| Library / Tipiṭaka / д̇ибидага • Tipiṭaka / суд̇д̇анибаад̇а-адтагат̇аа • Suttanipāta-aṭṭhakathā |
11. галахавиваад̣̇асуд̇д̇аван̣н̣анаа
11. Kalahavivādasuttavaṇṇanā
869. гуд̇о бахууд̇аа галахаа виваад̣̇аад̇и галахавиваад̣̇асуд̇д̇ам̣. гаа уббад̇д̇и? ид̣̇амби д̇асмим̣язва махаасамаяз ‘‘гуд̇о ну, ко, галахаад̣̇аяо адта д̇хаммаа бавад̇д̇анд̇ий’’д̇и уббаннажид̇д̇аанам̣ згажжаанам̣ д̣̇звад̇аанам̣ д̇з д̇хаммз аавигаад̇ум̣ буриманаязнзва ниммид̇аб̣уд̣̇д̇хзна ад̇д̇аанам̣ бужчаабзд̇ваа вуд̇д̇ам̣ д̇ад̇т̇а бужчаависсаж̇ж̇анаггамзна тид̇ад̇д̇аа саб̣б̣аг̇аат̇аа баагадасамб̣анд̇хааязва.
869.Kutopahūtā kalahā vivādāti kalahavivādasuttaṃ. Kā uppatti? Idampi tasmiṃyeva mahāsamaye ‘‘kuto nu, kho, kalahādayo aṭṭha dhammā pavattantī’’ti uppannacittānaṃ ekaccānaṃ devatānaṃ te dhamme āvikātuṃ purimanayeneva nimmitabuddhena attānaṃ pucchāpetvā vuttaṃ tattha pucchāvissajjanakkamena ṭhitattā sabbagāthā pākaṭasambandhāyeva.
ануд̇д̇аанабад̣̇аван̣н̣анаа банзд̇аасам̣ звам̣ взд̣̇ид̇аб̣б̣аа – гуд̇обахууд̇аа галахаа виваад̣̇аад̇и галахо жа д̇асса буб̣б̣абхааг̇о виваад̣̇о жаад̇и имз гуд̇о ж̇аад̇аа. барид̣̇звасогаа сахамажчараа жаад̇и барид̣̇звасогаа жа мажчараа жа гуд̇обахууд̇аа. маанаад̇имаанаа сахабзсун̣аа жаад̇и маанаа жа ад̇имаанаа жа бзсун̣аа жа гуд̇обахууд̇аа. д̇зд̇и д̇з саб̣б̣зби адта гилзсад̇хаммаа. д̇ад̣̇ин̇гха б̣руухийд̇и д̇ам̣ маяаа бужчид̇амад̇т̇ам̣ б̣руухи яаажаами д̇ам̣ аханд̇и. яаажанад̇т̇о хи ин̇гхаад̇и нибаад̇о.
Anuttānapadavaṇṇanā panetāsaṃ evaṃ veditabbā – kutopahūtā kalahā vivādāti kalaho ca tassa pubbabhāgo vivādo cāti ime kuto jātā. Paridevasokā sahamaccharā cāti paridevasokā ca maccharā ca kutopahūtā. Mānātimānā sahapesuṇā cāti mānā ca atimānā ca pesuṇā ca kutopahūtā. Teti te sabbepi aṭṭha kilesadhammā. Tadiṅgha brūhīti taṃ mayā pucchitamatthaṃ brūhi yācāmi taṃ ahanti. Yācanattho hi iṅghāti nipāto.
870. бияаббахууд̇аад̇и бияавад̇т̇уд̇о ж̇аад̇аа. яуд̇д̇и банзд̇т̇а нид̣̇д̣̇зсз (махаани. 98) вуд̇д̇аа зва. мажчзраяуд̇д̇аа галахаа виваад̣̇аад̇и иминаа галахавиваад̣̇аад̣̇ийнам̣ на гзвалам̣ бияавад̇т̇умзва, мажчарияамби бажжаяам̣ д̣̇ассзд̇и. галахавиваад̣̇асийсзна жзд̇т̇а саб̣б̣зби д̇з д̇хаммаа вуд̇д̇аад̇и взд̣̇ид̇аб̣б̣аа. яат̇аа жа зд̇зсам̣ мажчарияам̣, д̇ат̇аа бзсун̣аанан̃жа виваад̣̇ам̣. д̇знааха – ‘‘виваад̣̇аж̇аад̇зсу жа бзсун̣ааний’’д̇и.
