| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
८. कल्याणसीलसुत्तं
8. Kalyāṇasīlasuttaṃ
९७. वुत्तञ्हेतं भगवता, वुत्तमरहताति मे सुतं –
97. Vuttañhetaṃ bhagavatā, vuttamarahatāti me sutaṃ –
‘‘कल्याणसीलो, भिक्खवे, भिक्खु कल्याणधम्मो कल्याणपञ्ञो इमस्मिं धम्मविनये ‘केवली वुसितवा उत्तमपुरिसो’ति वुच्चति –
‘‘Kalyāṇasīlo, bhikkhave, bhikkhu kalyāṇadhammo kalyāṇapañño imasmiṃ dhammavinaye ‘kevalī vusitavā uttamapuriso’ti vuccati –
‘‘कथञ्च , भिक्खवे, भिक्खु कल्याणसीलो होति? इध, भिक्खवे, भिक्खु सीलवा होति, पातिमोक्खसंवरसंवुतो विहरति, आचारगोचरसम्पन्नो अणुमत्तेसु वज्जेसु भयदस्सावी, समादाय सिक्खति सिक्खापदेसु। एवं खो, भिक्खवे, भिक्खु कल्याणसीलो होति। इति कल्याणसीलो।
‘‘Kathañca , bhikkhave, bhikkhu kalyāṇasīlo hoti? Idha, bhikkhave, bhikkhu sīlavā hoti, pātimokkhasaṃvarasaṃvuto viharati, ācāragocarasampanno aṇumattesu vajjesu bhayadassāvī, samādāya sikkhati sikkhāpadesu. Evaṃ kho, bhikkhave, bhikkhu kalyāṇasīlo hoti. Iti kalyāṇasīlo.
‘‘कल्याणधम्मो च कथं होति? इध, भिक्खवे, भिक्खु सत्तन्नं बोधिपक्खियानं धम्मानं भावनानुयोगमनुयुत्तो विहरति। एवं खो, भिक्खवे, भिक्खु कल्याणधम्मो होति। इति कल्याणसीलो, कल्याणधम्मो।
‘‘Kalyāṇadhammo ca kathaṃ hoti? Idha, bhikkhave, bhikkhu sattannaṃ bodhipakkhiyānaṃ dhammānaṃ bhāvanānuyogamanuyutto viharati. Evaṃ kho, bhikkhave, bhikkhu kalyāṇadhammo hoti. Iti kalyāṇasīlo, kalyāṇadhammo.
‘‘कल्याणपञ्ञो च कथं होति ? इध, भिक्खवे, भिक्खु आसवानं खया अनासवं चेतोविमुत्तिं पञ्ञाविमुत्तिं दिट्ठेव धम्मे सयं अभिञ्ञा सच्छिकत्वा उपसम्पज्ज विहरति। एवं खो, भिक्खवे, भिक्खु कल्याणपञ्ञो होति।
‘‘Kalyāṇapañño ca kathaṃ hoti ? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ kho, bhikkhave, bhikkhu kalyāṇapañño hoti.
‘‘इति कल्याणसीलो कल्याणधम्मो कल्याणपञ्ञो इमस्मिं धम्मविनये ‘केवली वुसितवा उत्तमपुरिसो’ति वुच्चती’’ति। एतमत्थं भगवा अवोच। तत्थेतं इति वुच्चति –
‘‘Iti kalyāṇasīlo kalyāṇadhammo kalyāṇapañño imasmiṃ dhammavinaye ‘kevalī vusitavā uttamapuriso’ti vuccatī’’ti. Etamatthaṃ bhagavā avoca. Tatthetaṃ iti vuccati –
‘‘यस्स कायेन वाचाय, मनसा नत्थि दुक्कटं।
‘‘Yassa kāyena vācāya, manasā natthi dukkaṭaṃ;
तं वे कल्याणधम्मोति, आहु भिक्खुं अनुस्सदं॥
Taṃ ve kalyāṇadhammoti, āhu bhikkhuṃ anussadaṃ.
‘‘यो दुक्खस्स पजानाति, इधेव खयमत्तनो।
‘‘Yo dukkhassa pajānāti, idheva khayamattano;
तं वे कल्याणपञ्ञोति, आहु भिक्खुं अनासवं॥
Taṃ ve kalyāṇapaññoti, āhu bhikkhuṃ anāsavaṃ.
‘‘तेहि धम्मेहि सम्पन्नं, अनीघं छिन्नसंसयं।
‘‘Tehi dhammehi sampannaṃ, anīghaṃ chinnasaṃsayaṃ;
असितं सब्बलोकस्स, आहु सब्बपहायिन’’न्ति॥
Asitaṃ sabbalokassa, āhu sabbapahāyina’’nti.
अयम्पि अत्थो वुत्तो भगवता, इति मे सुतन्ति। अट्ठमं।
Ayampi attho vutto bhagavatā, iti me sutanti. Aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ८. कल्याणसीलसुत्तवण्णना • 8. Kalyāṇasīlasuttavaṇṇanā
