| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[456] 2. ж̇ун̣хаж̇аад̇агаван̣н̣анаа
[456] 2. Juṇhajātakavaṇṇanā
сун̣охи маяхам̣ важанам̣ ж̇анинд̣̇аад̇и ид̣̇ам̣ сад̇т̇аа ж̇зд̇аванз вихаранд̇о аананд̣̇ад̇т̇зрзна лад̣̇д̇хаварз аараб̣бха гат̇зси. батамаб̣од̇хияан̃хи вийсад̇и вассаани бхаг̇авад̇о аниб̣ад̣̇д̇хубадтаагаа ахзсум̣. згад̣̇аа т̇зро нааг̇асамаало, згад̣̇аа нааг̇ид̇о, згад̣̇аа убаваан̣о, згад̣̇аа сунагкад̇д̇о, згад̣̇аа жунд̣̇о, згад̣̇аа нанд̣̇о, згад̣̇аа сааг̇ад̇о, згад̣̇аа мзгхияо бхаг̇аванд̇ам̣ убадтахи. ат̇згад̣̇ивасам̣ бхаг̇аваа бхигкуу ааманд̇зси ‘‘бхигкавз, ид̣̇аанимхи махаллаго, згажжз бхигкуу ‘иминаа маг̇г̇зна г̇ажчаамаа’д̇и вуд̇д̇з ан̃н̃зна г̇ажчанд̇и, згажжз маяхам̣ бад̇д̇ажийварам̣ бхуумияам̣ нигкибанд̇и, ниб̣ад̣̇д̇хубадтаагам̣ мз згам̣ бхигкум̣ ж̇аанаат̇аа’’д̇и. ‘‘бханд̇з, ахам̣ убадтахиссаами, ахам̣ убадтахиссаамий’’д̇и сираси ан̃ж̇алим̣ гад̇ваа удтид̇з саарибуд̇д̇ад̇т̇зраад̣̇аяо ‘‘д̇умхаагам̣ бад̇т̇анаа мад̇т̇агам̣ бад̇д̇аа, ала’’нд̇и бадигкиби. д̇ад̇о бхигкуу аананд̣̇ад̇т̇зрам̣ ‘‘д̇вам̣ аавусо, убадтаагадтаанам̣ яаажаахий’’д̇и аахам̣су. т̇зро ‘‘сажз мз бханд̇з, бхаг̇аваа ад̇д̇анаа лад̣̇д̇хажийварам̣ на д̣̇ассад̇и, бин̣д̣абаад̇ам̣ на д̣̇ассад̇и, згаг̇анд̇хагудияам̣ васид̇ум̣ на д̣̇ассад̇и, мам̣ г̇ахзд̇ваа ниманд̇анам̣ на г̇амиссад̇и, сажз бана бхаг̇аваа маяаа г̇ахид̇ам̣ ниманд̇анам̣ г̇амиссад̇и, сажз ахам̣ д̇ирорадтаа д̇ирож̇анабад̣̇аа бхаг̇аванд̇ам̣ д̣̇адтум̣ ааг̇ад̇ам̣ барисам̣ ааг̇ад̇агкан̣зязва д̣̇ассзд̇ум̣ лабхиссаами , яад̣̇аа мз ган̇каа уббаж̇ж̇ад̇и, д̇асмим̣ кан̣зязва бхаг̇аванд̇ам̣ убасан̇гамид̇ум̣ лабхиссаами, сажз яам̣ бхаг̇аваа мама бараммукаа д̇хаммам̣ гат̇зд̇и, д̇ам̣ ааг̇анд̇ваа маяхам̣ гат̇зссад̇и, зваахам̣ бхаг̇аванд̇ам̣ убадтахиссаамий’’д̇и имз жад̇д̇ааро бадигкзбз жад̇ассо жа ааяаажанаад̇и адта варз яаажи, бхаг̇аваабисса ад̣̇ааси.