870.Piyappahūtāti piyavatthuto jātā. Yutti panettha niddese (mahāni. 98) vuttā eva. Maccherayuttā kalahā vivādāti iminā kalahavivādādīnaṃ na kevalaṃ piyavatthumeva, macchariyampi paccayaṃ dasseti. Kalahavivādasīsena cettha sabbepi te dhammā vuttāti veditabbā. Yathā ca etesaṃ macchariyaṃ, tathā pesuṇānañca vivādaṃ. Tenāha – ‘‘vivādajātesu ca pesuṇānī’’ti.
871. бияаасу логасмим̣ гуд̇онид̣̇аанаа яз жааби лобхаа вижаранд̇и логзд̇и ‘‘бияаа бахууд̇аа галахаа’’д̇и яз зд̇т̇а вуд̇д̇аа. д̇з бияаа логасмим̣ гуд̇онид̣̇аанаа, на гзвалан̃жа бияаа, яз жааби кад̇д̇ияаад̣̇аяо лобхаа вижаранд̇и лобхахзд̇угаа лобхзнаабхибхууд̇аа вижаранд̇и, д̇зсам̣ со лобхо жа гуд̇онид̣̇аанод̇и д̣̇вз ад̇т̇з згааяа бужчааяа бужчад̇и. аасаа жа нидтаа жаад̇и аасаа жа д̇ассаа аасааяа самид̣̇д̇хи жа. яз самбарааяааяа нарасса хонд̇ийд̇и яз нарасса самбарааяааяа хонд̇и, барааяанаа хонд̇ийд̇и вуд̇д̇ам̣ ход̇и. згаа звааяамби бужчаа.
871.Piyāsu lokasmiṃ kutonidānā ye cāpi lobhā vicaranti loketi ‘‘piyā pahūtā kalahā’’ti ye ettha vuttā. Te piyā lokasmiṃ kutonidānā, na kevalañca piyā, ye cāpi khattiyādayo lobhā vicaranti lobhahetukā lobhenābhibhūtā vicaranti, tesaṃ so lobho ca kutonidānoti dve atthe ekāya pucchāya pucchati. Āsā ca niṭṭhā cāti āsā ca tassā āsāya samiddhi ca. Ye samparāyāya narassa hontīti ye narassa samparāyāya honti, parāyanā hontīti vuttaṃ hoti. Ekā evāyampi pucchā.
872. чанд̣̇аанид̣̇аанаанийд̇и гаамажчанд̣̇аад̣̇ичанд̣̇анид̣̇аанаани. яз жааби лобхаа вижаранд̇ийд̇и яз жааби кад̇д̇ияаад̣̇аяо лобхаа вижаранд̇и д̇зсам̣ лобхоби чанд̣̇анид̣̇аанод̇и д̣̇взби ад̇т̇з згад̇о виссаж̇ж̇зд̇и. ид̇онид̣̇аанаад̇и чанд̣̇анид̣̇аанаа зваад̇и вуд̇д̇ам̣ ход̇и. ‘‘гуд̇онид̣̇аанаа гуд̇онид̣̇аанаа’’д̇и (су. ни. 273) зд̇зсу жа сад̣̇д̣̇асид̣̇д̇хи суужиломасуд̇д̇з вуд̇д̇анаязнзва взд̣̇ид̇аб̣б̣аа.
872.Chandānidānānīti kāmacchandādichandanidānāni. Ye cāpi lobhā vicarantīti ye cāpi khattiyādayo lobhā vicaranti tesaṃ lobhopi chandanidānoti dvepi atthe ekato vissajjeti. Itonidānāti chandanidānā evāti vuttaṃ hoti. ‘‘Kutonidānā kutonidānā’’ti (su. ni. 273) etesu ca saddasiddhi sūcilomasutte vuttanayeneva veditabbā.
873. винижчаяаад̇и д̇ан̣хаад̣̇идтивинижчаяаа. яз вааби д̇хаммаа саман̣зна вуд̇д̇аад̇и яз жа ан̃н̃зби год̇хаад̣̇ийхи самбаяуд̇д̇аа, д̇ат̇ааруубаа ваа агусалаа д̇хаммаа б̣уд̣̇д̇хасаман̣зна вуд̇д̇аа, д̇з гуд̇обахууд̇аад̇и.
