| Library / Tipiṭaka / д̇ибидага • Tipiṭaka / д̇хаммасан̇г̇ан̣ий-анудийгаа • Dhammasaṅgaṇī-anuṭīkā |
гаамааважарагусалабад̣̇абхааж̇анийяаван̣н̣анаа
Kāmāvacarakusalapadabhājanīyavaṇṇanā
1. аббзд̇унд̇и ниг̇амзд̇ум̣. ‘‘бад̣̇абхааж̇анийяам̣ на вуд̇д̇а’’нд̇и бад̣̇абхааж̇анийяааважанзна аббанааварод̇хам̣ саад̇хзд̇ваа бад̣̇абхааж̇анийяааважанасса гааран̣ам̣ вад̣̇анд̇о ‘‘саруубзнаа’’д̇иаад̣̇имааха. д̇ад̇т̇а ‘‘пассо ход̇ий’’д̇иаад̣̇ийсу ход̇и-сад̣̇д̣̇о ад̇т̇и-сад̣̇д̣̇зна анаанад̇т̇од̇и ад̇хиббааязна вуд̇д̇ам̣ ‘‘д̣̇уд̇иязна ход̇и-сад̣̇д̣̇знаа’’д̇и. буб̣б̣з адтагат̇аад̇хиббааязна вад̇ваа яат̇аавуд̇д̇асса баал̣иббад̣̇зсасса аббанааварод̇хо самад̇т̇ид̇од̇и ад̇д̇ано ад̇хиббааяам̣ д̣̇ассзнд̇о ‘‘сан̇кзбзнаа’’д̇иаад̣̇имааха.
1. Appetunti nigametuṃ. ‘‘Padabhājanīyaṃ na vutta’’nti padabhājanīyāvacanena appanāvarodhaṃ sādhetvā padabhājanīyāvacanassa kāraṇaṃ vadanto ‘‘sarūpenā’’tiādimāha. Tattha ‘‘phasso hotī’’tiādīsu hoti-saddo atthi-saddena anānatthoti adhippāyena vuttaṃ ‘‘dutiyena hoti-saddenā’’ti. Pubbe aṭṭhakathādhippāyena vatvā yathāvuttassa pāḷippadesassa appanāvarodho samatthitoti attano adhippāyaṃ dassento ‘‘saṅkhepenā’’tiādimāha.
н̃аад̇ум̣ ижчид̇од̇и лагкан̣асса бужчаависаяад̇ам̣ д̣̇ассзд̇ум̣ вуд̇д̇ам̣. язна гзнажийд̇и д̣̇ассанаад̣̇ивисзсаяуд̇д̇зна, ид̇арзна ваа. авад̇т̇аависзсо хи н̃аан̣асса д̣̇ассанад̇уланад̇ийран̣аани. ‘‘ад̣̇идтад̇а’’нд̇иаад̣̇ийсу аахаад̇и яож̇зд̇аб̣б̣ам̣, саб̣б̣ад̇т̇а жа лагкан̣ассаад̇и. д̇ан̃хзд̇т̇а ад̇хигад̇анд̇и. ад̣̇идтам̣ ж̇од̇ийяад̇и зд̇ааяаад̇и зд̇зна д̣̇идтам̣ сам̣санд̣̇ад̇и зд̇ааяаад̇и д̣̇идтасам̣санд̣̇анаа. вимад̇им̣ чинд̣̇ад̇и зд̇ааяаад̇и вимад̇ижчзд̣̇анаад̇и зд̇аасамби сад̣̇д̣̇ад̇т̇о наяад̇о д̣̇ассид̇о, ад̇т̇ад̇о бана саб̣б̣ааби д̇ат̇аабавад̇д̇ам̣ важанам̣, д̇ад̣̇уббаад̣̇аго ваа жид̇д̇уббаад̣̇од̇и взд̣̇ид̇аб̣б̣ам̣.
Ñātuṃicchitoti lakkhaṇassa pucchāvisayataṃ dassetuṃ vuttaṃ. Yena kenacīti dassanādivisesayuttena, itarena vā. Avatthāviseso hi ñāṇassa dassanatulanatīraṇāni. ‘‘Adiṭṭhata’’ntiādīsu āhāti yojetabbaṃ, sabbattha ca lakkhaṇassāti. Tañhettha adhikatanti. Adiṭṭhaṃ jotīyati etāyāti etena diṭṭhaṃ saṃsandati etāyāti diṭṭhasaṃsandanā. Vimatiṃ chindati etāyāti vimaticchedanāti etāsampi saddattho nayato dassito, atthato pana sabbāpi tathāpavattaṃ vacanaṃ, taduppādako vā cittuppādoti veditabbaṃ.
ан̃н̃аман̃н̃ад̇о бабхиж̇ж̇ад̇ийд̇и бабхзд̣̇о, висзсо, д̇зна бабхзд̣̇зна. д̇хаммаанам̣ д̣̇зсананд̇и гин̃жааби самаяабхуумиж̇аад̇иаарамман̣асабхааваад̣̇ивасзна анавасзсаббабхзд̣̇абариг̇г̇ахад̇о нид̣̇д̣̇зсад̣̇зсанаава вад̇д̇ум̣ яуд̇д̇аа, д̇ат̇ааби гусалаад̣̇имаад̇игаабад̣̇асан̇г̇ахид̇ависзсоязва ид̇ха бабхзд̣̇од̇и ад̇хиббзд̇од̇и вуд̇д̇ам̣ ‘‘бабхзд̣̇а…бз… д̣̇зсанам̣ аахаа’’д̇и. д̇знзвааха адтагат̇ааяам̣ ‘‘гусала…бз… д̣̇ийбзд̇ваад̇и пассо ход̇и…бз… авигкзбо ход̇ий’’д̇и (д̇ха. са. адта. д̇хаммуд̣̇д̣̇зсаваара пассабан̃жамагараасиван̣н̣анаа). ‘‘пассо пусанаа’’д̇иаад̣̇инаа жа бабхзд̣̇аванд̇ова саад̇исаяам̣ нид̣̇д̣̇идтаа, на бана маад̇игааяам̣ вуд̇д̇аббабхзд̣̇од̇и бабхзд̣̇аванд̇ад̣̇ассанам̣ нид̣̇д̣̇зсо. ид̣̇ам̣ вуд̇д̇ам̣ ход̇ийд̇иаад̣̇инаа ‘‘бабхзд̣̇з…бз… д̣̇ассанад̇т̇а’’нд̇и имасса ваагяасса бин̣д̣ад̇т̇амааха. яад̣̇и д̇хаммаа зва бужчид̇аб̣б̣аа виссаж̇ж̇зд̇аб̣б̣аа жа, гасмаа гусалаад̇и бабхзд̣̇аважананд̇и ааха ‘‘д̇з банаа’’д̇иаад̣̇и. на хи бабхзд̣̇зхи винаа бабхзд̣̇аванд̇о ад̇т̇ийд̇и. ‘‘имз д̇хаммаа гусалаа’’д̇и зд̇зна ‘‘пассо ход̇ий’’д̇и, ‘‘пассо пусанаа’’д̇и жа аад̣̇инаа уд̣̇д̣̇идтанид̣̇д̣̇идтаанам̣ д̇хаммаанам̣ гусалабхааво виссаж̇ж̇ид̇о ход̇ийд̇и иминаа ад̇хиббааязна ‘‘имз д̇хаммаа гусалаад̇и виссаж̇ж̇анзбий’’д̇и ааха. имасмин̃хийд̇и хи-сад̣̇д̣̇о гааран̣ад̇т̇о. д̇зна яасмаа д̇хаммаава д̣̇зсзд̇аб̣б̣аа, д̇з жа гусалаа…бз… бхзд̣̇аа д̣̇зсзд̇аб̣б̣аа , д̇асмаад̇и звам̣ ваа яож̇анаа. д̇хаммаанамзваад̇и авад̇хааран̣апалам̣ д̣̇ассзд̇и ‘‘авохаарад̣̇зсанаад̇о’’д̇и. ад̇т̇аанан̃жаад̇и жа-сад̣̇д̣̇зна ‘‘пассо пусанаа’’д̇и звамаад̣̇исабхааванируд̇д̇им̣ яат̇аавуд̇д̇ад̇хаммаад̣̇ин̃аан̣ан̃жа сан̇г̇ан̣хаад̇и. ‘‘ид̇и звам̣ аяам̣ бавад̇д̇зд̇аб̣б̣о нивад̇д̇зд̇аб̣б̣о жаа’’д̇и д̇ат̇аа д̇ат̇аа вид̇хзд̇аб̣б̣абхааво ид̇игад̇д̇аб̣б̣ад̇аа, д̇ааяа яуд̇д̇о ид̇и…бз… яуд̇д̇о , д̇асса вид̇хзд̇аб̣б̣ассаад̇и ад̇т̇о, висзсанад̇д̇аа бабхзд̣̇ассаад̇и ад̇хиббааяо.
Aññamaññato pabhijjatīti pabhedo, viseso, tena pabhedena. Dhammānaṃ desananti kiñcāpi samayabhūmijātiārammaṇasabhāvādivasena anavasesappabhedapariggahato niddesadesanāva vattuṃ yuttā, tathāpi kusalādimātikāpadasaṅgahitavisesoyeva idha pabhedoti adhippetoti vuttaṃ ‘‘pabheda…pe… desanaṃ āhā’’ti. Tenevāha aṭṭhakathāyaṃ ‘‘kusala…pe… dīpetvāti phasso hoti…pe… avikkhepo hotī’’ti (dha. sa. aṭṭha. dhammuddesavāra phassapañcamakarāsivaṇṇanā). ‘‘Phasso phusanā’’tiādinā ca pabhedavantova sātisayaṃ niddiṭṭhā, na pana mātikāyaṃ vuttappabhedoti pabhedavantadassanaṃ niddeso. Idaṃ vuttaṃ hotītiādinā ‘‘pabhede…pe… dassanattha’’nti imassa vākyassa piṇḍatthamāha. Yadi dhammā eva pucchitabbā vissajjetabbā ca, kasmā kusalāti pabhedavacananti āha ‘‘te panā’’tiādi. Na hi pabhedehi vinā pabhedavanto atthīti. ‘‘Ime dhammā kusalā’’ti etena ‘‘phasso hotī’’ti, ‘‘phasso phusanā’’ti ca ādinā uddiṭṭhaniddiṭṭhānaṃ dhammānaṃ kusalabhāvo vissajjito hotīti iminā adhippāyena ‘‘ime dhammā kusalāti vissajjanepī’’ti āha. Imasmiñhīti hi-saddo kāraṇattho. Tena yasmā dhammāva desetabbā, te ca kusalā…pe… bhedā desetabbā , tasmāti evaṃ vā yojanā. Dhammānamevāti avadhāraṇaphalaṃ dasseti ‘‘avohāradesanāto’’ti. Atthānañcāti ca-saddena ‘‘phasso phusanā’’ti evamādisabhāvaniruttiṃ yathāvuttadhammādiñāṇañca saṅgaṇhāti. ‘‘Iti evaṃ ayaṃ pavattetabbo nivattetabbo cā’’ti tathā tathā vidhetabbabhāvo itikattabbatā, tāya yutto iti…pe… yutto, tassa vidhetabbassāti attho, visesanattā pabhedassāti adhippāyo.
ид̇игад̇д̇аб̣б̣ад̇ааяуд̇д̇асса висзсид̇аб̣б̣ад̇д̇аа уд̣̇д̣̇зсо д̇хаммаббад̇хаано, д̇асмаа д̇ад̇т̇а д̇хаммасса висзсид̇аб̣б̣ад̇д̇аа ‘‘гусалаа д̇хаммаа’’д̇и аяам̣ бад̣̇аануггамо гад̇о. бужчаа сам̣саяид̇аббад̇хаанаа анижчид̇анижчаяанааяа бавад̇д̇зд̇аб̣б̣ад̇д̇аа. д̇зна саб̣б̣ад̇хаммзсу самуг̇гхаадид̇авижигижчаанусаяаанамби бужчаа д̣̇зсзд̇аб̣б̣абуг̇г̇алаг̇ад̇асам̣саяаабад̇д̇им̣ ад̇д̇ани ааробзд̇ваа сам̣саяаабаннзхи вияа бавад̇д̇ийяад̇ийд̇и д̣̇ассзд̇и. гаамааважараад̣̇ибхзд̣̇о вияа гусалаад̣̇ибхаавзна гусалаад̣̇ибхзд̣̇о д̇хаммабхаавзна нияад̇од̇и д̇хаммаад̇и вуд̇д̇з нижчаяаабхаавад̇о ‘‘гусалаа ну ко агусалаа ну ко’’д̇иаад̣̇инаа сам̣саяо ход̇ийд̇и ааха ‘‘гусалаад̣̇ибхзд̣̇о бана сам̣саяид̇о’’д̇и. д̇хаммабхааво бана гусалаад̣̇ийсу зганд̇игад̇д̇аа нижчид̇оязваад̇и вуд̇д̇ам̣ ‘‘на жа д̇хаммабхааво сам̣саяид̇о’’д̇и. д̇зна сам̣саяид̇о нижчзд̇аб̣б̣абхаавзна бад̇хаано зд̇т̇а гусалабхааво, на д̇ат̇аа д̇хаммабхаавод̇и д̇хаммаа гусалаад̇и вуд̇д̇анд̇и д̣̇ассзд̇и.
Itikattabbatāyuttassa visesitabbattā uddeso dhammappadhāno, tasmā tattha dhammassa visesitabbattā ‘‘kusalā dhammā’’ti ayaṃ padānukkamo kato. Pucchā saṃsayitappadhānā anicchitanicchayanāya pavattetabbattā. Tena sabbadhammesu samugghāṭitavicikicchānusayānampi pucchā desetabbapuggalagatasaṃsayāpattiṃ attani āropetvā saṃsayāpannehi viya pavattīyatīti dasseti. Kāmāvacarādibhedo viya kusalādibhāvena kusalādibhedo dhammabhāvena niyatoti dhammāti vutte nicchayābhāvato ‘‘kusalā nu kho akusalā nu kho’’tiādinā saṃsayo hotīti āha ‘‘kusalādibhedo pana saṃsayito’’ti. Dhammabhāvo pana kusalādīsu ekantikattā nicchitoyevāti vuttaṃ ‘‘na ca dhammabhāvo saṃsayito’’ti. Tena saṃsayito nicchetabbabhāvena padhāno ettha kusalabhāvo, na tathā dhammabhāvoti dhammā kusalāti vuttanti dasseti.
