| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೬. ಕಟುವಿಯಸುತ್ತಂ
6. Kaṭuviyasuttaṃ
೧೨೯. ಏಕಂ ಸಮಯಂ ಭಗವಾ ಬಾರಾಣಸಿಯಂ ವಿಹರತಿ ಇಸಿಪತನೇ ಮಿಗದಾಯೇ। ಅಥ ಖೋ ಭಗವಾ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಬಾರಾಣಸಿಂ ಪಿಣ್ಡಾಯ ಪಾವಿಸಿ। ಅದ್ದಸಾ ಖೋ ಭಗವಾ ಗೋಯೋಗಪಿಲಕ್ಖಸ್ಮಿಂ 1 ಪಿಣ್ಡಾಯ ಚರಮಾನೋ 2 ಅಞ್ಞತರಂ ಭಿಕ್ಖುಂ ರಿತ್ತಸ್ಸಾದಂ ಬಾಹಿರಸ್ಸಾದಂ ಮುಟ್ಠಸ್ಸತಿಂ ಅಸಮ್ಪಜಾನಂ ಅಸಮಾಹಿತಂ ವಿಬ್ಭನ್ತಚಿತ್ತಂ ಪಾಕತಿನ್ದ್ರಿಯಂ। ದಿಸ್ವಾ ತಂ ಭಿಕ್ಖುಂ ಏತದವೋಚ –
129. Ekaṃ samayaṃ bhagavā bārāṇasiyaṃ viharati isipatane migadāye. Atha kho bhagavā pubbaṇhasamayaṃ nivāsetvā pattacīvaramādāya bārāṇasiṃ piṇḍāya pāvisi. Addasā kho bhagavā goyogapilakkhasmiṃ 3 piṇḍāya caramāno 4 aññataraṃ bhikkhuṃ rittassādaṃ bāhirassādaṃ muṭṭhassatiṃ asampajānaṃ asamāhitaṃ vibbhantacittaṃ pākatindriyaṃ. Disvā taṃ bhikkhuṃ etadavoca –
‘‘ಮಾ ಖೋ ತ್ವಂ, ಭಿಕ್ಖು, ಅತ್ತಾನಂ ಕಟುವಿಯಮಕಾಸಿ। ತಂ ವತ ಭಿಕ್ಖು ಕಟುವಿಯಕತಂ ಅತ್ತಾನಂ ಆಮಗನ್ಧೇನ 5 ಅವಸ್ಸುತಂ ಮಕ್ಖಿಕಾ ನಾನುಪತಿಸ್ಸನ್ತಿ ನಾನ್ವಾಸ್ಸವಿಸ್ಸನ್ತೀತಿ 6, ನೇತಂ ಠಾನಂ ವಿಜ್ಜತೀ’’ತಿ। ಅಥ ಖೋ ಸೋ ಭಿಕ್ಖು ಭಗವತಾ ಇಮಿನಾ ಓವಾದೇನ ಓವದಿತೋ ಸಂವೇಗಮಾಪಾದಿ। ಅಥ ಖೋ ಭಗವಾ ಬಾರಾಣಸಿಯಂ ಪಿಣ್ಡಾಯ ಚರಿತ್ವಾ ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತೋ ಭಿಕ್ಖೂ ಆಮನ್ತೇಸಿ –
‘‘Mā kho tvaṃ, bhikkhu, attānaṃ kaṭuviyamakāsi. Taṃ vata bhikkhu kaṭuviyakataṃ attānaṃ āmagandhena 7 avassutaṃ makkhikā nānupatissanti nānvāssavissantīti 8, netaṃ ṭhānaṃ vijjatī’’ti. Atha kho so bhikkhu bhagavatā iminā ovādena ovadito saṃvegamāpādi. Atha kho bhagavā bārāṇasiyaṃ piṇḍāya caritvā pacchābhattaṃ piṇḍapātapaṭikkanto bhikkhū āmantesi –
‘‘ಇಧಾಹಂ, ಭಿಕ್ಖವೇ, ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಬಾರಾಣಸಿಂ ಪಿಣ್ಡಾಯ ಪಾವಿಸಿಂ। ಅದ್ದಸಂ ಖೋ ಅಹಂ, ಭಿಕ್ಖವೇ, ಗೋಯೋಗಪಿಲಕ್ಖಸ್ಮಿಂ ಪಿಣ್ಡಾಯ ಚರಮಾನೋ ಅಞ್ಞತರಂ ಭಿಕ್ಖುಂ ರಿತ್ತಸ್ಸಾದಂ ಬಾಹಿರಸ್ಸಾದಂ ಮುಟ್ಠಸ್ಸತಿಂ ಅಸಮ್ಪಜಾನಂ ಅಸಮಾಹಿತಂ ವಿಬ್ಭನ್ತಚಿತ್ತಂ ಪಾಕತಿನ್ದ್ರಿಯಂ। ದಿಸ್ವಾ ತಂ ಭಿಕ್ಖುಂ ಏತದವೋಚಂ –
‘‘Idhāhaṃ, bhikkhave, pubbaṇhasamayaṃ nivāsetvā pattacīvaramādāya bārāṇasiṃ piṇḍāya pāvisiṃ. Addasaṃ kho ahaṃ, bhikkhave, goyogapilakkhasmiṃ piṇḍāya caramāno aññataraṃ bhikkhuṃ rittassādaṃ bāhirassādaṃ muṭṭhassatiṃ asampajānaṃ asamāhitaṃ vibbhantacittaṃ pākatindriyaṃ. Disvā taṃ bhikkhuṃ etadavocaṃ –
‘‘‘ಮಾ ಖೋ ತ್ವಂ, ಭಿಕ್ಖು, ಅತ್ತಾನಂ ಕಟುವಿಯಮಕಾಸಿ। ತಂ ವತ ಭಿಕ್ಖು ಕಟುವಿಯಕತಂ ಅತ್ತಾನಂ ಆಮಗನ್ಧೇನ ಅವಸ್ಸುತಂ ಮಕ್ಖಿಕಾ ನಾನುಪತಿಸ್ಸನ್ತಿ ನಾನ್ವಾಸ್ಸವಿಸ್ಸನ್ತೀತಿ, ನೇತಂ ಠಾನಂ ವಿಜ್ಜತೀ’ತಿ। ಅಥ ಖೋ, ಭಿಕ್ಖವೇ, ಸೋ ಭಿಕ್ಖು ಮಯಾ ಇಮಿನಾ ಓವಾದೇನ ಓವದಿತೋ ಸಂವೇಗಮಾಪಾದೀ’’ತಿ। ಏವಂ ವುತ್ತೇ ಅಞ್ಞತರೋ ಭಿಕ್ಖು ಭಗವನ್ತಂ ಏತದವೋಚ – ‘‘ಕಿಂ ನು ಖೋ, ಭನ್ತೇ, ಕಟುವಿಯಂ? ಕೋ ಆಮಗನ್ಧೋ? ಕಾ ಮಕ್ಖಿಕಾ’’ತಿ?
