| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೮. ಕಟ್ಠಹಾರಸುತ್ತವಣ್ಣನಾ
8. Kaṭṭhahārasuttavaṇṇanā
೨೦೪. ಧಮ್ಮನ್ತೇವಾಸಿಕಾತಿ ಕಿಞ್ಚಿಪಿ ಧನಂ ಅದತ್ವಾ ಕೇವಲಂ ಅನ್ತೇವಾಸಿಕಾ। ತೇನಾಹ ‘‘ವೇಯ್ಯಾವಚ್ಚಂ ಕತ್ವಾ ಸಿಪ್ಪುಗ್ಗಣ್ಹನಕಾ’’ತಿ। ಗಮ್ಭೀರಸಭಾವೇತಿ ಸಮನ್ತತೋ ದೂರತೋ ಗಹನಸಚ್ಛನ್ನವಿಪುಲತರರುಕ್ಖಗಚ್ಛಲತಾಯ ಚ, ತದಾ ಹಿಮಪಿಣ್ಡಸಿನ್ನಭಾವೇನ ಮಯೂರಯಾನೇಹಿ ಪತಿಟ್ಠಾತುಂ ಅಸಕ್ಕುಣೇಯ್ಯತಾಯ ಚ ಗಮ್ಭೀರಭಾವೇ।
204.Dhammantevāsikāti kiñcipi dhanaṃ adatvā kevalaṃ antevāsikā. Tenāha ‘‘veyyāvaccaṃ katvā sippuggaṇhanakā’’ti. Gambhīrasabhāveti samantato dūrato gahanasacchannavipulatararukkhagacchalatāya ca, tadā himapiṇḍasinnabhāvena mayūrayānehi patiṭṭhātuṃ asakkuṇeyyatāya ca gambhīrabhāve.
ಬಹುಭೇರವೇತಿ ಬಹುಭಯಾನಕೇ। ಅನಿಞ್ಜಮಾನೇನಾತಿ ಇತ್ಥಮ್ಭೂತತ್ಥೇ ಕರಣವಚನಂ। ಅತಿಸುನ್ದರಂ ವತಾತಿ ಏವಂ ಸನ್ತೇ ನಾಮ ಅರಞ್ಞೇ ಏವಂ ನಿಚ್ಚಲಕಾಯೋ ನಿಸಿನ್ನೋ ಝಾಯನ್ತೋ ಅತಿವಿಯ ಸುನ್ದರಞ್ಚ ಝಾನಂ ಝಾಯಸೀತಿ ವದತಿ।
Bahubheraveti bahubhayānake. Aniñjamānenāti itthambhūtatthe karaṇavacanaṃ. Atisundaraṃ vatāti evaṃ sante nāma araññe evaṃ niccalakāyo nisinno jhāyanto ativiya sundarañca jhānaṃ jhāyasīti vadati.
ಅಚ್ಛೇರರೂಪನ್ತಿ ಅಚ್ಛರಿಯಭಾವಂ। ಸೇಟ್ಠಪ್ಪತ್ತಿಯಾತಿ ಸೇಟ್ಠಭಾವಪ್ಪತ್ತಿಯಾ।
Accherarūpanti acchariyabhāvaṃ. Seṭṭhappattiyāti seṭṭhabhāvappattiyā.
‘‘ಲೋಕಾಧಿಪತಿಸಹಬ್ಯತಂ ಆಕಙ್ಖಮಾನೋ’’ತಿ ಇಮಿನಾ ಬ್ರಾಹ್ಮಣೋ ಲೋಕಾಧಿಪತಿಸಹಯೋಗಂ ಪುಚ್ಛತಿ, ‘‘ಕಸ್ಮಾ ಭವ’’ನ್ತಿಆದಿನಾ ಪನ ತದಞ್ಞವಿಸೇಸಾಕಙ್ಖಂ ಪುಚ್ಛತೀತಿ ಆಹ ‘‘ಅಪರೇನಪಿ ಆಕಾರೇನ ಪುಚ್ಛತೀ’’ತಿ।
‘‘Lokādhipatisahabyataṃ ākaṅkhamāno’’ti iminā brāhmaṇo lokādhipatisahayogaṃ pucchati, ‘‘kasmā bhava’’ntiādinā pana tadaññavisesākaṅkhaṃ pucchatīti āha ‘‘aparenapi ākārena pucchatī’’ti.
