| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೫. ಜಿಣ್ಣಸುತ್ತಂ
5. Jiṇṇasuttaṃ
೧೪೮. ಏವಂ ಮೇ ಸುತಂ…ಪೇ॰… ರಾಜಗಹೇ ವೇಳುವನೇ। ಅಥ ಖೋ ಆಯಸ್ಮಾ ಮಹಾಕಸ್ಸಪೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನಂ ಖೋ ಆಯಸ್ಮನ್ತಂ ಮಹಾಕಸ್ಸಪಂ ಭಗವಾ ಏತದವೋಚ – ‘‘ಜಿಣ್ಣೋಸಿ ದಾನಿ ತ್ವಂ, ಕಸ್ಸಪ, ಗರುಕಾನಿ ಚ ತೇ ಇಮಾನಿ ಸಾಣಾನಿ ಪಂಸುಕೂಲಾನಿ ನಿಬ್ಬಸನಾನಿ। ತಸ್ಮಾತಿಹ ತ್ವಂ, ಕಸ್ಸಪ, ಗಹಪತಾನಿ 1 ಚೇವ ಚೀವರಾನಿ ಧಾರೇಹಿ, ನಿಮನ್ತನಾನಿ ಚ ಭುಞ್ಜಾಹಿ, ಮಮ ಚ ಸನ್ತಿಕೇ ವಿಹರಾಹೀ’’ತಿ।
148. Evaṃ me sutaṃ…pe… rājagahe veḷuvane. Atha kho āyasmā mahākassapo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ mahākassapaṃ bhagavā etadavoca – ‘‘jiṇṇosi dāni tvaṃ, kassapa, garukāni ca te imāni sāṇāni paṃsukūlāni nibbasanāni. Tasmātiha tvaṃ, kassapa, gahapatāni 2 ceva cīvarāni dhārehi, nimantanāni ca bhuñjāhi, mama ca santike viharāhī’’ti.
‘‘ಅಹಂ ಖೋ, ಭನ್ತೇ, ದೀಘರತ್ತಂ ಆರಞ್ಞಿಕೋ ಚೇವ ಆರಞ್ಞಿಕತ್ತಸ್ಸ ಚ ವಣ್ಣವಾದೀ, ಪಿಣ್ಡಪಾತಿಕೋ ಚೇವ ಪಿಣ್ಡಪಾತಿಕತ್ತಸ್ಸ ಚ ವಣ್ಣವಾದೀ, ಪಂಸುಕೂಲಿಕೋ ಚೇವ ಪಂಸುಕೂಲಿಕತ್ತಸ್ಸ ಚ ವಣ್ಣವಾದೀ, ತೇಚೀವರಿಕೋ ಚೇವ ತೇಚೀವರಿಕತ್ತಸ್ಸ ಚ ವಣ್ಣವಾದೀ, ಅಪ್ಪಿಚ್ಛೋ ಚೇವ ಅಪ್ಪಿಚ್ಛತಾಯ ಚ ವಣ್ಣವಾದೀ, ಸನ್ತುಟ್ಠೋ ಚೇವ ಸನ್ತುಟ್ಠಿಯಾ ಚ ವಣ್ಣವಾದೀ, ಪವಿವಿತ್ತೋ ಚೇವ ಪವಿವೇಕಸ್ಸ ಚ ವಣ್ಣವಾದೀ, ಅಸಂಸಟ್ಠೋ ಚೇವ ಅಸಂಸಗ್ಗಸ್ಸ ಚ ವಣ್ಣವಾದೀ, ಆರದ್ಧವೀರಿಯೋ ಚೇವ ವೀರಿಯಾರಮ್ಭಸ್ಸ 3 ಚ ವಣ್ಣವಾದೀ’’ತಿ।
‘‘Ahaṃ kho, bhante, dīgharattaṃ āraññiko ceva āraññikattassa ca vaṇṇavādī, piṇḍapātiko ceva piṇḍapātikattassa ca vaṇṇavādī, paṃsukūliko ceva paṃsukūlikattassa ca vaṇṇavādī, tecīvariko ceva tecīvarikattassa ca vaṇṇavādī, appiccho ceva appicchatāya ca vaṇṇavādī, santuṭṭho ceva santuṭṭhiyā ca vaṇṇavādī, pavivitto ceva pavivekassa ca vaṇṇavādī, asaṃsaṭṭho ceva asaṃsaggassa ca vaṇṇavādī, āraddhavīriyo ceva vīriyārambhassa 4 ca vaṇṇavādī’’ti.
