A World of Knowledge
    Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā

    ൩. കാളിഗോധാപുത്തഭദ്ദിയത്ഥേരഅപദാനവണ്ണനാ

    3. Kāḷigodhāputtabhaddiyattheraapadānavaṇṇanā

    പദുമുത്തരസമ്ബുദ്ധന്തിആദികം ആയസ്മതോ ഭദ്ദിയസ്സ കാളിഗോധാപുത്തത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ വിഭവസമ്പന്നേ ഏകസ്മിം കുലേ നിബ്ബത്തോ വുദ്ധിപ്പത്തോ പുത്തദാരേഹി വഡ്ഢിതോ നഗരവാസിനോ പുഞ്ഞാനി കരോന്തേ ദിസ്വാ സയമ്പി പുഞ്ഞാനി കാതുകാമോ ബുദ്ധപ്പമുഖം ഭിക്ഖുസങ്ഘം നിമന്തേത്വാ ഥൂലപടലികാദിഅനേകാനി മഹാരഹാനി സയനാനി പഞ്ഞാപേത്വാ തത്ഥ നിസിന്നേ ഭഗവതി സസങ്ഘേ പണീതേനാഹാരേന ഭോജേത്വാ മഹാദാനം അദാസി. സോ ഏവം യാവതായുകം പുഞ്ഞാനി കത്വാ ദേവമനുസ്സേസു ഉഭയസമ്പത്തിയോ അനുഭവിത്വാ അപരഭാഗേ ഇമസ്മിം ബുദ്ധുപ്പാദേ കാളിഗോധായ നാമ ദേവിയാ പുത്തോ ഹുത്വാ നിബ്ബത്തി. സോ വിഞ്ഞുതം പത്തോ ആരോഹപരിണാഹഹത്ഥപാദരൂപസമ്പത്തിയാ ഭദ്ദത്താ ച കാളിഗോധായ ദേവിയാ പുത്തത്താ ച ഭദ്ദിയോ കാളിഗോധാപുത്തോതി പാകടോ. സത്ഥരി പസീദിത്വാ മാതാപിതരോ ആരാധേത്വാ പബ്ബജിത്വാ നചിരസ്സേവ അരഹാ അഹോസി.

    Padumuttarasambuddhantiādikaṃ āyasmato bhaddiyassa kāḷigodhāputtattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle vibhavasampanne ekasmiṃ kule nibbatto vuddhippatto puttadārehi vaḍḍhito nagaravāsino puññāni karonte disvā sayampi puññāni kātukāmo buddhappamukhaṃ bhikkhusaṅghaṃ nimantetvā thūlapaṭalikādianekāni mahārahāni sayanāni paññāpetvā tattha nisinne bhagavati sasaṅghe paṇītenāhārena bhojetvā mahādānaṃ adāsi. So evaṃ yāvatāyukaṃ puññāni katvā devamanussesu ubhayasampattiyo anubhavitvā aparabhāge imasmiṃ buddhuppāde kāḷigodhāya nāma deviyā putto hutvā nibbatti. So viññutaṃ patto ārohapariṇāhahatthapādarūpasampattiyā bhaddattā ca kāḷigodhāya deviyā puttattā ca bhaddiyo kāḷigodhāputtoti pākaṭo. Satthari pasīditvā mātāpitaro ārādhetvā pabbajitvā nacirasseva arahā ahosi.

    ൫൪. സോ അരഹാ ഹുത്വാ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ പദുമുത്തരസമ്ബുദ്ധന്തിആദിമാഹ. തം ഹേട്ഠാ വുത്തത്ഥമേവ. മേത്തചിത്തന്തി മിജ്ജതി സിനേഹതി നന്ദതി സബ്ബസത്തേതി മേത്താ, മേത്തായ സഹഗതം ചിത്തം മേത്തചിത്തം, തം യസ്സ ഭഗവതോ അത്ഥീതി മേത്തചിത്തോ, തം മേത്തചിത്തം. മഹാമുനിന്തി സകലഭിക്ഖൂനം മഹന്തത്താ മഹാമുനി, തം പദുമുത്തരം സമ്ബുദ്ധന്തി സമ്ബന്ധോ. ജനതാ സബ്ബാതി സബ്ബോ ജനകായോ, സബ്ബനഗരവാസിനോതി അത്ഥോ. സബ്ബലോകഗ്ഗനായകന്തി സകലലോകസ്സ അഗ്ഗം സേട്ഠം നിബ്ബാനസ്സ നയനതോ പാപനതോ നായകം പദുമുത്തരസമ്ബുദ്ധം ജനതാ ഉപേതി സമീപം ഗച്ഛതീതി സമ്ബന്ധോ.

    54. So arahā hutvā attano pubbakammaṃ saritvā somanassajāto pubbacaritāpadānaṃ pakāsento padumuttarasambuddhantiādimāha. Taṃ heṭṭhā vuttatthameva. Mettacittanti mijjati sinehati nandati sabbasatteti mettā, mettāya sahagataṃ cittaṃ mettacittaṃ, taṃ yassa bhagavato atthīti mettacitto, taṃ mettacittaṃ. Mahāmuninti sakalabhikkhūnaṃ mahantattā mahāmuni, taṃ padumuttaraṃ sambuddhanti sambandho. Janatā sabbāti sabbo janakāyo, sabbanagaravāsinoti attho. Sabbalokagganāyakanti sakalalokassa aggaṃ seṭṭhaṃ nibbānassa nayanato pāpanato nāyakaṃ padumuttarasambuddhaṃ janatā upeti samīpaṃ gacchatīti sambandho.

    ൫൫. സത്തുകഞ്ച ബദ്ധകഞ്ചാതി ബദ്ധസത്തുഅബദ്ധസത്തുസങ്ഖാതം ആമിസം. അഥ വാ ഭത്തപൂപഖജ്ജഭോജ്ജയാഗുആദയോ യാവകാലികത്താ ആമിസം പാനഭോജനഞ്ച ഗഹേത്വാ പുഞ്ഞക്ഖേത്തേ അനുത്തരേ സത്ഥുനോ ദദന്തീതി സമ്ബന്ധോ.

    55.Sattukañca baddhakañcāti baddhasattuabaddhasattusaṅkhātaṃ āmisaṃ. Atha vā bhattapūpakhajjabhojjayāguādayo yāvakālikattā āmisaṃ pānabhojanañca gahetvā puññakkhette anuttare satthuno dadantīti sambandho.

    ൫൮. ആസനം ബുദ്ധയുത്തകന്തി ബുദ്ധയോഗ്ഗം ബുദ്ധാരഹം ബുദ്ധാനുച്ഛവികം സത്തരതനമയം ആസനന്തി അത്ഥോ. സേസം നയാനുയോഗേന സുവിഞ്ഞേയ്യമേവാതി.

    58.Āsanaṃ buddhayuttakanti buddhayoggaṃ buddhārahaṃ buddhānucchavikaṃ sattaratanamayaṃ āsananti attho. Sesaṃ nayānuyogena suviññeyyamevāti.

    കാളിഗോധാപുത്തഭദ്ദിയത്ഥേരഅപദാനവണ്ണനാ സമത്താ.

    Kāḷigodhāputtabhaddiyattheraapadānavaṇṇanā samattā.







    Related texts:



    തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൩. കാളിഗോധാപുത്തഭദ്ദിയത്ഥേരഅപദാനം • 3. Kāḷigodhāputtabhaddiyattheraapadānaṃ


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact