| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૨. કણ્ટકસુત્તં
2. Kaṇṭakasuttaṃ
૭૨. એકં સમયં ભગવા વેસાલિયં વિહરતિ મહાવને કૂટાગારસાલાયં સમ્બહુલેહિ અભિઞ્ઞાતેહિ અભિઞ્ઞાતેહિ થેરેહિ સાવકેહિ સદ્ધિં – આયસ્મતા ચ ચાલેન 1, આયસ્મતા ચ ઉપચાલેન 2, આયસ્મતા ચ કુક્કુટેન 3, આયસ્મતા ચ કળિમ્ભેન 4, આયસ્મતા ચ નિકટેન 5, આયસ્મતા ચ કટિસ્સહેન; અઞ્ઞેહિ ચ અભિઞ્ઞાતેહિ અભિઞ્ઞાતેહિ થેરેહિ સાવકેહિ સદ્ધિં.
72. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ sambahulehi abhiññātehi abhiññātehi therehi sāvakehi saddhiṃ – āyasmatā ca cālena 6, āyasmatā ca upacālena 7, āyasmatā ca kukkuṭena 8, āyasmatā ca kaḷimbhena 9, āyasmatā ca nikaṭena 10, āyasmatā ca kaṭissahena; aññehi ca abhiññātehi abhiññātehi therehi sāvakehi saddhiṃ.
તેન ખો પન સમયેન સમ્બહુલા અભિઞ્ઞાતા અભિઞ્ઞાતા લિચ્છવી ભદ્રેહિ ભદ્રેહિ યાનેહિ પરપુરાય 11 ઉચ્ચાસદ્દા મહાસદ્દા મહાવનં અજ્ઝોગાહન્તિ ભગવન્તં દસ્સનાય. અથ ખો તેસં આયસ્મન્તાનં એતદહોસિ – ‘‘ઇમે ખો સમ્બહુલા અભિઞ્ઞાતા અભિઞ્ઞાતા લિચ્છવી ભદ્રેહિ ભદ્રેહિ યાનેહિ પરપુરાય ઉચ્ચાસદ્દા મહાસદ્દા મહાવનં અજ્ઝોગાહન્તિ ભગવન્તં દસ્સનાય. ‘સદ્દકણ્ટકા ખો પન ઝાના’ વુત્તા ભગવતા. યંનૂન મયં યેન ગોસિઙ્ગસાલવનદાયો તેનુપસઙ્કમેય્યામ . તત્થ મયં અપ્પસદ્દા અપ્પાકિણ્ણા ફાસું 12 વિહરેય્યામા’’તિ. અથ ખો તે આયસ્મન્તો યેન ગોસિઙ્ગસાલવનદાયો તેનુપસઙ્કમિંસુ; તત્થ તે આયસ્મન્તો અપ્પસદ્દા અપ્પાકિણ્ણા ફાસું વિહરન્તિ.
Tena kho pana samayena sambahulā abhiññātā abhiññātā licchavī bhadrehi bhadrehi yānehi parapurāya 13 uccāsaddā mahāsaddā mahāvanaṃ ajjhogāhanti bhagavantaṃ dassanāya. Atha kho tesaṃ āyasmantānaṃ etadahosi – ‘‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya. ‘Saddakaṇṭakā kho pana jhānā’ vuttā bhagavatā. Yaṃnūna mayaṃ yena gosiṅgasālavanadāyo tenupasaṅkameyyāma . Tattha mayaṃ appasaddā appākiṇṇā phāsuṃ 14 vihareyyāmā’’ti. Atha kho te āyasmanto yena gosiṅgasālavanadāyo tenupasaṅkamiṃsu; tattha te āyasmanto appasaddā appākiṇṇā phāsuṃ viharanti.
અથ ખો ભગવા ભિક્ખૂ આમન્તેસિ – ‘‘કહં નુ ખો, ભિક્ખવે, ચાલો, કહં ઉપચાલો, કહં કુક્કુટો, કહં કળિમ્ભો, કહં નિકટો, કહં કટિસ્સહો; કહં નુ ખો તે, ભિક્ખવે, થેરા સાવકા ગતા’’તિ?
Atha kho bhagavā bhikkhū āmantesi – ‘‘kahaṃ nu kho, bhikkhave, cālo, kahaṃ upacālo, kahaṃ kukkuṭo, kahaṃ kaḷimbho, kahaṃ nikaṭo, kahaṃ kaṭissaho; kahaṃ nu kho te, bhikkhave, therā sāvakā gatā’’ti?
