္တသ္သ စ ဝဏ္ဏဝာဒီ, အပ္ပိစ္ဆော စေဝ အပ္ပိစ္ဆတာယ စ ဝဏ္ဏဝာဒီ, သန္တုဋ္ဌော စေဝ သန္တုဋ္ဌိယာ စ ဝဏ္ဏဝာဒီ, ပဝိဝိတ္တော စေဝ ပဝိဝေကသ္သ စ ဝဏ္ဏဝာဒီ, အသံသဋ္ဌော စေဝ အသံသဂ္ဂသ္သ စ ဝဏ္ဏဝာဒီ, အာရဒ္ဓဝီရိယော စေဝ ဝီရိယာရမ္ဘသ္သ 3 စ ဝဏ္ဏဝာဒီ’’တိ။
‘‘Ahaṃ kho, bhante, dīgharattaṃ āraññiko ceva āraññikattassa ca vaṇṇavādī, piṇḍapātiko ceva piṇḍapātikattassa ca vaṇṇavādī, paṃsukūliko ceva paṃsukūlikattassa ca vaṇṇavādī, tecīvariko ceva tecīvarikattassa ca vaṇṇavādī, appiccho ceva appicchatāya ca vaṇṇavādī, santuṭṭho ceva santuṭṭhiyā ca vaṇṇavādī, pavivitto ceva pavivekassa ca vaṇṇavādī, asaṃsaṭṭho ceva asaṃsaggassa ca vaṇṇavādī, āraddhavīriyo ceva vīriyārambhassa 4 ca vaṇṇavādī’’ti.
‘‘ကိံ 5 ပန တ္ဝံ, ကသ္သပ, အတ္ထဝသံ သမ္ပသ္သမာနော ဒီဃရတ္တံ အာရညိကော စေဝ အာရညိကတ္တသ္သ စ ဝဏ္ဏဝာဒီ, ပိဏ္ဍပာတိကော စေဝ။ပေ.။ ပံသုကူလိကော စေဝ။ တေစီဝရိကော စေဝ။ အပ္ပိစ္ဆော စေဝ။ သန္တုဋ္ဌော စေဝ။ ပဝိဝိတ္တော စေဝ။ အသံသဋ္ဌော စေဝ။ အာရဒ္ဓဝီရိယော စေဝ ဝီရိယာရမ္ဘသ္သ စ ဝဏ္ဏဝာဒီ’’တိ?
‘‘Kiṃ 6 pana tvaṃ, kassapa, atthavasaṃ sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī’’ti?
‘‘ဒ္ဝေ ခ္ဝာဟံ, ဘန္တေ, အတ္ထဝသေ သမ္ပသ္သမာနော ဒီဃရတ္တံ အာရညိကော စေဝ အာရညိကတ္တသ္သ စ ဝဏ္ဏဝာဒီ, ပိဏ္ဍပာတိကော စေဝ။ပေ.။ ပံသုကူလိကော စေဝ။ တေစီဝရိကော စေဝ။ အပ္ပိစ္ဆော စေဝ။ သန္တုဋ္ဌော စေဝ။ ပဝိဝိတ္တော စေဝ။ အသံသဋ္ဌော စေဝ။ အာရဒ္ဓဝီရိယော စေဝ ဝီရိယာရမ္ဘသ္သ စ ဝဏ္ဏဝာဒီ။ အတ္တနော စ ဒိဋ္ဌဓမ္မသုခဝိဟာရံ သမ္ပသ္သမာနော, ပစ္ဆိမဉ္စ ဇနတံ အနုကမ္ပမာနော – ‘အပ္ပေဝ နာမ ပစ္ဆိမာ ဇနတာ ဒိဋ္ဌာနုဂတိံ အာပဇ္ဇေယ္ယုံ’ 7။ ‘ယေ ကိရ တေ အဟေသုံ ဗုဒ္ဓာနုဗုဒ္ဓသာဝကာ တေ ဒီဃရတ္တံ အာရညိကာ စေဝ အဟေသုံ အာရညိကတ္တသ္သ စ ဝဏ္ဏဝာဒိနော။ပေ.။ ပိဏ္ဍပာတိကာ စေဝ အဟေသုံ ။ပေ.။ ပံသုကူလိကာ စေဝ အဟေသုံ။ တေစီဝရိကာ စေဝ အဟေသုံ။ အပ္ပိစ္ဆာ စေဝ အဟေသုံ။ သန္တုဋ္ဌာ စေဝ အဟေသုံ။ ပဝိဝိတ္တာ စေဝ အဟေသုံ။ အသံသဋ္ဌာ စေဝ အဟေသုံ။ အာရဒ္ဓဝီရိယာ စေဝ အဟေသုံ ဝီရိယာရမ္ဘသ္သ စ ဝဏ္ဏဝာဒိနော’တိ။ တေ တထတ္တာယ ပဋိပဇ္ဇိသ္သန္တိ, တေသံ တံ ဘဝိသ္သတိ ဒီဃရတ္တံ ဟိတာယ သုခာယ။
