| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೬. ಕಾಳೀಸುತ್ತಂ
6. Kāḷīsuttaṃ
೨೬. ಏಕಂ ಸಮಯಂ ಆಯಸ್ಮಾ ಮಹಾಕಚ್ಚಾನೋ ಅವನ್ತೀಸು ವಿಹರತಿ ಕುರರಘರೇ 1 ಪವತ್ತೇ ಪಬ್ಬತೇ। ಅಥ ಖೋ ಕಾಳೀ ಉಪಾಸಿಕಾ ಕುರರಘರಿಕಾ ಯೇನಾಯಸ್ಮಾ ಮಹಾಕಚ್ಚಾನೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ಮಹಾಕಚ್ಚಾನಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನಾ ಖೋ ಕಾಳೀ ಉಪಾಸಿಕಾ ಕುರರಘರಿಕಾ ಆಯಸ್ಮನ್ತಂ ಮಹಾಕಚ್ಚಾನಂ ಏತದವೋಚ – ‘‘ವುತ್ತಮಿದಂ, ಭನ್ತೇ, ಭಗವತಾ ಕುಮಾರಿಪಞ್ಹೇಸು –
26. Ekaṃ samayaṃ āyasmā mahākaccāno avantīsu viharati kuraraghare 2 pavatte pabbate. Atha kho kāḷī upāsikā kuraragharikā yenāyasmā mahākaccāno tenupasaṅkami; upasaṅkamitvā āyasmantaṃ mahākaccānaṃ abhivādetvā ekamantaṃ nisīdi. Ekamantaṃ nisinnā kho kāḷī upāsikā kuraragharikā āyasmantaṃ mahākaccānaṃ etadavoca – ‘‘vuttamidaṃ, bhante, bhagavatā kumāripañhesu –
‘ಅತ್ಥಸ್ಸ ಪತ್ತಿಂ ಹದಯಸ್ಸ ಸನ್ತಿಂ,
‘Atthassa pattiṃ hadayassa santiṃ,
ಜೇತ್ವಾನ ಸೇನಂ ಪಿಯಸಾತರೂಪಂ।
Jetvāna senaṃ piyasātarūpaṃ;
‘‘ಇಮಸ್ಸ ಖೋ, ಭನ್ತೇ, ಭಗವತಾ ಸಂಖಿತ್ತೇನ ಭಾಸಿತಸ್ಸ ಕಥಂ ವಿತ್ಥಾರೇನ ಅತ್ಥೋ ದಟ್ಠಬ್ಬೋ’’ತಿ?
‘‘Imassa kho, bhante, bhagavatā saṃkhittena bhāsitassa kathaṃ vitthārena attho daṭṭhabbo’’ti?
‘‘ಪಥವೀಕಸಿಣಸಮಾಪತ್ತಿಪರಮಾ ಖೋ, ಭಗಿನಿ, ಏಕೇ ಸಮಣಬ್ರಾಹ್ಮಣಾ ‘ಅತ್ಥೋ’ತಿ ಅಭಿನಿಬ್ಬತ್ತೇಸುಂ 9। ಯಾವತಾ ಖೋ, ಭಗಿನಿ, ಪಥವೀಕಸಿಣಸಮಾಪತ್ತಿಪರಮತಾ , ತದಭಿಞ್ಞಾಸಿ ಭಗವಾ। ತದಭಿಞ್ಞಾಯ ಭಗವಾ ಅಸ್ಸಾದಮದ್ದಸ 10 ಆದೀನವಮದ್ದಸ ನಿಸ್ಸರಣಮದ್ದಸ ಮಗ್ಗಾಮಗ್ಗಞಾಣದಸ್ಸನಮದ್ದಸ। ತಸ್ಸ ಅಸ್ಸಾದದಸ್ಸನಹೇತು ಆದೀನವದಸ್ಸನಹೇತು ನಿಸ್ಸರಣದಸ್ಸನಹೇತು ಮಗ್ಗಾಮಗ್ಗಞಾಣದಸ್ಸನಹೇತು ಅತ್ಥಸ್ಸ ಪತ್ತಿ ಹದಯಸ್ಸ ಸನ್ತಿ ವಿದಿತಾ ಹೋತಿ।
‘‘Pathavīkasiṇasamāpattiparamā kho, bhagini, eke samaṇabrāhmaṇā ‘attho’ti abhinibbattesuṃ 11. Yāvatā kho, bhagini, pathavīkasiṇasamāpattiparamatā , tadabhiññāsi bhagavā. Tadabhiññāya bhagavā assādamaddasa 12 ādīnavamaddasa nissaraṇamaddasa maggāmaggañāṇadassanamaddasa. Tassa assādadassanahetu ādīnavadassanahetu nissaraṇadassanahetu maggāmaggañāṇadassanahetu atthassa patti hadayassa santi viditā hoti.