‘‘ಕಿಂ 5 ಪನ ತ್ವಂ, ಕಸ್ಸಪ, ಅತ್ಥವಸಂ ಸಮ್ಪಸ್ಸಮಾನೋ ದೀಘರತ್ತಂ ಆರಞ್ಞಿಕೋ ಚೇವ ಆರಞ್ಞಿಕತ್ತಸ್ಸ ಚ ವಣ್ಣವಾದೀ, ಪಿಣ್ಡಪಾತಿಕೋ ಚೇವ…ಪೇ॰… ಪಂಸುಕೂಲಿಕೋ ಚೇವ… ತೇಚೀವರಿಕೋ ಚೇವ… ಅಪ್ಪಿಚ್ಛೋ ಚೇವ… ಸನ್ತುಟ್ಠೋ ಚೇವ… ಪವಿವಿತ್ತೋ ಚೇವ… ಅಸಂಸಟ್ಠೋ ಚೇವ… ಆರದ್ಧವೀರಿಯೋ ಚೇವ ವೀರಿಯಾರಮ್ಭಸ್ಸ ಚ ವಣ್ಣವಾದೀ’’ತಿ?
‘‘Kiṃ 6 pana tvaṃ, kassapa, atthavasaṃ sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī’’ti?
‘‘ದ್ವೇ ಖ್ವಾಹಂ, ಭನ್ತೇ, ಅತ್ಥವಸೇ ಸಮ್ಪಸ್ಸಮಾನೋ ದೀಘರತ್ತಂ ಆರಞ್ಞಿಕೋ ಚೇವ ಆರಞ್ಞಿಕತ್ತಸ್ಸ ಚ ವಣ್ಣವಾದೀ, ಪಿಣ್ಡಪಾತಿಕೋ ಚೇವ…ಪೇ॰… ಪಂಸುಕೂಲಿಕೋ ಚೇವ… ತೇಚೀವರಿಕೋ ಚೇವ… ಅಪ್ಪಿಚ್ಛೋ ಚೇವ… ಸನ್ತುಟ್ಠೋ ಚೇವ… ಪವಿವಿತ್ತೋ ಚೇವ… ಅಸಂಸಟ್ಠೋ ಚೇವ… ಆರದ್ಧವೀರಿಯೋ ಚೇವ ವೀರಿಯಾರಮ್ಭಸ್ಸ ಚ ವಣ್ಣವಾದೀ। ಅತ್ತನೋ ಚ ದಿಟ್ಠಧಮ್ಮಸುಖವಿಹಾರಂ ಸಮ್ಪಸ್ಸಮಾನೋ, ಪಚ್ಛಿಮಞ್ಚ ಜನತಂ ಅನುಕಮ್ಪಮಾನೋ – ‘ಅಪ್ಪೇವ ನಾಮ ಪಚ್ಛಿಮಾ ಜನತಾ ದಿಟ್ಠಾನುಗತಿಂ ಆಪಜ್ಜೇಯ್ಯುಂ’ 7। ‘ಯೇ ಕಿರ ತೇ ಅಹೇಸುಂ ಬುದ್ಧಾನುಬುದ್ಧಸಾವಕಾ ತೇ ದೀಘರತ್ತಂ ಆರಞ್ಞಿಕಾ ಚೇವ ಅಹೇಸುಂ ಆರಞ್ಞಿಕತ್ತಸ್ಸ ಚ ವಣ್ಣವಾದಿನೋ…ಪೇ॰… ಪಿಣ್ಡಪಾತಿಕಾ ಚೇವ ಅಹೇಸುಂ …ಪೇ॰… ಪಂಸುಕೂಲಿಕಾ ಚೇವ ಅಹೇಸುಂ… ತೇಚೀವರಿಕಾ ಚೇವ ಅಹೇಸುಂ… ಅಪ್ಪಿಚ್ಛಾ ಚೇವ ಅಹೇಸುಂ… ಸನ್ತುಟ್ಠಾ ಚೇವ ಅಹೇಸುಂ… ಪವಿವಿತ್ತಾ ಚೇವ ಅಹೇಸುಂ… ಅಸಂಸಟ್ಠಾ ಚೇವ ಅಹೇಸುಂ… ಆರದ್ಧವೀರಿಯಾ ಚೇವ ಅಹೇಸುಂ ವೀರಿಯಾರಮ್ಭಸ್ಸ ಚ ವಣ್ಣವಾದಿನೋ’ತಿ। ತೇ ತಥತ್ತಾಯ ಪಟಿಪಜ್ಜಿಸ್ಸನ್ತಿ, ತೇಸಂ ತಂ ಭವಿಸ್ಸತಿ ದೀಘರತ್ತಂ ಹಿತಾಯ ಸುಖಾಯ।
‘‘Dve khvāhaṃ, bhante, atthavase sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī. Attano ca diṭṭhadhammasukhavihāraṃ sampassamāno, pacchimañca janataṃ anukampamāno – ‘appeva nāma pacchimā janatā diṭṭhānugatiṃ āpajjeyyuṃ’ 8. ‘Ye kira te ahesuṃ buddhānubuddhasāvakā te dīgharattaṃ āraññikā