| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. कन्दलिपुप्फियत्थेरअपदानं
9. Kandalipupphiyattheraapadānaṃ
४७.
47.
‘‘सिन्धुया नदिया तीरे, अहोसिं कस्सको तदा।
‘‘Sindhuyā nadiyā tīre, ahosiṃ kassako tadā;
परकम्मायने युत्तो, परभत्तं अपस्सितो॥
Parakammāyane yutto, parabhattaṃ apassito.
४८.
48.
‘‘सिन्धुं अनुचरन्तोहं, सिद्धत्थं जिनमद्दसं।
‘‘Sindhuṃ anucarantohaṃ, siddhatthaṃ jinamaddasaṃ;
समाधिना निसिन्नंव, सतपत्तंव पुप्फितं॥
Samādhinā nisinnaṃva, satapattaṃva pupphitaṃ.
४९.
49.
‘‘सत्त कन्दलिपुप्फानि, वण्टे छेत्वानहं तदा।
‘‘Satta kandalipupphāni, vaṇṭe chetvānahaṃ tadā;
मत्थके अभिरोपेसिं, बुद्धस्सादिच्चबन्धुनो॥
Matthake abhiropesiṃ, buddhassādiccabandhuno.
५०.
50.
‘‘सुवण्णवण्णं सम्बुद्धं, अनुकूले समाहितं।
‘‘Suvaṇṇavaṇṇaṃ sambuddhaṃ, anukūle samāhitaṃ;
तिधापभिन्नमातङ्गं, कुञ्जरंव दुरासदं॥
Tidhāpabhinnamātaṅgaṃ, kuñjaraṃva durāsadaṃ.
५१.
51.
‘‘तमहं उपगन्त्वान, निपकं भावितिन्द्रियं।
‘‘Tamahaṃ upagantvāna, nipakaṃ bhāvitindriyaṃ;
अञ्जलिं पग्गहेत्वान, अवन्दिं सत्थुनो अहं॥
Añjaliṃ paggahetvāna, avandiṃ satthuno ahaṃ.
५२.
52.
‘‘चतुन्नवुतितो कप्पे, यं पुप्फमभिरोपयिं।
‘‘Catunnavutito kappe, yaṃ pupphamabhiropayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
५३.
53.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा कन्दलिपुप्फियो थेरो इमा गाथायो अभासित्थाति।
Itthaṃ sudaṃ āyasmā kandalipupphiyo thero imā gāthāyo abhāsitthāti.
कन्दलिपुप्फियत्थेरस्सापदानं नवमं।
Kandalipupphiyattherassāpadānaṃ navamaṃ.
