| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
10. கப்பமாணவஸுத்தனித்³தே³ஸவண்ணனா
10. Kappamāṇavasuttaniddesavaṇṇanā
61. த³ஸமே கப்பஸுத்தனித்³தே³ஸே – மஜ்ஜே² ஸரஸ்மிந்தி புரிமபச்சி²மகோடிபஞ்ஞாணாபா⁴வதோ மஜ்ஜ²பூ⁴தே ஸங்ஸாரேதி வுத்தங் ஹோதி. திட்ட²தந்தி திட்ட²மானானங். யதா²யித³ங் நாபரங் ஸியாதி யதா² இத³ங் து³க்க²ங் புன ந ப⁴வெய்ய.
61. Dasame kappasuttaniddese – majjhe sarasminti purimapacchimakoṭipaññāṇābhāvato majjhabhūte saṃsāreti vuttaṃ hoti. Tiṭṭhatanti tiṭṭhamānānaṃ. Yathāyidaṃ nāparaṃ siyāti yathā idaṃ dukkhaṃ puna na bhaveyya.
ஆக³மனந்தி புப்³ப³ந்ததோ இதா⁴க³மனங். க³மனந்தி இதோ பரலோகக³மனங். க³மனாக³மனந்தி தது³ப⁴யவஸேன வுத்தங். காலந்தி மரணகாலங். க³தீதி நிப்³ப³த்தி. ப⁴வாப⁴வோதி ப⁴வதோ ப⁴வோ. சுதி சாதி ப⁴வதோ சவனஞ்ச. உபபத்தி சாதி சுதஸ்ஸ உபபத்தி ச. நிப்³ப³த்தி சாதி பாதுபா⁴வோ ச. பே⁴தோ³ சாதி க²ந்த⁴பே⁴தோ³ ச. ஜாதி சாதி ஜனநஞ்ச. ஜரா சாதி ஹானி ச. மரணஞ்சாதி ஜீவிதிந்த்³ரியஸ்ஸ சாகோ³ ச. புரிமாபி கோடி ந பஞ்ஞாயதீதி புப்³பா³பி கோடி நத்தி² ந ஸங்விஜ்ஜதி. ததா² பச்சி²மாபி கோடி.
Āgamananti pubbantato idhāgamanaṃ. Gamananti ito paralokagamanaṃ. Gamanāgamananti tadubhayavasena vuttaṃ. Kālanti maraṇakālaṃ. Gatīti nibbatti. Bhavābhavoti bhavato bhavo. Cuti cāti bhavato cavanañca. Upapatti cāti cutassa upapatti ca. Nibbatti cāti pātubhāvo ca. Bhedo cāti khandhabhedo ca. Jāti cāti jananañca. Jarā cāti hāni ca. Maraṇañcāti jīvitindriyassa cāgo ca. Purimāpi koṭi na paññāyatīti pubbāpi koṭi natthi na saṃvijjati. Tathā pacchimāpi koṭi.
எத்தகா ஜாதியோதி ஏதபரமா ஜாதியோ. வட்டங் வத்தீதி ஸங்ஸாரபவத்தி. ததோ பரங் ந வத்ததீதி ததோ உத்³த⁴ங் நப்பவத்ததி. ஹேவங் நத்தீ²தி ஏவங் நத்தி² ந ஸங்விஜ்ஜதி. ஹி-இதி நிபாதோ. அனமதக்³கோ³யந்தி அயங் ஸங்ஸாரோ அவிதி³தக்³கோ³.
Ettakā jātiyoti etaparamā jātiyo. Vaṭṭaṃ vattīti saṃsārapavatti. Tato paraṃ na vattatīti tato uddhaṃ nappavattati. Hevaṃ natthīti evaṃ natthi na saṃvijjati. Hi-iti nipāto. Anamataggoyanti ayaṃ saṃsāro aviditaggo.
அவிஜ்ஜானீவரணானந்தி அவிஜ்ஜாய ஆவரிதானங். தண்ஹாஸங்யோஜனானந்தி காமராக³ஸங்கா²ததண்ஹாப³ந்த⁴னப³த்³தா⁴னங். ஸந்தா⁴வதந்தி காமதா⁴துயா புனப்புனங் தா⁴வந்தானங். ஸங்ஸரதந்தி ரூபாரூபதா⁴துயா ஸங்ஸரந்தானங். து³க்க²ங் பச்சனுபூ⁴தந்தி காயிகசேதஸிகது³க்க²ங் அனுபூ⁴தங் விந்தி³தங். திப்³ப³ந்தி ப³ஹலங். ப்³யஸனந்தி அவட்³டி⁴ வினாஸோ. கடஸீ வட்³டி⁴தாதி ஸுஸானவட்³டி⁴தங். அலமேவாதி யுத்தமேவ . ஸப்³ப³ஸங்கா²ரேஸூதி தேபூ⁴மகஸங்கா²ரேஸு. நிப்³பி³ந்தி³துந்தி உக்கண்டி²துங். விரஜ்ஜிதுந்தி விராக³ங் உப்பாதே³துங். விமுச்சிதுந்தி மோசேதுங். வட்டங் வத்திஸ்ஸதீதி ஸங்ஸாரபவத்தங் தேபூ⁴மகவட்டங் அனாக³தே பவத்திஸ்ஸதி. ததோ பரங் ந வத்திஸ்ஸதீதி ததோ உத்³த⁴ங் அனாக³தே ஸங்ஸாரபவத்தங் நப்பவத்திஸ்ஸதி. ஜாதிப⁴யேதி ஜாதிங் படிச்ச உப்பஜ்ஜனகப⁴யே. ஜராப⁴யாதீ³ஸுபி ஏஸேவ நயோ.
