| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[297] 7. гаамавилаабаж̇аад̇агаван̣н̣анаа
[297] 7. Kāmavilāpajātakavaṇṇanā
ужжз сагун̣а д̣змаанаад̇и ид̣̇ам̣ сад̇т̇аа ж̇зд̇аванз вихаранд̇о бураан̣ад̣̇уд̇ияигаабалобханам̣ аараб̣бха гат̇зси. бажжуббаннавад̇т̇у бубпарад̇д̇аж̇аад̇агз (ж̇аа. 1.1.147) гат̇ид̇ам̣, ад̇ийд̇авад̇т̇у инд̣̇рияаж̇аад̇агз (ж̇аа. 1.8.60 аад̣̇аяо) аавибхависсад̇и. д̇ам̣ бана бурисам̣ ж̇ийванд̇ам̣ суулз уд̇д̇аасзсум̣. со д̇ад̇т̇а нисинно аагаасзна г̇ажчанд̇ам̣ згам̣ гаагам̣ д̣̇исваа д̇аавакарамби д̇ам̣ взд̣̇анам̣ аг̇ан̣зд̇ваа бияабхарияааяа саасанам̣ бзсзд̇ум̣ гаагам̣ ааманд̇знд̇о имаа г̇аат̇аа ааха –
Uccesakuṇa ḍemānāti idaṃ satthā jetavane viharanto purāṇadutiyikāpalobhanaṃ ārabbha kathesi. Paccuppannavatthu puppharattajātake (jā. 1.1.147) kathitaṃ, atītavatthu indriyajātake (jā. 1.8.60 ādayo) āvibhavissati. Taṃ pana purisaṃ jīvantaṃ sūle uttāsesuṃ. So tattha nisinno ākāsena gacchantaṃ ekaṃ kākaṃ disvā tāvakharampi taṃ vedanaṃ agaṇetvā piyabhariyāya sāsanaṃ pesetuṃ kākaṃ āmantento imā gāthā āha –
139.
139.
‘‘ужжз сагун̣а д̣змаана, бад̇д̇аяаана вихан̇г̇ама;
‘‘Ucce sakuṇa ḍemāna, pattayāna vihaṅgama;
важ̇ж̇ааси ко д̇вам̣ ваамуурум̣, жирам̣ ко саа гариссад̇и.
Vajjāsi kho tvaṃ vāmūruṃ, ciraṃ kho sā karissati.
140.
140.
‘‘ид̣̇ам̣ ко саа на ж̇аанаад̇и, асим̣ сад̇д̇ин̃жа од̣д̣ид̇ам̣;
‘‘Idaṃ kho sā na jānāti, asiṃ sattiñca oḍḍitaṃ;
саа жан̣д̣ий гаахад̇и год̇хам̣, д̇ам̣ мз д̇абад̇и но ид̣̇ам̣.
Sā caṇḍī kāhati kodhaṃ, taṃ me tapati no idaṃ.
141.
141.
‘‘зса уббаласаннаахо, нигкан̃жуссийсагохид̇ам̣;
‘‘Esa uppalasannāho, nikkhañcussīsakohitaṃ;
гаасиган̃жа муд̣̇ум̣ вад̇т̇ам̣, д̇аббзд̇у д̇ханигаа бияаа’’д̇и.
Kāsikañca muduṃ vatthaṃ, tappetu dhanikā piyā’’ti.
д̇ад̇т̇а д̣змаанаад̇и г̇ажчамаана жарамаана. бад̇д̇аяаанаад̇и д̇амзваалабад̇и, д̇ат̇аа вихан̇г̇амаад̇и. со хи бад̇д̇зхи яаанам̣ гад̇ваа г̇аманад̇о бад̇д̇аяаано, аагаасз г̇аманад̇о вихан̇г̇амо. важ̇ж̇аасийд̇и вад̣̇зяяааси. ваамуурунд̇и гад̣̇алигканд̇хасамаанауурум̣, мама суулз нисиннабхаавам̣ вад̣̇зяяааси. жирам̣ ко саа гариссад̇ийд̇и саа имам̣ бавад̇д̇им̣ аж̇аанамаанаа мама ааг̇аманам̣ жирам̣ гариссад̇и, ‘‘жирам̣ мз г̇ад̇асса бияасса на жа ааг̇ажчад̇ий’’д̇и звам̣ жинд̇зссад̇ийд̇и ад̇т̇о.
Tattha ḍemānāti gacchamāna caramāna. Pattayānāti tamevālapati, tathā vihaṅgamāti. So hi pattehi yānaṃ katvā gamanato pattayāno, ākāse gamanato vihaṅgamo. Vajjāsīti vadeyyāsi. Vāmūrunti kadalikkhandhasamānaūruṃ, mama sūle nisinnabhāvaṃ vadeyyāsi. Ciraṃ kho sā karissatīti sā imaṃ pavattiṃ ajānamānā mama āgamanaṃ ciraṃ karissati, ‘‘ciraṃ me gatassa piyassa na ca āgacchatī’’ti evaṃ cintessatīti attho.