873.Vinicchayāti taṇhādiṭṭhivinicchayā. Ye vāpi dhammā samaṇena vuttāti ye ca aññepi kodhādīhi sampayuttā, tathārūpā vā akusalā dhammā buddhasamaṇena vuttā, te kutopahūtāti.
874. д̇амуубаниссааяа баход̇и чанд̣̇од̇и д̇ам̣ сукад̣̇угкавзд̣̇анам̣. д̇ад̣̇убхаяавад̇т̇усан̇каад̇ам̣ саад̇аасаад̇ам̣ убаниссааяа сам̣яог̇авияог̇абад̇т̇анаавасзна чанд̣̇о баход̇и. зд̇д̇аавад̇аа ‘‘чанд̣̇о ну логасмим̣ гуд̇онид̣̇аано’’д̇и аяам̣ бан̃хо виссаж̇ж̇ид̇о ход̇и. руубзсу д̣̇исваа вибхавам̣ бхаван̃жаад̇и руубзсу ваяан̃жа уббаад̣̇ан̃жа д̣̇исваа. винижчаяам̣ губ̣б̣ад̇и ж̇анд̇у логзд̇и абааяаад̣̇игз логз аяам̣ ж̇анд̇у бхог̇аад̇хиг̇аманад̇т̇ам̣ д̇ан̣хаавинижчаяам̣ ‘‘ад̇д̇аа мз уббанно’’д̇иаад̣̇инаа наязна д̣̇идтивинижчаяан̃жа гуруд̇з. яуд̇д̇и банзд̇т̇а нид̣̇д̣̇зсз (махаани. 102) вуд̇д̇аа зва. зд̇д̇аавад̇аа ‘‘винижчаяаа жааби гуд̇обахууд̇аа’’д̇и аяам̣ бан̃хо виссаж̇ж̇ид̇о ход̇и.
874.Tamūpanissāya pahoti chandoti taṃ sukhadukkhavedanaṃ. Tadubhayavatthusaṅkhātaṃ sātāsātaṃ upanissāya saṃyogaviyogapatthanāvasena chando pahoti. Ettāvatā ‘‘chando nu lokasmiṃ kutonidāno’’ti ayaṃ pañho vissajjito hoti. Rūpesu disvā vibhavaṃ bhavañcāti rūpesu vayañca uppādañca disvā. Vinicchayaṃ kubbati jantu loketi apāyādike loke ayaṃ jantu bhogādhigamanatthaṃ taṇhāvinicchayaṃ ‘‘attā me uppanno’’tiādinā nayena diṭṭhivinicchayañca kurute. Yutti panettha niddese (mahāni. 102) vuttā eva. Ettāvatā ‘‘vinicchayā cāpi kutopahūtā’’ti ayaṃ pañho vissajjito hoti.
875. зд̇зби д̇хаммаа д̣̇ваяамзва санд̇зд̇и зд̇зби год̇хаад̣̇аяо д̇хаммаа саад̇аасаад̇ад̣̇ваяз санд̇з зва бахонд̇и уббаж̇ж̇анд̇и. уббад̇д̇и жа нзсам̣ нид̣̇д̣̇зсз (махаани. 103) вуд̇д̇ааязва. зд̇д̇аавад̇аа д̇ад̇ияабан̃хоби виссаж̇ж̇ид̇о ход̇и. ид̣̇аани яо звам̣ виссаж̇ж̇ид̇зсу зд̇зсу бан̃хзсу гат̇ам̣гат̇ий бхавзяяа, д̇асса гат̇ам̣гат̇аабахаануубааяам̣ д̣̇ассзнд̇о ааха – ‘‘гат̇ам̣гат̇ий н̃аан̣абат̇ааяа сигкз’’д̇и, н̃аан̣ад̣̇ассанан̃аан̣аад̇хиг̇аманад̇т̇ам̣ д̇иссо сигкаа сигкзяяаад̇и вуд̇д̇ам̣ ход̇и. гим̣ гааран̣ам̣? н̃ад̇ваа бавуд̇д̇аа саман̣зна д̇хаммаа. б̣уд̣̇д̇хасаман̣зна хи н̃ад̇ваава д̇хаммаа вуд̇д̇аа, над̇т̇и д̇асса д̇хаммзсу ан̃н̃аан̣ам̣. ад̇д̇ано бана н̃аан̣аабхаавзна д̇з аж̇аананд̇о на ж̇аанзяяа, на д̣̇зсанаа д̣̇осзна, д̇асмаа гат̇ам̣гат̇ий н̃аан̣абат̇ааяа сигкз, н̃ад̇ваа бавуд̇д̇аа саман̣зна д̇хаммаад̇и.
