| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. காரணபாலீஸுத்தவண்ணனா
4. Kāraṇapālīsuttavaṇṇanā
194. சதுத்தே² காரணபாலீதி பாலோதி தஸ்ஸ நாமங், ராஜகுலானங் பன கம்மந்தே காரேதீதி காரணபாலீ நாம ஜாதோ. கம்மந்தங் காரேதீதி பாதோவ உட்டா²ய த்³வாரட்டாலகபாகாரே அகதே காரேதி, ஜிண்ணே படிஜக்³கா³பேதி. பிங்கி³யானிங் ப்³ராஹ்மணந்தி ஏவங்னாமகங் அனாகா³மிப²லே பதிட்டி²தங் அரியஸாவகங் ப்³ராஹ்மணங். ஸோ கிர பாதோவ உட்டா²ய க³ந்த⁴மாலாதீ³னி கா³ஹாபெத்வா ஸத்து² ஸந்திகங் க³ந்த்வா வந்தி³த்வா க³ந்த⁴மாலாதீ³ஹி பூஜெத்வா நக³ரங் ஆக³ச்ச²தி, இத³ங் ப்³ராஹ்மணஸ்ஸ தே³வஸிகங் வத்தந்தி. தங் ஸோ ஏவங் வத்தங் கத்வா ஆக³ச்ச²ந்தங் அத்³த³ஸ. ஏதத³வோசாதி ‘‘அயங் ப்³ராஹ்மணோ பஞ்ஞவா ஞாணுத்தரோ, கஹங் நு கோ² பாதோவ க³ந்த்வா ஆக³ச்ச²தீ’’தி சிந்தெத்வா அனுக்கமேன ஸந்திகங் ஆக³தங் ஸஞ்ஜானித்வா ‘‘ஹந்த³ குதோ நூ’’திஆதி³வசனங் அவோச.
194. Catutthe kāraṇapālīti pāloti tassa nāmaṃ, rājakulānaṃ pana kammante kāretīti kāraṇapālī nāma jāto. Kammantaṃkāretīti pātova uṭṭhāya dvāraṭṭālakapākāre akate kāreti, jiṇṇe paṭijaggāpeti. Piṅgiyāniṃ brāhmaṇanti evaṃnāmakaṃ anāgāmiphale patiṭṭhitaṃ ariyasāvakaṃ brāhmaṇaṃ. So kira pātova uṭṭhāya gandhamālādīni gāhāpetvā satthu santikaṃ gantvā vanditvā gandhamālādīhi pūjetvā nagaraṃ āgacchati, idaṃ brāhmaṇassa devasikaṃ vattanti. Taṃ so evaṃ vattaṃ katvā āgacchantaṃ addasa. Etadavocāti ‘‘ayaṃ brāhmaṇo paññavā ñāṇuttaro, kahaṃ nu kho pātova gantvā āgacchatī’’ti cintetvā anukkamena santikaṃ āgataṃ sañjānitvā ‘‘handa kuto nū’’tiādivacanaṃ avoca.
