Library / Tipiṭaka / တိပိဋက • Tipiṭaka / ဇာတကပာဠိ • Jātakapāḷi |
၄၄၄. ကဏ္ဟဒီပာယနဇာတကံ (၆)
444. Kaṇhadīpāyanajātakaṃ (6)
၆၂.
62.
သတ္တာဟမေဝာဟံ ပသန္နစိတ္တော၊ ပုညတ္ထိကော အာစရိံ 1 ဗ္ရဟ္မစရိယံ။
Sattāhamevāhaṃ pasannacitto, puññatthiko ācariṃ 2 brahmacariyaṃ;
အထာပရံ ယံ စရိတံ မမေဒံ 3၊ ဝသ္သာနိ ပညာသ သမာဓိကာနိ။
Athāparaṃ yaṃ caritaṃ mamedaṃ 4, vassāni paññāsa samādhikāni;
အကာမကော ဝာပိ 5 အဟံ စရာမိ၊ ဧတေန သစ္စေန သုဝတ္ထိ ဟောတု။
Akāmako vāpi 6 ahaṃ carāmi, etena saccena suvatthi hotu;
ဟတံ ဝိသံ ဇီဝတု ယညဒတ္တော။
Hataṃ visaṃ jīvatu yaññadatto.
၆၃.
63.
ယသ္မာ ဒာနံ နာဘိနန္ဒိံ ကဒာစိ၊ ဒိသ္ဝာနဟံ အတိထိံ ဝာသကာလေ။
Yasmā dānaṃ nābhinandiṃ kadāci, disvānahaṃ atithiṃ vāsakāle;
န စာပိ မေ အပ္ပိယတံ အဝေဒုံ၊ ဗဟုသ္သုတာ သမဏဗ္ရာဟ္မဏာ စ။
Na cāpi me appiyataṃ aveduṃ, bahussutā samaṇabrāhmaṇā ca.
အကာမကော ဝာပိ အဟံ ဒဒာမိ၊ ဧတေန သစ္စေန သုဝတ္ထိ ဟောတု။
Akāmako vāpi ahaṃ dadāmi, etena saccena suvatthi hotu;
ဟတံ ဝိသံ ဇီဝတု ယညဒတ္တော။
Hataṃ visaṃ jīvatu yaññadatto.
၆၄.
64.
တသ္မိဉ္စ မေ အပ္ပိယတာယ အဇ္ဇ၊ ပိတရိ စ တေ နတ္ထိ ကောစိ ဝိသေသော။
Tasmiñca me appiyatāya ajja, pitari ca te natthi koci viseso;
ဧတေန သစ္စေန သုဝတ္ထိ ဟောတု၊ ဟတံ ဝိသံ ဇီဝတု ယညဒတ္တော။
Etena saccena suvatthi hotu, hataṃ visaṃ jīvatu yaññadatto.
၆၅.
65.
ဒီပာယန ကိသ္သ ဇိဂုစ္ဆမာနော၊ အကာမကော စရသိ ဗ္ရဟ္မစရိယံ။
Dīpāyana kissa jigucchamāno, akāmako carasi brahmacariyaṃ.
၆၆.
66.
သဒ္ဓာယ နိက္ခမ္မ ပုနံ နိဝတ္တော၊ သော ဧဠမူဂောဝ ဗာလော 15 ဝတာယံ။
Saddhāya nikkhamma punaṃ nivatto, so eḷamūgova bālo 16 vatāyaṃ;
ဧတသ္သ ဝာဒသ္သ ဇိဂုစ္ဆမာနော၊ အကာမကော စရာမိ ဗ္ရဟ္မစရိယံ။
Etassa vādassa jigucchamāno, akāmako carāmi brahmacariyaṃ;
ဝိညုပ္ပသတ္ထဉ္စ သတဉ္စ ဌာနံ 17၊ ဧဝမ္ပဟံ ပုညကရော ဘဝာမိ။
Viññuppasatthañca satañca ṭhānaṃ 18, evampahaṃ puññakaro bhavāmi.
၆၇.
67.