875.Etepi dhammā dvayameva santeti etepi kodhādayo dhammā sātāsātadvaye sante eva pahonti uppajjanti. Uppatti ca nesaṃ niddese (mahāni. 103) vuttāyeva. Ettāvatā tatiyapañhopi vissajjito hoti. Idāni yo evaṃ vissajjitesu etesu pañhesu kathaṃkathī bhaveyya, tassa kathaṃkathāpahānūpāyaṃ dassento āha – ‘‘kathaṃkathī ñāṇapathāya sikkhe’’ti, ñāṇadassanañāṇādhigamanatthaṃ tisso sikkhā sikkheyyāti vuttaṃ hoti. Kiṃ kāraṇaṃ? Ñatvā pavuttā samaṇena dhammā. Buddhasamaṇena hi ñatvāva dhammā vuttā, natthi tassa dhammesu aññāṇaṃ. Attano pana ñāṇābhāvena te ajānanto na jāneyya, na desanā dosena, tasmā kathaṃkathī ñāṇapathāya sikkhe, ñatvā pavuttā samaṇena dhammāti.
876-7. саад̇ам̣ асаад̇ан̃жа гуд̇онид̣̇аанаад̇и зд̇т̇а саад̇ам̣ асаад̇анд̇и сукад̣̇угкавзд̣̇анаа зва ад̇хиббзд̇аа. на бхаванд̇и хзд̇зд̇и на бхаванд̇и зд̇з. вибхавам̣ бхаван̃жааби яамзд̇амад̇т̇ам̣ зд̇ам̣ мз баб̣руухи яад̇онид̣̇аананд̇и саад̇аасаад̇аанам̣ вибхавам̣ бхаван̃жа зд̇амби яам̣ ад̇т̇ам̣. лин̇г̇аб̣яад̇д̇аяо зд̇т̇а гад̇о. ид̣̇ам̣ бана вуд̇д̇ам̣ ход̇и – саад̇аасаад̇аанам̣ вибхаво бхаво жаад̇и яо зса ад̇т̇о, звам̣ мз баб̣руухи яад̇онид̣̇аананд̇и. зд̇т̇а жа саад̇аасаад̇аанам̣ вибхавабхававад̇т̇угаа вибхавабхавад̣̇идтияо зва вибхавабхаваад̇и ад̇т̇ад̇о взд̣̇ид̇аб̣б̣аа. д̇ат̇аа хи имасса бан̃хасса виссаж̇ж̇анабагкз ‘‘бхавад̣̇идтиби пассанид̣̇аанаа, вибхавад̣̇идтиби пассанид̣̇аанаа’’д̇и нид̣̇д̣̇зсз (махаани. 105) вуд̇д̇ам̣. ид̇онид̣̇аананд̇и пассанид̣̇аанам̣.
876-7.Sātaṃasātañca kutonidānāti ettha sātaṃ asātanti sukhadukkhavedanā eva adhippetā. Na bhavanti heteti na bhavanti ete. Vibhavaṃ bhavañcāpi yametamatthaṃ etaṃ me pabrūhi yatonidānanti sātāsātānaṃ vibhavaṃ bhavañca etampi yaṃ atthaṃ. Liṅgabyattayo ettha kato. Idaṃ pana vuttaṃ hoti – sātāsātānaṃ vibhavo bhavo cāti yo esa attho, evaṃ me pabrūhi yatonidānanti. Ettha ca sātāsātānaṃ vibhavabhavavatthukā vibhavabhavadiṭṭhiyo eva vibhavabhavāti atthato veditabbā. Tathā hi imassa pañhassa vissajjanapakkhe ‘‘bhavadiṭṭhipi phassanidānā, vibhavadiṭṭhipi phassanidānā’’ti niddese (mahāni. 105) vuttaṃ. Itonidānanti phassanidānaṃ.
878. гисмим̣ вибхууд̇з на пусанд̇и пассаад̇и гисмим̣ вийд̇ивад̇д̇з жагкусампассаад̣̇аяо бан̃жа пассаа на пусанд̇и.
878.Kismiṃ vibhūte na phusanti phassāti kismiṃ vītivatte cakkhusamphassādayo pañca phassā na phusanti.
