| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
13. கம்மபச்சயனித்³தே³ஸவண்ணனா
13. Kammapaccayaniddesavaṇṇanā
13. கம்மபச்சயனித்³தே³ஸே கம்மந்தி சேதனாகம்மமேவ. கடத்தா ச ரூபானந்தி கம்மஸ்ஸ கடத்தா உப்பன்னரூபானங். கம்மபச்சயேனாதி அனேகானம்பி கப்பகோடீனங் மத்த²கே அத்தனோ ப²லங் உப்பாதே³துங் ஸமத்தே²ன நானாக்க²ணிககம்மபச்சயேனாதி அத்தோ². குஸலாகுஸலஞ்ஹி கம்மங் அத்தனோ பவத்திக்க²ணே ப²லங் ந தே³தி. யதி³ த³தெ³ய்ய, யங் மனுஸ்ஸோ தே³வலோகூபக³ங் குஸலகம்மங் கரோதி, தஸ்ஸானுபா⁴வேன தஸ்மிங்யேவ க²ணே தே³வோ ப⁴வெய்ய. யஸ்மிங் பன க²ணே தங் கதங், ததோ அஞ்ஞஸ்மிங் க²ணே அவிஜ்ஜமானம்பி கேவலங் கடத்தாயேவ தி³ட்டே²வ த⁴ம்மே உபபஜ்ஜே வா அபரே வா பரியாயே அவஸேஸபச்சயஸமாயோகே³ ஸதி ப²லங் உப்பாதே³தி நிருத்³தா⁴பி புரிமஸிப்பாதி³கிரியா விய காலந்தரே பச்சி²மஸிப்பாதி³கிரியாய. தஸ்மா நானாக்க²ணிககம்மபச்சயோதி வுச்சதி. சேதனா ஸம்பயுத்தகானங் த⁴ம்மானந்தி யா காசி சேதனா அத்தனா ஸம்பயுத்தகானங் த⁴ம்மானங். தங்ஸமுட்டா²னானந்தி இமினா படிஸந்தி⁴க்க²ணே கடத்தாரூபம்பி க³ண்ஹாதி. கம்மபச்சயேனாதி இத³ங் ஸஹஜாதசேதனங் ஸந்தா⁴ய வுத்தங். குஸலாதீ³ஸு ஹி யா காசி ஸஹஜாதசேதனா ஸேஸத⁴ம்மானங் சித்தபயோக³ஸங்கா²தேன கிரியாபா⁴வேன உபகாரிகா ஹோதி. தஸ்மா ஸஹஜாதகம்மபச்சயோதி வுச்சதி. அயங் தாவெத்த² பாளிவண்ணனா.
13. Kammapaccayaniddese kammanti cetanākammameva. Kaṭattā ca rūpānanti kammassa kaṭattā uppannarūpānaṃ. Kammapaccayenāti anekānampi kappakoṭīnaṃ matthake attano phalaṃ uppādetuṃ samatthena nānākkhaṇikakammapaccayenāti attho. Kusalākusalañhi kammaṃ attano pavattikkhaṇe phalaṃ na deti. Yadi dadeyya, yaṃ manusso devalokūpagaṃ kusalakammaṃ karoti, tassānubhāvena tasmiṃyeva khaṇe devo bhaveyya. Yasmiṃ pana khaṇe taṃ kataṃ, tato aññasmiṃ khaṇe avijjamānampi kevalaṃ kaṭattāyeva diṭṭheva dhamme upapajje vā apare vā pariyāye avasesapaccayasamāyoge sati phalaṃ uppādeti niruddhāpi purimasippādikiriyā viya kālantare pacchimasippādikiriyāya. Tasmā nānākkhaṇikakammapaccayoti vuccati. Cetanā sampayuttakānaṃ dhammānanti yā kāci cetanā attanā sampayuttakānaṃ dhammānaṃ. Taṃsamuṭṭhānānanti iminā paṭisandhikkhaṇe kaṭattārūpampi gaṇhāti. Kammapaccayenāti idaṃ sahajātacetanaṃ sandhāya vuttaṃ. Kusalādīsu hi yā kāci sahajātacetanā sesadhammānaṃ cittapayogasaṅkhātena kiriyābhāvena upakārikā hoti. Tasmā sahajātakammapaccayoti vuccati. Ayaṃ tāvettha pāḷivaṇṇanā.
அயங் பன கம்மபச்சயோ அத்த²தோ சதுபூ⁴மிகசேதனாமத்தமேவ. ஸோ ஹி ஜாதிபே⁴த³தோ குஸலோ அகுஸலோ விபாகோ கிரியாதி சதுதா⁴ பி⁴ஜ்ஜதி. தத்த² குஸலோ பூ⁴மிதோ காமாவசராதி³வஸேன சதுதா⁴ பி⁴ஜ்ஜதி. அகுஸலோ ஏகதா⁴வ விபாகோ சதுதா⁴, கிரியா திதா⁴வாதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
Ayaṃ pana kammapaccayo atthato catubhūmikacetanāmattameva. So hi jātibhedato kusalo akusalo vipāko kiriyāti catudhā bhijjati. Tattha kusalo bhūmito kāmāvacarādivasena catudhā bhijjati. Akusalo ekadhāva vipāko catudhā, kiriyā tidhāvāti evamettha nānappakārabhedato viññātabbo vinicchayo.