தத்த² தி³வா தி³வஸ்ஸாதி தி³வஸஸ்ஸாபி தி³வா, மஜ்ஜ²ன்ஹிககாலேதி அத்தோ². பண்டி³தோ மஞ்ஞேதி ப⁴வங் பிங்கி³யானீ ஸமணங் கோ³தமங் பண்டி³தோதி மஞ்ஞதி, உதா³ஹு நோதி அயமெத்த² அத்தோ². கோ சாஹங், போ⁴தி, போ⁴, ஸமணஸ்ஸ கோ³தமஸ்ஸ பஞ்ஞாவெய்யத்தியஜானநே அஹங் கோ நாம? கோ ச ஸமணஸ்ஸ கோ³தமஸ்ஸ பஞ்ஞாவெய்யத்தியங் ஜானிஸ்ஸாமீதி குதோ சாஹங் ஸமணஸ்ஸ கோ³தமஸ்ஸ பஞ்ஞாவெய்யத்தியங் ஜானிஸ்ஸாமி, கேன நாம காரணேன ஜானிஸ்ஸாமீதி ஏவங் ஸப்³ப³தா²பி அத்தனோ அஜானநபா⁴வங் தீ³பேதி. ஸோபி நூனஸ்ஸ தாதி³ஸோவாதி யோ ஸமணஸ்ஸ கோ³தமஸ்ஸ பஞ்ஞாவெய்யத்தியங் ஜானெய்ய, ஸோபி நூன த³ஸ பாரமியோ பூரெத்வா ஸப்³ப³ஞ்ஞுதங் பத்தோ தாதி³ஸோ பு³த்³தோ⁴யேவ ப⁴வெய்ய. ஸினேருங் வா ஹி பத²விங் வா ஆகாஸங் வா பமேதுகாமேன தப்பமாணோ த³ண்டோ³ வா ரஜ்ஜு வா லத்³து⁴ங் வட்டதி, ஸமணஸ்ஸ கோ³தமஸ்ஸ பஞ்ஞங் ஜானந்தேனபி தஸ்ஸ ஞாணஸதி³ஸமேவ ஸப்³ப³ஞ்ஞுதஞ்ஞாணங் லத்³து⁴ங் வட்டதீதி தீ³பேதி. ஆத³ரவஸேன பனெத்த² ஆமேடி³தங் கதங். உளாராயாதி உத்தமாய ஸெட்டா²ய. கோ சாஹங், போ⁴தி, போ⁴, அஹங் ஸமணஸ்ஸ கோ³தமஸ்ஸ பஸங்ஸனே கோ நாம. கோ ச ஸமணங் கோ³தமங் பஸங்ஸிஸ்ஸாமீதி கேன காரணேன பஸங்ஸிஸ்ஸாமி.
Tattha divā divassāti divasassāpi divā, majjhanhikakāleti attho. Paṇḍito maññeti bhavaṃ piṅgiyānī samaṇaṃ gotamaṃ paṇḍitoti maññati, udāhu noti ayamettha attho. Ko cāhaṃ, bhoti, bho, samaṇassa gotamassa paññāveyyattiyajānane ahaṃ ko nāma? Ko ca samaṇassa gotamassa paññāveyyattiyaṃ jānissāmīti kuto cāhaṃ samaṇassa gotamassa paññāveyyattiyaṃ jānissāmi, kena nāma kāraṇena jānissāmīti evaṃ sabbathāpi attano ajānanabhāvaṃ dīpeti. Sopi nūnassa tādisovāti yo samaṇassa gotamassa paññāveyyattiyaṃ jāneyya, sopi nūna dasa pāramiyo pūretvā sabbaññutaṃ patto tādiso buddhoyeva bhaveyya. Sineruṃ vā hi pathaviṃ vā ākāsaṃ vā pametukāmena tappamāṇo daṇḍo vā rajju vā laddhuṃ vaṭṭati, samaṇassa gotamassa paññaṃ jānantenapi tassa ñāṇasadisameva sabbaññutaññāṇaṃ laddhuṃ vaṭṭatīti dīpeti. Ādaravasena panettha āmeḍitaṃ kataṃ. Uḷārāyāti uttamāya seṭṭhāya. Ko cāhaṃ, bhoti, bho, ahaṃ samaṇassa gotamassa pasaṃsane ko nāma. Ko ca samaṇaṃ gotamaṃ pasaṃsissāmīti kena kāraṇena pasaṃsissāmi.
பஸத்த²ப்பஸத்தோ²தி ஸப்³ப³கு³ணானங் உபரி சரேஹி ஸப்³ப³லோகபஸத்தே²ஹி அத்தனோ கு³ணேஹேவ பஸத்தோ², ந தஸ்ஸ அஞ்ஞேஹி பஸங்ஸனகிச்சங் அத்தி². யதா² ஹி சம்பகபுப்ப²ங் வா நீலுப்பலங் வா பது³மங் வா லோஹிதசந்த³னங் வா அத்தனோ வண்ணக³ந்த⁴ஸிரியாவ பாஸாதி³கஞ்சேவ ஸுக³ந்த⁴ஞ்ச, ந தஸ்ஸ ஆக³ந்துகேஹி வண்ணக³ந்தே⁴ஹி தோ²மனகிச்சங் அத்தி². யதா² ச மணிரதனங் வா சந்த³மண்ட³லங் வா அத்தனோ ஆலோகேனேவ ஓபா⁴ஸதி, ந தஸ்ஸ அஞ்ஞேன ஓபா⁴ஸனகிச்சங் அத்தி², ஏவங் ஸமணோ கோ³தமோ ஸப்³ப³லோகபஸத்தே²ஹி அத்தனோ கு³ணேஹேவ பஸத்தோ² தோ²மிதோ, ஸப்³ப³லோகஸ்ஸ ஸெட்ட²தங் பாபிதோ. ந தஸ்ஸ அஞ்ஞேன பஸங்ஸனகிச்சங் அத்தி².
Pasatthappasatthoti sabbaguṇānaṃ upari carehi sabbalokapasatthehi attano guṇeheva pasattho, na tassa aññehi pasaṃsanakiccaṃ atthi. Yathā hi campakapupphaṃ vā nīluppalaṃ vā padumaṃ vā lohitacandanaṃ vā attano vaṇṇagandhasiriyāva pāsādikañceva sugandhañca, na tassa āgantukehi vaṇṇagandhehi thomanakiccaṃ atthi. Yathā ca maṇiratanaṃ vā candamaṇḍalaṃ vā attano ālokeneva obhāsati, na tassa aññena obhāsanakiccaṃ atthi, evaṃ samaṇo gotamo sabbalokapasatthehi attano guṇeheva pasattho thomito, sabbalokassa seṭṭhataṃ pāpito. Na tassa aññena pasaṃsanakiccaṃ atthi.
பஸத்தே²ஹி வா பஸத்தோ²திபி பஸத்த²ப்பஸத்தோ². கே பன பஸத்தா² நாம? ராஜா பஸேனதி³ கோஸலோ காஸிகோஸலவாஸிகேஹி பஸத்தோ², பி³ம்பி³ஸாரோ அங்க³மக³த⁴வாஸீஹி, வேஸாலிகா லிச்ச²வீ வஜ்ஜிதட்ட²வாஸீஹி பஸத்தா², பாவெய்யகா மல்லா கோஸினாரகா மல்லா அஞ்ஞேபி தே தே க²த்தியா தேஹி தேஹி ஜானபதே³ஹி பஸத்தா², சங்கிஆத³யோ ப்³ராஹ்மணா ப்³ராஹ்மணக³ணேஹி, அனாத²பிண்டி³காத³யோ உபாஸகா உபாஸகக³ணேஹி, விஸாகா²ஆதி³கா உபாஸிகா அனேகஸதாஹி உபாஸிகாஹி, ஸகுலுதா³யிஆத³யோ பரிப்³பா³ஜகா அனேகேஹி பரிப்³பா³ஜகஸதேஹி, உப்பலவண்ணத்தே²ரிஆதி³கா மஹாஸாவிகா அனேகேஹி பி⁴க்கு²னிஸதேஹி, ஸாரிபுத்தத்தே²ராத³யோ மஹாதே²ரா அனேகஸதேஹி பி⁴க்கூ²ஹி, ஸக்காத³யோ தே³வா அனேகஸஹஸ்ஸேஹி தே³வேஹி, மஹாப்³ரஹ்மாத³யோ ப்³ரஹ்மானோ அனேகஸஹஸ்ஸேஹி ப்³ரஹ்மேஹி பஸத்தா². தே ஸப்³பே³பி த³ஸப³லங் தோ²மெந்தி வண்ணெந்தி பஸங்ஸந்தீதி ப⁴க³வா ‘‘பஸத்த²ப்பஸத்தோ²’’தி வுச்சதி. அத்த²வஸந்தி அத்தா²னிஸங்ஸங்.