жид̇д̇уббаад̣̇асамаязд̇и жид̇д̇асса уббаж̇ж̇анасамаяз. ‘‘ат̇а виж̇ж̇амаанз’’д̇и зд̇т̇а ат̇а-сад̣̇д̣̇асса ад̇т̇амааха ‘‘бажчаа’’д̇и. бхож̇анаг̇аманаад̣̇ийхи самаязгад̣̇зсанаанад̇д̇ам̣ д̣̇ассзд̇ваа авасзсанаанад̇д̇ам̣ д̣̇ассзд̇ум̣ ‘‘самавааяаад̣̇ий’’д̇и вуд̇д̇ам̣. висзсид̇аад̇и зд̇зна ‘‘нияамид̇аа’’д̇и бад̣̇асса ад̇т̇ам̣ виварад̇и, д̇асмаа яат̇аавуд̇д̇ажид̇д̇ависзсид̇аб̣б̣ад̇о самаяад̇од̇и ад̇т̇о. яат̇аад̇хиббзд̇аананд̇и гаамааважараад̣̇ивисзсаяуд̇д̇аанам̣. ‘‘д̇асмим̣ самаяз’’д̇и жид̇д̇уббад̇д̇ияаа висзсид̇аб̣б̣оби самаяо язна жид̇д̇зна уббаж̇ж̇амаанзна висзсийяад̇и, д̇ассзва жид̇д̇асса ‘‘яасмим̣ самаяз’’д̇и зд̇т̇а саяам̣ висзсанабхаавам̣ аабаж̇ж̇ад̇и. д̇ат̇аа ‘‘д̇асмим̣ самаяз’’д̇и зд̇т̇а висзсанабхууд̇ам̣ жид̇д̇ам̣ ад̇д̇анаа висзсид̇аб̣б̣асамаяасса убагаарад̇т̇ам̣ ‘‘яасмим̣ самаяз…бз… жид̇д̇а’’нд̇и висзсид̇аб̣б̣абхаавам̣ аабаж̇ж̇ад̇и. убагаарод̇и жа ан̃н̃аман̃н̃ам̣ аважчзд̣̇агааважчинд̣̇ид̇аб̣б̣абхаавод̇и д̣̇адтаб̣б̣ам̣. буримад̇хаммаанам̣ бхан̇г̇асамагаалам̣, бхан̇г̇аананд̇арамзва ваа бажчимад̇хаммаанам̣ уббад̇д̇и буримабажчимаанам̣ ниранд̇арад̇аа гзнажи ананд̇арид̇ад̇аа. яааяа бхаавабагкасса б̣алавабхаавзна бадижчаад̣̇ид̇о вияа худ̇ваа абхаавабагко на бан̃н̃ааяад̇ийд̇и д̇ад̣̇звзд̇анд̇и г̇ахан̣авасзна бажураж̇ано вибариязсид̇о, сояамад̇т̇о алаад̇ажаггзна субаагадо ход̇и. д̇знзвааха ‘‘згийбхууд̇аанамиваа’’д̇и . згасамуухавасзна згийбхууд̇аанамива бавад̇д̇и самуухагханад̇аа, д̣̇уб̣б̣ин̃н̃зяяагижжабхзд̣̇авасзна згийбхууд̇аанамива бавад̇д̇и гижжагханад̇аад̇и яож̇анаа. зд̇т̇а жа бажжаяабажжаяуббаннабхаавзна бавад̇д̇амаанаанам̣ анзгзсам̣ д̇хаммаанам̣ гааласабхааваб̣яаабаараарамман̣зхи д̣̇уб̣б̣ин̃н̃зяяабхзд̣̇ад̇ааяа згийбхууд̇аанамива г̇ахзд̇аб̣б̣ад̇аа яат̇ааггамам̣ санд̇ад̇игханад̇аад̣̇аяод̇и д̣̇адтаб̣б̣ам̣.
Cittuppādasamayeti cittassa uppajjanasamaye. ‘‘Atha vijjamāne’’ti ettha atha-saddassa atthamāha ‘‘pacchā’’ti. Bhojanagamanādīhi samayekadesanānattaṃ dassetvā avasesanānattaṃ dassetuṃ ‘‘samavāyādī’’ti vuttaṃ. Visesitāti etena ‘‘niyamitā’’ti padassa atthaṃ vivarati, tasmā yathāvuttacittavisesitabbato samayatoti attho. Yathādhippetānanti kāmāvacarādivisesayuttānaṃ. ‘‘Tasmiṃ samaye’’ti cittuppattiyā visesitabbopi samayo yena cittena uppajjamānena visesīyati, tasseva cittassa ‘‘yasmiṃ samaye’’ti ettha sayaṃ visesanabhāvaṃ āpajjati. Tathā ‘‘tasmiṃ samaye’’ti ettha visesanabhūtaṃ cittaṃ attanā visesitabbasamayassa upakāratthaṃ ‘‘yasmiṃ samaye…pe… citta’’nti visesitabbabhāvaṃ āpajjati. Upakāroti ca aññamaññaṃ avacchedakāvacchinditabbabhāvoti daṭṭhabbaṃ. Purimadhammānaṃ bhaṅgasamakālaṃ, bhaṅgānantarameva vā pacchimadhammānaṃ uppatti purimapacchimānaṃ nirantaratā kenaci anantaritatā. Yāya bhāvapakkhassa balavabhāvena paṭicchādito viya hutvā abhāvapakkho na paññāyatīti tadevetanti gahaṇavasena pacurajano vipariyesito, soyamattho alātacakkena supākaṭo hoti. Tenevāha ‘‘ekībhūtānamivā’’ti . Ekasamūhavasena ekībhūtānamiva pavatti samūhaghanatā, dubbiññeyyakiccabhedavasena ekībhūtānamiva pavatti kiccaghanatāti yojanā. Ettha ca paccayapaccayuppannabhāvena pavattamānānaṃ anekesaṃ dhammānaṃ kālasabhāvabyāpārārammaṇehi dubbiññeyyabhedatāya ekībhūtānamiva gahetabbatā yathākkamaṃ santatighanatādayoti daṭṭhabbaṃ.
сахагаарийгааран̣асанниж̇жхам̣ самзд̇ийд̇и самаяо, самавзд̇ийд̇и ад̇т̇од̇и самаяа-сад̣̇д̣̇асса самавааяад̇т̇ад̇ам̣ д̣̇ассзнд̇о ‘‘бажжаяасаамаг̇г̇и’’нд̇и ааха. самзд̇и самааг̇ажчад̇и зд̇т̇а маг̇г̇аб̣рахмажарияам̣ д̇ад̣̇аад̇хаарабуг̇г̇алзхийд̇и самаяо, кан̣о. самзнд̇и зд̇т̇а, зд̇зна ваа, самааг̇ажчанд̇и д̇хаммаа сахаж̇аад̇ад̇хаммзхи уббаад̣̇аад̣̇ийхи ваад̇и самаяо, гаало. д̇хаммаббавад̇д̇имад̇д̇ад̇ааяа ад̇т̇ад̇о абхууд̇оби хи гаало д̇хаммаббавад̇д̇ияаа ад̇хигаран̣ам̣ гаран̣ам̣ вияа жа баригаббанаамад̇д̇асид̣̇д̇хзна руубзна вохарийяад̇ийд̇и. самам̣, саха ваа аваяаваанам̣ аяанам̣ бавад̇д̇и авадтаананд̇и самаяо, самуухо яат̇аа ‘‘самуд̣̇ааяо’’д̇и. аваяавасахаавадтаанамзва хи самуухо. бажжаяанд̇арасамааг̇амз зд̇и палам̣ зд̇асмаа уббаж̇ж̇ад̇и бавад̇д̇ад̇и жаад̇и самаяо, хзд̇у яат̇аа ‘‘самуд̣̇аяо’’д̇и. самзд̇и самб̣анд̇хо зд̇и сависаяз бавад̇д̇ад̇и, самб̣анд̇хаа ваа аяанд̇и зд̇знаад̇и самаяо, д̣̇идти. д̣̇идтисам̣яож̇анзна хи сад̇д̇аа ад̇ивияа б̣аж̇жханд̇ийд̇и. самаяанам̣ сан̇г̇ад̇и самод̇хаананд̇и самаяо, бадилаабхо. самасса нирод̇хасса яаанам̣, саммаа ваа яаанам̣ абаг̇амо аббавад̇д̇ийд̇и самаяо, бахаанам̣. абхимукабхаавзна саммаа зд̇аб̣б̣о абхисамзд̇аб̣б̣о ад̇хиг̇анд̇аб̣б̣од̇и авибарийд̇о сабхааво абхисамаяо. абхимукабхаавзна саммаа ваа зд̇и г̇ажчад̇и б̣уж̇жхад̇ийд̇и абхисамаяо, авираад̇хзд̇ваа д̇хаммаанам̣ авибарийд̇асабхаавааваб̣од̇хо. зд̇т̇а жа убасаг̇г̇аанам̣ ж̇од̇агамад̇д̇ад̇д̇аа д̇асса д̇асса ад̇т̇асса ваажаго самаяа-сад̣̇д̣̇о зваад̇и саубасаг̇г̇оби вуд̇д̇о. д̇аанзваад̇и бийл̣анаад̣̇ийнзва. вибпааригад̇аа сзрибхаавзна гирияаасу уссааханабаринибпанно.
Sahakārīkāraṇasannijjhaṃ sametīti samayo, samavetīti atthoti samaya-saddassa samavāyatthataṃ dassento ‘‘paccayasāmaggi’’nti āha. Sameti samāgacchati ettha maggabrahmacariyaṃ tadādhārapuggalehīti samayo, khaṇo. Samenti ettha, etena vā, samāgacchanti dhammā sahajātadhammehi uppādādīhi vāti samayo, kālo. Dhammappavattimattatāya atthato abhūtopi hi kālo dhammappavattiyā adhikaraṇaṃ karaṇaṃ viya ca parikappanāmattasiddhena rūpena voharīyatīti. Samaṃ, saha vā avayavānaṃ ayanaṃ pavatti avaṭṭhānanti samayo, samūho yathā ‘‘samudāyo’’ti. Avayavasahāvaṭṭhānameva hi samūho. Paccayantarasamāgame eti phalaṃ etasmā uppajjati pavattati cāti samayo, hetu yathā ‘‘samudayo’’ti. Sameti sambandho eti savisaye pavattati, sambandhā vā ayanti etenāti samayo, diṭṭhi. Diṭṭhisaṃyojanena hi sattā ativiya bajjhantīti. Samayanaṃ saṅgati samodhānanti samayo, paṭilābho. Samassa nirodhassa yānaṃ, sammā vā yānaṃ apagamo appavattīti samayo, pahānaṃ. Abhimukhabhāvena sammā etabbo abhisametabbo adhigantabboti aviparīto sabhāvo abhisamayo. Abhimukhabhāvena sammā vā eti gacchati bujjhatīti abhisamayo, avirādhetvā dhammānaṃ aviparītasabhāvāvabodho. Ettha ca upasaggānaṃ jotakamattattā tassa tassa atthassa vācako samaya-saddo evāti saupasaggopi vutto. Tānevāti pīḷanādīneva. Vipphārikatā seribhāvena kiriyāsu ussāhanaparinipphanno.
гзсужийд̇и агусалавибаагаад̣̇ийсу. кан̣асса асамбхаво д̇зна винаабхаавод̇и ааха ‘‘нануу’’д̇иаад̣̇и. д̇хаммзнзваад̇и висзсанд̇арарахид̇зна. д̇ам̣язва хи авад̇хааран̣зна нивад̇д̇ид̇ам̣ висзсам̣ д̣̇ассзд̇и ‘‘на д̇асса бавад̇д̇ид̇т̇аа’’д̇иаад̣̇инаа. яат̇аа ваа д̇ат̇аа ваад̇и гаалзна лого бавад̇д̇ад̇и нивад̇д̇ад̇ийд̇и ваа гаало наама бхааво вад̇д̇аналагкан̣о бхааваанам̣ бавад̇д̇иогаасад̣̇ааяагод̇и ваа язна д̇зна багаарзна. ид̇ха уд̇д̇амахзд̇уно самбхаво зва над̇т̇ийд̇и хзд̇ухзд̇усаад̇хааран̣ахзд̇ууязва бадисзд̇хзд̇и. д̇аббажжаяад̇ам̣ анзгабажжаяад̇ам̣.
Kesucīti akusalavipākādīsu. Khaṇassa asambhavo tena vinābhāvoti āha ‘‘nanū’’tiādi. Dhammenevāti visesantararahitena. Taṃyeva hi avadhāraṇena nivattitaṃ visesaṃ dasseti ‘‘na tassa pavattitthā’’tiādinā. Yathā vā tathā vāti kālena loko pavattati nivattatīti vā kālo nāma bhāvo vattanalakkhaṇo bhāvānaṃ pavattiokāsadāyakoti vā yena tena pakārena. Idha uttamahetuno sambhavo eva natthīti hetuhetusādhāraṇahetūyeva paṭisedheti. Tappaccayataṃ anekapaccayataṃ.