Suṇohi mayhaṃ vacanaṃ janindāti idaṃ satthā jetavane viharanto ānandattherena laddhavare ārabbha kathesi. Paṭhamabodhiyañhi vīsati vassāni bhagavato anibaddhupaṭṭhākā ahesuṃ. Ekadā thero nāgasamālo, ekadā nāgito, ekadā upavāṇo, ekadā sunakkhatto, ekadā cundo, ekadā nando, ekadā sāgato, ekadā meghiyo bhagavantaṃ upaṭṭhahi. Athekadivasaṃ bhagavā bhikkhū āmantesi ‘‘bhikkhave, idānimhi mahallako, ekacce bhikkhū ‘iminā maggena gacchāmā’ti vutte aññena gacchanti, ekacce mayhaṃ pattacīvaraṃ bhūmiyaṃ nikkhipanti, nibaddhupaṭṭhākaṃ me ekaṃ bhikkhuṃ jānāthā’’ti. ‘‘Bhante, ahaṃ upaṭṭhahissāmi, ahaṃ upaṭṭhahissāmī’’ti sirasi añjaliṃ katvā uṭṭhite sāriputtattherādayo ‘‘tumhākaṃ patthanā matthakaṃ pattā, ala’’nti paṭikkhipi. Tato bhikkhū ānandattheraṃ ‘‘tvaṃ āvuso, upaṭṭhākaṭṭhānaṃ yācāhī’’ti āhaṃsu. Thero ‘‘sace me bhante, bhagavā attanā laddhacīvaraṃ na dassati, piṇḍapātaṃ na dassati, ekagandhakuṭiyaṃ vasituṃ na dassati, maṃ gahetvā nimantanaṃ na gamissati, sace pana bhagavā mayā gahitaṃ nimantanaṃ gamissati, sace ahaṃ tiroraṭṭhā tirojanapadā bhagavantaṃ daṭṭhuṃ āgataṃ parisaṃ āgatakkhaṇeyeva dassetuṃ labhissāmi , yadā me kaṅkhā uppajjati, tasmiṃ khaṇeyeva bhagavantaṃ upasaṅkamituṃ labhissāmi, sace yaṃ bhagavā mama parammukhā dhammaṃ katheti, taṃ āgantvā mayhaṃ kathessati, evāhaṃ bhagavantaṃ upaṭṭhahissāmī’’ti ime cattāro paṭikkhepe catasso ca āyācanāti aṭṭha vare yāci, bhagavāpissa adāsi.
со д̇ад̇о бадтааяа бан̃жавийсад̇и вассаани ниб̣ад̣̇д̇хубадтааго ахоси. со бан̃жасу таанзсу зд̇ад̣̇аг̇г̇з табанам̣ бад̇ваа ааг̇амасамбад̣̇аа, ад̇хиг̇амасамбад̣̇аа, буб̣б̣ахзд̇усамбад̣̇аа, ад̇д̇ад̇т̇абарибужчаасамбад̣̇аа, д̇ид̇т̇аваасасамбад̣̇аа, яонисоманасигаарасамбад̣̇аа, б̣уд̣̇д̇хуубаниссаяасамбад̣̇аад̇и имаахи сад̇д̇ахи самбад̣̇аахи саманнааг̇ад̇о б̣уд̣̇д̇хасса санд̇игз адтаварад̣̇ааяаж̇ж̇ам̣ лабхид̇ваа б̣уд̣̇д̇хасаасанз бан̃н̃аад̇о г̇аг̇анамаж̇жхз жанд̣̇о вияа баагадо ахоси. ат̇згад̣̇ивасам̣ бхигкуу д̇хаммасабхааяам̣ гат̇ам̣ самудтаабзсум̣ ‘‘аавусо, д̇ат̇ааг̇ад̇о аананд̣̇ад̇т̇зрам̣ варад̣̇аанзна санд̇аббзсий’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, ид̣̇аанзва, буб̣б̣збаахам̣ аананд̣̇ам̣ варзна санд̇аббзсим̣, буб̣б̣збаахам̣ яам̣ яам̣ зса яаажи, д̇ам̣ д̇ам̣ ад̣̇аасим̣язваа’’д̇и вад̇ваа ад̇ийд̇ам̣ аахари.