‘‘Dve khvāhaṃ, bhante, atthavase sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī. Attano ca diṭṭhadhammasukhavihāraṃ sampassamāno, pacchimañca janataṃ anukampamāno – ‘appeva nāma pacchimā janatā diṭṭhānugatiṃ āpajjeyyuṃ’ 8. ‘Ye kira te ahesuṃ buddhānubuddhasāvakā te dīgharattaṃ āraññikā ceva ahesuṃ āraññikattassa ca vaṇṇavādino…pe… piṇḍapātikā ceva ahesuṃ …pe… paṃsukūlikā ceva ahesuṃ… tecīvarikā ceva ahesuṃ… appicchā ceva ahesuṃ… santuṭṭhā ceva ahesuṃ… pavivittā ceva ahesuṃ… asaṃsaṭṭhā ceva ahesuṃ… āraddhavīriyā ceva ahesuṃ vīriyārambhassa ca vaṇṇavādino’ti. Te tathattāya paṭipajjissanti, tesaṃ taṃ bhavissati dīgharattaṃ hitāya sukhāya.
‘‘ဣမေ ခ္ဝာဟံ, ဘန္တေ, ဒ္ဝေ အတ္ထဝသေ သမ္ပသ္သမာနော ဒီဃရတ္တံ အာရညိကော စေဝ အာရညိကတ္တသ္သ စ ဝဏ္ဏဝာဒီ, ပိဏ္ဍပာတိကော စေဝ။ပေ.။ ပံသုကူလိကော စေဝ။ တေစီဝရိကော စေဝ။ အပ္ပိစ္ဆော စေဝ။ သန္တုဋ္ဌော စေဝ။ ပဝိဝိတ္တော စေဝ။ အသံသဋ္ဌော စေဝ။ အာရဒ္ဓဝီရိယော စေဝ ဝီရိယာရမ္ဘသ္သ စ ဝဏ္ဏဝာဒီ’’တိ။
‘‘Ime khvāhaṃ, bhante, dve atthavase sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī’’ti.
‘‘သာဓု သာဓု, ကသ္သပ။ ဗဟုဇနဟိတာယ ကိရ တ္ဝံ, ကသ္သပ, ပဋိပန္နော ဗဟုဇနသုခာယ လောကာနုကမ္ပာယ အတ္ထာယ ဟိတာယ သုခာယ ဒေဝမနုသ္သာနံ။ တသ္မာတိဟ တ္ဝံ, ကသ္သပ, သာဏာနိ စေဝ ပံသုကူလာနိ ဓာရေဟိ နိဗ္ဗသနာနိ, ပိဏ္ဍာယ စ စရာဟိ, အရညေ စ ဝိဟရာဟီ’’တိ။ ပဉ္စမံ။
‘‘Sādhu sādhu, kassapa. Bahujanahitāya kira tvaṃ, kassapa, paṭipanno bahujanasukhāya lokānukampāya atthāya hitāya sukhāya devamanussānaṃ. Tasmātiha tvaṃ, kassapa, sāṇāni ceva paṃsukūlāni dhārehi nibbasanāni, piṇḍāya ca carāhi, araññe ca viharāhī’’ti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. ဇိဏ္ဏသုတ္တဝဏ္ဏနာ • 5. Jiṇṇasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. ဇိဏ္ဏသုတ္တဝဏ္ဏနာ • 5. Jiṇṇasuttavaṇṇanā
