| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
11. கலஹவிவாத³ஸுத்தவண்ணனா
11. Kalahavivādasuttavaṇṇanā
869. குதோ பஹூதா கலஹா விவாதா³தி கலஹவிவாத³ஸுத்தங். கா உப்பத்தி? இத³ம்பி தஸ்மிங்யேவ மஹாஸமயே ‘‘குதோ நு, கோ², கலஹாத³யோ அட்ட² த⁴ம்மா பவத்தந்தீ’’தி உப்பன்னசித்தானங் ஏகச்சானங் தே³வதானங் தே த⁴ம்மே ஆவிகாதுங் புரிமனயேனேவ நிம்மிதபு³த்³தே⁴ன அத்தானங் புச்சா²பெத்வா வுத்தங் தத்த² புச்சா²விஸ்ஸஜ்ஜனக்கமேன டி²தத்தா ஸப்³ப³கா³தா² பாகடஸம்ப³ந்தா⁴யேவ.
869.Kutopahūtā kalahā vivādāti kalahavivādasuttaṃ. Kā uppatti? Idampi tasmiṃyeva mahāsamaye ‘‘kuto nu, kho, kalahādayo aṭṭha dhammā pavattantī’’ti uppannacittānaṃ ekaccānaṃ devatānaṃ te dhamme āvikātuṃ purimanayeneva nimmitabuddhena attānaṃ pucchāpetvā vuttaṃ tattha pucchāvissajjanakkamena ṭhitattā sabbagāthā pākaṭasambandhāyeva.
அனுத்தானபத³வண்ணனா பனேதாஸங் ஏவங் வேதி³தப்³பா³ – குதோபஹூதா கலஹா விவாதா³தி கலஹோ ச தஸ்ஸ புப்³ப³பா⁴கோ³ விவாதோ³ சாதி இமே குதோ ஜாதா. பரிதே³வஸோகா ஸஹமச்ச²ரா சாதி பரிதே³வஸோகா ச மச்ச²ரா ச குதோபஹூதா. மானாதிமானா ஸஹபேஸுணா சாதி மானா ச அதிமானா ச பேஸுணா ச குதோபஹூதா. தேதி தே ஸப்³பே³பி அட்ட² கிலேஸத⁴ம்மா. ததி³ங்க⁴ ப்³ரூஹீதி தங் மயா புச்சி²தமத்த²ங் ப்³ரூஹி யாசாமி தங் அஹந்தி. யாசனத்தோ² ஹி இங்கா⁴தி நிபாதோ.
Anuttānapadavaṇṇanā panetāsaṃ evaṃ veditabbā – kutopahūtā kalahā vivādāti kalaho ca tassa pubbabhāgo vivādo cāti ime kuto jātā. Paridevasokā sahamaccharā cāti paridevasokā ca maccharā ca kutopahūtā. Mānātimānā sahapesuṇā cāti mānā ca atimānā ca pesuṇā ca kutopahūtā. Teti te sabbepi aṭṭha kilesadhammā. Tadiṅgha brūhīti taṃ mayā pucchitamatthaṃ brūhi yācāmi taṃ ahanti. Yācanattho hi iṅghāti nipāto.
870. பியப்பஹூதாதி பியவத்து²தோ ஜாதா. யுத்தி பனெத்த² நித்³தே³ஸே (மஹானி॰ 98) வுத்தா ஏவ. மச்சே²ரயுத்தா கலஹா விவாதா³தி இமினா கலஹவிவாதா³தீ³னங் ந கேவலங் பியவத்து²மேவ, மச்ச²ரியம்பி பச்சயங் த³ஸ்ஸேதி. கலஹவிவாத³ஸீஸேன செத்த² ஸப்³பே³பி தே த⁴ம்மா வுத்தாதி வேதி³தப்³பா³. யதா² ச ஏதேஸங் மச்ச²ரியங், ததா² பேஸுணானஞ்ச விவாத³ங். தேனாஹ – ‘‘விவாத³ஜாதேஸு ச பேஸுணானீ’’தி.
870.Piyappahūtāti piyavatthuto jātā. Yutti panettha niddese (mahāni. 98) vuttā eva. Maccherayuttā kalahā vivādāti iminā kalahavivādādīnaṃ na kevalaṃ piyavatthumeva, macchariyampi paccayaṃ dasseti. Kalahavivādasīsena cettha sabbepi te dhammā vuttāti veditabbā. Yathā ca etesaṃ macchariyaṃ, tathā pesuṇānañca vivādaṃ. Tenāha – ‘‘vivādajātesu ca pesuṇānī’’ti.