So tato paṭṭhāya pañcavīsati vassāni nibaddhupaṭṭhāko ahosi. So pañcasu ṭhānesu etadagge ṭhapanaṃ patvā āgamasampadā, adhigamasampadā, pubbahetusampadā, attatthaparipucchāsampadā, titthavāsasampadā, yonisomanasikārasampadā, buddhūpanissayasampadāti imāhi sattahi sampadāhi samannāgato buddhassa santike aṭṭhavaradāyajjaṃ labhitvā buddhasāsane paññāto gaganamajjhe cando viya pākaṭo ahosi. Athekadivasaṃ bhikkhū dhammasabhāyaṃ kathaṃ samuṭṭhāpesuṃ ‘‘āvuso, tathāgato ānandattheraṃ varadānena santappesī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva, pubbepāhaṃ ānandaṃ varena santappesiṃ, pubbepāhaṃ yaṃ yaṃ esa yāci, taṃ taṃ adāsiṃyevā’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о д̇асса буд̇д̇о ж̇ун̣хагумааро наама худ̇ваа д̇аггасилааяам̣ сиббам̣ уг̇г̇ахзд̇ваа аажарияасса ануяог̇ам̣ д̣̇ад̇ваа рад̇д̇ибхааг̇з анд̇хагаарз аажарияасса гхараа нигкамид̇ваа ад̇д̇ано ниваасадтаанам̣ взг̇зна г̇ажчанд̇о ан̃н̃ад̇арам̣ б̣раахман̣ам̣ бхигкам̣ жарид̇ваа ад̇д̇ано ниваасадтаанам̣ г̇ажчанд̇ам̣ абассанд̇о б̣аахунаа бахарид̇ваа д̇асса бхад̇д̇абаад̇им̣ бхинд̣̇им̣, б̣раахман̣о бад̇ид̇ваа вирави. гумааро гаарун̃н̃зна нивад̇д̇ид̇ваа д̇ам̣ хад̇т̇з г̇ахзд̇ваа удтаабзси. б̣раахман̣о ‘‘д̇аяаа, д̇аад̇а, мама бхигкаабхааж̇анам̣ бхиннам̣, бхад̇д̇амуулам̣ мз д̣̇зхий’’д̇и ааха. гумааро ‘‘б̣раахман̣а, на д̣̇аанаахам̣ д̇ава бхад̇д̇амуулам̣ д̣̇аад̇ум̣ саггоми, ахам̣ ко бана гаасигаран̃н̃о буд̇д̇о ж̇ун̣хагумааро наама, маяи раж̇ж̇з бад̇идтид̇з ааг̇анд̇ваа мам̣ д̇ханам̣ яаажзяяаасий’’д̇и вад̇ваа нидтид̇асиббо аажарияам̣ ванд̣̇ид̇ваа б̣аараан̣асим̣ г̇анд̇ваа бид̇у сиббам̣ д̣̇ассзси. бид̇аа ‘‘ж̇ийванд̇зна мз буд̇д̇о д̣̇идто, рааж̇абхууд̇амби нам̣ бассиссаамий’’д̇и раж̇ж̇з абхисин̃жи. со ж̇ун̣харааж̇аа наама худ̇ваа д̇хаммзна раж̇ж̇ам̣ гаарзси. б̣раахман̣о д̇ам̣ бавад̇д̇им̣ суд̇ваа ‘‘ид̣̇аани мама бхад̇д̇амуулам̣ аахариссаамий’’д̇и б̣аараан̣асим̣ г̇анд̇ваа рааж̇аанам̣ алан̇гад̇анаг̇арам̣ бад̣̇агкин̣ам̣ гаронд̇амзва д̣̇исваа згасмим̣ уннад̇аббад̣̇зсз тид̇о хад̇т̇ам̣ басаарзд̇ваа ж̇аяаабзси. ат̇а нам̣ рааж̇аа анологзд̇ваава ад̇иггами. б̣раахман̣о д̇зна ад̣̇идтабхаавам̣ н̃ад̇ваа гат̇ам̣ самудтаабзнд̇о батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente bodhisatto tassa putto juṇhakumāro nāma hutvā takkasilāyaṃ sippaṃ uggahetvā ācariyassa anuyogaṃ datvā rattibhāge andhakāre ācariyassa gharā nikkhamitvā attano nivāsaṭṭhānaṃ vegena gacchanto aññataraṃ brāhmaṇaṃ bhikkhaṃ caritvā attano nivāsaṭṭhānaṃ gacchantaṃ apassanto bāhunā paharitvā tassa bhattapātiṃ bhindiṃ, brāhmaṇo patitvā viravi. Kumāro kāruññena nivattitvā taṃ hatthe gahetvā uṭṭhāpesi. Brāhmaṇo ‘‘tayā, tāta, mama bhikkhābhājanaṃ bhinnaṃ, bhattamūlaṃ me dehī’’ti āha. Kumāro ‘‘brāhmaṇa, na dānāhaṃ tava bhattamūlaṃ dātuṃ sakkomi, ahaṃ kho pana kāsikarañño putto juṇhakumāro nāma, mayi rajje patiṭṭhite āgantvā maṃ dhanaṃ yāceyyāsī’’ti vatvā niṭṭhitasippo ācariyaṃ vanditvā bārāṇasiṃ gantvā pitu sippaṃ dassesi. Pitā ‘‘jīvantena me putto diṭṭho, rājabhūtampi naṃ passissāmī’’ti rajje abhisiñci. So juṇharājā nāma hutvā dhammena rajjaṃ kāresi. Brāhmaṇo taṃ pavattiṃ sutvā ‘‘idāni mama bhattamūlaṃ āharissāmī’’ti bārāṇasiṃ gantvā rājānaṃ alaṅkatanagaraṃ padakkhiṇaṃ karontameva disvā ekasmiṃ unnatappadese ṭhito hatthaṃ pasāretvā jayāpesi. Atha naṃ rājā anoloketvāva atikkami. Brāhmaṇo tena adiṭṭhabhāvaṃ ñatvā kathaṃ samuṭṭhāpento paṭhamaṃ gāthamāha –
13.