ஏவங் பி⁴ன்னே பனெத்த² ஸஹஜாதா காமாவசரகுஸலசேதனா பஞ்சவோகாரே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, சதுவோகாரே ஸம்பயுத்தக்க²ந்தா⁴னஞ்ஞேவ ஸஹஜாதகம்மபச்சயோ ஹோதி. உப்பஜ்ஜித்வா நிருத்³தா⁴ பன அத்தனோ விபாகானங் க²ந்தா⁴னங் கடத்தா ச ரூபானங் நானாக்க²ணிககம்மபச்சயேன பச்சயோ ஹோதி. ஸா ச கோ² பஞ்சவோகாரேயேவ, ந அஞ்ஞத்த². ஸஹஜாதா ரூபாவசரகுஸலசேதனா அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபானஞ்ச ஏகந்தேனேவ ஸஹஜாதகம்மபச்சயேன பச்சயோ. உப்பஜ்ஜித்வா நிருத்³தா⁴ பன அத்தனோ விபாகானஞ்சேவ கடத்தாரூபானஞ்ச நானாக்க²ணிககம்மபச்சயேன பச்சயோ. அரூபாவசரா பன லோகுத்தரா ச ஸஹஜாதா குஸலசேதனா பஞ்சவோகாரே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபானஞ்ச, சதுவோகாரே ஸம்பயுத்தக்க²ந்தா⁴னஞ்ஞேவ ஸஹஜாதகம்மபச்சயேன பச்சயோ. உப்பஜ்ஜித்வா நிருத்³தா⁴ பனேஸா து³விதா⁴பி அத்தனோ அத்தனோ விபாகக்க²ந்தா⁴னஞ்ஞேவ நானாக்க²ணிககம்மபச்சயேன பச்சயோ. ஸஹஜாதா அகுஸலசேதனா பஞ்சவோகாரே அத்தனா ஸம்பயுத்தக்க²ந்தா⁴னஞ்சேவ சித்தஸமுட்டா²னரூபானஞ்ச சதுவோகாரே அரூபக்க²ந்தா⁴னஞ்ஞேவ ஸஹஜாதகம்மபச்சயேன பச்சயோ. உப்பஜ்ஜித்வா நிருத்³தா⁴ பன விபாகக்க²ந்தா⁴னஞ்சேவ கடத்தாரூபானஞ்ச நானாக்க²ணிககம்மபச்சயேன பச்சயோ.
Evaṃ bhinne panettha sahajātā kāmāvacarakusalacetanā pañcavokāre attanā sampayuttadhammānañceva cittasamuṭṭhānarūpassa ca, catuvokāre sampayuttakkhandhānaññeva sahajātakammapaccayo hoti. Uppajjitvā niruddhā pana attano vipākānaṃ khandhānaṃ kaṭattā ca rūpānaṃ nānākkhaṇikakammapaccayena paccayo hoti. Sā ca kho pañcavokāreyeva, na aññattha. Sahajātā rūpāvacarakusalacetanā attanā sampayuttadhammānañceva cittasamuṭṭhānarūpānañca ekanteneva sahajātakammapaccayena paccayo. Uppajjitvā niruddhā pana attano vipākānañceva kaṭattārūpānañca nānākkhaṇikakammapaccayena paccayo. Arūpāvacarā pana lokuttarā ca sahajātā kusalacetanā pañcavokāre attanā sampayuttadhammānañceva cittasamuṭṭhānarūpānañca, catuvokāre sampayuttakkhandhānaññeva sahajātakammapaccayena paccayo. Uppajjitvā niruddhā panesā duvidhāpi attano attano vipākakkhandhānaññeva nānākkhaṇikakammapaccayena paccayo. Sahajātā akusalacetanā pañcavokāre attanā sampayuttakkhandhānañceva cittasamuṭṭhānarūpānañca catuvokāre arūpakkhandhānaññeva sahajātakammapaccayena paccayo. Uppajjitvā niruddhā pana vipākakkhandhānañceva kaṭattārūpānañca nānākkhaṇikakammapaccayena paccayo.
காமாவசரரூபாவசரதோ விபாகசேதனா அத்தனா ஸம்பயுத்தத⁴ம்மானங் பவத்தே சித்தஸமுட்டா²னரூபானங், படிஸந்தி⁴யங் கடத்தாரூபானஞ்ச ஸஹஜாதகம்மபச்சயேன பச்சயோ. அரூபாவசரவிபாகசேதனா அத்தனா ஸம்பயுத்தத⁴ம்மானஞ்ஞேவ ஸஹஜாதகம்மபச்சயேன பச்சயோ. லோகுத்தரவிபாகசேதனா பஞ்சவோகாரே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, சதுவோகாரே அரூபஸ்ஸேவ ஸஹஜாதகம்மபச்சயேன பச்சயோ. தேபூ⁴மிகா கிரியசேதனா பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச ஸஹஜாதகம்மபச்சயேன பச்சயோ. யா பனெத்த² ஆருப்பே உப்பஜ்ஜதி, ஸா அரூபத⁴ம்மானஞ்ஞேவ ஸஹஜாதகம்மபச்சயேன பச்சயோதி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Kāmāvacararūpāvacarato vipākacetanā attanā sampayuttadhammānaṃ pavatte cittasamuṭṭhānarūpānaṃ, paṭisandhiyaṃ kaṭattārūpānañca sahajātakammapaccayena paccayo. Arūpāvacaravipākacetanā attanā sampayuttadhammānaññeva sahajātakammapaccayena paccayo. Lokuttaravipākacetanā pañcavokāre attanā sampayuttadhammānañceva cittasamuṭṭhānarūpassa ca, catuvokāre arūpasseva sahajātakammapaccayena paccayo. Tebhūmikā kiriyacetanā pañcavokāre sampayuttadhammānañceva cittasamuṭṭhānarūpassa ca sahajātakammapaccayena paccayo. Yā panettha āruppe uppajjati, sā arūpadhammānaññeva sahajātakammapaccayena paccayoti evamettha paccayuppannatopi viññātabbo vinicchayoti.
கம்மபச்சயனித்³தே³ஸவண்ணனா.
Kammapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
