| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༨. ཀལིངྒརསུཏྟཝཎྞནཱ
8. Kaliṅgarasuttavaṇṇanā
༢༣༠. ཀལིངྒརཾ ཝུཙྩཏི ཁུདྡཀདཱརུཁཎྜཾ, ཏཾ ཨུཔདྷཱནཾ ཨེཏེསནྟི ཀལིངྒརཱུཔདྷཱནཱ། ལིཙྪཝཱི པན ཁདིརདཎྜཾ ཨུཔདྷཱནཾ ཀཏྭཱ ཏདཱ ཝིཧརིཾསུ། ཏསྨཱ ཝུཏྟཾ ‘‘ཁདིརགྷཊིཀཱསཱུ’’ཏིཨཱདི། པཀཏིཝིཛྫུསཉྙིཏོ ནཏྠི ཨེཏེསཾ ཁཎོ ཝིཛ྄ཛྷནེཏི ཨཀྑཎཝེདྷིནོ ཏཏོ སཱིགྷཏརཾ ཝིཛ྄ཛྷནཏོ། ‘‘ཨཀྑཎ’’ནྟི ཝིཛྫུ ཝུཙྩཏི ཨིཏྟརཁཎཏྟཱ། ཨཀྑཎོབྷཱསེན ལཀྑཎཝེདྷཀཱ ཨཀྑཎཝེདྷིནོ། ཨནེཀདྷཱ བྷིནྣསྶ ཝཱལསྶ ཝིཛ྄ཛྷནེན ཝཱལཝེདྷིནོ། ཝཱལེཀདེསོ ཧི ཨིདྷ ‘‘ཝཱལོ’’ཏི གཧིཏོ།
230. Kaliṅgaraṃ vuccati khuddakadārukhaṇḍaṃ, taṃ upadhānaṃ etesanti kaliṅgarūpadhānā. Licchavī pana khadiradaṇḍaṃ upadhānaṃ katvā tadā vihariṃsu. Tasmā vuttaṃ ‘‘khadiraghaṭikāsū’’tiādi. Pakativijjusaññito natthi etesaṃ khaṇo vijjhaneti akkhaṇavedhino tato sīghataraṃ vijjhanato. ‘‘Akkhaṇa’’nti vijju vuccati ittarakhaṇattā. Akkhaṇobhāsena lakkhaṇavedhakā akkhaṇavedhino. Anekadhā bhinnassa vālassa vijjhanena vālavedhino. Vālekadeso hi idha ‘‘vālo’’ti gahito.
བཧུདེཝ དིཝསབྷཱགཾ པདྷཱནཱནུཡོགཏོ ཨུཔྤནྣདརཐཔརིསྶམཝིནོདནཏྠཾ ནྷཱཡིཏྭཱ། ཏེ སནྡྷཱཡཱཏི ཏེ ཏཐཱརཱུཔེ པདྷཱནཀམྨིཀབྷིཀྑཱུ སནྡྷཱཡ། ཨིདཾ ཨིདཱནི ཝུཙྩམཱནཾ ཨཏྠཛཱཏཾ ཝུཏྟཾ པོརཱཎཊྛཀཐཱཡཾ། ཨཡམྤི དཱིཔོཏི ཏམྦཔཎྞིདཱིཔམཱཧ། པདྷཱནཱནུཡུཉྫནཝེལཱཡ ནིཝེདནཝསེན ཏཏྠ ཏཏྠ ཨེཀཛ྄ཛྷཾ པཧཏགྷཎྜིནིགྒྷོསེནེཝ ཨེཀགྷཎྜིནིགྒྷོསོ, ཏཏྠ ཏཏྠ པཎྞསཱལཱདཱིསུ ཝསནྟཱནཾ བྷིཀྑཱུནཾ ཝསེན ཨེཀཔདྷཱནབྷཱུཏོ། ནཱནཱམུཁོཏི ཨནུརཱདྷཔུརསྶ པཙྪིམདིསཱཡཾ ཨེཀོ ཝིཧཱརོ, པིལིཙྪིཀོལི༹ནགརསྶ པུརཏྠིམདིསཱཡཾ། ཨུབྷཡཏྠ པཝཏྟགྷཎྜིསདྡཱ ཨནྟརཱཔཝཏྟགྷཎྜིསདྡེཧི མིསྶེཏྭཱ ཨོསརནྟི། ཀལྱཱཎིཡཾ པཝཏྟགྷཎྜིསདྡོ ཏཐཱ ནཱགདཱིཔེ།
Bahudeva divasabhāgaṃ padhānānuyogato uppannadarathaparissamavinodanatthaṃ nhāyitvā. Te sandhāyāti te tathārūpe padhānakammikabhikkhū sandhāya. Idaṃ idāni vuccamānaṃ atthajātaṃ vuttaṃ porāṇaṭṭhakathāyaṃ. Ayampi dīpoti tambapaṇṇidīpamāha. Padhānānuyuñjanavelāya nivedanavasena tattha tattha ekajjhaṃ pahataghaṇḍinigghoseneva ekaghaṇḍinigghoso, tattha tattha paṇṇasālādīsu vasantānaṃ bhikkhūnaṃ vasena ekapadhānabhūto. Nānāmukhoti anurādhapurassa pacchimadisāyaṃ eko vihāro, pilicchikoḷinagarassa puratthimadisāyaṃ. Ubhayattha pavattaghaṇḍisaddā antarāpavattaghaṇḍisaddehi missetvā osaranti. Kalyāṇiyaṃ pavattaghaṇḍisaddo tathā nāgadīpe.
ཀལིངྒརསུཏྟཝཎྞནཱ ནིཊྛིཏཱ།
Kaliṅgarasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༨. ཀལིངྒརསུཏྟཾ • 8. Kaliṅgarasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༨. ཀལིངྒརསུཏྟཝཎྞནཱ • 8. Kaliṅgarasuttavaṇṇanā