багад̇иссараваад̣̇аг̇г̇ахан̣ам̣ нид̣̇ассанамад̇д̇ам̣ д̣̇адтаб̣б̣ам̣. баж̇аабад̇ибурисагаалаваад̣̇аад̣̇аяоби ‘‘згагааран̣аваад̣̇о’’д̇и. ваа-сад̣̇д̣̇зна ваа д̇зсамби сан̇г̇ахо д̣̇адтаб̣б̣о. аваяава…бз… д̣̇ааяо вуд̇д̇о аваяавад̇хаммзна самуд̣̇ааяасса абад̣̇исид̇аб̣б̣ад̇д̇аа, яат̇аа ‘‘самам̣ жун̣н̣ам̣, алан̇гад̇о д̣̇звад̣̇ад̇д̇о’’д̇и жа. анибпаад̣̇анам̣ нибпаад̣̇анаабхааво ахзд̇убхааво. нибпаад̣̇зд̇ум̣ асамад̇т̇асса бана бажжаяанд̇араанам̣ сахассзби самааг̇ад̇з над̇т̇зва самад̇т̇ад̇аад̇и ааха ‘‘нибпаад̣̇анасамад̇т̇ассаа’’д̇и. зд̇т̇а жа сахагаарийгааран̣ааяад̇д̇аа палуббаад̣̇анаа бажжаяад̇хаммаанам̣ ан̃н̃аман̃н̃аабзгкаад̇и вуд̇д̇аад̇и абзгкаа вияаад̇и абзгкаа д̣̇адтаб̣б̣аа.
Pakatissaravādaggahaṇaṃ nidassanamattaṃ daṭṭhabbaṃ. Pajāpatipurisakālavādādayopi ‘‘ekakāraṇavādo’’ti. Vā-saddena vā tesampi saṅgaho daṭṭhabbo. Avayava…pe… dāyo vutto avayavadhammena samudāyassa apadisitabbattā, yathā ‘‘samaṃ cuṇṇaṃ, alaṅkato devadatto’’ti ca. Anipphādanaṃ nipphādanābhāvo ahetubhāvo. Nipphādetuṃ asamatthassa pana paccayantarānaṃ sahassepi samāgate nattheva samatthatāti āha ‘‘nipphādanasamatthassā’’ti. Ettha ca sahakārīkāraṇāyattā phaluppādanā paccayadhammānaṃ aññamaññāpekkhāti vuttāti apekkhā viyāti apekkhā daṭṭhabbā.
ниб̣яаабаарзсу аб̣яаавадзсу. згзгасминд̇и адтагат̇ааяам̣ аамзд̣ид̇аважанасса луд̇д̇анид̣̇д̣̇идтад̇ам̣ д̣̇ассзд̇и. сад̇и жа аамзд̣ид̇з сид̣̇д̇хо б̣ахубхаавод̇и. анд̇хасад̇ам̣ бассад̇ийд̇и жа бажжад̇д̇аважанам̣ нид̣̇д̇хааран̣з бхуммавасзна барин̣аамзд̇ваа ‘‘анд̇хасад̇з’’д̇и ааха. д̇ат̇аа згзгасминд̇и иминаа висум̣ асамад̇т̇ад̇аа ж̇од̇ид̇аад̇и анд̇хасад̇ам̣ бассад̇ийд̇и самуд̣̇ид̇ам̣ бассад̇ийд̇и ад̇т̇ад̇о аяамад̇т̇о аабаннод̇и ааха ‘‘анд̇хасад̇ам̣ сахид̇ам̣ бассад̇ийд̇и ад̇хиббааяо’’д̇и. ан̃н̃ат̇аад̇и яат̇ааруд̇авасзна ад̇т̇з г̇аяхамаанз. яасмаа асаа…бз… сид̣̇д̇хо сивигуб̣б̣аханаад̣̇ийсу, д̇асмаа нааяамад̇т̇о саад̇хзд̇аб̣б̣о. ид̣̇аани д̇ассад̇т̇асса субаагадабхаавзна асаад̇хзд̇аб̣б̣ад̇ам̣ д̣̇ассзнд̇о ‘‘вису’’нд̇иаад̣̇имааха.
Nibyāpāresu abyāvaṭesu. Ekekasminti aṭṭhakathāyaṃ āmeḍitavacanassa luttaniddiṭṭhataṃ dasseti. Sati ca āmeḍite siddho bahubhāvoti. Andhasataṃ passatīti ca paccattavacanaṃ niddhāraṇe bhummavasena pariṇāmetvā ‘‘andhasate’’ti āha. Tathā ekekasminti iminā visuṃ asamatthatā jotitāti andhasataṃ passatīti samuditaṃ passatīti atthato ayamattho āpannoti āha ‘‘andhasataṃ sahitaṃ passatīti adhippāyo’’ti. Aññathāti yathārutavasena atthe gayhamāne. Yasmā asā…pe… siddho sivikubbahanādīsu, tasmā nāyamattho sādhetabbo. Idāni tassatthassa supākaṭabhāvena asādhetabbataṃ dassento ‘‘visu’’ntiādimāha.
зд̇знубааязнаад̇и яояам̣ кан̣асан̇каад̇о самаяо гусалуббад̇д̇ияаа д̣̇уллабхабхаавам̣ д̣̇ийбзд̇и. ад̇д̇ано д̣̇уллабхад̇ааяаад̇и зд̇т̇а кан̣ад̇т̇о ваа самаяа-сад̣̇д̣̇о кан̣асан̇каад̇о самаяод̇и ад̇т̇о вуд̇д̇о. зд̇зна убааяабхууд̇зна наяабхууд̇зна. яож̇анаа гаад̇аб̣б̣аад̇и зд̇т̇ааяам̣ яож̇анаа – самавааяа…бз… вуд̇д̇им̣ д̣̇ийбзд̇и саяам̣ бажжаяасаамаг̇г̇ибхаавад̇о, самавааяад̇т̇о ваа самаяа-сад̣̇д̣̇о самавааяасан̇каад̇о самаяо. со яааяа бажжаяасаамаг̇г̇ияаа сад̇ийд̇и имасса ад̇т̇асса багаасанавасзна д̇хаммаанам̣ анзгахзд̇уд̇о вуд̇д̇им̣ д̣̇ийбзд̇и. гаала…бз… барид̇д̇ад̇ам̣ д̣̇ийбзд̇и ад̇д̇ано ад̇ибарид̇д̇ад̇ааяа. самууха…бз… сахуббад̇д̇им̣ д̣̇ийбзд̇и саяам̣ д̇хаммаанам̣ самуд̣̇ааяабхаавад̇о. хзд̇у…бз… вуд̇д̇ид̇ам̣ д̣̇ийбзд̇и сад̇и зва ад̇д̇ани ад̇д̇ано палаанам̣ самбхавад̇од̇и. ад̇т̇абагкз жа сад̣̇д̣̇абагкз жа яасмим̣ ад̇ибарид̇д̇з гаалз яасмим̣ д̇хаммасамуд̣̇ааяз яамхи хзд̇умхи сад̇ийд̇и зд̇асса ад̇т̇асса н̃аабанавасзна д̇ад̣̇аад̇хаарааяа д̇ад̣̇ад̇хийнааяа жа гусалад̇хаммаббавад̇д̇ияаа д̣̇уббадивиж̇жхад̇ам̣ анзгзсам̣ сахуббад̇д̇им̣ бараад̇хийнаббад̇д̇ин̃жа д̣̇ийбзд̇ийд̇и.
Etenupāyenāti yoyaṃ khaṇasaṅkhāto samayo kusaluppattiyā dullabhabhāvaṃ dīpeti. Attano dullabhatāyāti ettha khaṇattho vā samaya-saddo khaṇasaṅkhāto samayoti attho vutto. Etena upāyabhūtena nayabhūtena. Yojanā kātabbāti etthāyaṃ yojanā – samavāya…pe… vuttiṃ dīpeti sayaṃ paccayasāmaggibhāvato, samavāyattho vā samaya-saddo samavāyasaṅkhāto samayo. So yāya paccayasāmaggiyā satīti imassa atthassa pakāsanavasena dhammānaṃ anekahetuto vuttiṃ dīpeti. Kāla…pe… parittataṃ dīpeti attano atiparittatāya. Samūha…pe… sahuppattiṃ dīpeti sayaṃ dhammānaṃ samudāyabhāvato. Hetu…pe… vuttitaṃ dīpeti sati eva attani attano phalānaṃ sambhavatoti. Atthapakkhe ca saddapakkhe ca yasmiṃ atiparitte kāle yasmiṃ dhammasamudāye yamhi hetumhi satīti etassa atthassa ñāpanavasena tadādhārāya tadadhīnāya ca kusaladhammappavattiyā duppaṭivijjhataṃ anekesaṃ sahuppattiṃ parādhīnappattiñca dīpetīti.
д̣̇ал̣хад̇хаммаа д̇хануг̇г̇ахаад̇и д̣̇ал̣хад̇хануно иссаасаа. д̣̇ал̣хад̇хану наама д̣̇висахассат̇аамам̣ вужжад̇и. д̣̇висахассат̇ааманд̇и жа яасса ааробид̇асса ж̇ияааб̣ад̣̇д̇хо лохасийсаад̣̇ийнам̣ бхааро д̣̇ан̣д̣з г̇ахзд̇ваа яаава ган̣д̣аббамаан̣аа угкид̇д̇асса бат̇авид̇о мужжад̇и. сигкид̇аад̇и д̣̇асад̣̇ваад̣̇асавассаани аажарияагулз уг̇г̇ахид̇асиббаа. гад̇ахад̇т̇аад̇и д̇ханусмим̣ жин̣н̣авасийбхааваа. гожи сиббамзва уг̇г̇ан̣хаад̇и, гад̇ахад̇т̇о на ход̇и, имз бана на д̇ат̇аад̇и д̣̇ассзд̇и. гад̇убаасанаад̇и рааж̇агулаад̣̇ийсу д̣̇ассид̇асиббаа. жад̇уд̣̇д̣̇исаа тид̇аа ассууд̇и згасмим̣язва бад̣̇зсз т̇амбхам̣ ваа ругкам̣ ваа яам̣ гин̃жи згам̣язва ниссааяа жад̇уд̣̇д̣̇исаабхимукаа тид̇аа сияунд̇и ад̇т̇о. звам̣ вуд̇д̇аж̇аванабурисассаад̇и на зваруубо бурисо гожи бхууд̇абуб̣б̣о ан̃н̃ад̇ра б̣од̇хисад̇д̇зна. со хи ж̇аванахам̣сагаалз зваруубамагааси. суд̇д̇з бана абхууд̇абаригаббанавасзна убамаамад̇д̇ам̣ аахадам̣. д̇аббарабхааваад̇и д̇аббарабхаавад̇о хзд̇усан̇каад̇асса самаяасса барааяад̇д̇авуд̇д̇ид̣̇ийбанз зганд̇аб̣яаавадасабхаавад̇од̇и ад̇т̇о. яз бана ‘‘д̇аббарабхааво’’д̇и батанд̇и, д̇зсам̣ бажжаяааяад̇д̇авуд̇д̇ид̣̇ийбанад̇о д̇аббарабхааво хзд̇усан̇каад̇асса самаяасса, д̇асмаа д̇асса барааяад̇д̇авуд̇д̇ид̣̇ийбанад̇аа вуд̇д̇аад̇и яож̇анаа. самуд̣̇ааяааяад̇д̇ад̇аад̣̇ийбанз д̇аббаро, д̇ад̣̇згад̣̇зсааяад̇д̇ад̇аад̣̇ийбанз д̇аббаро на ход̇ийд̇и ааха ‘‘ад̇аббарабхаавад̇о’’д̇и.
Daḷhadhammā dhanuggahāti daḷhadhanuno issāsā. Daḷhadhanu nāma dvisahassathāmaṃ vuccati. Dvisahassathāmanti ca yassa āropitassa jiyābaddho lohasīsādīnaṃ bhāro daṇḍe gahetvā yāva kaṇḍappamāṇā ukkhittassa pathavito muccati. Sikkhitāti dasadvādasavassāni ācariyakule uggahitasippā. Katahatthāti dhanusmiṃ ciṇṇavasībhāvā. Koci sippameva uggaṇhāti, katahattho na hoti, ime pana na tathāti dasseti. Katupāsanāti rājakulādīsu dassitasippā. Catuddisā ṭhitā assūti ekasmiṃyeva padese thambhaṃ vā rukkhaṃ vā yaṃ kiñci ekaṃyeva nissāya catuddisābhimukhā ṭhitā siyunti attho. Evaṃ vuttajavanapurisassāti na evarūpo puriso koci bhūtapubbo aññatra bodhisattena. So hi javanahaṃsakāle evarūpamakāsi. Sutte pana abhūtaparikappanavasena upamāmattaṃ āhaṭaṃ. Tapparabhāvāti tapparabhāvato hetusaṅkhātassa samayassa parāyattavuttidīpane ekantabyāvaṭasabhāvatoti attho. Ye pana ‘‘tapparabhāvo’’ti paṭhanti, tesaṃ paccayāyattavuttidīpanato tapparabhāvo hetusaṅkhātassa samayassa, tasmā tassa parāyattavuttidīpanatā vuttāti yojanā. Samudāyāyattatādīpane tapparo, tadekadesāyattatādīpane tapparo na hotīti āha ‘‘atapparabhāvato’’ti.
нану жа д̇ам̣ д̇ам̣ убаад̣̇ааяа бан̃н̃ад̇д̇о гаало вохаарамад̇д̇аго, со гат̇ам̣ аад̇хааро д̇ад̇т̇а вуд̇д̇ад̇хаммаананд̇и ааха ‘‘гаалоби хий’’д̇иаад̣̇и. яад̣̇и гирияааяа гирияанд̇аралагкан̣ам̣ бхаавзнабхаавалагкан̣ам̣, гаа банзд̇т̇а лагкан̣агирияаад̇и ааха ‘‘ихаабий’’д̇иаад̣̇и. лагкан̣абхууд̇абхааваяуд̇д̇од̇и ид̇и-сад̣̇д̣̇о хзд̇уад̇т̇о. ид̣̇ам̣ вуд̇д̇ам̣ ход̇и – яасмаа сад̇д̇аасан̇каад̇ааяа лагкан̣агирияааяа яуд̇д̇о самаяо, д̇асмаа д̇ад̇т̇а бхууминид̣̇д̣̇зсод̇и.