871. பியாஸு லோகஸ்மிங் குதோனிதா³னா யே சாபி லோபா⁴ விசரந்தி லோகேதி ‘‘பியா பஹூதா கலஹா’’தி யே எத்த² வுத்தா. தே பியா லோகஸ்மிங் குதோனிதா³னா, ந கேவலஞ்ச பியா, யே சாபி க²த்தியாத³யோ லோபா⁴ விசரந்தி லோப⁴ஹேதுகா லோபே⁴னாபி⁴பூ⁴தா விசரந்தி, தேஸங் ஸோ லோபோ⁴ ச குதோனிதா³னோதி த்³வே அத்தே² ஏகாய புச்சா²ய புச்ச²தி. ஆஸா ச நிட்டா² சாதி ஆஸா ச தஸ்ஸா ஆஸாய ஸமித்³தி⁴ ச. யே ஸம்பராயாய நரஸ்ஸ ஹொந்தீதி யே நரஸ்ஸ ஸம்பராயாய ஹொந்தி, பராயனா ஹொந்தீதி வுத்தங் ஹோதி. ஏகா ஏவாயம்பி புச்சா².
871.Piyāsu lokasmiṃ kutonidānā ye cāpi lobhā vicaranti loketi ‘‘piyā pahūtā kalahā’’ti ye ettha vuttā. Te piyā lokasmiṃ kutonidānā, na kevalañca piyā, ye cāpi khattiyādayo lobhā vicaranti lobhahetukā lobhenābhibhūtā vicaranti, tesaṃ so lobho ca kutonidānoti dve atthe ekāya pucchāya pucchati. Āsā ca niṭṭhā cāti āsā ca tassā āsāya samiddhi ca. Ye samparāyāya narassa hontīti ye narassa samparāyāya honti, parāyanā hontīti vuttaṃ hoti. Ekā evāyampi pucchā.
872. ச²ந்தா³னிதா³னானீதி காமச்ச²ந்தா³தி³ச²ந்த³னிதா³னானி. யே சாபி லோபா⁴ விசரந்தீதி யே சாபி க²த்தியாத³யோ லோபா⁴ விசரந்தி தேஸங் லோபோ⁴பி ச²ந்த³னிதா³னோதி த்³வேபி அத்தே² ஏகதோ விஸ்ஸஜ்ஜேதி. இதோனிதா³னாதி ச²ந்த³னிதா³னா ஏவாதி வுத்தங் ஹோதி. ‘‘குதோனிதா³னா குதோனிதா³னா’’தி (ஸு॰ நி॰ 273) ஏதேஸு ச ஸத்³த³ஸித்³தி⁴ ஸூசிலோமஸுத்தே வுத்தனயேனேவ வேதி³தப்³பா³.
872.Chandānidānānīti kāmacchandādichandanidānāni. Ye cāpi lobhā vicarantīti ye cāpi khattiyādayo lobhā vicaranti tesaṃ lobhopi chandanidānoti dvepi atthe ekato vissajjeti. Itonidānāti chandanidānā evāti vuttaṃ hoti. ‘‘Kutonidānā kutonidānā’’ti (su. ni. 273) etesu ca saddasiddhi sūcilomasutte vuttanayeneva veditabbā.
873. வினிச்ச²யாதி தண்ஹாதி³ட்டி²வினிச்ச²யா. யே வாபி த⁴ம்மா ஸமணேன வுத்தாதி யே ச அஞ்ஞேபி கோதா⁴தீ³ஹி ஸம்பயுத்தா, ததா²ரூபா வா அகுஸலா த⁴ம்மா பு³த்³த⁴ஸமணேன வுத்தா, தே குதோபஹூதாதி.
873.Vinicchayāti taṇhādiṭṭhivinicchayā. Ye vāpi dhammā samaṇena vuttāti ye ca aññepi kodhādīhi sampayuttā, tathārūpā vā akusalā dhammā buddhasamaṇena vuttā, te kutopahūtāti.
