| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ಕಣ್ಟಕಸುತ್ತಂ
2. Kaṇṭakasuttaṃ
೭೨. ಏಕಂ ಸಮಯಂ ಭಗವಾ ವೇಸಾಲಿಯಂ ವಿಹರತಿ ಮಹಾವನೇ ಕೂಟಾಗಾರಸಾಲಾಯಂ ಸಮ್ಬಹುಲೇಹಿ ಅಭಿಞ್ಞಾತೇಹಿ ಅಭಿಞ್ಞಾತೇಹಿ ಥೇರೇಹಿ ಸಾವಕೇಹಿ ಸದ್ಧಿಂ – ಆಯಸ್ಮತಾ ಚ ಚಾಲೇನ 1, ಆಯಸ್ಮತಾ ಚ ಉಪಚಾಲೇನ 2, ಆಯಸ್ಮತಾ ಚ ಕುಕ್ಕುಟೇನ 3, ಆಯಸ್ಮತಾ ಚ ಕಳಿಮ್ಭೇನ 4, ಆಯಸ್ಮತಾ ಚ ನಿಕಟೇನ 5, ಆಯಸ್ಮತಾ ಚ ಕಟಿಸ್ಸಹೇನ; ಅಞ್ಞೇಹಿ ಚ ಅಭಿಞ್ಞಾತೇಹಿ ಅಭಿಞ್ಞಾತೇಹಿ ಥೇರೇಹಿ ಸಾವಕೇಹಿ ಸದ್ಧಿಂ।
72. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ sambahulehi abhiññātehi abhiññātehi therehi sāvakehi saddhiṃ – āyasmatā ca cālena 6, āyasmatā ca upacālena 7, āyasmatā ca kukkuṭena 8, āyasmatā ca kaḷimbhena 9, āyasmatā ca nikaṭena 10, āyasmatā ca kaṭissahena; aññehi ca abhiññātehi abhiññātehi therehi sāvakehi saddhiṃ.
ತೇನ ಖೋ ಪನ ಸಮಯೇನ ಸಮ್ಬಹುಲಾ ಅಭಿಞ್ಞಾತಾ ಅಭಿಞ್ಞಾತಾ ಲಿಚ್ಛವೀ ಭದ್ರೇಹಿ ಭದ್ರೇಹಿ ಯಾನೇಹಿ ಪರಪುರಾಯ 11 ಉಚ್ಚಾಸದ್ದಾ ಮಹಾಸದ್ದಾ ಮಹಾವನಂ ಅಜ್ಝೋಗಾಹನ್ತಿ ಭಗವನ್ತಂ ದಸ್ಸನಾಯ। ಅಥ ಖೋ ತೇಸಂ ಆಯಸ್ಮನ್ತಾನಂ ಏತದಹೋಸಿ – ‘‘ಇಮೇ ಖೋ ಸಮ್ಬಹುಲಾ ಅಭಿಞ್ಞಾತಾ ಅಭಿಞ್ಞಾತಾ ಲಿಚ್ಛವೀ ಭದ್ರೇಹಿ ಭದ್ರೇಹಿ ಯಾನೇಹಿ ಪರಪುರಾಯ ಉಚ್ಚಾಸದ್ದಾ ಮಹಾಸದ್ದಾ ಮಹಾವನಂ ಅಜ್ಝೋಗಾಹನ್ತಿ ಭಗವನ್ತಂ ದಸ್ಸನಾಯ। ‘ಸದ್ದಕಣ್ಟಕಾ ಖೋ ಪನ ಝಾನಾ’ ವುತ್ತಾ ಭಗವತಾ। ಯಂನೂನ ಮಯಂ ಯೇನ ಗೋಸಿಙ್ಗಸಾಲವನದಾಯೋ ತೇನುಪಸಙ್ಕಮೇಯ್ಯಾಮ । ತತ್ಥ ಮಯಂ ಅಪ್ಪಸದ್ದಾ ಅಪ್ಪಾಕಿಣ್ಣಾ ಫಾಸುಂ 12 ವಿಹರೇಯ್ಯಾಮಾ’’ತಿ। ಅಥ ಖೋ ತೇ ಆಯಸ್ಮನ್ತೋ ಯೇನ ಗೋಸಿಙ್ಗಸಾಲವನದಾಯೋ ತೇನುಪಸಙ್ಕಮಿಂಸು; ತತ್ಥ ತೇ ಆಯಸ್ಮನ್ತೋ ಅಪ್ಪಸದ್ದಾ ಅಪ್ಪಾಕಿಣ್ಣಾ ಫಾಸುಂ ವಿಹರನ್ತಿ।
Tena kho pana samayena sambahulā abhiññātā abhiññātā licchavī bhadrehi bhadrehi yānehi parapurāya 13 uccāsaddā mahāsaddā mahāvanaṃ ajjhogāhanti bhagavantaṃ dassanāya. Atha kho tesaṃ āyasmantānaṃ etadahosi – ‘‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya. ‘Saddakaṇṭakā kho pana jhānā’ vuttā bhagavatā. Yaṃnūna mayaṃ yena gosiṅgasālavanadāyo tenupasaṅkameyyāma . Tattha mayaṃ appasaddā appākiṇṇā phāsuṃ 14 vihareyyāmā’’ti. Atha kho te āyasmanto yena gosiṅgasālavanadāyo tenupasaṅkamiṃsu; tattha te āyasmanto appasaddā appākiṇṇā phāsuṃ viharanti.
ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಕಹಂ ನು ಖೋ, ಭಿಕ್ಖವೇ, ಚಾಲೋ, ಕಹಂ ಉಪಚಾಲೋ, ಕಹಂ ಕುಕ್ಕುಟೋ, ಕಹಂ ಕಳಿಮ್ಭೋ, ಕಹಂ ನಿಕಟೋ, ಕಹಂ ಕಟಿಸ್ಸಹೋ; ಕಹಂ ನು ಖೋ ತೇ, ಭಿಕ್ಖವೇ, ಥೇರಾ ಸಾವಕಾ ಗತಾ’’ತಿ?
Atha kho bhagavā bhikkhū āmantesi – ‘‘kahaṃ nu kho, bhikkhave, cālo, kahaṃ upacālo, kahaṃ kukkuṭo, kahaṃ kaḷimbho, kahaṃ nikaṭo, kahaṃ kaṭissaho; kahaṃ nu kho te, bhikkhave, therā sāvakā gatā’’ti?
‘‘ಇಧ, ಭನ್ತೇ, ತೇಸಂ ಆಯಸ್ಮನ್ತಾನಂ ಏತದಹೋಸಿ – ‘ಇಮೇ ಖೋ ಸಮ್ಬಹುಲಾ ಅಭಿಞ್ಞಾತಾ ಅಭಿಞ್ಞಾತಾ ಲಿಚ್ಛವೀ ಭದ್ರೇಹಿ ಭದ್ರೇಹಿ ಯಾನೇಹಿ ಪರಪುರಾಯ ಉಚ್ಚಾಸದ್ದಾ ಮಹಾಸದ್ದಾ ಮಹಾವನಂ ಅಜ್ಝೋಗಾಹನ್ತಿ ಭಗವನ್ತಂ ದಸ್ಸನಾಯ ‘ಸದ್ದಕಣ್ಟಕಾ ಖೋ ಪನ ಝಾನಾವುತ್ತಾ ಭಗವತಾ ಯಂನೂನ ಮಯಂ ಯೇನ ಗೋಸಿಙ್ಗಸಾಲವನದಾಯೋ ತೇನುಪಸಙ್ಕಮೇಯ್ಯಾಮ ತತ್ಥ ಮಯಂ ಅಪ್ಪಸದ್ದಾ ಅಪ್ಪಾಕಿಣ್ಣಾ ಫಾಸುಂ ವಿಹರೇಯ್ಯಾಮಾ’ತಿ। ಅಥ ಖೋ ತೇ, ಭನ್ತೇ, ಆಯಸ್ಮನ್ತೋ ಯೇನ ಗೋಸಿಙ್ಗಸಾಲವನದಾಯೋ ತೇನುಪಸಙ್ಕಮಿಂಸು। ತತ್ಥ ತೇ ಆಯಸ್ಮನ್ತೋ ಅಪ್ಪಸದ್ದಾ ಅಪ್ಪಾಕಿಣ್ಣಾ ಫಾಸುಂ ವಿಹರನ್ತೀ’’ತಿ ।
‘‘Idha, bhante, tesaṃ āyasmantānaṃ etadahosi – ‘ime kho sambahulā abhiññātā abhiññātā licchavī bhadrehi bhadrehi yānehi parapurāya uccāsaddā mahāsaddā mahāvanaṃ ajjhogāhanti bhagavantaṃ dassanāya ‘saddakaṇṭakā kho pana jhānāvuttā bhagavatā yaṃnūna mayaṃ yena gosiṅgasālavanadāyo tenupasaṅkameyyāma tattha mayaṃ appasaddā appākiṇṇā phāsuṃ vihareyyāmā’ti. Atha kho te, bhante, āyasmanto yena gosiṅgasālavanadāyo tenupasaṅkamiṃsu. Tattha te āyasmanto appasaddā appākiṇṇā phāsuṃ viharantī’’ti .
‘‘ಸಾಧು ಸಾಧು, ಭಿಕ್ಖವೇ, ಯಥಾ ತೇ ಮಹಾಸಾವಕಾ ಸಮ್ಮಾ ಬ್ಯಾಕರಮಾನಾ ಬ್ಯಾಕರೇಯ್ಯುಂ, ‘ಸದ್ದಕಣ್ಟಕಾ ಹಿ, ಭಿಕ್ಖವೇ, ಝಾನಾ’ ವುತ್ತಾ ಮಯಾ।
‘‘Sādhu sādhu, bhikkhave, yathā te mahāsāvakā sammā byākaramānā byākareyyuṃ, ‘saddakaṇṭakā hi, bhikkhave, jhānā’ vuttā mayā.