Nanu ca taṃ taṃ upādāya paññatto kālo vohāramattako, so kathaṃ ādhāro tattha vuttadhammānanti āha ‘‘kālopi hī’’tiādi. Yadi kiriyāya kiriyantaralakkhaṇaṃ bhāvenabhāvalakkhaṇaṃ, kā panettha lakkhaṇakiriyāti āha ‘‘ihāpī’’tiādi. Lakkhaṇabhūtabhāvayuttoti iti-saddo hetuattho. Idaṃ vuttaṃ hoti – yasmā sattāsaṅkhātāya lakkhaṇakiriyāya yutto samayo, tasmā tattha bhūminiddesoti.
уд̣̇д̣̇аанад̇од̇и яад̣̇и сан̇кзбад̇од̇и ад̇т̇о. нану жа авасидтагилзсаад̣̇аяо вияа гилзсагаамоби ассаад̣̇зд̇аб̣б̣ад̇ааяа вад̇т̇угаамз самаваруд̣̇д̇хо н̃аан̣ам̣ вияа н̃зяязд̇и сан̇кзбад̇о згоязва гаамо сияаад̇и ануяог̇ам̣ санд̇хааяааха ‘‘гилзсагаамо’’д̇иаад̣̇и. сахид̇ассаад̇и висаяависаяибхаавзна авадтид̇асса. ‘‘уд̣̇д̣̇аанад̇о д̣̇вз гаамаа’’д̇и гин̃жааби саб̣б̣з гаамаа уд̣̇д̣̇идтаа, ‘‘жад̇уннам̣ абааяаана’’нд̇иаад̣̇инаа бана висаяасса висзсид̇ад̇д̇аа орамбхааг̇ияагилзсабхууд̇о гаамарааг̇о ид̇ха гилзсагаамод̇и г̇ахид̇од̇и ‘‘д̇знаа’’д̇иаад̣̇имааха. жод̣̇аго д̇асса ад̇хиббааяам̣ аж̇аананд̇о ‘‘нану жаа’’д̇иаад̣̇инаа ануяун̃ж̇ад̇и. ид̇аро бана ‘‘б̣ахалагилзсассаа’’д̇иаад̣̇инаа ад̇д̇ано ад̇хиббааяам̣ виварад̇и.
Uddānatoti yadi saṅkhepatoti attho. Nanu ca avasiṭṭhakilesādayo viya kilesakāmopi assādetabbatāya vatthukāme samavaruddho ñāṇaṃ viya ñeyyeti saṅkhepato ekoyeva kāmo siyāti anuyogaṃ sandhāyāha ‘‘kilesakāmo’’tiādi. Sahitassāti visayavisayibhāvena avaṭṭhitassa. ‘‘Uddānato dve kāmā’’ti kiñcāpi sabbe kāmā uddiṭṭhā, ‘‘catunnaṃ apāyāna’’ntiādinā pana visayassa visesitattā orambhāgiyakilesabhūto kāmarāgo idha kilesakāmoti gahitoti ‘‘tenā’’tiādimāha. Codako tassa adhippāyaṃ ajānanto ‘‘nanu cā’’tiādinā anuyuñjati. Itaro pana ‘‘bahalakilesassā’’tiādinā attano adhippāyaṃ vivarati.
гаамааважарад̇хаммзсу вимаанагаббаругкаад̣̇иббагаарзсу барид̇д̇агусалаад̣̇ийсу ваа. нану жа ‘‘жад̇уннам̣ абааяаана’’нд̇и висаяасса висзсид̇ад̇д̇аа руубааруубад̇хаад̇уг̇г̇ахан̣асса асамбхавоязваад̇и? на, ‘‘уд̣̇д̣̇аанад̇о д̣̇вз гаамаа’’д̇и ниравасзсад̇о гаамаанам̣ уд̣̇д̣̇идтад̇д̇аа. уд̣̇д̣̇идтзби хи гаамасамуд̣̇ааяз яат̇аа д̇ад̣̇згад̣̇зсова г̇аяхад̇и, д̇ам̣ д̣̇ассзд̇ум̣ ‘‘д̣̇увид̇хо’’д̇иаад̣̇имааха. гаамарааг̇о бан̃жагаамаг̇ун̣иго рааг̇о. гаамад̇ан̣хаа гаамааважарад̇хаммависаяаа д̇ан̣хаа. нирод̇хад̇ан̣хаа ужчзд̣̇ад̣̇идтисахаг̇ад̇о рааг̇о. ид̇хаад̇и згаад̣̇асавид̇хз бад̣̇зсз. яад̣̇и анавасзсаббавад̇д̇и ад̇хиббзд̇аа, ‘‘д̣̇увид̇хобзсо’’д̇и на вад̇д̇аб̣б̣ам̣ вад̇т̇угаамзгад̣̇зсасса ид̇ха аббавад̇д̇анад̇од̇и ануяог̇зна язбхуяяабхаавад̇о анавасзсо вияа анавасзсод̇и ваа ад̇т̇о г̇ахзд̇аб̣б̣од̇и д̣̇ассзнд̇о ‘‘вад̇т̇угаамобий’’д̇иаад̣̇имааха. анавасзсасад̣̇исад̇аа жзд̇т̇а сабхаавабхиннасса гассажи анавасзсад̇о. зван̃жа гад̇ваад̇и гилзсагаамавад̇т̇угаамаанам̣ анавасзсабарибун̣н̣абхаавзна абхилагкид̇ад̇д̇аад̇и ад̇т̇о. жаасад̣̇д̣̇асса рассад̇д̇ам̣ гад̇анд̇и гаамааважарасад̣̇д̣̇з хзд̇угад̇д̇уад̇т̇о анд̇онийд̇од̇и д̣̇ассзд̇и.
Kāmāvacaradhammesu vimānakapparukkhādippakāresu parittakusalādīsu vā. Nanu ca ‘‘catunnaṃ apāyāna’’nti visayassa visesitattā rūpārūpadhātuggahaṇassa asambhavoyevāti? Na, ‘‘uddānato dve kāmā’’ti niravasesato kāmānaṃ uddiṭṭhattā. Uddiṭṭhepi hi kāmasamudāye yathā tadekadesova gayhati, taṃ dassetuṃ ‘‘duvidho’’tiādimāha. Kāmarāgo pañcakāmaguṇiko rāgo. Kāmataṇhā kāmāvacaradhammavisayā taṇhā. Nirodhataṇhā ucchedadiṭṭhisahagato rāgo. Idhāti ekādasavidhe padese. Yadi anavasesappavatti adhippetā, ‘‘duvidhopeso’’ti na vattabbaṃ vatthukāmekadesassa idha appavattanatoti anuyogena yebhuyyabhāvato anavaseso viya anavasesoti vā attho gahetabboti dassento ‘‘vatthukāmopī’’tiādimāha. Anavasesasadisatā cettha sabhāvabhinnassa kassaci anavasesato. Evañca katvāti kilesakāmavatthukāmānaṃ anavasesaparipuṇṇabhāvena abhilakkhitattāti attho. Cāsaddassa rassattaṃ katanti kāmāvacarasadde hetukattuattho antonītoti dasseti.
висаязд̇и вад̇т̇усмим̣ абхид̇хзяяад̇т̇зд̇и ад̇т̇о. нимид̇д̇авирахзд̇и зд̇зна рул̣хийсу гирияаа вибхааг̇агаран̣ааяа, на ад̇д̇агирияааяаад̇и д̣̇ассзд̇и. гусалабхааванд̇и ж̇аад̇агаб̣аахид̇игасуд̇д̇аабхид̇хаммабарияааязна гат̇ид̇ам̣ гусалад̇д̇ам̣. д̇ассаад̇и сукавибаагабхаавасса. д̇асса бажжубадтаанад̇ам̣ вад̇д̇угаамад̇ааяаад̇и зд̇зна ‘‘анаваж̇ж̇асукавибаагалагкан̣а’’нд̇и зд̇т̇а сукасад̣̇д̣̇о идтабарияааяо вуд̇д̇од̇и д̣̇ассзд̇и. сан̃н̃аабан̃н̃аагижжам̣ сан̃н̃аан̣агаран̣абадивиж̇жханаани, д̇ад̣̇убхаяавид̇хураа аарамман̣уубалад̣̇д̇хи ‘‘виж̇аанаад̇ий’’д̇и иминаа вужжад̇ийд̇и ааха ‘‘сан̃н̃аа…бз… г̇ахан̣а’’нд̇и. нану жа пассаад̣̇игижжад̇оби висидтагижжам̣ жид̇д̇анд̇и? сажжамзд̇ам̣, со бана висзсо на д̇ат̇аа д̣̇ураваб̣од̇хо, яат̇аа сан̃н̃аабан̃н̃аавин̃н̃аан̣аананд̇и сан̃н̃аабан̃н̃аагижжависидталагкан̣ад̇ааяа вин̃н̃аан̣алагкан̣амааха. ананд̇арад̇хаммаанам̣ баг̇ун̣аб̣алавабхаавасса гааран̣абхаавзна бавад̇д̇амаано санд̇аанам̣ жинод̇и наама. д̇ат̇аабавад̇д̇и жа аасзванабажжаяабхаавод̇и ааха ‘‘аасзванабажжаяабхаавзна жинод̇ий’’д̇и.
Visayeti vatthusmiṃ abhidheyyattheti attho. Nimittaviraheti etena ruḷhīsu kiriyā vibhāgakaraṇāya, na attakiriyāyāti dasseti. Kusalabhāvanti jātakabāhitikasuttaabhidhammapariyāyena kathitaṃ kusalattaṃ. Tassāti sukhavipākabhāvassa. Tassa paccupaṭṭhānataṃ vattukāmatāyāti etena ‘‘anavajjasukhavipākalakkhaṇa’’nti ettha sukhasaddo iṭṭhapariyāyo vuttoti dasseti. Saññāpaññākiccaṃ saññāṇakaraṇapaṭivijjhanāni, tadubhayavidhurā ārammaṇūpaladdhi ‘‘vijānātī’’ti iminā vuccatīti āha ‘‘saññā…pe… gahaṇa’’nti. Nanu ca phassādikiccatopi visiṭṭhakiccaṃ cittanti? Saccametaṃ, so pana viseso na tathā duravabodho, yathā saññāpaññāviññāṇānanti saññāpaññākiccavisiṭṭhalakkhaṇatāya viññāṇalakkhaṇamāha. Anantaradhammānaṃ paguṇabalavabhāvassa kāraṇabhāvena pavattamāno santānaṃ cinoti nāma. Tathāpavatti ca āsevanapaccayabhāvoti āha ‘‘āsevanapaccayabhāvena cinotī’’ti.
жид̇д̇агад̇амзваад̇и абхисан̇кааравин̃н̃аан̣агад̇амзва. наанад̇д̇аад̣̇ийнам̣ вавад̇т̇аананд̇и зд̇т̇а вавад̇т̇аанам̣ бажжзгам̣ яож̇зд̇аб̣б̣ам̣. вавад̇т̇аанам̣ барижчзд̣̇о асан̇гарабхааво. д̇зна жа д̇хаммо нижчид̇о наама ход̇ийд̇и ааха ‘‘нижчид̇ад̇аа’’д̇и. лин̇г̇анаанад̇д̇аад̣̇ийнийд̇и зд̇т̇а ид̇т̇ибурисасан̣таанавасзна лин̇г̇анаанад̇д̇ам̣. д̣̇звамануссад̇иражчаанаад̣̇ивасзна ид̇т̇илин̇г̇асса бут̇уд̇д̇ам̣, д̇ат̇аа бурисалин̇г̇асса. д̣̇зваад̣̇ибхзд̣̇з ид̇т̇илин̇г̇з бажжзгам̣ наанад̇д̇агааяад̇аасан̇каад̇асса ан̃н̃аман̃н̃ависад̣̇исасабхаавасса д̣̇зсаад̣̇ибхзд̣̇абхиннасса жа висзсасса васзна бабхзд̣̇о взд̣̇ид̇аб̣б̣о. д̇ат̇аа бурисалин̇г̇з. лин̇г̇аниб̣б̣ад̇д̇агасса ваа гаммасса яат̇аавуд̇д̇анаанад̇д̇аад̣̇ивасзна лин̇г̇асса наанад̇д̇аад̣̇ийни яож̇зд̇аб̣б̣аани. лин̇г̇анаанад̇д̇аад̣̇ийсу бавад̇д̇ад̇д̇аа сан̃н̃аад̣̇ийнам̣ наанад̇д̇аад̣̇ийни. д̇знзвааха ‘‘гамманаанад̇д̇аад̣̇ийхи ниб̣б̣ад̇д̇аани хи д̇ааний’’д̇и. абад̣̇аад̣̇инаанаагаран̣ад̣̇ассанзна лин̇г̇анаанад̇д̇ам̣ д̣̇ассид̇ам̣. д̇асмин̃жа д̣̇ассид̇з сан̃н̃аанаанад̇д̇аад̣̇аяо д̣̇ассид̇аа зваад̇и аавад̇д̇ад̇и бхаважагганд̇и д̣̇ассзнд̇о ааха ‘‘анааг̇а…бз… гхадзнд̇о’’д̇и. ид̇т̇илин̇г̇абурисалин̇г̇аад̣̇и вин̃н̃аан̣аад̇хидтид̇асса руубагканд̇хасса саннивзсависзсо. сан̃н̃аасийсзна жад̇д̇ааро канд̇хаа вуд̇д̇аа. вохаараважанзна жа бан̃жаннам̣ канд̇хаанам̣ вохарид̇аб̣б̣абхаавзна бавад̇д̇и д̣̇ийбид̇аа, яаа саа д̇ан̣хаад̣̇идтиабхинивзсахзд̇ууд̇и имамад̇т̇ам̣ д̣̇ассзнд̇о ‘‘лин̇г̇аад̣̇и…бз… яосаанааний’’д̇и ааха.