874. தமூபனிஸ்ஸாய பஹோதி ச²ந்தோ³தி தங் ஸுக²து³க்க²வேத³னங். தது³ப⁴யவத்து²ஸங்கா²தங் ஸாதாஸாதங் உபனிஸ்ஸாய ஸங்யோக³வியோக³பத்த²னாவஸேன ச²ந்தோ³ பஹோதி. எத்தாவதா ‘‘ச²ந்தோ³ நு லோகஸ்மிங் குதோனிதா³னோ’’தி அயங் பஞ்ஹோ விஸ்ஸஜ்ஜிதோ ஹோதி. ரூபேஸு தி³ஸ்வா விப⁴வங் ப⁴வஞ்சாதி ரூபேஸு வயஞ்ச உப்பாத³ஞ்ச தி³ஸ்வா. வினிச்ச²யங் குப்³ப³தி ஜந்து லோகேதி அபாயாதி³கே லோகே அயங் ஜந்து போ⁴கா³தி⁴க³மனத்த²ங் தண்ஹாவினிச்ச²யங் ‘‘அத்தா மே உப்பன்னோ’’திஆதி³னா நயேன தி³ட்டி²வினிச்ச²யஞ்ச குருதே. யுத்தி பனெத்த² நித்³தே³ஸே (மஹானி॰ 102) வுத்தா ஏவ. எத்தாவதா ‘‘வினிச்ச²யா சாபி குதோபஹூதா’’தி அயங் பஞ்ஹோ விஸ்ஸஜ்ஜிதோ ஹோதி.
874.Tamūpanissāya pahoti chandoti taṃ sukhadukkhavedanaṃ. Tadubhayavatthusaṅkhātaṃ sātāsātaṃ upanissāya saṃyogaviyogapatthanāvasena chando pahoti. Ettāvatā ‘‘chando nu lokasmiṃ kutonidāno’’ti ayaṃ pañho vissajjito hoti. Rūpesu disvā vibhavaṃ bhavañcāti rūpesu vayañca uppādañca disvā. Vinicchayaṃ kubbati jantu loketi apāyādike loke ayaṃ jantu bhogādhigamanatthaṃ taṇhāvinicchayaṃ ‘‘attā me uppanno’’tiādinā nayena diṭṭhivinicchayañca kurute. Yutti panettha niddese (mahāni. 102) vuttā eva. Ettāvatā ‘‘vinicchayā cāpi kutopahūtā’’ti ayaṃ pañho vissajjito hoti.
875. ஏதேபி த⁴ம்மா த்³வயமேவ ஸந்தேதி ஏதேபி கோதா⁴த³யோ த⁴ம்மா ஸாதாஸாதத்³வயே ஸந்தே ஏவ பஹொந்தி உப்பஜ்ஜந்தி. உப்பத்தி ச நேஸங் நித்³தே³ஸே (மஹானி॰ 103) வுத்தாயேவ. எத்தாவதா ததியபஞ்ஹோபி விஸ்ஸஜ்ஜிதோ ஹோதி. இதா³னி யோ ஏவங் விஸ்ஸஜ்ஜிதேஸு ஏதேஸு பஞ்ஹேஸு கத²ங்கதீ² ப⁴வெய்ய, தஸ்ஸ கத²ங்கதா²பஹானூபாயங் த³ஸ்ஸெந்தோ ஆஹ – ‘‘கத²ங்கதீ² ஞாணபதா²ய ஸிக்கே²’’தி, ஞாணத³ஸ்ஸனஞாணாதி⁴க³மனத்த²ங் திஸ்ஸோ ஸிக்கா² ஸிக்கெ²ய்யாதி வுத்தங் ஹோதி. கிங் காரணங்? ஞத்வா பவுத்தா ஸமணேன த⁴ம்மா. பு³த்³த⁴ஸமணேன ஹி ஞத்வாவ த⁴ம்மா வுத்தா, நத்தி² தஸ்ஸ த⁴ம்மேஸு அஞ்ஞாணங். அத்தனோ பன ஞாணாபா⁴வேன தே அஜானந்தோ ந ஜானெய்ய, ந தே³ஸனா தோ³ஸேன, தஸ்மா கத²ங்கதீ² ஞாணபதா²ய ஸிக்கே², ஞத்வா பவுத்தா ஸமணேன த⁴ம்மாதி.