асим̣ сад̇д̇ин̃жаад̇и асисамаанад̇ааяа сад̇д̇исамаанад̇ааяа жа сууламзва санд̇хааяа вад̣̇ад̇и. д̇ан̃хи д̇асса уд̇д̇аасанад̇т̇ааяа од̣д̣ид̇ам̣ табид̇ам̣. жан̣д̣ийд̇и год̇ханаа. гаахад̇и год̇ханд̇и ‘‘ад̇ижирааяад̇ий’’д̇и маяи год̇хам̣ гариссад̇и. д̇ам̣ мз д̇абад̇ийд̇и д̇ам̣ д̇ассаа гуж̇жханам̣ мам̣ д̇абад̇и. но ид̣̇анд̇и ид̇ха бана ид̣̇ам̣ суулам̣ мам̣ на д̇абад̇ийд̇и д̣̇ийбзд̇и.
Asiṃ sattiñcāti asisamānatāya sattisamānatāya ca sūlameva sandhāya vadati. Tañhi tassa uttāsanatthāya oḍḍitaṃ ṭhapitaṃ. Caṇḍīti kodhanā. Kāhati kodhanti ‘‘aticirāyatī’’ti mayi kodhaṃ karissati. Taṃ me tapatīti taṃ tassā kujjhanaṃ maṃ tapati. No idanti idha pana idaṃ sūlaṃ maṃ na tapatīti dīpeti.
‘‘зса уббаласаннаахо’’д̇иаад̣̇ийхи гхарз уссийсагз табид̇ам̣ ад̇д̇ано бхан̣д̣ам̣ аажигкад̇и. д̇ад̇т̇а уббаласаннааход̇и уббало жа саннаахо жа уббаласаннаахо, уббаласад̣̇исо ган̣аяо жа саннаахаго жаад̇и ад̇т̇о. нигкан̃жаад̇и бан̃жахи суван̣н̣зхи гад̇ам̣ ан̇г̇улимуд̣̇д̣̇игам̣. гаасиган̃жа муд̣̇у вад̇т̇анд̇и муд̣̇ум̣ гаасигасаадагаяуг̇ам̣ санд̇хааяааха. зд̇д̇агам̣ гира д̇зна уссийсагз нигкид̇д̇ам̣. д̇аббзд̇у д̇ханигаа бияаад̇и зд̇ам̣ саб̣б̣ам̣ г̇ахзд̇ваа саа мама бияаа д̇ханад̇т̇игаа иминаа д̇ханзна д̇аббзд̇у буурзд̇у, санд̇удтаа ход̇ууд̇и.
‘‘Esa uppalasannāho’’tiādīhi ghare ussīsake ṭhapitaṃ attano bhaṇḍaṃ ācikkhati. Tattha uppalasannāhoti uppalo ca sannāho ca uppalasannāho, uppalasadiso kaṇayo ca sannāhako cāti attho. Nikkhañcāti pañcahi suvaṇṇehi kataṃ aṅgulimuddikaṃ. Kāsikañca mudu vatthanti muduṃ kāsikasāṭakayugaṃ sandhāyāha. Ettakaṃ kira tena ussīsake nikkhittaṃ. Tappetu dhanikā piyāti etaṃ sabbaṃ gahetvā sā mama piyā dhanatthikā iminā dhanena tappetu pūretu, santuṭṭhā hotūti.
звам̣ со барид̣̇звамаанова гаалам̣ гад̇ваа нираяз ниб̣б̣ад̇д̇и.
Evaṃ so paridevamānova kālaṃ katvā niraye nibbatti.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз угган̣тид̇абхигку, сод̇аабад̇д̇ипалз бад̇идтахи. ‘‘д̇ад̣̇аа бхарияаа зд̇арахи бхарияаа ахоси, язна бана д̣̇звабуд̇д̇зна д̇ам̣ гааран̣ам̣ д̣̇идтам̣, со ахамзва ахоси’’нд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne ukkaṇṭhitabhikkhu, sotāpattiphale patiṭṭhahi. ‘‘Tadā bhariyā etarahi bhariyā ahosi, yena pana devaputtena taṃ kāraṇaṃ diṭṭhaṃ, so ahameva ahosi’’nti.
гаамавилаабаж̇аад̇агаван̣н̣анаа сад̇д̇амаа.
Kāmavilāpajātakavaṇṇanā sattamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 297. гаамавилаабаж̇аад̇агам̣ • 297. Kāmavilāpajātakaṃ