Cittakatamevāti abhisaṅkhāraviññāṇakatameva. Nānattādīnaṃ vavatthānanti ettha vavatthānaṃ paccekaṃ yojetabbaṃ. Vavatthānaṃ paricchedo asaṅkarabhāvo. Tena ca dhammo nicchito nāma hotīti āha ‘‘nicchitatā’’ti. Liṅganānattādīnīti ettha itthipurisasaṇṭhānavasena liṅganānattaṃ. Devamanussatiracchānādivasena itthiliṅgassa puthuttaṃ, tathā purisaliṅgassa. Devādibhede itthiliṅge paccekaṃ nānattakāyatāsaṅkhātassa aññamaññavisadisasabhāvassa desādibhedabhinnassa ca visesassa vasena pabhedo veditabbo. Tathā purisaliṅge. Liṅganibbattakassa vā kammassa yathāvuttanānattādivasena liṅgassa nānattādīni yojetabbāni. Liṅganānattādīsu pavattattā saññādīnaṃ nānattādīni. Tenevāha ‘‘kammanānattādīhi nibbattāni hi tānī’’ti. Apadādinānākaraṇadassanena liṅganānattaṃ dassitaṃ. Tasmiñca dassite saññānānattādayo dassitā evāti āvattati bhavacakkanti dassento āha ‘‘anāga…pe… ghaṭento’’ti. Itthiliṅgapurisaliṅgādi viññāṇādhiṭṭhitassa rūpakkhandhassa sannivesaviseso. Saññāsīsena cattāro khandhā vuttā. Vohāravacanena ca pañcannaṃ khandhānaṃ voharitabbabhāvena pavatti dīpitā, yā sā taṇhādiṭṭhiabhinivesahetūti imamatthaṃ dassento ‘‘liṅgādi…pe… yosānānī’’ti āha.
‘‘яз гзжи, бхигкавз, д̇хаммаа агусалаа агусалабхааг̇ияаа, саб̣б̣зд̇з манобуб̣б̣ан̇г̇амаа’’д̇и (а. ни. 1.56-57), ‘‘манобуб̣б̣ан̇г̇амаа д̇хаммаа’’д̇и (д̇ха. ба. 1, 2) жа звамаад̣̇иважанад̇о жид̇д̇ахзд̇угам̣ гамманд̇и ааха ‘‘гамман̃хи жид̇д̇ад̇о ниб̣б̣ад̇д̇а’’нд̇и. яат̇аасан̇кяанд̇и гаммад̇о лин̇г̇ам̣ лин̇г̇ад̇о сан̃н̃аад̇и ад̇т̇о. на буримавигаббз вияа гаммад̇о лин̇г̇асан̃н̃аа лин̇г̇ад̇о лин̇г̇асан̃н̃аад̇и убхаяад̇о убхаяаббавад̇д̇ид̣̇ассанавасзна. ‘‘бхзд̣̇ам̣ г̇ажчанд̇и ид̇т̇ааяам̣ бурисод̇и ваа’’д̇и бхзд̣̇асса висзсид̇ад̇д̇аа ид̇т̇аад̣̇ибхаавзна вохарид̇аб̣б̣абхааво ид̇ха бхзд̣̇од̇и ‘‘ид̇т̇ибурисаад̣̇ивохаарам̣ г̇ажчанд̇ий’’д̇и вуд̇д̇ам̣. ад̣̇д̇хад̣̇ваяавасзнаад̇и ад̇ийд̇абажжуббаннад̣̇д̇хад̣̇ваяавасзна. г̇ун̣аабхиб̣яаабанам̣ гид̇д̇ийд̇и ааха ‘‘бад̇т̇адаяасад̇а’’нд̇и. гамманаанаагаран̣зна винаа гамманиб̣б̣ад̇д̇анаанаагааран̣аабхаавад̇о ‘‘гаммаж̇зхи…бз… наанаагаран̣а’’нд̇и вуд̇д̇ам̣. авибажжаногаасо адтаанабхууд̇аа, г̇ад̇игаалоби ваа. гаамааважарам̣ абхисан̇кааравин̃н̃аан̣ам̣ руубад̇хаад̇уяаа жагкувин̃н̃аан̣аад̣̇им̣ ж̇анзд̇ваа аногаасад̇ааяа д̇ад̣̇аарамман̣ам̣ аж̇анзнд̇ам̣ зд̇т̇а нид̣̇ассзд̇аб̣б̣ам̣. згажжажид̇д̇агаран̣асса ад̇хиббзд̇ад̇д̇аа жагкаад̣̇ивзгаллзна жагкувин̃н̃аан̣аад̣̇ийнам̣ аж̇анагам̣ гаммавин̃н̃аан̣ам̣ авасзсабажжаяавигалз аног̇ад̇хам̣ д̣̇адтаб̣б̣ам̣. д̇ад̣̇аби гаалаг̇ад̇ибаяог̇аад̣̇ийд̇и аад̣̇и-сад̣̇д̣̇зна сан̇г̇ахид̇анд̇и. зд̇т̇а жа ‘‘сахагаарийгааран̣авигалам̣ вибаагасса ажжанд̇ам̣ огаасамзва на лабхад̇и, ид̇арам̣ вибаагзгад̣̇зсасса лад̣̇д̇хогаасанд̇и, ид̣̇амзд̇зсам̣ наанад̇д̇а’’нд̇и вад̣̇анд̇и, д̇ам̣ вибаагасса огаасалаабхз сад̇и сахааяагааран̣авигалад̇аава над̇т̇ийд̇и ад̇хиббааязна вуд̇д̇ам̣.
‘‘Ye keci, bhikkhave, dhammā akusalā akusalabhāgiyā, sabbete manopubbaṅgamā’’ti (a. ni. 1.56-57), ‘‘manopubbaṅgamā dhammā’’ti (dha. pa. 1, 2) ca evamādivacanato cittahetukaṃ kammanti āha ‘‘kammañhi cittato nibbatta’’nti. Yathāsaṅkhyanti kammato liṅgaṃ liṅgato saññāti attho. Na purimavikappe viya kammato liṅgasaññā liṅgato liṅgasaññāti ubhayato ubhayappavattidassanavasena. ‘‘Bhedaṃ gacchanti itthāyaṃ purisoti vā’’ti bhedassa visesitattā itthādibhāvena voharitabbabhāvo idha bhedoti ‘‘itthipurisādivohāraṃ gacchantī’’ti vuttaṃ. Addhadvayavasenāti atītapaccuppannaddhadvayavasena. Guṇābhibyāpanaṃ kittīti āha ‘‘patthaṭayasata’’nti. Kammanānākaraṇena vinā kammanibbattanānākāraṇābhāvato ‘‘kammajehi…pe… nānākaraṇa’’nti vuttaṃ. Avipaccanokāso aṭṭhānabhūtā, gatikālopi vā. Kāmāvacaraṃ abhisaṅkhāraviññāṇaṃ rūpadhātuyā cakkhuviññāṇādiṃ janetvā anokāsatāya tadārammaṇaṃ ajanentaṃ ettha nidassetabbaṃ. Ekaccacittakaraṇassa adhippetattā cakkhādivekallena cakkhuviññāṇādīnaṃ ajanakaṃ kammaviññāṇaṃ avasesapaccayavikale anogadhaṃ daṭṭhabbaṃ. Tadapi kālagatipayogādīti ādi-saddena saṅgahitanti. Ettha ca ‘‘sahakārīkāraṇavikalaṃ vipākassa accantaṃ okāsameva na labhati, itaraṃ vipākekadesassa laddhokāsanti, idametesaṃ nānatta’’nti vadanti, taṃ vipākassa okāsalābhe sati sahāyakāraṇavikalatāva natthīti adhippāyena vuttaṃ.
бхавад̇у д̇аава бхавид̇ваа абаг̇ад̇ам̣ бхууд̇аабаг̇ад̇ам̣, анубхавид̇ваа абаг̇ад̇ам̣ бана гат̇анд̇и ааха ‘‘анубхууд̇абхууд̇аа’’д̇иаад̣̇и. д̇зна анубхууд̇а-сад̣̇д̣̇зна яо ад̇т̇о вужжад̇и, д̇асса бхууд̇а-сад̣̇д̣̇оязва ваажаго, на ану-сад̣̇д̣̇о, ану-сад̣̇д̣̇о бана ж̇од̇агод̇и д̣̇ассзд̇и. саакаабхан̇г̇асад̣̇исаа хи нибаад̇обасаг̇г̇аад̇и. гирияаависзсагад̇д̇ан̃жа убасаг̇г̇аанам̣ анзгад̇т̇ад̇д̇аа д̇хаад̇усад̣̇д̣̇аанам̣ д̇зхи вад̇д̇аб̣б̣ависзсасса ж̇од̇анабхаавзнзва аважчинд̣̇ананд̇и яад̇д̇агаа д̇хаад̇усад̣̇д̣̇зна абхид̇хаад̇аб̣б̣аа ад̇т̇ависзсаа, д̇зсам̣ яам̣ сааман̃н̃ам̣ ависзсо, д̇асса висзсз авадтаабанам̣ д̇асса д̇асса висзсасса ж̇од̇анамзваад̇и ааха ‘‘сааман̃н̃а…бз… висзсийяад̇ий’’д̇и. анубхууд̇а-сад̣̇д̣̇о б̣ахулам̣ гаммад̇т̇з зва д̣̇иссад̇ийд̇и д̇асса ид̇ха гад̇д̇уад̇т̇аваажид̇ам̣ д̣̇ассзд̇ум̣ ‘‘анубхууд̇асад̣̇д̣̇о жаа’’д̇иаад̣̇имааха. сад̇иби саб̣б̣зсам̣ жид̇д̇уббаад̣̇аанам̣ савзд̣̇аяид̇абхаавад̇о аарамман̣аанубхаванз, савибаллаасз бана санд̇аанз жид̇д̇аабхисан̇кааравасзна бавад̇д̇ид̇о аб̣яаагад̇зхи висидто гусалаагусалаанам̣ саад̇исаяо висаяаанубхаванаагаарод̇и аяамад̇т̇о ид̇хаад̇хиббзд̇од̇и д̣̇ассзнд̇о ‘‘вад̇д̇ум̣ ад̇хиббааяавасзнаа’’д̇и ааха. бхууд̇аабаг̇ад̇абхааваабхид̇хаанаад̇хиббааязнаад̇и гусалаагусаласса аагад̣дханубааяамааха.
Bhavatu tāva bhavitvā apagataṃ bhūtāpagataṃ, anubhavitvā apagataṃ pana kathanti āha ‘‘anubhūtabhūtā’’tiādi. Tena anubhūta-saddena yo attho vuccati, tassa bhūta-saddoyeva vācako, na anu-saddo, anu-saddo pana jotakoti dasseti. Sākhābhaṅgasadisā hi nipātopasaggāti. Kiriyāvisesakattañca upasaggānaṃ anekatthattā dhātusaddānaṃ tehi vattabbavisesassa jotanabhāveneva avacchindananti yattakā dhātusaddena abhidhātabbā atthavisesā, tesaṃ yaṃ sāmaññaṃ aviseso, tassa visese avaṭṭhāpanaṃ tassa tassa visesassa jotanamevāti āha ‘‘sāmañña…pe… visesīyatī’’ti. Anubhūta-saddo bahulaṃ kammatthe eva dissatīti tassa idha kattuatthavācitaṃ dassetuṃ ‘‘anubhūtasaddo cā’’tiādimāha. Satipi sabbesaṃ cittuppādānaṃ savedayitabhāvato ārammaṇānubhavane, savipallāse pana santāne cittābhisaṅkhāravasena pavattito abyākatehi visiṭṭho kusalākusalānaṃ sātisayo visayānubhavanākāroti ayamattho idhādhippetoti dassento ‘‘vattuṃ adhippāyavasenā’’ti āha. Bhūtāpagatabhāvābhidhānādhippāyenāti kusalākusalassa ākaḍḍhanupāyamāha.
уббад̇ид̇агижжанибпаад̣̇анад̇о уббад̇ид̇асад̣̇исад̇д̇аа ‘‘уббад̇ид̇а’’нд̇и вуд̇д̇ам̣. уббаж̇ж̇ид̇ум̣ аарад̣̇д̇ход̇и анааг̇ад̇ассаби д̇ассзва уббанна-сад̣̇д̣̇зна вуд̇д̇ад̇ааяа гааран̣амааха. зд̇т̇а жа раж̇ж̇анаад̣̇ивасзна аарамман̣арасаанубхаванам̣ саад̇исаяанд̇и агусалан̃жа гусалан̃жа уббаж̇ж̇ид̇ваа нируд̣̇д̇хад̇аасааман̃н̃зна ‘‘саб̣б̣асан̇кад̇ам̣ бхууд̇аабаг̇ад̇а’’нд̇и вуд̇д̇ам̣. саммохавинод̣̇анияам̣ бана ‘‘вибаагаанубхаванавасзна д̇ад̣̇аарамман̣ам̣. авибаггавибаагасса саб̣б̣ат̇аа авиг̇ад̇ад̇д̇аа бхавид̇ваа виг̇ад̇ад̇аамад̇д̇авасзнагамман̃жа бхууд̇аабаг̇ад̇а’’нд̇и вуд̇д̇ам̣. д̇знзва д̇ад̇т̇а огаасагад̇уббаннанд̇и вибаагамзвааха. ид̇ха бана гаммамбийд̇и. аарамман̣агаран̣авасзна бхавад̇и зд̇т̇а гилзсаж̇аад̇анд̇и бхуумийд̇и вуд̇д̇аа убаад̣̇аанагканд̇хаа. аг̇г̇иаахид̇о вияаад̇и бхуумилад̣̇д̇ханд̇и вад̇д̇аб̣б̣ад̇ааяа убааяам̣ д̣̇ассзд̇и. зд̇знаад̇и гаммам̣. зд̇ассаад̇и вибааго вуд̇д̇од̇и д̣̇адтаб̣б̣ам̣.