13.
‘‘сун̣охи маяхам̣ важанам̣ ж̇анинд̣̇а, ад̇т̇зна ж̇ун̣хамхи ид̇хаанубад̇д̇о;
‘‘Suṇohi mayhaṃ vacanaṃ janinda, atthena juṇhamhi idhānupatto;
на б̣раахман̣з ад̣̇д̇хигз д̇идтамаанз, г̇анд̇аб̣б̣амааху д̣̇вибад̣̇инд̣̇а сздтаа’’д̇и.
Na brāhmaṇe addhike tiṭṭhamāne, gantabbamāhu dvipadinda seṭṭhā’’ti.
д̇ад̇т̇а ж̇ун̣хамхийд̇и махаарааж̇а, д̇аяи ж̇ун̣хамхи ахам̣ згзна ад̇т̇зна ид̇хаануббад̇д̇о, на ниггааран̣аа ид̇хааг̇ад̇омхийд̇и д̣̇ийбзд̇и. ад̣̇д̇хигзд̇и ад̣̇д̇хаанам̣ ааг̇ад̇з. г̇анд̇аб̣б̣анд̇и д̇ам̣ ад̣̇д̇хигам̣ ад̣̇д̇хаанамааг̇ад̇ам̣ яаажамаанам̣ б̣раахман̣ам̣ анологзд̇ваава г̇анд̇аб̣б̣анд̇и бан̣д̣ид̇аа на ааху на гат̇знд̇ийд̇и.
Tattha juṇhamhīti mahārāja, tayi juṇhamhi ahaṃ ekena atthena idhānuppatto, na nikkāraṇā idhāgatomhīti dīpeti. Addhiketi addhānaṃ āgate. Gantabbanti taṃ addhikaṃ addhānamāgataṃ yācamānaṃ brāhmaṇaṃ anoloketvāva gantabbanti paṇḍitā na āhu na kathentīti.
рааж̇аа д̇асса важанам̣ суд̇ваа хад̇т̇им̣ важ̇иран̇гусзна ниг̇г̇ахзд̇ваа д̣̇уд̇ияам̣ г̇аат̇амааха –
Rājā tassa vacanaṃ sutvā hatthiṃ vajiraṅkusena niggahetvā dutiyaṃ gāthamāha –
14.
14.
‘‘сун̣оми д̇идтаами вад̣̇зхи б̣рахмз, язнааси ад̇т̇зна ид̇хаанубад̇д̇о;
‘‘Suṇomi tiṭṭhāmi vadehi brahme, yenāsi atthena idhānupatto;
гам̣ ваа д̇вамад̇т̇ам̣ маяи бад̇т̇аяаано, ид̇хааг̇амо б̣рахмз д̇ад̣̇ин̇гха б̣руухий’’д̇и.
Kaṃ vā tvamatthaṃ mayi patthayāno, idhāgamo brahme tadiṅgha brūhī’’ti.
д̇ад̇т̇а ин̇гхаад̇и жод̣̇анад̇т̇з нибаад̇о.
Tattha iṅghāti codanatthe nipāto.
д̇ад̇о барам̣ б̣раахман̣асса жа ран̃н̃о жа важанабадиважанавасзна сзсаг̇аат̇аа гат̇ид̇аа –
Tato paraṃ brāhmaṇassa ca rañño ca vacanapaṭivacanavasena sesagāthā kathitā –
15.