Pasatthehi vā pasatthotipi pasatthappasattho. Ke pana pasatthā nāma? Rājā pasenadi kosalo kāsikosalavāsikehi pasattho, bimbisāro aṅgamagadhavāsīhi, vesālikā licchavī vajjitaṭṭhavāsīhi pasatthā, pāveyyakā mallā kosinārakā mallā aññepi te te khattiyā tehi tehi jānapadehi pasatthā, caṅkiādayo brāhmaṇā brāhmaṇagaṇehi, anāthapiṇḍikādayo upāsakā upāsakagaṇehi, visākhāādikā upāsikā anekasatāhi upāsikāhi, sakuludāyiādayo paribbājakā anekehi paribbājakasatehi, uppalavaṇṇattheriādikā mahāsāvikā anekehi bhikkhunisatehi, sāriputtattherādayo mahātherā anekasatehi bhikkhūhi, sakkādayo devā anekasahassehi devehi, mahābrahmādayo brahmāno anekasahassehi brahmehi pasatthā. Te sabbepi dasabalaṃ thomenti vaṇṇenti pasaṃsantīti bhagavā ‘‘pasatthappasattho’’ti vuccati. Atthavasanti atthānisaṃsaṃ.
அத²ஸ்ஸ ஸோ அத்தனோ பஸாத³காரணங் ஆசிக்க²ந்தோ ஸெய்யதா²பி, போ⁴, புரிஸோதிஆதி³மாஹ. தத்த² அக்³க³ரஸபரிதித்தோதி போ⁴ஜனரஸேஸு பாயாஸோ ஸ்னேஹரஸேஸு கோ³ஸப்பி, கஸாவரஸேஸு கு²த்³த³கமது⁴ அனேளகங், மது⁴ரரஸேஸு ஸக்கராதி ஏவமாத³யோ அக்³க³ரஸா நாம. தேஸு யேன கேனசி பரிதித்தோ ஆகண்ட²ப்பமாணங் பு⁴ஞ்ஜித்வா டி²தோ. அஞ்ஞேஸங் ஹீனானந்தி அக்³க³ரஸேஹி அஞ்ஞேஸங் ஹீனரஸானங். ஸுத்தஸோதி ஸுத்ததோ, ஸுத்தபா⁴வேனாதி அத்தோ². ஸேஸுபி ஏஸேவ நயோ. ததோ ததோதி ஸுத்தாதீ³ஸு ததோ ததோ. அஞ்ஞேஸங் புது²ஸமணப்³ராஹ்மணாப்பவாதா³னந்தி யே அஞ்ஞேஸங் புதூ²னங் ஸமணப்³ராஹ்மணானங் லத்³தி⁴ஸங்கா²தப்பவாதா³, தேஸங். ந பிஹேதீதி ந பத்தே²தி, தே கதி²யமானே ஸோதும்பி ந இச்ச²தி. ஜிக⁴ச்சா²து³ப்³ப³ல்யபரேதோதி ஜிக⁴ச்சா²ய சேவ து³ப்³ப³லபா⁴வேன ச அனுக³தோ. மது⁴பிண்டி³கந்தி ஸாலிபிட்ட²ங் ப⁴ஜ்ஜித்வா சதுமது⁴ரேன யோஜெத்வா கதங் ப³த்³த⁴ஸத்துபிண்டி³கங், மது⁴ரபூவமேவ வா. அதி⁴க³ச்செ²ய்யாதி லபெ⁴ய்ய. அஸேசனகந்தி மது⁴ரபா⁴வகரணத்தா²ய அஞ்ஞேன ரஸேன அனாஸித்தகங் ஓஜவந்தங் பணீதரஸங்.