‘‘ದಸಯಿಮೇ, ಭಿಕ್ಖವೇ, ಕಣ್ಟಕಾ। ಕತಮೇ ದಸ? ಪವಿವೇಕಾರಾಮಸ್ಸ ಸಙ್ಗಣಿಕಾರಾಮತಾ ಕಣ್ಟಕೋ, ಅಸುಭನಿಮಿತ್ತಾನುಯೋಗಂ ಅನುಯುತ್ತಸ್ಸ ಸುಭನಿಮಿತ್ತಾನುಯೋಗೋ ಕಣ್ಟಕೋ, ಇನ್ದ್ರಿಯೇಸು ಗುತ್ತದ್ವಾರಸ್ಸ ವಿಸೂಕದಸ್ಸನಂ ಕಣ್ಟಕೋ, ಬ್ರಹ್ಮಚರಿಯಸ್ಸ ಮಾತುಗಾಮೂಪಚಾರೋ 15 ಕಣ್ಟಕೋ, 16 ಪಠಮಸ್ಸ ಝಾನಸ್ಸ ಸದ್ದೋ ಕಣ್ಟಕೋ, ದುತಿಯಸ್ಸ ಝಾನಸ್ಸ ವಿತಕ್ಕವಿಚಾರಾ ಕಣ್ಟಕಾ, ತತಿಯಸ್ಸ ಝಾನಸ್ಸ ಪೀತಿ ಕಣ್ಟಕೋ, ಚತುತ್ಥಸ್ಸ ಝಾನಸ್ಸ ಅಸ್ಸಾಸಪಸ್ಸಾಸೋ ಕಣ್ಟಕೋ, ಸಞ್ಞಾವೇದಯಿತನಿರೋಧಸಮಾಪತ್ತಿಯಾ ಸಞ್ಞಾ ಚ ವೇದನಾ ಚ ಕಣ್ಟಕೋ ರಾಗೋ ಕಣ್ಟಕೋ ದೋಸೋ ಕಣ್ಟಕೋ ಮೋಹೋ ಕಣ್ಟಕೋ।
‘‘Dasayime, bhikkhave, kaṇṭakā. Katame dasa? Pavivekārāmassa saṅgaṇikārāmatā kaṇṭako, asubhanimittānuyogaṃ anuyuttassa subhanimittānuyogo kaṇṭako, indriyesu guttadvārassa visūkadassanaṃ kaṇṭako, brahmacariyassa mātugāmūpacāro 17 kaṇṭako, 18 paṭhamassa jhānassa saddo kaṇṭako, dutiyassa jhānassa vitakkavicārā kaṇṭakā, tatiyassa jhānassa pīti kaṇṭako, catutthassa jhānassa assāsapassāso kaṇṭako, saññāvedayitanirodhasamāpattiyā saññā ca vedanā ca kaṇṭako rāgo kaṇṭako doso kaṇṭako moho kaṇṭako.
‘‘ಅಕಣ್ಟಕಾ , ಭಿಕ್ಖವೇ, ವಿಹರಥ। ನಿಕ್ಕಣ್ಟಕಾ, ಭಿಕ್ಖವೇ, ವಿಹರಥ। ಅಕಣ್ಟಕನಿಕ್ಕಣ್ಟಕಾ, ಭಿಕ್ಖವೇ, ವಿಹರಥ। ಅಕಣ್ಟಕಾ, ಭಿಕ್ಖವೇ, ಅರಹನ್ತೋ; ನಿಕ್ಕಣ್ಟಕಾ, ಭಿಕ್ಖವೇ, ಅರಹನ್ತೋ; ಅಕಣ್ಟಕನಿಕ್ಕಣ್ಟಕಾ, ಭಿಕ್ಖವೇ, ಅರಹನ್ತೋ’’ತಿ। ದುತಿಯಂ।
‘‘Akaṇṭakā , bhikkhave, viharatha. Nikkaṇṭakā, bhikkhave, viharatha. Akaṇṭakanikkaṇṭakā, bhikkhave, viharatha. Akaṇṭakā, bhikkhave, arahanto; nikkaṇṭakā, bhikkhave, arahanto; akaṇṭakanikkaṇṭakā, bhikkhave, arahanto’’ti. Dutiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೨. ಕಣ್ಟಕಸುತ್ತವಣ್ಣನಾ • 2. Kaṇṭakasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೪. ಆಕಙ್ಖಸುತ್ತಾದಿವಣ್ಣನಾ • 1-4. Ākaṅkhasuttādivaṇṇanā