ಕಙ್ಖಾತಿ ತಣ್ಹಾ ಅಭಿಕ್ಖಣವಸೇನ ಪವತ್ತಾ। ಅನೇಕಸಭಾವೇಸೂತಿ ರೂಪಾದಿವಸೇನ ಅಜ್ಝತ್ತಿಕಾದಿವಸೇನ ಏವಂ ನಾನಾಸಭಾವೇಸು ಆರಮ್ಮಣೇಸು। ಅಸ್ಸಾದರಾಗೋ ಲೋಭೋ ಅಭಿಜ್ಝಾತಿ ನಾನಪ್ಪಕಾರಾ। ಸೇಸಕಿಲೇಸಾ ವಾ ದಿಟ್ಠಿಮಾನದೋಸಾದಯೋ। ನಿಚ್ಚಕಾಲಂ ಅವಸ್ಸಿತಾ ಸತ್ತಾನಂ ಅವಸ್ಸಯಭಾವತ್ತಾ। ಪಜಪ್ಪಾಪನವಸೇನಾತಿ ಪಕಾರೇಹಿ ತಣ್ಹಾಯನವಸೇನ। ನಿರನ್ತಾತಿ ಅನ್ತರಹಿತಾ ನಿರವಸೇಸಾ।
Kaṅkhāti taṇhā abhikkhaṇavasena pavattā. Anekasabhāvesūti rūpādivasena ajjhattikādivasena evaṃ nānāsabhāvesu ārammaṇesu. Assādarāgo lobho abhijjhāti nānappakārā. Sesakilesā vā diṭṭhimānadosādayo. Niccakālaṃ avassitā sattānaṃ avassayabhāvattā. Pajappāpanavasenāti pakārehi taṇhāyanavasena. Nirantāti antarahitā niravasesā.
ಅನುಪಗಮನೋತಿ ಅನುಪಾದಾನೋ। ಸಬ್ಬಞ್ಞುತಞ್ಞಾಣಂ ದೀಪೇತಿ, ತಸ್ಸ ಹಿ ವಸೇನ ಏವ ನಾನಾಸಭಾವೇಸು ಭಗವಾ ಸಮನ್ತಚಕ್ಖುನಾ ಪಸ್ಸತೀತಿ ‘‘ಸಬ್ಬೇ…ಪೇ॰… ದಸ್ಸನೋ’’ತಿ ವುಚ್ಚತಿ। ಅರಹತ್ತಂ ಸನ್ಧಾಯಾಹ, ತಞ್ಹಿ ನಿಪ್ಪರಿಯಾಯತೋ ‘‘ಅನುತ್ತರ’’ನ್ತಿ ವುಚ್ಚತಿ।
Anupagamanoti anupādāno. Sabbaññutaññāṇaṃ dīpeti, tassa hi vasena eva nānāsabhāvesu bhagavā samantacakkhunā passatīti ‘‘sabbe…pe… dassano’’ti vuccati. Arahattaṃ sandhāyāha, tañhi nippariyāyato ‘‘anuttara’’nti vuccati.
ಕಟ್ಠಹಾರಸುತ್ತವಣ್ಣನಾ ನಿಟ್ಠಿತಾ।
Kaṭṭhahārasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ಕಟ್ಠಹಾರಸುತ್ತಂ • 8. Kaṭṭhahārasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ಕಟ್ಠಹಾರಸುತ್ತವಣ್ಣನಾ • 8. Kaṭṭhahārasuttavaṇṇanā