15.
‘‘д̣̇ад̣̇аахи мз г̇аамавараани бан̃жа, д̣̇аасийсад̇ам̣ сад̇д̇а г̇авам̣сад̇аани;
‘‘Dadāhi me gāmavarāni pañca, dāsīsataṃ satta gavaṃsatāni;
баросахассан̃жа суван̣н̣анигкз, бхарияаа жа мз саад̣̇исий д̣̇вз д̣̇ад̣̇аахи.
Parosahassañca suvaṇṇanikkhe, bhariyā ca me sādisī dve dadāhi.
16.
16.
‘‘д̇або ну д̇з б̣раахман̣а бхим̣саруубо, манд̇аа ну д̇з б̣раахман̣а жид̇д̇аруубаа;
‘‘Tapo nu te brāhmaṇa bhiṃsarūpo, mantā nu te brāhmaṇa cittarūpā;
яагкаа ну д̇з ассаваа санд̇и гзжи, ад̇т̇ам̣ ваа мз абхиж̇аанааси гад̇д̇ам̣.
Yakkhā nu te assavā santi keci, atthaṃ vā me abhijānāsi kattaṃ.
17.
17.
‘‘на мз д̇або ад̇т̇и на жааби манд̇аа, яагкааби мз ассаваа над̇т̇и гзжи;
‘‘Na me tapo atthi na cāpi mantā, yakkhāpi me assavā natthi keci;
ад̇т̇амби д̇з наабхиж̇аанаами гад̇д̇ам̣, буб̣б̣з жа ко сан̇г̇ад̇имад̇д̇амааси.
Atthampi te nābhijānāmi kattaṃ, pubbe ca kho saṅgatimattamāsi.
18.
18.
‘‘батамам̣ ид̣̇ам̣ д̣̇ассанам̣ ж̇аанад̇о мз, на д̇аабхиж̇аанаами ид̇о бурад̇т̇аа;
‘‘Paṭhamaṃ idaṃ dassanaṃ jānato me, na tābhijānāmi ito puratthā;
агкаахи мз бужчид̇о зд̇амад̇т̇ам̣, гад̣̇аа гухим̣ ваа аху сан̇г̇амо но.
Akkhāhi me pucchito etamatthaṃ, kadā kuhiṃ vā ahu saṅgamo no.
19.
19.
‘‘г̇анд̇хаарарааж̇асса бурамхи раммз, авасимхасз д̇аггасийлааяам̣ д̣̇зва;
‘‘Gandhārarājassa puramhi ramme, avasimhase takkasīlāyaṃ deva;
д̇ад̇т̇анд̇хагаарамхи д̇имийсигааяам̣, ам̣сзна ам̣сам̣ самагхаддаяимха.
Tatthandhakāramhi timīsikāyaṃ, aṃsena aṃsaṃ samaghaṭṭayimha.
20.
20.
‘‘д̇з д̇ад̇т̇а тад̇ваана убхо ж̇анинд̣̇а, саараан̣ияам̣ вийд̇исаараяимха д̇ад̇т̇а;
‘‘Te tattha ṭhatvāna ubho janinda, sārāṇiyaṃ vītisārayimha tattha;
сааязва но сан̇г̇ад̇имад̇д̇амааси, д̇ад̇о на бажчаа на бурз ахоси.
Sāyeva no saṅgatimattamāsi, tato na pacchā na pure ahosi.
21.
21.
‘‘яад̣̇аа гад̣̇аажи мануж̇зсу б̣рахмз, самааг̇амо саббурисзна ход̇и;
‘‘Yadā kadāci manujesu brahme, samāgamo sappurisena hoti;
на бан̣д̣ид̇аа сан̇г̇ад̇исант̇аваани, буб̣б̣з гад̇ам̣ вааби винаасаяанд̇и.
Na paṇḍitā saṅgatisanthavāni, pubbe kataṃ vāpi vināsayanti.
22.
22.
‘‘б̣аалаава ко сан̇г̇ад̇исант̇аваани, буб̣б̣з гад̇ам̣ вааби винаасаяанд̇и;
‘‘Bālāva kho saṅgatisanthavāni, pubbe kataṃ vāpi vināsayanti;
б̣ахумби б̣аалзсу гад̇ам̣ винассад̇и, д̇ат̇аа хи б̣аалаа агад̇ан̃н̃уруубаа.