875.Etepi dhammā dvayameva santeti etepi kodhādayo dhammā sātāsātadvaye sante eva pahonti uppajjanti. Uppatti ca nesaṃ niddese (mahāni. 103) vuttāyeva. Ettāvatā tatiyapañhopi vissajjito hoti. Idāni yo evaṃ vissajjitesu etesu pañhesu kathaṃkathī bhaveyya, tassa kathaṃkathāpahānūpāyaṃ dassento āha – ‘‘kathaṃkathī ñāṇapathāya sikkhe’’ti, ñāṇadassanañāṇādhigamanatthaṃ tisso sikkhā sikkheyyāti vuttaṃ hoti. Kiṃ kāraṇaṃ? Ñatvā pavuttā samaṇena dhammā. Buddhasamaṇena hi ñatvāva dhammā vuttā, natthi tassa dhammesu aññāṇaṃ. Attano pana ñāṇābhāvena te ajānanto na jāneyya, na desanā dosena, tasmā kathaṃkathī ñāṇapathāya sikkhe, ñatvā pavuttā samaṇena dhammāti.
876-7. ஸாதங் அஸாதஞ்ச குதோனிதா³னாதி எத்த² ஸாதங் அஸாதந்தி ஸுக²து³க்க²வேத³னா ஏவ அதி⁴ப்பேதா. ந ப⁴வந்தி ஹேதேதி ந ப⁴வந்தி ஏதே. விப⁴வங் ப⁴வஞ்சாபி யமேதமத்த²ங் ஏதங் மே பப்³ரூஹி யதோனிதா³னந்தி ஸாதாஸாதானங் விப⁴வங் ப⁴வஞ்ச ஏதம்பி யங் அத்த²ங். லிங்க³ப்³யத்தயோ எத்த² கதோ. இத³ங் பன வுத்தங் ஹோதி – ஸாதாஸாதானங் விப⁴வோ ப⁴வோ சாதி யோ ஏஸ அத்தோ², ஏவங் மே பப்³ரூஹி யதோனிதா³னந்தி. எத்த² ச ஸாதாஸாதானங் விப⁴வப⁴வவத்து²கா விப⁴வப⁴வதி³ட்டி²யோ ஏவ விப⁴வப⁴வாதி அத்த²தோ வேதி³தப்³பா³. ததா² ஹி இமஸ்ஸ பஞ்ஹஸ்ஸ விஸ்ஸஜ்ஜனபக்கே² ‘‘ப⁴வதி³ட்டி²பி ப²ஸ்ஸனிதா³னா, விப⁴வதி³ட்டி²பி ப²ஸ்ஸனிதா³னா’’தி நித்³தே³ஸே (மஹானி॰ 105) வுத்தங். இதோனிதா³னந்தி ப²ஸ்ஸனிதா³னங்.
876-7.Sātaṃasātañca kutonidānāti ettha sātaṃ asātanti sukhadukkhavedanā eva adhippetā. Na bhavanti heteti na bhavanti ete. Vibhavaṃ bhavañcāpi yametamatthaṃ etaṃ me pabrūhi yatonidānanti sātāsātānaṃ vibhavaṃ bhavañca etampi yaṃ atthaṃ. Liṅgabyattayo ettha kato. Idaṃ pana vuttaṃ hoti – sātāsātānaṃ vibhavo bhavo cāti yo esa attho, evaṃ me pabrūhi yatonidānanti. Ettha ca sātāsātānaṃ vibhavabhavavatthukā vibhavabhavadiṭṭhiyo eva vibhavabhavāti atthato veditabbā. Tathā hi imassa pañhassa vissajjanapakkhe ‘‘bhavadiṭṭhipi phassanidānā, vibhavadiṭṭhipi phassanidānā’’ti niddese (mahāni. 105) vuttaṃ. Itonidānanti phassanidānaṃ.
878. கிஸ்மிங் விபூ⁴தே ந பு²ஸந்தி ப²ஸ்ஸாதி கிஸ்மிங் வீதிவத்தே சக்கு²ஸம்ப²ஸ்ஸாத³யோ பஞ்ச ப²ஸ்ஸா ந பு²ஸந்தி.
878.Kismiṃ vibhūte na phusanti phassāti kismiṃ vītivatte cakkhusamphassādayo pañca phassā na phusanti.