‘‘ઇધ, ભન્તે, તેસં આયસ્મન્તાનં એતદહોસિ – ‘ઇમે ખો સમ્બહુલા અભિઞ્ઞાતા અભિઞ્ઞાતા લિચ્છવી ભદ્રેહિ ભદ્રેહિ યાનેહિ પરપુરાય ઉચ્ચાસદ્દા મહાસદ્દા મહાવનં અજ્ઝોગાહન્તિ ભગવન્તં દસ્સનાય ‘સદ્દકણ્ટકા ખો પન ઝાનાવુત્તા ભગવતા યંનૂન મયં યેન ગોસિઙ્ગસાલવનદાયો તેનુપસઙ્કમેય્યામ તત્થ મયં અપ્પસદ્દા અપ્પાકિણ્ણા ફાસું વિહરેય્યામા’તિ. અથ ખો તે, ભન્તે, આયસ્મન્તો યેન ગોસિઙ્ગસાલવનદાયો તેનુપસઙ્કમિંસુ. તત્થ તે આયસ્મન્તો અપ્પસદ્દા અપ્પાકિણ્ણા ફાસું વિહરન્તી’’તિ .
‘‘Idha, bhante, tesaṃ āyasmantānaṃ etadahosi – ‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya ‘saddakaṇṭakā kho pana jhānāvuttā bhagavatā yaṃnūna mayaṃ yena gosiṅgasālavanadāyo tenupasaṅkameyyāma tattha mayaṃ appasaddā appākiṇṇā phāsuṃ vihareyyāmā’ti. Atha kho te, bhante, āyasmanto yena gosiṅgasālavanadāyo tenupasaṅkamiṃsu. Tattha te āyasmanto appasaddā appākiṇṇā phāsuṃ viharantī’’ti .
‘‘સાધુ સાધુ, ભિક્ખવે, યથા તે મહાસાવકા સમ્મા બ્યાકરમાના બ્યાકરેય્યું, ‘સદ્દકણ્ટકા હિ, ભિક્ખવે, ઝાના’ વુત્તા મયા.
‘‘Sādhu sādhu, bhikkhave, yathā te mahāsāvakā sammā byākaramānā byākareyyuṃ, ‘saddakaṇṭakā hi, bhikkhave, jhānā’ vuttā mayā.
‘‘દસયિમે, ભિક્ખવે, કણ્ટકા. કતમે દસ? પવિવેકારામસ્સ સઙ્ગણિકારામતા કણ્ટકો, અસુભનિમિત્તાનુયોગં અનુયુત્તસ્સ સુભનિમિત્તાનુયોગો કણ્ટકો, ઇન્દ્રિયેસુ ગુત્તદ્વારસ્સ વિસૂકદસ્સનં કણ્ટકો, બ્રહ્મચરિયસ્સ માતુગામૂપચારો 15 કણ્ટકો, 16 પઠમસ્સ ઝાનસ્સ સદ્દો કણ્ટકો, દુતિયસ્સ ઝાનસ્સ વિતક્કવિચારા કણ્ટકા, તતિયસ્સ ઝાનસ્સ પીતિ કણ્ટકો, ચતુત્થસ્સ ઝાનસ્સ અસ્સાસપસ્સાસો કણ્ટકો, સઞ્ઞાવેદયિતનિરોધસમાપત્તિયા સઞ્ઞા ચ વેદના ચ કણ્ટકો રાગો કણ્ટકો દોસો કણ્ટકો મોહો કણ્ટકો.
‘‘Dasayime, bhikkhave, kaṇṭakā. Katame dasa? Pavivekārāmassa saṅgaṇikārāmatā kaṇṭako, asubhanimittānuyogaṃ anuyuttassa subhanimittānuyogo kaṇṭako, indriyesu guttadvārassa visūkadassanaṃ kaṇṭako, brahmacariyassa mātugāmūpacāro 17 kaṇṭako, 18 paṭhamassa jhānassa saddo kaṇṭako, dutiyassa jhānassa vitakkavicārā kaṇṭakā, tatiyassa jhānassa pīti kaṇṭako, catutthassa jhānassa assāsapassāso kaṇṭako, saññāvedayitanirodhasamāpattiyā saññā ca vedanā ca kaṇṭako rāgo kaṇṭako doso kaṇṭako moho kaṇṭako.
‘‘અકણ્ટકા , ભિક્ખવે, વિહરથ. નિક્કણ્ટકા, ભિક્ખવે, વિહરથ. અકણ્ટકનિક્કણ્ટકા, ભિક્ખવે, વિહરથ. અકણ્ટકા, ભિક્ખવે, અરહન્તો; નિક્કણ્ટકા, ભિક્ખવે, અરહન્તો; અકણ્ટકનિક્કણ્ટકા, ભિક્ખવે, અરહન્તો’’તિ. દુતિયં.
‘‘Akaṇṭakā , bhikkhave, viharatha. Nikkaṇṭakā, bhikkhave, viharatha. Akaṇṭakanikkaṇṭakā, bhikkhave, viharatha. Akaṇṭakā, bhikkhave, arahanto; nikkaṇṭakā, bhikkhave, arahanto; akaṇṭakanikkaṇṭakā, bhikkhave, arahanto’’ti. Dutiyaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૨. કણ્ટકસુત્તવણ્ણના • 2. Kaṇṭakasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧-૪. આકઙ્ખસુત્તાદિવણ્ણના • 1-4. Ākaṅkhasuttādivaṇṇanā