Bahumpi bālesu kataṃ vinassati, tathā hi bālā akataññurūpā.
23.
23.
‘‘д̇хийраа жа ко сан̇г̇ад̇исант̇аваани, буб̣б̣з гад̇ам̣ вааби на наасаяанд̇и;
‘‘Dhīrā ca kho saṅgatisanthavāni, pubbe kataṃ vāpi na nāsayanti;
аббамби д̇хийрзсу гад̇ам̣ на нассад̇и, д̇ат̇аа хи д̇хийраа сугад̇ан̃н̃уруубаа.
Appampi dhīresu kataṃ na nassati, tathā hi dhīrā sukataññurūpā.
24.
24.
‘‘д̣̇ад̣̇аами д̇з г̇аамавараани бан̃жа, д̣̇аасийсад̇ам̣ сад̇д̇а г̇авам̣сад̇аани;
‘‘Dadāmi te gāmavarāni pañca, dāsīsataṃ satta gavaṃsatāni;
баросахассан̃жа суван̣н̣анигкз, бхарияаа жа д̇з саад̣̇исий д̣̇вз д̣̇ад̣̇аами.
Parosahassañca suvaṇṇanikkhe, bhariyā ca te sādisī dve dadāmi.
25.
25.
‘‘звам̣ сад̇ам̣ ход̇и самзжжа рааж̇а, нагкад̇д̇арааж̇аарива д̇аарагаанам̣;
‘‘Evaṃ sataṃ hoti samecca rāja, nakkhattarājāriva tārakānaṃ;
аабуурад̇ий гаасибад̇ий д̇ат̇аахам̣, д̇аяааби мз сан̇г̇амо аж̇ж̇а лад̣̇д̇хо’’д̇и.
Āpūratī kāsipatī tathāhaṃ, tayāpi me saṅgamo ajja laddho’’ti.
д̇ад̇т̇а саад̣̇исийд̇и руубаван̣н̣аж̇аад̇игулабад̣̇зсзна маяаа саад̣̇исий згасад̣̇исаа д̣̇вз махааяасаа бхарияаа жа мз д̣̇зхийд̇и ад̇т̇о. бхим̣саруубод̇и гим̣ ну д̇з б̣раахман̣а б̣алаваруубасийлаажаараг̇ун̣асан̇каад̇ам̣ д̇абогаммам̣ ад̇т̇ийд̇и бужчад̇и. манд̇аа ну д̇зд̇и уд̣̇ааху вижид̇раруубаа саб̣б̣ад̇т̇асаад̇хагаа манд̇аа д̇з ад̇т̇и. ассаваад̇и важанагаарагаа ижчид̇ижчид̇ад̣̇ааяагаа яагкаа ваа д̇з гзжи санд̇и. гад̇д̇анд̇и гад̇ам̣, уд̣̇ааху д̇аяаа гад̇ам̣ гин̃жи мама ад̇т̇ам̣ абхиж̇аанаасийд̇и бужчад̇и. сан̇г̇ад̇имад̇д̇анд̇и самааг̇амамад̇д̇ам̣ д̇аяаа сад̣̇д̇хим̣ буб̣б̣з мама аасийд̇и вад̣̇ад̇и. ж̇аанад̇о мзд̇и ж̇аананд̇асса мама ид̣̇ам̣ батамам̣ д̇ава д̣̇ассанам̣. на д̇аабхиж̇аанаамийд̇и на д̇ам̣ абхиж̇аанаами. д̇имийсигааяанд̇и б̣ахалад̇имирааяам̣ рад̇д̇ияам̣. д̇з д̇ад̇т̇а тад̇ваанаад̇и д̇з маяам̣ д̇асмим̣ ам̣сзна ам̣сам̣ гхаддид̇адтаанз тад̇ваа вийд̇исаараяимха д̇ад̇т̇аад̇и д̇асмим̣язва таанз сарид̇аб̣б̣аяуд̇д̇агам̣ гат̇ам̣ вийд̇исаараяимха, ахам̣ ‘‘бхигкаабхааж̇анам̣ мз д̇аяаа бхиннам̣, бхад̇д̇амуулам̣ мз д̣̇зхий’’д̇и аважам̣, д̇вам̣ ‘‘ид̣̇аанаахам̣ д̇ава бхад̇д̇амуулам̣ д̣̇аад̇ум̣ на саггоми, ахам̣ ко бана гаасигаран̃н̃о буд̇д̇о ж̇ун̣хагумааро наама, маяи раж̇ж̇з бад̇идтид̇з ааг̇анд̇ваа мам̣ д̇ханам̣ яаажзяяаасий’’д̇и аважаад̇и имам̣ сааран̣ийяагат̇ам̣ гаримхаад̇и ааха. сааязва но сан̇г̇ад̇имад̇д̇амаасийд̇и д̣̇зва, амхаагам̣ сааязва ан̃н̃аман̃н̃ам̣ сан̇г̇ад̇имад̇д̇амааси, згамухуд̇д̇игамахосийд̇и д̣̇ийбзд̇и. д̇ад̇од̇и д̇ад̇о бана д̇ам̣мухуд̇д̇игамид̇д̇ад̇хаммад̇о бажчаа ваа бурз ваа гад̣̇аажи амхаагам̣ сан̇г̇ад̇и наама на бхууд̇абуб̣б̣аа.
