| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
૯. કમ્મકારઙ્ગપઞ્હો
9. Kammakāraṅgapañho
૯. ‘‘ભન્તે નાગસેન, ‘કમ્મકારસ્સ એકં અઙ્ગં ગહેતબ્બ’ન્તિ યં વદેસિ, કતમં તં એકં અઙ્ગં ગહેતબ્બ’’ન્તિ? ‘‘યથા, મહારાજ, કમ્મકારો એવં ચિન્તયતિ ‘ભતકો અહં ઇમાય નાવાય કમ્મં કરોમિ, ઇમાયાહં નાવાય વાહસા ભત્તવેતનં લભામિ, ન મે પમાદો કરણીયો, અપ્પમાદેન મે અયં નાવા વાહેતબ્બા’તિ, એવમેવ ખો, મહારાજ, યોગિના યોગાવચરેન એવં ચિન્તયિતબ્બં ‘ઇમં ખો અહં ચાતુમહાભૂતિકં કાયં સમ્મસન્તો સતતં સમિતં અપ્પમત્તો ઉપટ્ઠિતસ્સતિ સતો સમ્પજાનો સમાહિતો એકગ્ગચિત્તો જાતિજરાબ્યાધિમરણસોકપરિદેવદુક્ખદોમનસ્સુપાયાસેહિ પરિમુચ્ચિસ્સામીતિ અપ્પમાદો મે કરણીયો’તિ, ઇદં, મહારાજ, કમ્મકારસ્સ એકં અઙ્ગં ગહેતબ્બં. ભાસિતમ્પેતં, મહારાજ, થેરેન સારિપુત્તેન ધમ્મસેનાપતિના –
9. ‘‘Bhante nāgasena, ‘kammakārassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kammakāro evaṃ cintayati ‘bhatako ahaṃ imāya nāvāya kammaṃ karomi, imāyāhaṃ nāvāya vāhasā bhattavetanaṃ labhāmi, na me pamādo karaṇīyo, appamādena me ayaṃ nāvā vāhetabbā’ti, evameva kho, mahārāja, yoginā yogāvacarena evaṃ cintayitabbaṃ ‘imaṃ kho ahaṃ cātumahābhūtikaṃ kāyaṃ sammasanto satataṃ samitaṃ appamatto upaṭṭhitassati sato sampajāno samāhito ekaggacitto jātijarābyādhimaraṇasokaparidevadukkhadomanassupāyāsehi parimuccissāmīti appamādo me karaṇīyo’ti, idaṃ, mahārāja, kammakārassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘કાયં ઇમં સમ્મસથ, પરિજાનાથ પુનપ્પુનં;
‘‘‘Kāyaṃ imaṃ sammasatha, parijānātha punappunaṃ;
કાયે સભાવં દિસ્વાન, દુક્ખસ્સન્તં કરિસ્સથા’તિ.
Kāye sabhāvaṃ disvāna, dukkhassantaṃ karissathā’ti.
કમ્મકારઙ્ગપઞ્હો નવમો.
Kammakāraṅgapañho navamo.