ceva ahesuṃ āraññikattassa ca vaṇṇavādino…pe… piṇḍapātikā ceva ahesuṃ …pe… paṃsukūlikā ceva ahesuṃ… tecīvarikā ceva ahesuṃ… appicchā ceva ahesuṃ… santuṭṭhā ceva ahesuṃ… pavivittā ceva ahesuṃ… asaṃsaṭṭhā ceva ahesuṃ… āraddhavīriyā ceva ahesuṃ vīriyārambhassa ca vaṇṇavādino’ti. Te tathattāya paṭipajjissanti, tesaṃ taṃ bhavissati dīgharattaṃ hitāya sukhāya.
‘‘ಇಮೇ ಖ್ವಾಹಂ, ಭನ್ತೇ, ದ್ವೇ ಅತ್ಥವಸೇ ಸಮ್ಪಸ್ಸಮಾನೋ ದೀಘರತ್ತಂ ಆರಞ್ಞಿಕೋ ಚೇವ ಆರಞ್ಞಿಕತ್ತಸ್ಸ ಚ ವಣ್ಣವಾದೀ, ಪಿಣ್ಡಪಾತಿಕೋ ಚೇವ…ಪೇ॰… ಪಂಸುಕೂಲಿಕೋ ಚೇವ… ತೇಚೀವರಿಕೋ ಚೇವ… ಅಪ್ಪಿಚ್ಛೋ ಚೇವ… ಸನ್ತುಟ್ಠೋ ಚೇವ… ಪವಿವಿತ್ತೋ ಚೇವ… ಅಸಂಸಟ್ಠೋ ಚೇವ… ಆರದ್ಧವೀರಿಯೋ ಚೇವ ವೀರಿಯಾರಮ್ಭಸ್ಸ ಚ ವಣ್ಣವಾದೀ’’ತಿ।
‘‘Ime khvāhaṃ, bhante, dve atthavase sampassamāno dīgharattaṃ āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī’’ti.
‘‘ಸಾಧು ಸಾಧು, ಕಸ್ಸಪ। ಬಹುಜನಹಿತಾಯ ಕಿರ ತ್ವಂ, ಕಸ್ಸಪ, ಪಟಿಪನ್ನೋ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ। ತಸ್ಮಾತಿಹ ತ್ವಂ, ಕಸ್ಸಪ, ಸಾಣಾನಿ ಚೇವ ಪಂಸುಕೂಲಾನಿ ಧಾರೇಹಿ ನಿಬ್ಬಸನಾನಿ, ಪಿಣ್ಡಾಯ ಚ ಚರಾಹಿ, ಅರಞ್ಞೇ ಚ ವಿಹರಾಹೀ’’ತಿ। ಪಞ್ಚಮಂ।
‘‘Sādhu sādhu, kassapa. Bahujanahitāya kira tvaṃ, kassapa, paṭipanno bahujanasukhāya lokānukampāya atthāya hitāya sukhāya devamanussānaṃ. Tasmātiha tvaṃ, kassapa, sāṇāni ceva paṃsukūlāni dhārehi nibbasanāni, piṇḍāya ca carāhi, araññe ca viharāhī’’ti. Pañcamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೫. ಜಿಣ್ಣಸುತ್ತವಣ್ಣನಾ • 5. Jiṇṇasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೫. ಜಿಣ್ಣಸುತ್ತವಣ್ಣನಾ • 5. Jiṇṇasuttavaṇṇanā