Uppatitakiccanipphādanato uppatitasadisattā ‘‘uppatita’’nti vuttaṃ. Uppajjituṃ āraddhoti anāgatassapi tasseva uppanna-saddena vuttatāya kāraṇamāha. Ettha ca rajjanādivasena ārammaṇarasānubhavanaṃ sātisayanti akusalañca kusalañca uppajjitvā niruddhatāsāmaññena ‘‘sabbasaṅkhataṃ bhūtāpagata’’nti vuttaṃ. Sammohavinodaniyaṃ pana ‘‘vipākānubhavanavasena tadārammaṇaṃ. Avipakkavipākassa sabbathā avigatattā bhavitvā vigatatāmattavasenakammañca bhūtāpagata’’nti vuttaṃ. Teneva tattha okāsakatuppannanti vipākamevāha. Idha pana kammampīti. Ārammaṇakaraṇavasena bhavati ettha kilesajātanti bhūmīti vuttā upādānakkhandhā. Aggiāhito viyāti bhūmiladdhanti vattabbatāya upāyaṃ dasseti. Etenāti kammaṃ. Etassāti vipāko vuttoti daṭṭhabbaṃ.
авигкамбхид̇ад̇д̇аад̇и авинод̣̇ид̇ад̇д̇аа. сабхуумияанд̇и сагабхуумияам̣. вижчинд̣̇ид̇ваад̇и буна уббаж̇ж̇ид̇ум̣ ад̣̇ад̇ваа. кан̣ад̇д̇аязгад̣̇зсаг̇ад̇ам̣ кан̣ад̇д̇аяаг̇ад̇анд̇и вуд̇д̇анд̇и яат̇аавуд̇д̇асса уд̣̇аахаран̣асса убажаарабхаавамааха. д̇зна уббаннаа д̇хаммаа бажжуббаннаа д̇хаммаад̇и ид̣̇амзд̇т̇а уд̣̇аахаран̣ам̣ яуд̇д̇анд̇и д̣̇ассзд̇и. бад̇хаанзнаад̇и бад̇хаанабхаавзна. д̣̇зсанааяа жид̇д̇ам̣ буб̣б̣ан̇г̇аманд̇и логияад̇хаммз д̣̇зсзд̇аб̣б̣з жид̇д̇ам̣ буб̣б̣ан̇г̇амам̣ гад̇ваа д̣̇зсанаа бхаг̇авад̇аа ужид̇аад̇и д̣̇ассзд̇и. д̇хаммасабхаавам̣ ваа санд̇хааяаад̇и логияад̇хаммаанам̣ аяам̣ сабхааво яад̣̇ид̣̇ам̣ д̇з жид̇д̇аж̇здтагаа жид̇д̇абуб̣б̣ан̇г̇амаа бавад̇д̇анд̇ийд̇и д̣̇ассзд̇и. д̇зна д̇зсам̣ д̇ат̇аад̣̇зсанааяа гааран̣амааха, саб̣б̣з агусалаа д̇хаммаа жид̇д̇аваж̇ж̇аад̇и ад̇т̇о. гзжийд̇и бад̣̇агаараа. пассаад̣̇аяобийд̇и би-сад̣̇д̣̇зна рааг̇аад̣̇аяо самбин̣д̣зд̇и. гаалабхзд̣̇аабхаавзби бажжаяабхаавзна абзгкид̇о д̇хаммо буриманибпанно вияа вохарийяад̇ийд̇и ааха ‘‘батамам̣ уббанно вияаа’’д̇и. анубажарид̇амзвасса буб̣б̣ан̇г̇амабхаавам̣ д̣̇ассзд̇ум̣ ‘‘ананд̇арабажжаяамана’’нд̇иаад̣̇и вуд̇д̇ам̣. ‘‘кийн̣аа бхаванзд̇д̇ий’’д̇иаад̣̇иважанад̇о (д̣̇ий. ни. 2.155; нзд̇д̇и. 114) нзд̇д̇ибхууд̇ааяа д̇ан̣хааяа яуд̇д̇ам̣ жид̇д̇ам̣ нааяаганд̇и ааха ‘‘д̇ан̣хаасамбаяуд̇д̇ам̣ ваа’’д̇и.
Avikkhambhitattāti avinoditattā. Sabhūmiyanti sakabhūmiyaṃ. Vicchinditvāti puna uppajjituṃ adatvā. Khaṇattayekadesagataṃ khaṇattayagatanti vuttanti yathāvuttassa udāharaṇassa upacārabhāvamāha. Tena uppannā dhammā paccuppannā dhammāti idamettha udāharaṇaṃ yuttanti dasseti. Padhānenāti padhānabhāvena. Desanāya cittaṃ pubbaṅgamanti lokiyadhamme desetabbe cittaṃ pubbaṅgamaṃ katvā desanā bhagavatā ucitāti dasseti. Dhammasabhāvaṃ vā sandhāyāti lokiyadhammānaṃ ayaṃ sabhāvo yadidaṃ te cittajeṭṭhakā cittapubbaṅgamā pavattantīti dasseti. Tena tesaṃ tathādesanāya kāraṇamāha, sabbe akusalā dhammā cittavajjāti attho. Kecīti padakārā. Phassādayopīti pi-saddena rāgādayo sampiṇḍeti. Kālabhedābhāvepi paccayabhāvena apekkhito dhammo purimanipphanno viya voharīyatīti āha ‘‘paṭhamaṃ uppanno viyā’’ti. Anupacaritamevassa pubbaṅgamabhāvaṃ dassetuṃ ‘‘anantarapaccayamana’’ntiādi vuttaṃ. ‘‘Khīṇā bhavanettī’’tiādivacanato (dī. ni. 2.155; netti. 114) nettibhūtāya taṇhāya yuttaṃ cittaṃ nāyakanti āha ‘‘taṇhāsampayuttaṃ vā’’ti.
‘‘яам̣ д̇асмим̣ самаяз жзд̇асигам̣ саад̇а’’нд̇и нид̣̇д̣̇идтад̇д̇аа соманассавзд̣̇анаа саад̇асабхааваад̇и ааха ‘‘сабхаававасзна вуд̇д̇а’’нд̇и. ниббарияааязна мад̇хура-сад̣̇д̣̇о расависзсабарияааяо, идтабхаавасааман̃н̃зна ид̇ха убажаарзна вуд̇д̇од̇иааха ‘‘мад̇хурам̣ вияаа’’д̇и. барамад̇т̇ад̇о д̇ан̣хаавинимуд̇д̇о нанд̣̇ирааг̇о нанд̣̇ирааг̇абхааво ваа над̇т̇ийд̇и ‘‘на зд̇т̇а самбаяог̇авасзна сахаг̇ад̇абхааво ад̇т̇ий’’д̇и, ‘‘нанд̣̇ирааг̇асахаг̇ад̇аа’’д̇и жа вужжад̇и. д̇зна вин̃н̃ааяад̇и ‘‘сахаг̇ад̇асад̣̇д̣̇о д̇ан̣хааяа нанд̣̇ирааг̇абхаавам̣ ж̇од̇зд̇ий’’д̇и. авад̇т̇аависзсаваажаго ваа саха-сад̣̇д̣̇о ‘‘санид̣̇ассанаа’’д̇иаад̣̇ийсу вияа, саб̣б̣аасуби авад̇т̇аасу нанд̣̇ирааг̇асабхааваавиж̇аханад̣̇ийбанавасзна нанд̣̇ирааг̇абхаавам̣ г̇ад̇аа нанд̣̇ирааг̇асахаг̇ад̇аад̇и д̇ан̣хаа вуд̇д̇аа. г̇ад̇а-сад̣̇д̣̇асса ваа ‘‘д̣̇идтиг̇ад̇а’’нд̇иаад̣̇ийсу вияа ад̇т̇анд̇араабхаавад̇о нанд̣̇ирааг̇асабхааваа д̇ан̣хаа ‘‘нанд̣̇ирааг̇асахаг̇ад̇аа’’д̇и вуд̇д̇аа, нанд̣̇ирааг̇асабхааваад̇и ад̇т̇о. ид̇хаабийд̇и имиссам̣ адтагат̇ааяам̣. имасмимби бад̣̇зд̇и ‘‘соманассасахаг̇ад̇а’’нд̇и зд̇асмимби бад̣̇з. аяамзвад̇т̇од̇и сам̣садто зва. яат̇аад̣̇ассид̇асам̣садтасад̣̇д̣̇од̇и ад̇т̇уд̣̇д̇хаараббасан̇г̇зна баал̣ид̇о адтагат̇ааяа ааг̇ад̇асам̣садтасад̣̇д̣̇о. сахаж̇аад̇зд̇и сахаж̇аад̇ад̇т̇з.
‘‘Yaṃ tasmiṃ samaye cetasikaṃ sāta’’nti niddiṭṭhattā somanassavedanā sātasabhāvāti āha ‘‘sabhāvavasena vutta’’nti. Nippariyāyena madhura-saddo rasavisesapariyāyo, iṭṭhabhāvasāmaññena idha upacārena vuttotiāha ‘‘madhuraṃ viyā’’ti. Paramatthato taṇhāvinimutto nandirāgo nandirāgabhāvo vā natthīti ‘‘na ettha sampayogavasena sahagatabhāvo atthī’’ti, ‘‘nandirāgasahagatā’’ti ca vuccati. Tena viññāyati ‘‘sahagatasaddo taṇhāya nandirāgabhāvaṃ jotetī’’ti. Avatthāvisesavācako vā saha-saddo ‘‘sanidassanā’’tiādīsu viya, sabbāsupi avatthāsu nandirāgasabhāvāvijahanadīpanavasena nandirāgabhāvaṃ gatā nandirāgasahagatāti taṇhā vuttā. Gata-saddassa vā ‘‘diṭṭhigata’’ntiādīsu viya atthantarābhāvato nandirāgasabhāvā taṇhā ‘‘nandirāgasahagatā’’ti vuttā, nandirāgasabhāvāti attho. Idhāpīti imissaṃ aṭṭhakathāyaṃ. Imasmimpi padeti ‘‘somanassasahagata’’nti etasmimpi pade. Ayamevatthoti saṃsaṭṭho eva. Yathādassitasaṃsaṭṭhasaddoti atthuddhārappasaṅgena pāḷito aṭṭhakathāya āgatasaṃsaṭṭhasaddo. Sahajāteti sahajātatthe.
гаалависзсаанабзгко гаммасаад̇хано аабхадта-сад̣̇д̣̇о бхаасид̇абарияааяод̇и д̣̇ассзнд̇о ааха ‘‘абхаасид̇аб̣б̣ад̇аа анаабхадтад̇аа’’д̇и. баал̣ияанд̇и имиссаа батамажид̇д̇уббаад̣̇абаал̣ияам̣. абхаасид̇ад̇д̇аа зваад̇и асан̇кааригабхаавасса авуд̇д̇ад̇д̇аа зва. гааран̣абарияааяад̇д̇аа вад̇т̇усад̣̇д̣̇асса бажжаяабхаавасааман̃н̃ад̇о д̣̇ваарабхууд̇ад̇хаммаанамби сияаа вад̇т̇убарияааяод̇и ааха ‘‘д̣̇ваарам̣ вад̇т̇ууд̇и вуд̇д̇а’’нд̇и. д̇зна вад̇т̇у вияа вад̇т̇ууд̇и д̣̇ассзд̇и. манод̣̇ваарабхууд̇аа д̇хаммаа язбхуяязна хад̣̇аяавад̇т̇унаа саха жаранд̇ийд̇и д̣̇ваарзна…бз… хад̣̇аяавад̇т̇у вуд̇д̇анд̇и ааха яат̇аа ‘‘гунд̇аа бажаранд̇ий’’д̇и. сагижжабхаавзнаад̇и ад̇д̇ано гижжабхаавзна, гижжасахид̇ад̇ааяа ваа. ан̃н̃аасаад̇хааран̣од̇и са-сад̣̇д̣̇асса ад̇т̇амааха. саго хи расо сарасод̇и.
Kālavisesānapekkho kammasādhano ābhaṭṭha-saddo bhāsitapariyāyoti dassento āha ‘‘abhāsitabbatā anābhaṭṭhatā’’ti. Pāḷiyanti imissā paṭhamacittuppādapāḷiyaṃ. Abhāsitattā evāti asaṅkhārikabhāvassa avuttattā eva. Kāraṇapariyāyattā vatthusaddassa paccayabhāvasāmaññato dvārabhūtadhammānampi siyā vatthupariyāyoti āha ‘‘dvāraṃ vatthūti vutta’’nti. Tena vatthu viya vatthūti dasseti. Manodvārabhūtā dhammā yebhuyyena hadayavatthunā saha carantīti dvārena…pe… hadayavatthu vuttanti āha yathā ‘‘kuntā pacarantī’’ti. Sakiccabhāvenāti attano kiccabhāvena, kiccasahitatāya vā. Aññāsādhāraṇoti sa-saddassa atthamāha. Sako hi raso sarasoti.
ананд̇аражид̇д̇ахзд̇угад̇д̇аа жид̇д̇асса згасамудтаанад̇аа вуд̇д̇аа, сахаж̇аад̇ажид̇д̇апассахзд̇угад̇д̇аа жзд̇асигаанам̣ д̣̇висамудтаанад̇аа. ‘‘жид̇д̇асамудтаанаа д̇хаммаа, пудто бхигкавз взд̣̇зд̇и, пудто сан̃ж̇аанаад̇и, пудто жзд̇зд̇ий’’д̇и (сам̣. ни. 4.93) хи вуд̇д̇ам̣.
Anantaracittahetukattā cittassa ekasamuṭṭhānatā vuttā, sahajātacittaphassahetukattā cetasikānaṃ dvisamuṭṭhānatā. ‘‘Cittasamuṭṭhānā dhammā, phuṭṭho bhikkhave vedeti, phuṭṭho sañjānāti, phuṭṭho cetetī’’ti (saṃ. ni. 4.93) hi vuttaṃ.