Tattha sādisīti rūpavaṇṇajātikulapadesena mayā sādisī ekasadisā dve mahāyasā bhariyā ca me dehīti attho. Bhiṃsarūpoti kiṃ nu te brāhmaṇa balavarūpasīlācāraguṇasaṅkhātaṃ tapokammaṃ atthīti pucchati. Mantā nu teti udāhu vicitrarūpā sabbatthasādhakā mantā te atthi. Assavāti vacanakārakā icchiticchitadāyakā yakkhā vā te keci santi. Kattanti kataṃ, udāhu tayā kataṃ kiñci mama atthaṃ abhijānāsīti pucchati. Saṅgatimattanti samāgamamattaṃ tayā saddhiṃ pubbe mama āsīti vadati. Jānato meti jānantassa mama idaṃ paṭhamaṃ tava dassanaṃ. Na tābhijānāmīti na taṃ abhijānāmi. Timīsikāyanti bahalatimirāyaṃ rattiyaṃ. Te tattha ṭhatvānāti te mayaṃ tasmiṃ aṃsena aṃsaṃ ghaṭṭitaṭṭhāne ṭhatvā vītisārayimha tatthāti tasmiṃyeva ṭhāne saritabbayuttakaṃ kathaṃ vītisārayimha, ahaṃ ‘‘bhikkhābhājanaṃ me tayā bhinnaṃ, bhattamūlaṃ me dehī’’ti avacaṃ, tvaṃ ‘‘idānāhaṃ tava bhattamūlaṃ dātuṃ na sakkomi, ahaṃ kho pana kāsikarañño putto juṇhakumāro nāma, mayi rajje patiṭṭhite āgantvā maṃ dhanaṃ yāceyyāsī’’ti avacāti imaṃ sāraṇīyakathaṃ karimhāti āha. Sāyeva no saṅgatimattamāsīti deva, amhākaṃ sāyeva aññamaññaṃ saṅgatimattamāsi, ekamuhuttikamahosīti dīpeti. Tatoti tato pana taṃmuhuttikamittadhammato pacchā vā pure vā kadāci amhākaṃ saṅgati nāma na bhūtapubbā.