Avijjānīvaraṇānanti avijjāya āvaritānaṃ. Taṇhāsaṃyojanānanti kāmarāgasaṅkhātataṇhābandhanabaddhānaṃ. Sandhāvatanti kāmadhātuyā punappunaṃ dhāvantānaṃ. Saṃsaratanti rūpārūpadhātuyā saṃsarantānaṃ. Dukkhaṃ paccanubhūtanti kāyikacetasikadukkhaṃ anubhūtaṃ vinditaṃ. Tibbanti bahalaṃ. Byasananti avaḍḍhi vināso. Kaṭasī vaḍḍhitāti susānavaḍḍhitaṃ. Alamevāti yuttameva . Sabbasaṅkhāresūti tebhūmakasaṅkhāresu. Nibbinditunti ukkaṇṭhituṃ. Virajjitunti virāgaṃ uppādetuṃ. Vimuccitunti mocetuṃ. Vaṭṭaṃ vattissatīti saṃsārapavattaṃ tebhūmakavaṭṭaṃ anāgate pavattissati. Tato paraṃ na vattissatīti tato uddhaṃ anāgate saṃsārapavattaṃ nappavattissati. Jātibhayeti jātiṃ paṭicca uppajjanakabhaye. Jarābhayādīsupi eseva nayo.
62-3. அத²ஸ்ஸ ப⁴க³வா தமத்த²ங் ப்³யாகரொந்தோ உபரூபரிகா³தா²யோ அபா⁴ஸி. து³தியகா³தா² வுத்தத்தா²யேவ. ததியகா³தா²ய அகிஞ்சனந்தி கிஞ்சனபடிபக்க²ங். அனாதா³னந்தி ஆதா³னபடிபக்க²ங், கிஞ்சனாதா³னவூபஸமந்தி வுத்தங் ஹோதி. அனாபரந்தி அபரபடிபா⁴க³தீ³பவிரஹிதங், ஸெட்ட²ந்தி வுத்தங் ஹோதி.
62-3. Athassa bhagavā tamatthaṃ byākaronto uparūparigāthāyo abhāsi. Dutiyagāthā vuttatthāyeva. Tatiyagāthāya akiñcananti kiñcanapaṭipakkhaṃ. Anādānanti ādānapaṭipakkhaṃ, kiñcanādānavūpasamanti vuttaṃ hoti. Anāparanti aparapaṭibhāgadīpavirahitaṃ, seṭṭhanti vuttaṃ hoti.
64. சதுத்த²கா³தா²ய ந தே மாரஸ்ஸ பத்³த⁴கூ³தி தே மாரஸ்ஸ பத்³த⁴சரா பரிசாரிகா ஸிஸ்ஸா ந ஹொந்தி.
64. Catutthagāthāya na te mārassa paddhagūti te mārassa paddhacarā paricārikā sissā na honti.
மஹாஜனங் பாஸே நியோஜெத்வா மாரேதீதி மாரோ. அகுஸலகம்மே நியுத்தத்தா கண்ஹோ. ச²ஸு தே³வலோகேஸு அதி⁴பதித்தா அதி⁴பதி. அகுஸலானங் த⁴ம்மானங் அந்தங் க³தத்தா அந்தகூ³. பாபஜனங் ந முஞ்சதீதி நமுசி. ஸதிவிப்பவாஸப்பமத்தபுக்³க³லானங் ஞாதகோதி பமத்தப³ந்து⁴. ஸேஸங் ஸப்³ப³த்த² பாகடமேவ.
Mahājanaṃ pāse niyojetvā māretīti māro. Akusalakamme niyuttattā kaṇho. Chasu devalokesu adhipatittā adhipati. Akusalānaṃ dhammānaṃ antaṃ gatattā antagū. Pāpajanaṃ na muñcatīti namuci. Sativippavāsappamattapuggalānaṃ ñātakoti pamattabandhu. Sesaṃ sabbattha pākaṭameva.
ஏவங் ப⁴க³வா இத³ம்பி ஸுத்தங் அரஹத்தனிகூடேனேவ தே³ஸேஸி, தே³ஸனாபரியோஸானே ச புப்³ப³ஸதி³ஸோவ த⁴ம்மாபி⁴ஸமயோ அஹோஸீதி.
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadisova dhammābhisamayo ahosīti.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
கப்பமாணவஸுத்தனித்³தே³ஸவண்ணனா நிட்டி²தா.
Kappamāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
10. கப்பமாணவபுச்சா² • 10. Kappamāṇavapucchā
10. கப்பமாணவபுச்சா²னித்³தே³ஸோ • 10. Kappamāṇavapucchāniddeso