сукумараж̇аад̣̇ируубанд̇и ан̣уд̇аж̇ж̇аарируубамааха. барамаан̣уруубз бана вад̇д̇аб̣б̣амзва над̇т̇и. вад̇т̇убарид̇д̇ад̇ааяаад̇и зд̇зна анзгагалаабаг̇ад̇аани б̣ахууниязва руубааяад̇анаани самуд̣̇ид̇аани сам̣хажжагаарид̇ааяа сивигуб̣б̣аханан̃ааязна жагкувин̃н̃аан̣асса аарамман̣абажжаяо, на згам̣ гад̇ибаяаани ваад̇и д̣̇ассзд̇и. нану жа звам̣ санд̇з жагкувин̃н̃аан̣ам̣ самуд̣̇ааяаарамман̣ам̣ аабаж̇ж̇ад̇ийд̇и? наабаж̇ж̇ад̇и самуд̣̇ааяассзва абхаавад̇о. на хи барамад̇т̇ад̇о самуд̣̇ааяо наама гожи ад̇т̇и. ван̣н̣ааяад̇анамзва хи яад̇д̇агам̣ яог̇яад̣̇зсз авадтид̇ам̣, сад̇и бажжаяанд̇арасамааяог̇з д̇ад̇д̇агам̣ яат̇аавуд̇д̇зна н̃ааязна жагкувин̃н̃аан̣асса аарамман̣абажжаяо ход̇и авигаббагад̇д̇аа д̇асса. д̇ад̣̇абхинихадам̣ бана мановин̃н̃аан̣ам̣ анзгагкад̇д̇ум̣ уббаж̇ж̇амаанам̣ буримасид̣̇д̇хагаббанаавасзна самуухаагаарзна сан̣таанаад̣̇иаагаарзна жа бавад̇д̇ад̇ийд̇и гим̣ жагкувин̃н̃аан̣асса згам̣ ван̣н̣ааяад̇анам̣ аарамман̣ам̣, уд̣̇ааху анзгаанийд̇и на жод̣̇зд̇аб̣б̣амзд̇ам̣. на хи бажжагкависаяз яуд̇д̇имаг̇г̇анаа яуд̇д̇аа. гин̃жа бхияяо ажчараасан̇гхаад̇агкан̣зна анзгагодисан̇кааяа жид̇д̇уббад̇д̇ияаа бавад̇д̇анад̇о жид̇д̇асса лахубаривад̇д̇ид̇ааяа самаанзби гхадасарааваад̣̇иван̣н̣аанам̣ яог̇яад̣̇зсаавадтаанз буримаманасигаараануруубам̣ ‘‘гхадо’’д̇и ваа ‘‘сарааво’’д̇и ваа батамам̣ д̇аава зго мановин̃н̃аан̣асанд̇аанзна барижчиж̇ж̇ад̇и, бажчаа ид̇аро жагкувин̃н̃аан̣авийт̇ияаа б̣яавахид̇знаад̇и ависзсавид̣̇уд̇ааяа бана гхадасарааваад̣̇иб̣уд̣̇д̇хияаа абхзд̣̇аабад̇д̇ибаригаббанаад̇и. ийд̣̇исийбзд̇т̇а жод̣̇анаа ажод̣̇анаад̇и д̣̇адтаб̣б̣аа. кан̣абарид̇д̇ад̇ааяаад̇и баб̣анд̇хагкан̣асса ид̇д̇арад̇ааяа. баб̣анд̇хавасзна хи бажжзгам̣ руубааруубад̇хаммаа вирод̇хиавирод̇хибажжаяасамааяог̇з лахум̣ д̣̇анд̇хан̃жа нируж̇жханад̇о барид̇д̇агаалаа д̣̇ийгхагаалаа жа хонд̇и, сабхаавалагкан̣авасзна бана згабарижчзд̣̇аа зваад̇и. яат̇аа жа руубааяад̇анам̣, звам̣ ид̇арааниби. сад̣̇д̣̇аад̣̇аяоби хи вад̇т̇убарид̇д̇ад̇аад̣̇ибхаавзна лаб̣бханд̇ийд̇и. ажжаасаннаад̣̇ид̇ааяаад̇и аад̣̇и-сад̣̇д̣̇зна анааваж̇ж̇анам̣ гзнажи бадижчаннад̇аад̇и звамаад̣̇им̣ сан̇г̇ан̣хаад̇и. висаяид̇хаммам̣ висзсад̇о синод̇и б̣анд̇хад̇ийд̇и висаяод̇и анан̃н̃ад̇т̇абхааваабзгко висаяод̇и ааха ‘‘висаяо анан̃н̃ад̇т̇абхаавзнаа’’д̇и. на хи жагкувин̃н̃аан̣аад̣̇аяо руубааяад̇анаад̣̇ид̇о ан̃н̃асмим̣ аарамман̣з бавад̇д̇анд̇ийд̇и. г̇ааво жаранд̇и зд̇т̇аад̇и г̇ожаро, г̇ожаро вияаад̇и г̇ожарод̇и самб̣ахулажаарид̇аабзгко г̇ожарод̇и ааха ‘‘г̇ожаро д̇ад̇т̇а жаран̣знаа’’д̇и. б̣ахулан̃хи жагкувин̃н̃аан̣аад̣̇ийхи руубаад̣̇аяо г̇аяханд̇и, на д̇ат̇аа мановин̃н̃аан̣знаад̇и. д̇зсанд̇и мановин̃н̃аан̣зна г̇аяхамаанаанам̣ руубааяад̇анаад̣̇ийнам̣. ‘‘важанасса анубабад̇д̇ид̇о’’д̇и гасмаа вуд̇д̇ам̣, нану бан̃жад̣̇ваарз бавад̇д̇амановин̃н̃аан̣ад̇хаад̇ум̣ санд̇хааяа д̇зсам̣ г̇ожарависаяам̣ бажжанубход̇ийд̇и важанам̣ убабаж̇ж̇ад̇иязваад̇и? на, нияамаабхаавад̇о. на хи бан̃жад̣̇ваараабхинихадам̣язва мано ид̇ха ‘‘мано’’д̇и вуд̇д̇анд̇и нияамахзд̇у ад̇т̇ийд̇и, зд̇ам̣язва ваа жод̣̇анам̣ манаси гад̇ваа д̣̇иб̣б̣ажагкун̃аан̣аад̣̇иг̇г̇ахан̣ам̣ гад̇ам̣. звам̣ван̣н̣од̇иаад̣̇иважанад̇о буб̣б̣зниваасаад̇ийд̇аанааг̇ад̇ам̣сан̃аан̣аад̣̇аяоби ид̇ха самбхаванд̇и. ид̇арат̇аад̇и руубам̣ сад̣̇д̣̇анд̇иаад̣̇инаа.
Sukhumarajādirūpanti aṇutajjārirūpamāha. Paramāṇurūpe pana vattabbameva natthi. Vatthuparittatāyāti etena anekakalāpagatāni bahūniyeva rūpāyatanāni samuditāni saṃhaccakāritāya sivikubbahanañāyena cakkhuviññāṇassa ārammaṇapaccayo, na ekaṃ katipayāni vāti dasseti. Nanu ca evaṃ sante cakkhuviññāṇaṃ samudāyārammaṇaṃ āpajjatīti? Nāpajjati samudāyasseva abhāvato. Na hi paramatthato samudāyo nāma koci atthi. Vaṇṇāyatanameva hi yattakaṃ yogyadese avaṭṭhitaṃ, sati paccayantarasamāyoge tattakaṃ yathāvuttena ñāyena cakkhuviññāṇassa ārammaṇapaccayo hoti avikappakattā tassa. Tadabhinihaṭaṃ pana manoviññāṇaṃ anekakkhattuṃ uppajjamānaṃ purimasiddhakappanāvasena samūhākārena saṇṭhānādiākārena ca pavattatīti kiṃ cakkhuviññāṇassa ekaṃ vaṇṇāyatanaṃ ārammaṇaṃ, udāhu anekānīti na codetabbametaṃ. Na hi paccakkhavisaye yuttimagganā yuttā. Kiñca bhiyyo accharāsaṅghātakkhaṇena anekakoṭisaṅkhāya cittuppattiyā pavattanato cittassa lahuparivattitāya samānepi ghaṭasarāvādivaṇṇānaṃ yogyadesāvaṭṭhāne purimamanasikārānurūpaṃ ‘‘ghaṭo’’ti vā ‘‘sarāvo’’ti vā paṭhamaṃ tāva eko manoviññāṇasantānena paricchijjati, pacchā itaro cakkhuviññāṇavīthiyā byavahitenāti avisesavidutāya pana ghaṭasarāvādibuddhiyā abhedāpattiparikappanāti. Īdisīpettha codanā acodanāti daṭṭhabbā. Khaṇaparittatāyāti pabandhakkhaṇassa ittaratāya. Pabandhavasena hi paccekaṃ rūpārūpadhammā virodhiavirodhipaccayasamāyoge lahuṃ dandhañca nirujjhanato parittakālā dīghakālā ca honti, sabhāvalakkhaṇavasena pana ekaparicchedā evāti. Yathā ca rūpāyatanaṃ, evaṃ itarānipi. Saddādayopi hi vatthuparittatādibhāvena labbhantīti. Accāsannāditāyāti ādi-saddena anāvajjanaṃ kenaci paṭicchannatāti evamādiṃ saṅgaṇhāti. Visayidhammaṃ visesato sinoti bandhatīti visayoti anaññatthabhāvāpekkho visayoti āha ‘‘visayo anaññatthabhāvenā’’ti. Na hi cakkhuviññāṇādayo rūpāyatanādito aññasmiṃ ārammaṇe pavattantīti. Gāvo caranti etthāti gocaro, gocaro viyāti gocaroti sambahulacāritāpekkho gocaroti āha ‘‘gocaro tattha caraṇenā’’ti. Bahulañhi cakkhuviññāṇādīhi rūpādayo gayhanti, na tathā manoviññāṇenāti. Tesanti manoviññāṇena gayhamānānaṃ rūpāyatanādīnaṃ. ‘‘Vacanassa anupapattito’’ti kasmā vuttaṃ, nanu pañcadvāre pavattamanoviññāṇadhātuṃ sandhāya tesaṃ gocaravisayaṃ paccanubhotīti vacanaṃ upapajjatiyevāti? Na, niyamābhāvato. Na hi pañcadvārābhinihaṭaṃyeva mano idha ‘‘mano’’ti vuttanti niyamahetu atthīti, etaṃyeva vā codanaṃ manasi katvā dibbacakkhuñāṇādiggahaṇaṃ kataṃ. Evaṃvaṇṇotiādivacanato pubbenivāsaatītānāgataṃsañāṇādayopi idha sambhavanti. Itarathāti rūpaṃ saddantiādinā.
бхож̇ана …бз… уссаахаад̣̇ийхийд̇и ид̣̇ам̣ яааяа гамман̃н̃ад̇ааяа руубагааяасса галлад̇аа ход̇и, д̇ассаа бажжаяанид̣̇ассанам̣. бхож̇анз хи саммаабарин̣ад̇з саббааяз жа уд̇убхож̇анз саммубаяуд̇д̇з саммаабаяог̇асан̇каад̇з гааяигажзд̇асигавийрияз жа самаарад̣̇д̇хз лахуд̇аад̣̇исаб̣бхаавзна гааяо гаммагкамо ход̇и саб̣б̣агирияаанугуулод̇и. ат̇а ваа бхож̇ана…бз… уссаахаад̣̇ийхийд̇и ид̣̇ам̣ гааяасса галяад̇ааяа вияа убад̣̇д̣̇уд̇ад̇ааяаби гааран̣аважанам̣. висамабхож̇анаабарин̣аамаад̣̇ид̇о хи гааяасса убад̣̇д̣̇авагараа ваад̇аад̣̇аяо уббаж̇ж̇анд̇ийд̇и. анувад̇д̇анд̇ассаад̇и бад̣̇ам̣ ‘‘ж̇аяам̣ взрам̣ басавад̇ий’’д̇иаад̣̇ийсу (д̇ха. ба. 201) вияа хзд̇уад̇т̇авасзна взд̣̇ид̇аб̣б̣ам̣. ж̇ааг̇аран̣анимид̇д̇ан̃хи ид̇ха анувад̇д̇анам̣ ад̇хиббзд̇анд̇и. ат̇а ваа анувад̇д̇анд̇ассаад̇и ид̣̇ам̣ багад̇ияаа д̣̇идтаад̣̇ивасзна аабаат̇аг̇аманубаниссаяаанам̣ галяад̇аад̣̇иниб̣б̣ад̇д̇аанам̣ гааяигасукаад̣̇ийнам̣ самбхавад̣̇ассанам̣. гааяагаляад̇аад̣̇им̣ ананувад̇д̇анд̇асса хи яат̇аавуд̇д̇аубаниссаяаабхог̇аабхаавзна вуд̇д̇аббагаарам̣ аабаат̇аг̇аманам̣ на сияаад̇и. яат̇аанубхууд̇з руубаад̣̇ивисаяз жид̇д̇асса табанам̣ ааваж̇ж̇анам̣ жид̇д̇абан̣ид̣̇аханам̣. яат̇аанубхууд̇зна руубаад̣̇инаа сад̣̇исам̣ асад̣̇исам̣ самб̣анд̇хан̃жа сад̣̇исаасад̣̇исасамб̣анд̇хам̣, д̇асса д̣̇ассанаад̣̇и сад̣̇исаасад̣̇исасамб̣анд̇хад̣̇ассанаад̣̇и, жид̇д̇абан̣ид̣̇аханан̃жа сад̣̇исаасад̣̇иса…бз… д̣̇ассанаад̣̇и жа жид̇д̇а…бз… д̣̇ассанаад̣̇аяо д̇з бажжаяаад̇и яож̇зд̇аб̣б̣ам̣. д̇хаад̇угкобхаад̣̇ийд̇и аад̣̇и-сад̣̇д̣̇зна д̣̇звад̇уубасам̣хаараад̣̇им̣ сан̇г̇ан̣хаад̇и. д̇ам̣сад̣̇исад̇аа д̣̇идтасуд̇асад̣̇исад̇аа. д̇ам̣самбаяуд̇д̇ад̇аа д̣̇идтасуд̇абадиб̣ад̣̇д̇хад̇аа. гзнажи вуд̇д̇зд̇и иминаа сад̣̇д̇хааяа ануссаваниб̣б̣ад̇д̇ад̇ам̣ ааха. аагааравижааран̣анд̇и д̇зсам̣ д̇зсам̣ ад̇т̇аанам̣ убадтаанаагааравижааран̣ам̣. гад̇т̇ажи ад̇т̇з.