သမဏေ တုဝံ ဗ္ရာဟ္မဏေ အဒ္ဓိကေ စ၊ သန္တပ္ပယာသိ အန္နပာနေန ဘိက္ခံ။
Samaṇe tuvaṃ brāhmaṇe addhike ca, santappayāsi annapānena bhikkhaṃ;
ဩပာနဘူတံဝ ဃရံ တဝ ယိဒံ၊ အန္နေန ပာနေန ဥပေတရူပံ။
Opānabhūtaṃva gharaṃ tava yidaṃ, annena pānena upetarūpaṃ;
အထ ကိသ္သ ဝာဒသ္သ ဇိဂုစ္ဆမာနော၊ အကာမကော ဒာနမိမံ ဒဒာသိ။
Atha kissa vādassa jigucchamāno, akāmako dānamimaṃ dadāsi.
၆၈.
68.
ပိတရော စ မေ အာသုံ ပိတာမဟာ စ၊ သဒ္ဓာ အဟုံ ဒာနပတီ ဝဒညူ။
Pitaro ca me āsuṃ pitāmahā ca, saddhā ahuṃ dānapatī vadaññū;
တံ ကုလ္လဝတ္တံ အနုဝတ္တမာနော၊ မာဟံ ကုလေ အန္တိမဂန္ဓနော 19 အဟုံ။
Taṃ kullavattaṃ anuvattamāno, māhaṃ kule antimagandhano 20 ahuṃ;
ဧတသ္သ ဝာဒသ္သ ဇိဂုစ္ဆမာနော၊ အကာမကော ဒာနမိမံ ဒဒာမိ။
Etassa vādassa jigucchamāno, akāmako dānamimaṃ dadāmi.
၆၉.
69.
ဒဟရိံ ကုမာရိံ အသမတ္ထပညံ၊ ယံ တာနယိံ ဉာတိကုလာ သုဂတ္တေ။
Dahariṃ kumāriṃ asamatthapaññaṃ, yaṃ tānayiṃ ñātikulā sugatte;
န စာပိ မေ အပ္ပိယတံ အဝေဒိ၊ အညတ္ရ ကာမာ ပရိစာရယန္တာ 21။
Na cāpi me appiyataṃ avedi, aññatra kāmā paricārayantā 22;
အထ ကေန ဝဏ္ဏေန မယာ တေ ဘောတိ၊ သံဝာသဓမ္မော အဟု ဧဝရူပော။
Atha kena vaṇṇena mayā te bhoti, saṃvāsadhammo ahu evarūpo.
၇၀.
70.
အာရာ ဒူရေ နယိဓ ကဒာစိ အတ္ထိ၊ ပရမ္ပရာ နာမ ကုလေ ဣမသ္မိံ။
Ārā dūre nayidha kadāci atthi, paramparā nāma kule imasmiṃ;
တံ ကုလ္လဝတ္တံ အနုဝတ္တမာနာ၊ မာဟံ ကုလေ အန္တိမဂန္ဓိနီ အဟုံ။
Taṃ kullavattaṃ anuvattamānā, māhaṃ kule antimagandhinī ahuṃ;
ဧတသ္သ ဝာဒသ္သ ဇိဂုစ္ဆမာနာ၊ အကာမိကာ ပဒ္ဓစရာမ္ဟိ 23 တုယ္ဟံ။
Etassa vādassa jigucchamānā, akāmikā paddhacarāmhi 24 tuyhaṃ.
၇၁.
71.
မဏ္ဍဗ္ယ ဘာသိံ ယမဘာသနေယ္ယံ 25၊ တံ ခမ္ယတံ ပုတ္တကဟေတု မဇ္ဇ။
Maṇḍabya bhāsiṃ yamabhāsaneyyaṃ 26, taṃ khamyataṃ puttakahetu majja;
ပုတ္တပေမာ န ဣဓ ပရတ္ထိ ကိဉ္စိ၊ သော နော အယံ ဇီဝတိ ယညဒတ္တောတိ။
Puttapemā na idha paratthi kiñci, so no ayaṃ jīvati yaññadattoti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ဇာတက-အဋ္ဌကထာ • Jātaka-aṭṭhakathā / [၄၄၄] ၆. ကဏ္ဟဒီပာယနဇာတကဝဏ္ဏနာ • [444] 6. Kaṇhadīpāyanajātakavaṇṇanā