| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೪. ಕಾಳಕಾರಾಮಸುತ್ತಂ
4. Kāḷakārāmasuttaṃ
೨೪. ಏಕಂ ಸಮಯಂ ಭಗವಾ ಸಾಕೇತೇ ವಿಹರತಿ ಕಾಳಕಾರಾಮೇ 1। ತತ್ರ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಭಿಕ್ಖವೋ’’ತಿ। ‘‘ಭದನ್ತೇ’’ತಿ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ। ಭಗವಾ ಏತದವೋಚ –
24. Ekaṃ samayaṃ bhagavā sākete viharati kāḷakārāme 2. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ಯಂ , ಭಿಕ್ಖವೇ, ಸದೇವಕಸ್ಸ ಲೋಕಸ್ಸ ಸಮಾರಕಸ್ಸ ಸಬ್ರಹ್ಮಕಸ್ಸ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ದಿಟ್ಠಂ ಸುತಂ ಮುತಂ ವಿಞ್ಞಾತಂ ಪತ್ತಂ ಪರಿಯೇಸಿತಂ ಅನುವಿಚರಿತಂ ಮನಸಾ, ತಮಹಂ ಜಾನಾಮಿ।
‘‘Yaṃ , bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, tamahaṃ jānāmi.
‘‘ಯಂ, ಭಿಕ್ಖವೇ, ಸದೇವಕಸ್ಸ ಲೋಕಸ್ಸ ಸಮಾರಕಸ್ಸ ಸಬ್ರಹ್ಮಕಸ್ಸ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ದಿಟ್ಠಂ ಸುತಂ ಮುತಂ ವಿಞ್ಞಾತಂ ಪತ್ತಂ ಪರಿಯೇಸಿತಂ ಅನುವಿಚರಿತಂ ಮನಸಾ, ತಮಹಂ ಅಬ್ಭಞ್ಞಾಸಿಂ। ತಂ ತಥಾಗತಸ್ಸ ವಿದಿತಂ, ತಂ ತಥಾಗತೋ ನ ಉಪಟ್ಠಾಸಿ।
‘‘Yaṃ, bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, tamahaṃ abbhaññāsiṃ. Taṃ tathāgatassa viditaṃ, taṃ tathāgato na upaṭṭhāsi.
‘‘ಯಂ , ಭಿಕ್ಖವೇ, ಸದೇವಕಸ್ಸ ಲೋಕಸ್ಸ ಸಮಾರಕಸ್ಸ ಸಬ್ರಹ್ಮಕಸ್ಸ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ದಿಟ್ಠಂ ಸುತಂ ಮುತಂ ವಿಞ್ಞಾತಂ ಪತ್ತಂ ಪರಿಯೇಸಿತಂ ಅನುವಿಚರಿತಂ ಮನಸಾ, ತಮಹಂ ನ ಜಾನಾಮೀತಿ ವದೇಯ್ಯಂ, ತಂ ಮಮಸ್ಸ ಮುಸಾ।
‘‘Yaṃ , bhikkhave, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, tamahaṃ na jānāmīti vadeyyaṃ, taṃ mamassa musā.
‘‘ಯಂ, ಭಿಕ್ಖವೇ…ಪೇ॰… ತಮಹಂ ಜಾನಾಮಿ ಚ ನ ಚ ಜಾನಾಮೀತಿ ವದೇಯ್ಯಂ, ತಂಪಸ್ಸ 3 ತಾದಿಸಮೇವ।
‘‘Yaṃ, bhikkhave…pe… tamahaṃ jānāmi ca na ca jānāmīti vadeyyaṃ, taṃpassa 4 tādisameva.
‘‘ಯಂ, ಭಿಕ್ಖವೇ…ಪೇ॰… ತಮಹಂ ನೇವ ಜಾನಾಮಿ ನ ನ ಜಾನಾಮೀತಿ ವದೇಯ್ಯಂ, ತಂ ಮಮಸ್ಸ ಕಲಿ।
‘‘Yaṃ, bhikkhave…pe… tamahaṃ neva jānāmi na na jānāmīti vadeyyaṃ, taṃ mamassa kali.