‘‘‘Mā kho tvaṃ, bhikkhu, attānaṃ kaṭuviyamakāsi. Taṃ vata bhikkhu kaṭuviyakataṃ attānaṃ āmagandhena avassutaṃ makkhikā nānupatissanti nānvāssavissantīti, netaṃ ṭhānaṃ vijjatī’ti. Atha kho, bhikkhave, so bhikkhu mayā iminā ovādena ovadito saṃvegamāpādī’’ti. Evaṃ vutte aññataro bhikkhu bhagavantaṃ etadavoca – ‘‘kiṃ nu kho, bhante, kaṭuviyaṃ? Ko āmagandho? Kā makkhikā’’ti?
‘‘ಅಭಿಜ್ಝಾ ಖೋ, ಭಿಕ್ಖು, ಕಟುವಿಯಂ; ಬ್ಯಾಪಾದೋ ಆಮಗನ್ಧೋ; ಪಾಪಕಾ ಅಕುಸಲಾ ವಿತಕ್ಕಾ ಮಕ್ಖಿಕಾ। ತಂ ವತ, ಭಿಕ್ಖು, ಕಟುವಿಯಕತಂ ಅತ್ತಾನಂ ಆಮಗನ್ಧೇನ ಅವಸ್ಸುತಂ ಮಕ್ಖಿಕಾ ನಾನುಪತಿಸ್ಸನ್ತಿ ನಾನ್ವಾಸ್ಸವಿಸ್ಸನ್ತೀತಿ, ನೇತಂ ಠಾನಂ ವಿಜ್ಜತೀ’’ತಿ।
‘‘Abhijjhā kho, bhikkhu, kaṭuviyaṃ; byāpādo āmagandho; pāpakā akusalā vitakkā makkhikā. Taṃ vata, bhikkhu, kaṭuviyakataṃ attānaṃ āmagandhena avassutaṃ makkhikā nānupatissanti nānvāssavissantīti, netaṃ ṭhānaṃ vijjatī’’ti.
‘‘ಅಗುತ್ತಂ ಚಕ್ಖುಸೋತಸ್ಮಿಂ, ಇನ್ದ್ರಿಯೇಸು ಅಸಂವುತಂ।
‘‘Aguttaṃ cakkhusotasmiṃ, indriyesu asaṃvutaṃ;
ಮಕ್ಖಿಕಾನುಪತಿಸ್ಸನ್ತಿ , ಸಙ್ಕಪ್ಪಾ ರಾಗನಿಸ್ಸಿತಾ॥
Makkhikānupatissanti , saṅkappā rāganissitā.
‘‘ಕಟುವಿಯಕತೋ ಭಿಕ್ಖು, ಆಮಗನ್ಧೇ ಅವಸ್ಸುತೋ।
‘‘Kaṭuviyakato bhikkhu, āmagandhe avassuto;
ಆರಕಾ ಹೋತಿ ನಿಬ್ಬಾನಾ, ವಿಘಾತಸ್ಸೇವ ಭಾಗವಾ॥
Ārakā hoti nibbānā, vighātasseva bhāgavā.
‘‘ಯೇ ಚ ಸೀಲೇನ ಸಮ್ಪನ್ನಾ, ಪಞ್ಞಾಯೂಪಸಮೇರತಾ।
‘‘Ye ca sīlena sampannā, paññāyūpasameratā;
ಉಪಸನ್ತಾ ಸುಖಂ ಸೇನ್ತಿ, ನಾಸಯಿತ್ವಾನ ಮಕ್ಖಿಕಾ’’ತಿ॥ ಛಟ್ಠಂ।
Upasantā sukhaṃ senti, nāsayitvāna makkhikā’’ti. chaṭṭhaṃ;
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೬. ಕಟುವಿಯಸುತ್ತವಣ್ಣನಾ • 6. Kaṭuviyasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೬. ಕಟುವಿಯಸುತ್ತವಣ್ಣನಾ • 6. Kaṭuviyasuttavaṇṇanā
