| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
10. ஜீவிதிந்த்³ரியகதா²வண்ணனா
10. Jīvitindriyakathāvaṇṇanā
540. இதா³னி ஜீவிதிந்த்³ரியகதா² நாம ஹோதி. தத்த² யேஸங் ஜீவிதிந்த்³ரியங் நாம சித்தவிப்பயுத்தோ அரூபத⁴ம்மோ, தஸ்மா ரூபஜீவிதிந்த்³ரியங் நத்தீ²தி லத்³தி⁴, ஸெய்யதா²பி புப்³ப³ஸேலியானஞ்சேவ ஸம்மிதியானஞ்ச; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. நத்தி² ரூபீனங் த⁴ம்மானங் ஆயூதி பஞ்ஹே உபாதி³ன்னரூபானம்பி திணகட்டா²தீ³னம்பி ஸந்தானவஸேன பவத்திமேவ ஆயு டி²தி யபனா யாபனா இரியனா வத்தனா பாலனாதி இச்ச²தி, தஸ்மா படிக்கி²பதி. அத்தீ²தி பஞ்ஹேபி இமினா காரணேன படிஜானாதி. அத்தி² அரூபஜீவிதிந்த்³ரியந்தி பஞ்ஹே அரூபத⁴ம்மானங் சித்தவிப்பயுத்தங் ஜீவிதிந்த்³ரியஸந்தானங் நாம அத்தீ²தி இச்ச²தி, தஸ்மா படிஜானாதி.
540. Idāni jīvitindriyakathā nāma hoti. Tattha yesaṃ jīvitindriyaṃ nāma cittavippayutto arūpadhammo, tasmā rūpajīvitindriyaṃ natthīti laddhi, seyyathāpi pubbaseliyānañceva sammitiyānañca; te sandhāya pucchā sakavādissa, paṭiññā itarassa. Natthi rūpīnaṃ dhammānaṃ āyūti pañhe upādinnarūpānampi tiṇakaṭṭhādīnampi santānavasena pavattimeva āyu ṭhiti yapanā yāpanā iriyanā vattanā pālanāti icchati, tasmā paṭikkhipati. Atthīti pañhepi iminā kāraṇena paṭijānāti. Atthi arūpajīvitindriyanti pañhe arūpadhammānaṃ cittavippayuttaṃ jīvitindriyasantānaṃ nāma atthīti icchati, tasmā paṭijānāti.
541. ரூபீனங் த⁴ம்மானங் ஆயு அரூபஜீவிதிந்த்³ரியந்தி பஞ்ஹே ஸத்தஸந்தானே ரூபினோ வா ஹொந்து அரூபினோ வா, ஸப்³பே³ஸங் சித்தவிப்பயுத்தங் அரூபஜீவிதிந்த்³ரியமேவ இச்ச²தி, தஸ்மா படிஜானாதி.
541. Rūpīnaṃ dhammānaṃ āyu arūpajīvitindriyanti pañhe sattasantāne rūpino vā hontu arūpino vā, sabbesaṃ cittavippayuttaṃ arūpajīvitindriyameva icchati, tasmā paṭijānāti.
542. நிரோத⁴ஸமாபன்னபஞ்ஹேஸுபி சித்தவிப்பயுத்தங் அரூபஜீவிதமேவ ஸந்தா⁴ய படிக்கி²பதி ச படிஜானாதி ச. ஸகவாதீ³ பன தங் அஸம்படிச்ச²ந்தோ யங் அரூபபவத்தே அஸதி அத்தி², ரூபேன தேன ப⁴விதப்³ப³ந்தி சோதே³துங் ஹஞ்சீதிஆதி³மாஹ. ஸங்கா²ரக்க²ந்த⁴பஞ்ஹே ப²ஸ்ஸாதி³ஸங்கா²ரக்க²ந்த⁴ங் ஸந்தா⁴ய படிக்கி²பதி, காயகம்மாதி³ஸங்கா²ரக்க²ந்த⁴ங் ஸந்தா⁴ய படிஜானாதி. காயவிஞ்ஞத்தி வசீவிஞ்ஞத்தி ஸம்மாவாசா ஸம்மாகம்மந்தோ ஜீவிதிந்த்³ரியந்தி ஏவமாத³யோபி த⁴ம்மா ஸங்கா²ரக்க²ந்த⁴பரியாபன்னாதிஸ்ஸ லத்³தி⁴. ஸகவாதீ³ பன தங் அஸம்படிச்ச²ந்தோ யதி³ நிருத்³தே⁴பி அரூபபவத்தே ஸங்கா²ரக்க²ந்தோ⁴ அத்தி², சதுன்னம்பி க²ந்தா⁴னங் அத்தி²தா ஹோதூதி சோதே³துங் அத்தி² வேத³னாக்க²ந்தோ⁴தி ஆதி³மாஹ. இதரோ அந்தோஸமாபத்திங் ஸந்தா⁴ய படிக்கி²பதி, ஸமாபஜ்ஜந்தஸ்ஸ ச வுட்ட²ஹந்தஸ்ஸ ச புப்³பா³பரபா⁴க³ங் ஸந்தா⁴ய படிஜானாதி.