879. нааман̃жа руубан̃жа бадижжаад̇и самбаяуд̇д̇аганаамам̣ вад̇т̇аарамман̣аруубан̃жа бадижжа. руубз вибхууд̇з на пусанд̇и пассаад̇и руубз вийд̇ивад̇д̇з бан̃жа пассаа на пусанд̇и.
879.Nāmañca rūpañca paṭiccāti sampayuttakanāmaṃ vatthārammaṇarūpañca paṭicca. Rūpe vibhūte na phusanti phassāti rūpe vītivatte pañca phassā na phusanti.
880. гат̇ам̣ самзд̇ассаад̇и гат̇ам̣ бадибаннасса. вибход̇и руубанд̇и рууба вибхавад̇и, на бхавзяяа ваа. сукам̣ д̣̇укан̃жаад̇и идтаанидтам̣ руубамзва бужчад̇и.
880.Kathaṃ sametassāti kathaṃ paṭipannassa. Vibhoti rūpanti rūpa vibhavati, na bhaveyya vā. Sukhaṃ dukhañcāti iṭṭhāniṭṭhaṃ rūpameva pucchati.
881. на сан̃н̃асан̃н̃ийд̇и яат̇аа самзд̇асса вибход̇и руубам̣, со багад̇исан̃н̃ааяа сан̃н̃ийби на ход̇и. на висан̃н̃асан̃н̃ийд̇и висан̃н̃ааяаби вируубааяа сан̃н̃ааяа сан̃н̃ий на ход̇и уммад̇д̇аго ваа кид̇д̇ажид̇д̇о ваа. ноби асан̃н̃ийд̇и сан̃н̃аавирахид̇оби на ход̇и нирод̇хасамаабанно ваа асан̃н̃асад̇д̇о ваа. на вибхууд̇асан̃н̃ийд̇и ‘‘саб̣б̣асо руубасан̃н̃аана’’нд̇иаад̣̇инаа (д̇ха са. 265; вибха. 602) наязна самад̇игганд̇асан̃н̃ийби на ход̇и аруубаж̇жхааналаабхий. звам̣ самзд̇асса вибход̇и руубанд̇и зд̇асмим̣ сан̃н̃асан̃н̃ид̇аад̣̇ибхаавз адтад̇ваа яад̣̇зд̇ам̣ вуд̇д̇ам̣ ‘‘со звам̣ самаахид̇з жид̇д̇з…бз… аагаасаанан̃жааяад̇анасамаабад̇д̇ибадилаабхад̇т̇ааяа жид̇д̇ам̣ абхинийхарад̇ий’’д̇и. звам̣ самзд̇асса аруубамаг̇г̇асаман̇г̇ино вибход̇и руубам̣. сан̃н̃аанид̣̇аанаа хи бабан̃жасан̇каад̇и звам̣ бадибаннассааби яаа сан̃н̃аа, д̇аннид̣̇аанаа д̇ан̣хаад̣̇идтибабан̃жаа аббахийнаа зва хонд̇ийд̇и д̣̇ассзд̇и.
881.Na saññasaññīti yathā sametassa vibhoti rūpaṃ, so pakatisaññāya saññīpi na hoti. Na visaññasaññīti visaññāyapi virūpāya saññāya saññī na hoti ummattako vā khittacitto vā. Nopi asaññīti saññāvirahitopi na hoti nirodhasamāpanno vā asaññasatto vā. Na vibhūtasaññīti ‘‘sabbaso rūpasaññāna’’ntiādinā (dha sa. 265; vibha. 602) nayena samatikkantasaññīpi na hoti arūpajjhānalābhī. Evaṃ sametassa vibhoti rūpanti etasmiṃ saññasaññitādibhāve aṭṭhatvā yadetaṃ vuttaṃ ‘‘so evaṃ samāhite citte…pe… ākāsānañcāyatanasamāpattipaṭilābhatthāya cittaṃ abhinīharatī’’ti. Evaṃ sametassa arūpamaggasamaṅgino vibhoti rūpaṃ. Saññānidānā hi papañcasaṅkhāti evaṃ paṭipannassāpi yā saññā, tannidānā taṇhādiṭṭhipapañcā appahīnā eva hontīti dasseti.