Bhojana…pe… ussāhādīhīti idaṃ yāya kammaññatāya rūpakāyassa kallatā hoti, tassā paccayanidassanaṃ. Bhojane hi sammāpariṇate sappāye ca utubhojane sammupayutte sammāpayogasaṅkhāte kāyikacetasikavīriye ca samāraddhe lahutādisabbhāvena kāyo kammakkhamo hoti sabbakiriyānukūloti. Atha vā bhojana…pe… ussāhādīhīti idaṃ kāyassa kalyatāya viya upaddutatāyapi kāraṇavacanaṃ. Visamabhojanāpariṇāmādito hi kāyassa upaddavakarā vātādayo uppajjantīti. Anuvattantassāti padaṃ ‘‘jayaṃ veraṃ pasavatī’’tiādīsu (dha. pa. 201) viya hetuatthavasena veditabbaṃ. Jāgaraṇanimittañhi idha anuvattanaṃ adhippetanti. Atha vā anuvattantassāti idaṃ pakatiyā diṭṭhādivasena āpāthagamanupanissayānaṃ kalyatādinibbattānaṃ kāyikasukhādīnaṃ sambhavadassanaṃ. Kāyakalyatādiṃ ananuvattantassa hi yathāvuttaupanissayābhogābhāvena vuttappakāraṃ āpāthagamanaṃ na siyāti. Yathānubhūte rūpādivisaye cittassa ṭhapanaṃ āvajjanaṃ cittapaṇidahanaṃ. Yathānubhūtena rūpādinā sadisaṃ asadisaṃ sambandhañca sadisāsadisasambandhaṃ, tassa dassanādi sadisāsadisasambandhadassanādi, cittapaṇidahanañca sadisāsadisa…pe… dassanādi ca citta…pe… dassanādayo te paccayāti yojetabbaṃ. Dhātukkhobhādīti ādi-saddena devatūpasaṃhārādiṃ saṅgaṇhāti. Taṃsadisatā diṭṭhasutasadisatā. Taṃsampayuttatā diṭṭhasutapaṭibaddhatā. Kenaci vutteti iminā saddhāya anussavanibbattataṃ āha. Ākāravicāraṇanti tesaṃ tesaṃ atthānaṃ upaṭṭhānākāravicāraṇaṃ. Katthaci atthe.
нияамид̇ассаад̇и гусаламзва маяаа уббаад̣̇зд̇аб̣б̣анд̇и звам̣ нияамид̇асса. басаад̣̇асинзхаабхааво д̣̇осаб̣ахулад̇ааяа ход̇ийд̇и луукабуг̇г̇алаа д̣̇осаб̣ахулаад̇и ааха.
Niyamitassāti kusalameva mayā uppādetabbanti evaṃ niyamitassa. Pasādasinehābhāvo dosabahulatāya hotīti lūkhapuggalā dosabahulāti āha.
ааяад̇анабхаавад̇од̇и гааран̣абхаавад̇о.
Āyatanabhāvatoti kāraṇabhāvato.
виж̇ж̇амаанавад̇т̇усминд̇и зд̇зна ‘‘винааби д̣̇зяяад̇хаммабарижжааг̇зна жид̇д̇уббаад̣̇амад̇д̇знзва д̣̇аанамаяам̣ гусалам̣ убажид̇ам̣ ход̇ий’’д̇и гзсан̃жи ад̇ид̇хааванам̣ нивад̇д̇ид̇ам̣ ход̇ийд̇и.
Vijjamānavatthusminti etena ‘‘vināpi deyyadhammapariccāgena cittuppādamatteneva dānamayaṃ kusalaṃ upacitaṃ hotī’’ti kesañci atidhāvanaṃ nivattitaṃ hotīti.
д̇хаммасаванасса гхосанам̣ д̇хаммасаванагхосанам̣. д̇ассаад̇и ‘‘сад̣̇д̣̇ад̣̇аанам̣ д̣̇ассаамий’’д̇и сад̣̇д̣̇авад̇т̇уунам̣ таанагаран̣абхзриаад̣̇ийнам̣ сасад̣̇д̣̇аббавад̇д̇игаран̣асса. жинд̇анам̣ д̇ат̇аа д̇ат̇аа жид̇д̇уббаад̣̇анам̣. ан̃н̃ад̇т̇аад̇и суд̇д̇зсу. абарад̇т̇аад̇и абхид̇хаммабад̣̇зсу. абарияаабаннаад̇и бад̣̇асса ад̇т̇аван̣н̣анаа ‘‘барибхог̇арасо’’д̇иаад̣̇игааяа ад̇т̇аван̣н̣анааяа барад̇о б̣ахуусу бод̇т̇агзсу ликийяад̇и, яат̇аатаанзязва бана аанзд̇ваа вад̇д̇аб̣б̣аа. д̇ад̇т̇а барамад̇т̇ад̇о авиж̇ж̇амаанад̇д̇аа лагкан̣абан̃н̃ад̇д̇ияо ан̃н̃ааяад̇анад̇д̇аа ча аж̇жхад̇д̇игааяад̇анаани асан̇г̇ахид̇аа д̇хаммааяад̇анзнаад̇и яож̇зд̇аб̣б̣ам̣.
Dhammasavanassa ghosanaṃ dhammasavanaghosanaṃ. Tassāti ‘‘saddadānaṃ dassāmī’’ti saddavatthūnaṃ ṭhānakaraṇabheriādīnaṃ sasaddappavattikaraṇassa. Cintanaṃ tathā tathā cittuppādanaṃ. Aññatthāti suttesu. Aparatthāti abhidhammapadesu. Apariyāpannāti padassa atthavaṇṇanā ‘‘paribhogaraso’’tiādikāya atthavaṇṇanāya parato bahūsu potthakesu likhīyati, yathāṭhāneyeva pana ānetvā vattabbā. Tattha paramatthato avijjamānattā lakkhaṇapaññattiyo aññāyatanattā cha ajjhattikāyatanāni asaṅgahitā dhammāyatanenāti yojetabbaṃ.
‘‘згад̣̇вааригагаммам̣ ан̃н̃асмим̣ д̣̇ваарз уббаж̇ж̇ад̇ий’’д̇и гасмаа вуд̇д̇ам̣, нану руубаад̣̇ийсу згаарамман̣ам̣ жид̇д̇ам̣ яат̇аа на ан̃н̃аарамман̣ам̣ ход̇и жид̇д̇ависзсасса ад̇хиббзд̇ад̇д̇аа, звам̣ гаммависзсз ад̇хиббзд̇з гааяад̣̇ваараад̣̇ийсу згад̣̇вааригагаммам̣ ан̃н̃асмим̣ д̣̇ваарз на уббаж̇ж̇ад̇и д̇ад̇т̇зва барияосид̇ад̇д̇аа, ат̇а гаммасааман̃н̃ам̣ ад̇хиббзд̇ам̣, руубаад̣̇ийсу згаарамман̣анд̇и ид̣̇ам̣ уд̣̇аахаран̣ам̣ на сияаад̇и? на, асад̣̇исабхаававибхааванавасзна уд̣̇аахадад̇д̇аа, ид̇арат̇аа мановин̃н̃аан̣абхууд̇ам̣ ид̣̇ам̣ жид̇д̇ам̣ часуби висаязсу бавад̇д̇анад̇о аниб̣ад̣̇д̇хаарамман̣анд̇и аарамман̣ам̣ сад̣̇исууд̣̇аахаран̣абхаавзна вужжзяяа аарамман̣ам̣ вияа д̣̇ваарамби аниб̣ад̣̇д̇ханд̇и. яасмаа бана сад̇иби гаммаанам̣ д̣̇вааранд̇аражаран̣з язбхуяязна вуд̇д̇ияаа д̇аб̣б̣ахулавуд̇д̇ияаа жа д̣̇ваарагаммаанам̣ ан̃н̃аман̃н̃ам̣ вавад̇т̇аанам̣ вагкад̇и, д̇асмаа баан̣аад̇ибаад̇аад̣̇ибхаавасааман̃н̃зна гаммам̣ згад̇д̇анаяавасзна г̇ахзд̇ваа д̇асса важийд̣̇ваараад̣̇ийсу бавад̇д̇исаб̣бхаавад̇о гаммасса аниб̣ад̣̇д̇хад̇д̇аад̇и вуд̇д̇анд̇и ааха ‘‘гааяад̣̇ваараад̣̇ийсу згад̣̇вааригагаммам̣ ан̃н̃асмим̣ д̣̇ваарз на нуббаж̇ж̇ад̇ий’’д̇и. руубаад̣̇ийсу бана згаарамман̣ам̣ жид̇д̇ам̣ д̇знзваарамман̣зна барижчиннанд̇и висидтамзва г̇ахид̇анд̇и аарамман̣амзва ниб̣ад̣̇д̇ханд̇и вуд̇д̇анд̇и жид̇д̇ависзсо зва г̇ахид̇о, на жид̇д̇асааман̃н̃ам̣. ‘‘нану жа руубаарамман̣ам̣ ваа…бз… д̇хаммаарамман̣ам̣ ваа яам̣ яам̣ ваа банаа’’д̇и аарамман̣амби анияамзнзва вуд̇д̇анд̇и? сажжамзд̇ам̣, д̇ад̇т̇а бана яам̣ руубаад̣̇ийсу згаарамман̣ам̣ жид̇д̇ам̣, д̇ам̣ д̇зна винаа наббавад̇д̇ад̇и, гаммам̣ бана гааяад̣̇вааригаад̣̇ибхзд̣̇ам̣ важийд̣̇ваараад̣̇ийсу на наббавад̇д̇ад̇ийд̇и имасса висзсасса ж̇од̇анад̇т̇ам̣ баал̣ияам̣ аарамман̣амзва г̇ахид̇ам̣, д̣̇ваарам̣ на г̇ахид̇анд̇и имамад̇т̇ам̣ д̣̇ассзд̇и ‘‘аарамман̣амзва ниб̣ад̣̇д̇ха’’нд̇иаад̣̇инаа. важийд̣̇ваарз уббаж̇ж̇амаанамби баан̣аад̇ибаад̇аад̣̇ийд̇и ад̇т̇о.
‘‘Ekadvārikakammaṃ aññasmiṃ dvāre uppajjatī’’ti kasmā vuttaṃ, nanu rūpādīsu ekārammaṇaṃ cittaṃ yathā na aññārammaṇaṃ hoti cittavisesassa adhippetattā, evaṃ kammavisese adhippete kāyadvārādīsu ekadvārikakammaṃ aññasmiṃ dvāre na uppajjati tattheva pariyositattā, atha kammasāmaññaṃ adhippetaṃ, rūpādīsu ekārammaṇanti idaṃ udāharaṇaṃ na siyāti? Na, asadisabhāvavibhāvanavasena udāhaṭattā, itarathā manoviññāṇabhūtaṃ idaṃ cittaṃ chasupi visayesu pavattanato anibaddhārammaṇanti ārammaṇaṃ sadisūdāharaṇabhāvena vucceyya ārammaṇaṃ viya dvārampi anibaddhanti. Yasmā pana satipi kammānaṃ dvārantaracaraṇe yebhuyyena vuttiyā tabbahulavuttiyā ca dvārakammānaṃ aññamaññaṃ vavatthānaṃ vakkhati, tasmā pāṇātipātādibhāvasāmaññena kammaṃ ekattanayavasena gahetvā tassa vacīdvārādīsu pavattisabbhāvato kammassa anibaddhattāti vuttanti āha ‘‘kāyadvārādīsu ekadvārikakammaṃ aññasmiṃ dvāre na nuppajjatī’’ti. Rūpādīsu pana ekārammaṇaṃ cittaṃ tenevārammaṇena paricchinnanti visiṭṭhameva gahitanti ārammaṇameva nibaddhanti vuttanti cittaviseso eva gahito, na cittasāmaññaṃ. ‘‘Nanu ca rūpārammaṇaṃ vā…pe… dhammārammaṇaṃ vā yaṃ yaṃ vā panā’’ti ārammaṇampi aniyameneva vuttanti? Saccametaṃ, tattha pana yaṃ rūpādīsu ekārammaṇaṃ cittaṃ, taṃ tena vinā nappavattati, kammaṃ pana kāyadvārikādibhedaṃ vacīdvārādīsu na nappavattatīti imassa visesassa jotanatthaṃ pāḷiyaṃ ārammaṇameva gahitaṃ, dvāraṃ na gahitanti imamatthaṃ dasseti ‘‘ārammaṇameva nibaddha’’ntiādinā. Vacīdvāre uppajjamānampi pāṇātipātādīti attho.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / д̇хаммасан̇г̇ан̣ийбаал̣и • Dhammasaṅgaṇīpāḷi / гаамааважарагусалам̣ • Kāmāvacarakusalaṃ
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / д̇хаммасан̇г̇ан̣и-адтагат̇аа • Dhammasaṅgaṇi-aṭṭhakathā / гаамааважарагусалабад̣̇абхааж̇анийяам̣ • Kāmāvacarakusalapadabhājanīyaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / д̇хаммасан̇г̇ан̣ий-мууладийгаа • Dhammasaṅgaṇī-mūlaṭīkā / гаамааважарагусалабад̣̇абхааж̇анийяаван̣н̣анаа • Kāmāvacarakusalapadabhājanīyavaṇṇanā