542. Nirodhasamāpannapañhesupi cittavippayuttaṃ arūpajīvitameva sandhāya paṭikkhipati ca paṭijānāti ca. Sakavādī pana taṃ asampaṭicchanto yaṃ arūpapavatte asati atthi, rūpena tena bhavitabbanti codetuṃ hañcītiādimāha. Saṅkhārakkhandhapañhe phassādisaṅkhārakkhandhaṃ sandhāya paṭikkhipati, kāyakammādisaṅkhārakkhandhaṃ sandhāya paṭijānāti. Kāyaviññatti vacīviññatti sammāvācā sammākammanto jīvitindriyanti evamādayopi dhammā saṅkhārakkhandhapariyāpannātissa laddhi. Sakavādī pana taṃ asampaṭicchanto yadi niruddhepi arūpapavatte saṅkhārakkhandho atthi, catunnampi khandhānaṃ atthitā hotūti codetuṃ atthi vedanākkhandhoti ādimāha. Itaro antosamāpattiṃ sandhāya paṭikkhipati, samāpajjantassa ca vuṭṭhahantassa ca pubbāparabhāgaṃ sandhāya paṭijānāti.
543. அஸஞ்ஞஸத்தவாரேபி ஏஸேவ நயோ. தஸ்ஸ ஹி லத்³தி⁴யா அஸஞ்ஞஸத்தானங் படிஸந்தி⁴காலே சித்தங் உப்பஜ்ஜித்வா நிருஜ்ஜ²தி, தேன ஸஹ சித்தவிப்பயுத்தஅரூபஜீவிதிந்த்³ரியங் உப்பஜ்ஜித்வா யாவதாயுகங் பவத்ததி. தஸ்மா தேஸங் ஜீவிதிந்த்³ரியங் நத்தீ²தி புட்டோ² படிக்கி²பதி, அத்தீ²தி புட்டோ² படிஜானாதி. வேத³னாக்க²ந்தா⁴த³யோபி தேஸங் பவத்திவஸேன படிக்கி²பதி, சுதிபடிஸந்தி⁴வஸேன படிஜானாதி. ஸகவாதீ³ பன தங் அனிச்ச²ந்தோ ‘‘ஸசே தத்த² ஏகக்க²ணேபி வேத³னாத³யோ அத்தி², பஞ்சவோகாரப⁴வத்தங் பாபுணாதீ’’தி சோதே³துங் பஞ்சவோகாரப⁴வோதி ஆஹ. இதரோ ஸுத்தவிரோத⁴ப⁴யா படிக்கி²பதி.
543. Asaññasattavārepi eseva nayo. Tassa hi laddhiyā asaññasattānaṃ paṭisandhikāle cittaṃ uppajjitvā nirujjhati, tena saha cittavippayuttaarūpajīvitindriyaṃ uppajjitvā yāvatāyukaṃ pavattati. Tasmā tesaṃ jīvitindriyaṃ natthīti puṭṭho paṭikkhipati, atthīti puṭṭho paṭijānāti. Vedanākkhandhādayopi tesaṃ pavattivasena paṭikkhipati, cutipaṭisandhivasena paṭijānāti. Sakavādī pana taṃ anicchanto ‘‘sace tattha ekakkhaṇepi vedanādayo atthi, pañcavokārabhavattaṃ pāpuṇātī’’ti codetuṃ pañcavokārabhavoti āha. Itaro suttavirodhabhayā paṭikkhipati.
544-545. ஏகதே³ஸங் பி⁴ஜ்ஜதீதி பஞ்ஹே ஸம்பயுத்தங் பி⁴ஜ்ஜதி, விப்பயுத்தங் திட்ட²தீதி தஸ்ஸ லத்³தி⁴, தஸ்மா படிஜானாதி. த்³வே ஜீவிதிந்த்³ரியானீதி புச்சா² பரவாதி³ஸ்ஸ, படிஞ்ஞா ஸகவாதி³ஸ்ஸ. ரூபாரூபவஸேன ஹி த்³வே ஜீவிதிந்த்³ரியானி, தேஹியேவ ஸத்தோ ஜீவதி, தேஸங் ப⁴ங்கே³ன மரதீதி வுச்சதி. சுதிக்க²ணஸ்மிஞ்ஹி த்³வேபி ஜீவிதானி ஸஹேவ பி⁴ஜ்ஜந்தி.
544-545. Ekadesaṃ bhijjatīti pañhe sampayuttaṃ bhijjati, vippayuttaṃ tiṭṭhatīti tassa laddhi, tasmā paṭijānāti. Dve jīvitindriyānīti pucchā paravādissa, paṭiññā sakavādissa. Rūpārūpavasena hi dve jīvitindriyāni, tehiyeva satto jīvati, tesaṃ bhaṅgena maratīti vuccati. Cutikkhaṇasmiñhi dvepi jīvitāni saheva bhijjanti.
ஜீவிதிந்த்³ரியகதா²வண்ணனா.
Jīvitindriyakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (82) 10. ஜீவிதிந்த்³ரியகதா² • (82) 10. Jīvitindriyakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 10. ஜீவிதிந்த்³ரியகதா²வண்ணனா • 10. Jīvitindriyakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 10. ஜீவிதிந்த்³ரியகதா²வண்ணனா • 10. Jīvitindriyakathāvaṇṇanā