Athassa so attano pasādakāraṇaṃ ācikkhanto seyyathāpi, bho, purisotiādimāha. Tattha aggarasaparitittoti bhojanarasesu pāyāso sneharasesu gosappi, kasāvarasesu khuddakamadhu aneḷakaṃ, madhurarasesu sakkarāti evamādayo aggarasā nāma. Tesu yena kenaci parititto ākaṇṭhappamāṇaṃ bhuñjitvā ṭhito. Aññesaṃ hīnānanti aggarasehi aññesaṃ hīnarasānaṃ. Suttasoti suttato, suttabhāvenāti attho. Sesupi eseva nayo. Tato tatoti suttādīsu tato tato. Aññesaṃ puthusamaṇabrāhmaṇāppavādānanti ye aññesaṃ puthūnaṃ samaṇabrāhmaṇānaṃ laddhisaṅkhātappavādā, tesaṃ. Na pihetīti na pattheti, te kathiyamāne sotumpi na icchati. Jighacchādubbalyaparetoti jighacchāya ceva dubbalabhāvena ca anugato. Madhupiṇḍikanti sālipiṭṭhaṃ bhajjitvā catumadhurena yojetvā kataṃ baddhasattupiṇḍikaṃ, madhurapūvameva vā. Adhigaccheyyāti labheyya. Asecanakanti madhurabhāvakaraṇatthāya aññena rasena anāsittakaṃ ojavantaṃ paṇītarasaṃ.
ஹரிசந்த³னஸ்ஸாதி ஸுவண்ணவண்ணசந்த³னஸ்ஸ. லோஹிதசந்த³னஸ்ஸாதி ரத்தவண்ணசந்த³னஸ்ஸ. ஸுரபி⁴க³ந்த⁴ந்தி ஸுக³ந்த⁴ங். த³ரதா²த³யோ வட்டத³ரதா², வட்டகிலமதா², வட்டபரிளாஹா ஏவ. உதா³னங் உதா³னேஸீதி உதா³ஹாரங் உதா³ஹரி. யதா² ஹி யங் தேலங் மானங் க³ஹேதுங் ந ஸக்கோதி, விஸ்ஸந்தி³த்வா க³ச்ச²தி, தங் அவஸேகோதி வுச்சதி. யஞ்ச ஜலங் தளாகங் க³ஹேதுங் ந ஸக்கோதி, அஜ்ஜொ²த்த²ரித்வா க³ச்ச²தி, தங் ஓகோ⁴தி வுச்சதி. ஏவமேவங் யங் பீதிவசனங் ஹத³யங் க³ஹேதுங் ந ஸக்கோதி, அதி⁴கங் ஹுத்வா அந்தோ அஸண்ட²ஹித்வா ப³ஹி நிக்க²மதி, தங் உதா³னந்தி வுச்சதி. ஏவரூபங் பீதிமயவசனங் நிச்சா²ரேஸீதி அத்தோ².
Haricandanassāti suvaṇṇavaṇṇacandanassa. Lohitacandanassāti rattavaṇṇacandanassa. Surabhigandhanti sugandhaṃ. Darathādayo vaṭṭadarathā, vaṭṭakilamathā, vaṭṭapariḷāhā eva. Udānaṃ udānesīti udāhāraṃ udāhari. Yathā hi yaṃ telaṃ mānaṃ gahetuṃ na sakkoti, vissanditvā gacchati, taṃ avasekoti vuccati. Yañca jalaṃ taḷākaṃ gahetuṃ na sakkoti, ajjhottharitvā gacchati, taṃ oghoti vuccati. Evamevaṃ yaṃ pītivacanaṃ hadayaṃ gahetuṃ na sakkoti, adhikaṃ hutvā anto asaṇṭhahitvā bahi nikkhamati, taṃ udānanti vuccati. Evarūpaṃ pītimayavacanaṃ nicchāresīti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. காரணபாலீஸுத்தங் • 4. Kāraṇapālīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. காரணபாலீஸுத்தவண்ணனா • 4. Kāraṇapālīsuttavaṇṇanā