882-3. зд̇д̇аавад̇аг̇г̇ам̣ ну вад̣̇анд̇и, хзгз яагкасса суд̣̇д̇хим̣ ид̇ха бан̣д̣ид̇аасз. уд̣̇ааху ан̃н̃амби вад̣̇анд̇и зд̇д̇од̇и зд̇д̇аавад̇аа ну ид̇ха бан̣д̣ид̇аа саман̣аб̣раахман̣аа аг̇г̇ам̣ суд̣̇д̇хим̣ сад̇д̇асса вад̣̇анд̇и, уд̣̇ааху ан̃н̃амби зд̇д̇о аруубасамаабад̇д̇ид̇о ад̇хигам̣ вад̣̇анд̇ийд̇и бужчад̇и. зд̇д̇аавад̇аг̇г̇амби вад̣̇анд̇и хзгзд̇и згз сассад̇аваад̣̇аа саман̣аб̣раахман̣аа бан̣д̣ид̇амаанино зд̇д̇аавад̇ааби аг̇г̇ам̣ суд̣̇д̇хим̣ вад̣̇анд̇и. д̇зсам̣ банзгз самаяам̣ вад̣̇анд̇ийд̇и д̇зсам̣язва згз ужчзд̣̇аваад̣̇аа самаяам̣ ужчзд̣̇ам̣ вад̣̇анд̇и. анубаад̣̇исзсз гусалаа вад̣̇аанаад̇и анубаад̣̇исзсз гусалаваад̣̇аа самаанаа.
882-3.Ettāvataggaṃnu vadanti, heke yakkhassa suddhiṃ idha paṇḍitāse. Udāhu aññampi vadantiettoti ettāvatā nu idha paṇḍitā samaṇabrāhmaṇā aggaṃ suddhiṃ sattassa vadanti, udāhu aññampi etto arūpasamāpattito adhikaṃ vadantīti pucchati. Ettāvataggampi vadanti heketi eke sassatavādā samaṇabrāhmaṇā paṇḍitamānino ettāvatāpi aggaṃ suddhiṃ vadanti. Tesaṃ paneke samayaṃ vadantīti tesaṃyeva eke ucchedavādā samayaṃ ucchedaṃ vadanti. Anupādisese kusalā vadānāti anupādisese kusalavādā samānā.
884. зд̇з жа н̃ад̇ваа убаниссид̇аад̇и зд̇з жа д̣̇идтиг̇ад̇игз сассад̇ужчзд̣̇ад̣̇идтияо ниссид̇аад̇и н̃ад̇ваа. н̃ад̇ваа муний ниссаяз со вимам̣сийд̇и ниссаяз жа н̃ад̇ваа со виймам̣сий бан̣д̣ид̇о б̣уд̣̇д̇хамуни. н̃ад̇ваа вимуд̇д̇од̇и д̣̇угкаанижжаад̣̇ид̇о д̇хаммз н̃ад̇ваа вимуд̇д̇о. бхаваабхавааяа на самзд̇ийд̇и бунаббунам̣ убабад̇д̇ияаа на самааг̇ажчад̇ийд̇и арахад̇д̇анигуудзна д̣̇зсанам̣ нидтаабзси. д̣̇зсанаабарияосаанз бураабхзд̣̇асуд̇д̇з вуд̇д̇асад̣̇исоязваабхисамаяо ахосийд̇и.
884.Eteca ñatvā upanissitāti ete ca diṭṭhigatike sassatucchedadiṭṭhiyo nissitāti ñatvā. Ñatvā munī nissaye so vimaṃsīti nissaye ca ñatvā so vīmaṃsī paṇḍito buddhamuni. Ñatvā vimuttoti dukkhāniccādito dhamme ñatvā vimutto. Bhavābhavāya na sametīti punappunaṃ upapattiyā na samāgacchatīti arahattanikūṭena desanaṃ niṭṭhāpesi. Desanāpariyosāne purābhedasutte vuttasadisoyevābhisamayo ahosīti.
барамад̇т̇аж̇од̇игааяа куд̣̇д̣̇ага-адтагат̇ааяа
Paramatthajotikāya khuddaka-aṭṭhakathāya
суд̇д̇анибаад̇а-адтагат̇ааяа галахавиваад̣̇асуд̇д̇аван̣н̣анаа нидтид̇аа.
Suttanipāta-aṭṭhakathāya kalahavivādasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / суд̇д̇анибаад̇абаал̣и • Suttanipātapāḷi / 11. галахавиваад̣̇асуд̇д̇ам̣ • 11. Kalahavivādasuttaṃ