879. நாமஞ்ச ரூபஞ்ச படிச்சாதி ஸம்பயுத்தகனாமங் வத்தா²ரம்மணரூபஞ்ச படிச்ச. ரூபே விபூ⁴தே ந பு²ஸந்தி ப²ஸ்ஸாதி ரூபே வீதிவத்தே பஞ்ச ப²ஸ்ஸா ந பு²ஸந்தி.
879.Nāmañca rūpañca paṭiccāti sampayuttakanāmaṃ vatthārammaṇarūpañca paṭicca. Rūpe vibhūte na phusanti phassāti rūpe vītivatte pañca phassā na phusanti.
880. கத²ங் ஸமேதஸ்ஸாதி கத²ங் படிபன்னஸ்ஸ. விபோ⁴தி ரூபந்தி ரூப விப⁴வதி, ந ப⁴வெய்ய வா. ஸுக²ங் து³க²ஞ்சாதி இட்டா²னிட்ட²ங் ரூபமேவ புச்ச²தி.
880.Kathaṃ sametassāti kathaṃ paṭipannassa. Vibhoti rūpanti rūpa vibhavati, na bhaveyya vā. Sukhaṃ dukhañcāti iṭṭhāniṭṭhaṃ rūpameva pucchati.
881. ந ஸஞ்ஞஸஞ்ஞீதி யதா² ஸமேதஸ்ஸ விபோ⁴தி ரூபங், ஸோ பகதிஸஞ்ஞாய ஸஞ்ஞீபி ந ஹோதி. ந விஸஞ்ஞஸஞ்ஞீதி விஸஞ்ஞாயபி விரூபாய ஸஞ்ஞாய ஸஞ்ஞீ ந ஹோதி உம்மத்தகோ வா கி²த்தசித்தோ வா. நோபி அஸஞ்ஞீதி ஸஞ்ஞாவிரஹிதோபி ந ஹோதி நிரோத⁴ஸமாபன்னோ வா அஸஞ்ஞஸத்தோ வா. ந விபூ⁴தஸஞ்ஞீதி ‘‘ஸப்³ப³ஸோ ரூபஸஞ்ஞான’’ந்திஆதி³னா (த⁴ ஸ॰ 265; விப⁴॰ 602) நயேன ஸமதிக்கந்தஸஞ்ஞீபி ந ஹோதி அரூபஜ்ஜா²னலாபீ⁴. ஏவங் ஸமேதஸ்ஸ விபோ⁴தி ரூபந்தி ஏதஸ்மிங் ஸஞ்ஞஸஞ்ஞிதாதி³பா⁴வே அட்ட²த்வா யதே³தங் வுத்தங் ‘‘ஸோ ஏவங் ஸமாஹிதே சித்தே…பே॰… ஆகாஸானஞ்சாயதனஸமாபத்திபடிலாப⁴த்தா²ய சித்தங் அபி⁴னீஹரதீ’’தி. ஏவங் ஸமேதஸ்ஸ அரூபமக்³க³ஸமங்கி³னோ விபோ⁴தி ரூபங். ஸஞ்ஞானிதா³னா ஹி பபஞ்சஸங்கா²தி ஏவங் படிபன்னஸ்ஸாபி யா ஸஞ்ஞா, தன்னிதா³னா தண்ஹாதி³ட்டி²பபஞ்சா அப்பஹீனா ஏவ ஹொந்தீதி த³ஸ்ஸேதி.
881.Na saññasaññīti yathā sametassa vibhoti rūpaṃ, so pakatisaññāya saññīpi na hoti. Na visaññasaññīti visaññāyapi virūpāya saññāya saññī na hoti ummattako vā khittacitto vā. Nopi asaññīti saññāvirahitopi na hoti nirodhasamāpanno vā asaññasatto vā. Na vibhūtasaññīti ‘‘sabbaso rūpasaññāna’’ntiādinā (dha sa. 265; vibha. 602) nayena samatikkantasaññīpi na hoti arūpajjhānalābhī. Evaṃ sametassa vibhoti rūpanti etasmiṃ saññasaññitādibhāve aṭṭhatvā yadetaṃ vuttaṃ ‘‘so evaṃ samāhite citte…pe… ākāsānañcāyatanasamāpattipaṭilābhatthāya cittaṃ abhinīharatī’’ti. Evaṃ sametassa arūpamaggasamaṅgino vibhoti rūpaṃ. Saññānidānā hi papañcasaṅkhāti evaṃ paṭipannassāpi yā saññā, tannidānā taṇhādiṭṭhipapañcā appahīnā eva hontīti dasseti.