‘‘ಇತಿ ಖೋ, ಭಿಕ್ಖವೇ, ತಥಾಗತೋ ದಟ್ಠಾ ದಟ್ಠಬ್ಬಂ, ದಿಟ್ಠಂ ನ ಮಞ್ಞತಿ, ಅದಿಟ್ಠಂ ನ ಮಞ್ಞತಿ, ದಟ್ಠಬ್ಬಂ ನ ಮಞ್ಞತಿ, ದಟ್ಠಾರಂ ನ ಮಞ್ಞತಿ; ಸುತ್ವಾ ಸೋತಬ್ಬಂ, ಸುತಂ ನ ಮಞ್ಞತಿ, ಅಸುತಂ ನ ಮಞ್ಞತಿ, ಸೋತಬ್ಬಂ ನ ಮಞ್ಞತಿ, ಸೋತಾರಂ ನ ಮಞ್ಞತಿ; ಮುತ್ವಾ ಮೋತಬ್ಬಂ, ಮುತಂ ನ ಮಞ್ಞತಿ, ಅಮುತಂ ನ ಮಞ್ಞತಿ, ಮೋತಬ್ಬಂ ನ ಮಞ್ಞತಿ, ಮೋತಾರಂ ನ ಮಞ್ಞತಿ; ವಿಞ್ಞತ್ವಾ ವಿಞ್ಞಾತಬ್ಬಂ, ವಿಞ್ಞಾತಂ ನ ಮಞ್ಞತಿ, ಅವಿಞ್ಞಾತಂ ನ ಮಞ್ಞತಿ, ವಿಞ್ಞಾತಬ್ಬಂ ನ ಮಞ್ಞತಿ, ವಿಞ್ಞಾತಾರಂ ನ ಮಞ್ಞತಿ। ಇತಿ ಖೋ, ಭಿಕ್ಖವೇ, ತಥಾಗತೋ ದಿಟ್ಠಸುತಮುತವಿಞ್ಞಾತಬ್ಬೇಸು ಧಮ್ಮೇಸು ತಾದೀಯೇವ ತಾದೀ 5। ತಮ್ಹಾ ಚ ಪನ ತಾದಿಮ್ಹಾ 6 ಅಞ್ಞೋ ತಾದೀ ಉತ್ತರಿತರೋ ವಾ ಪಣೀತತರೋ ವಾ ನತ್ಥೀತಿ ವದಾಮೀ’’ತಿ।
‘‘Iti kho, bhikkhave, tathāgato daṭṭhā daṭṭhabbaṃ, diṭṭhaṃ na maññati, adiṭṭhaṃ na maññati, daṭṭhabbaṃ na maññati, daṭṭhāraṃ na maññati; sutvā sotabbaṃ, sutaṃ na maññati, asutaṃ na maññati, sotabbaṃ na maññati, sotāraṃ na maññati; mutvā motabbaṃ, mutaṃ na maññati, amutaṃ na maññati, motabbaṃ na maññati, motāraṃ na maññati; viññatvā viññātabbaṃ, viññātaṃ na maññati, aviññātaṃ na maññati, viññātabbaṃ na maññati, viññātāraṃ na maññati. Iti kho, bhikkhave, tathāgato diṭṭhasutamutaviññātabbesu dhammesu tādīyeva tādī 7. Tamhā ca pana tādimhā 8 añño tādī uttaritaro vā paṇītataro vā natthīti vadāmī’’ti.
‘‘ಯಂ ಕಿಞ್ಚಿ ದಿಟ್ಠಂವ ಸುತಂ ಮುತಂ ವಾ,
‘‘Yaṃ kiñci diṭṭhaṃva sutaṃ mutaṃ vā,
ಅಜ್ಝೋಸಿತಂ ಸಚ್ಚಮುತಂ ಪರೇಸಂ।
Ajjhositaṃ saccamutaṃ paresaṃ;
ನ ತೇಸು ತಾದೀ ಸಯಸಂವುತೇಸು,
Na tesu tādī sayasaṃvutesu,
ಸಚ್ಚಂ ಮುಸಾ ವಾಪಿ ಪರಂ ದಹೇಯ್ಯ॥
Saccaṃ musā vāpi paraṃ daheyya.
ಅಜ್ಝೋಸಿತಾ ಯತ್ಥ ಪಜಾ ವಿಸತ್ತಾ।
Ajjhositā yattha pajā visattā;
ಜಾನಾಮಿ ಪಸ್ಸಾಮಿ ತಥೇವ ಏತಂ,
Jānāmi passāmi tatheva etaṃ,
ಅಜ್ಝೋಸಿತಂ ನತ್ಥಿ ತಥಾಗತಾನ’’ನ್ತ್ನ್ತ್ತಿ॥ ಚತುತ್ಥಂ।
Ajjhositaṃ natthi tathāgatāna’’ntntti. catutthaṃ;
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೪. ಕಾಳಕಾರಾಮಸುತ್ತವಣ್ಣನಾ • 4. Kāḷakārāmasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೪. ಕಾಳಕಾರಾಮಸುತ್ತವಣ್ಣನಾ • 4. Kāḷakārāmasuttavaṇṇanā