‘‘ಆಪೋಕಸಿಣಸಮಾಪತ್ತಿಪರಮಾ ಖೋ, ಭಗಿನಿ…ಪೇ॰… ತೇಜೋಕಸಿಣಸಮಾಪತ್ತಿಪರಮಾ ಖೋ, ಭಗಿನಿ… ವಾಯೋಕಸಿಣಸಮಾಪತ್ತಿಪರಮಾ ಖೋ, ಭಗಿನಿ… ನೀಲಕಸಿಣಸಮಾಪತ್ತಿಪರಮಾ ಖೋ, ಭಗಿನಿ… ಪೀತಕಸಿಣಸಮಾಪತ್ತಿಪರಮಾ ಖೋ, ಭಗಿನಿ… ಲೋಹಿತಕಸಿಣಸಮಾಪತ್ತಿಪರಮಾ ಖೋ, ಭಗಿನಿ… ಓದಾತಕಸಿಣಸಮಾಪತ್ತಿಪರಮಾ ಖೋ, ಭಗಿನಿ… ಆಕಾಸಕಸಿಣಸಮಾಪತ್ತಿಪರಮಾ ಖೋ, ಭಗಿನಿ… ವಿಞ್ಞಾಣಕಸಿಣಸಮಾಪತ್ತಿಪರಮಾ ಖೋ, ಭಗಿನಿ, ಏಕೇ ಸಮಣಬ್ರಾಹ್ಮಣಾ ‘ಅತ್ಥೋ’ತಿ ಅಭಿನಿಬ್ಬತ್ತೇಸುಂ । ಯಾವತಾ ಖೋ, ಭಗಿನಿ, ವಿಞ್ಞಾಣಕಸಿಣಸಮಾಪತ್ತಿಪರಮತಾ, ತದಭಿಞ್ಞಾಸಿ ಭಗವಾ। ತದಭಿಞ್ಞಾಯ ಭಗವಾ ಅಸ್ಸಾದಮದ್ದಸ ಆದೀನವಮದ್ದಸ ನಿಸ್ಸರಣಮದ್ದಸ ಮಗ್ಗಾಮಗ್ಗಞಾಣದಸ್ಸನಮದ್ದಸ। ತಸ್ಸ ಅಸ್ಸಾದದಸ್ಸನಹೇತು ಆದೀನವದಸ್ಸನಹೇತು ನಿಸ್ಸರಣದಸ್ಸನಹೇತು ಮಗ್ಗಾಮಗ್ಗಞಾಣದಸ್ಸನಹೇತು ಅತ್ಥಸ್ಸ ಪತ್ತಿ ಹದಯಸ್ಸ ಸನ್ತಿ ವಿದಿತಾ ಹೋತಿ। ಇತಿ ಖೋ, ಭಗಿನಿ, ಯಂ ತಂ ವುತ್ತಂ ಭಗವತಾ ಕುಮಾರಿಪಞ್ಹೇಸು –
‘‘Āpokasiṇasamāpattiparamā kho, bhagini…pe… tejokasiṇasamāpattiparamā kho, bhagini… vāyokasiṇasamāpattiparamā kho, bhagini… nīlakasiṇasamāpattiparamā kho, bhagini… pītakasiṇasamāpattiparamā kho, bhagini… lohitakasiṇasamāpattiparamā kho, bhagini… odātakasiṇasamāpattiparamā kho, bhagini… ākāsakasiṇasamāpattiparamā kho, bhagini… viññāṇakasiṇasamāpattiparamā kho, bhagini, eke samaṇabrāhmaṇā ‘attho’ti abhinibbattesuṃ . Yāvatā kho, bhagini, viññāṇakasiṇasamāpattiparamatā, tadabhiññāsi bhagavā. Tadabhiññāya bhagavā assādamaddasa ādīnavamaddasa nissaraṇamaddasa maggāmaggañāṇadassanamaddasa. Tassa assādadassanahetu ādīnavadassanahetu nissaraṇadassanahetu maggāmaggañāṇadassanahetu atthassa patti hadayassa santi viditā hoti. Iti kho, bhagini, yaṃ taṃ vuttaṃ bhagavatā kumāripañhesu –
‘ಅತ್ಥಸ್ಸ ಪತ್ತಿಂ ಹದಯಸ್ಸ ಸನ್ತಿಂ,
‘Atthassa pattiṃ hadayassa santiṃ,
ಜೇತ್ವಾನ ಸೇನಂ ಪಿಯಸಾತರೂಪಂ।
Jetvāna senaṃ piyasātarūpaṃ;
ಏಕೋಹಂ ಝಾಯಂ ಸುಖಮನುಬೋಧಿಂ,
Ekohaṃ jhāyaṃ sukhamanubodhiṃ,
ತಸ್ಮಾ ಜನೇನ ನ ಕರೋಮಿ ಸಕ್ಖಿಂ।
Tasmā janena na karomi sakkhiṃ;
ಸಕ್ಖೀ ನ ಸಮ್ಪಜ್ಜತಿ ಕೇನಚಿ ಮೇ’ತಿ॥
Sakkhī na sampajjati kenaci me’ti.
‘‘ಇಮಸ್ಸ ಖೋ, ಭಗಿನಿ, ಭಗವತಾ ಸಂಖಿತ್ತೇನ ಭಾಸಿತಸ್ಸ ಏವಂ ವಿತ್ಥಾರೇನ ಅತ್ಥೋ ದಟ್ಠಬ್ಬೋ’’ತಿ। ಛಟ್ಠಂ।
‘‘Imassa kho, bhagini, bhagavatā saṃkhittena bhāsitassa evaṃ vitthārena attho daṭṭhabbo’’ti. Chaṭṭhaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೬. ಕಾಳೀಸುತ್ತವಣ್ಣನಾ • 6. Kāḷīsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೬. ಕಾಳೀಸುತ್ತವಣ್ಣನಾ • 6. Kāḷīsuttavaṇṇanā