882-3. எத்தாவதக்³க³ங் நு வத³ந்தி, ஹேகே யக்க²ஸ்ஸ ஸுத்³தி⁴ங் இத⁴ பண்டி³தாஸே. உதா³ஹு அஞ்ஞம்பி வத³ந்தி எத்தோதி எத்தாவதா நு இத⁴ பண்டி³தா ஸமணப்³ராஹ்மணா அக்³க³ங் ஸுத்³தி⁴ங் ஸத்தஸ்ஸ வத³ந்தி, உதா³ஹு அஞ்ஞம்பி எத்தோ அரூபஸமாபத்திதோ அதி⁴கங் வத³ந்தீதி புச்ச²தி. எத்தாவதக்³க³ம்பி வத³ந்தி ஹேகேதி ஏகே ஸஸ்ஸதவாதா³ ஸமணப்³ராஹ்மணா பண்டி³தமானினோ எத்தாவதாபி அக்³க³ங் ஸுத்³தி⁴ங் வத³ந்தி. தேஸங் பனேகே ஸமயங் வத³ந்தீதி தேஸங்யேவ ஏகே உச்சே²த³வாதா³ ஸமயங் உச்சே²த³ங் வத³ந்தி. அனுபாதி³ஸேஸே குஸலா வதா³னாதி அனுபாதி³ஸேஸே குஸலவாதா³ ஸமானா.
882-3.Ettāvataggaṃnu vadanti, heke yakkhassa suddhiṃ idha paṇḍitāse. Udāhu aññampi vadantiettoti ettāvatā nu idha paṇḍitā samaṇabrāhmaṇā aggaṃ suddhiṃ sattassa vadanti, udāhu aññampi etto arūpasamāpattito adhikaṃ vadantīti pucchati. Ettāvataggampi vadanti heketi eke sassatavādā samaṇabrāhmaṇā paṇḍitamānino ettāvatāpi aggaṃ suddhiṃ vadanti. Tesaṃ paneke samayaṃ vadantīti tesaṃyeva eke ucchedavādā samayaṃ ucchedaṃ vadanti. Anupādisese kusalā vadānāti anupādisese kusalavādā samānā.
884. ஏதே ச ஞத்வா உபனிஸ்ஸிதாதி ஏதே ச தி³ட்டி²க³திகே ஸஸ்ஸதுச்சே²த³தி³ட்டி²யோ நிஸ்ஸிதாதி ஞத்வா. ஞத்வா முனீ நிஸ்ஸயே ஸோ விமங்ஸீதி நிஸ்ஸயே ச ஞத்வா ஸோ வீமங்ஸீ பண்டி³தோ பு³த்³த⁴முனி. ஞத்வா விமுத்தோதி து³க்கா²னிச்சாதி³தோ த⁴ம்மே ஞத்வா விமுத்தோ. ப⁴வாப⁴வாய ந ஸமேதீதி புனப்புனங் உபபத்தியா ந ஸமாக³ச்ச²தீதி அரஹத்தனிகூடேன தே³ஸனங் நிட்டா²பேஸி. தே³ஸனாபரியோஸானே புராபே⁴த³ஸுத்தே வுத்தஸதி³ஸோயேவாபி⁴ஸமயோ அஹோஸீதி.
884.Eteca ñatvā upanissitāti ete ca diṭṭhigatike sassatucchedadiṭṭhiyo nissitāti ñatvā. Ñatvā munī nissaye so vimaṃsīti nissaye ca ñatvā so vīmaṃsī paṇḍito buddhamuni. Ñatvā vimuttoti dukkhāniccādito dhamme ñatvā vimutto. Bhavābhavāya na sametīti punappunaṃ upapattiyā na samāgacchatīti arahattanikūṭena desanaṃ niṭṭhāpesi. Desanāpariyosāne purābhedasutte vuttasadisoyevābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய கலஹவிவாத³ஸுத்தவண்ணனா நிட்டி²தா.
Suttanipāta-aṭṭhakathāya kalahavivādasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 11. கலஹவிவாத³ஸுத்தங் • 11. Kalahavivādasuttaṃ