на бан̣д̣ид̇аад̇и б̣раахман̣а бан̣д̣ид̇аа наама д̇ам̣мухуд̇д̇игам̣ сан̇г̇ад̇им̣ ваа жирагааласант̇аваани ваа яам̣ гин̃жи буб̣б̣з гад̇аг̇ун̣ам̣ ваа на наасзнд̇и. б̣ахумбийд̇и б̣ахугамби . агад̇ан̃н̃уруубаад̇и яасмаа б̣аалаа агад̇ан̃н̃усабхааваа, д̇асмаа д̇зсу б̣ахумби гад̇ам̣ нассад̇ийд̇и ад̇т̇о. сугад̇ан̃н̃уруубаад̇и судту гад̇ан̃н̃усабхааваа. зд̇т̇ааби д̇ад̇т̇ааби д̇ат̇аа хийд̇и хи-гааро гааран̣ад̇т̇о. д̣̇ад̣̇аами д̇зд̇и б̣раахман̣зна яаажид̇аяаажид̇ам̣ д̣̇ад̣̇анд̇о звамааха. звам̣ сад̇анд̇и б̣раахман̣о ран̃н̃о анумод̣̇анам̣ гаронд̇о вад̣̇ад̇и, сад̇ам̣ саббурисаанам̣ згаваарамби самзжжа сан̇г̇ад̇и наама звам̣ ход̇и. нагкад̇д̇арааж̇аариваад̇и зд̇т̇а ра-гааро нибаад̇амад̇д̇ам̣. д̇аарагаананд̇и д̇аарагаг̇ан̣амаж̇жхз. гаасибад̇ийд̇и рааж̇аанамаалабад̇и. ид̣̇ам̣ вуд̇д̇ам̣ ход̇и – ‘‘д̣̇зва, гаасирадтаад̇хибад̇и яат̇аа жанд̣̇о д̇аарагаанам̣ маж̇жхз тид̇о д̇аарагаг̇ан̣абаривуд̇о баадибад̣̇ад̇о бадтааяа яаава бун̣н̣амаа аабуурад̇и, д̇ат̇аа ахамби аж̇ж̇а д̇аяаа д̣̇иннзхи г̇аамавараад̣̇ийхи аабуураамий’’д̇и. д̇аяааби мзд̇и маяаа буб̣б̣з д̇аяаа сад̣̇д̇хим̣ лад̣̇д̇хоби сан̇г̇амо алад̣̇д̇хова, аж̇ж̇а бана мама манорат̇асса нибпаннад̇д̇аа маяаа д̇аяаа саха сан̇г̇амо лад̣̇д̇хо наамаад̇и нибпаннам̣ мз д̇аяаа сад̣̇д̇хим̣ мид̇д̇апаланд̇и вад̣̇ад̇и. б̣од̇хисад̇д̇о д̇асса маханд̇ам̣ яасам̣ ад̣̇ааси.
Na paṇḍitāti brāhmaṇa paṇḍitā nāma taṃmuhuttikaṃ saṅgatiṃ vā cirakālasanthavāni vā yaṃ kiñci pubbe kataguṇaṃ vā na nāsenti. Bahumpīti bahukampi . Akataññurūpāti yasmā bālā akataññusabhāvā, tasmā tesu bahumpi kataṃ nassatīti attho. Sukataññurūpāti suṭṭhu kataññusabhāvā. Etthāpi tatthāpi tathā hīti hi-kāro kāraṇattho. Dadāmi teti brāhmaṇena yācitayācitaṃ dadanto evamāha. Evaṃ satanti brāhmaṇo rañño anumodanaṃ karonto vadati, sataṃ sappurisānaṃ ekavārampi samecca saṅgati nāma evaṃ hoti. Nakkhattarājārivāti ettha ra-kāro nipātamattaṃ. Tārakānanti tārakagaṇamajjhe. Kāsipatīti rājānamālapati. Idaṃ vuttaṃ hoti – ‘‘deva, kāsiraṭṭhādhipati yathā cando tārakānaṃ majjhe ṭhito tārakagaṇaparivuto pāṭipadato paṭṭhāya yāva puṇṇamā āpūrati, tathā ahampi ajja tayā dinnehi gāmavarādīhi āpūrāmī’’ti. Tayāpi meti mayā pubbe tayā saddhiṃ laddhopi saṅgamo aladdhova, ajja pana mama manorathassa nipphannattā mayā tayā saha saṅgamo laddho nāmāti nipphannaṃ me tayā saddhiṃ mittaphalanti vadati. Bodhisatto tassa mahantaṃ yasaṃ adāsi.
сад̇т̇аа имам̣ д̇хаммад̣̇зсанам̣ аахарид̇ваа ‘‘на, бхигкавз, ид̣̇аанзва, буб̣б̣збаахам̣ аананд̣̇ам̣ варзна санд̇аббзсим̣ язваа’’д̇и вад̇ваа ж̇аад̇агам̣ самод̇хаанзси – ‘‘д̇ад̣̇аа б̣раахман̣о аананд̣̇о ахоси, рааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā ‘‘na, bhikkhave, idāneva, pubbepāhaṃ ānandaṃ varena santappesiṃ yevā’’ti vatvā jātakaṃ samodhānesi – ‘‘tadā brāhmaṇo ānando ahosi, rājā pana ahameva ahosi’’nti.
ж̇ун̣хаж̇аад̇агаван̣н̣анаа д̣̇уд̇ияаа.
Juṇhajātakavaṇṇanā dutiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 456. ж̇ун̣хаж̇аад̇агам̣ • 456. Juṇhajātakaṃ
