| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
9. гааяаг̇ад̇аасад̇исуд̇д̇аван̣н̣анаа
9. Kāyagatāsatisuttavaṇṇanā
153-4. звам̣ мз суд̇анд̇и гааяаг̇ад̇аасад̇исуд̇д̇ам̣. д̇ад̇т̇а г̇зхасид̇аад̇и бан̃жагаамаг̇ун̣аниссид̇аа. сарасан̇габбаад̇и д̇хааванасан̇габбаа. саранд̇ийд̇и хи сараа, д̇хааванд̇ийд̇и ад̇т̇о. аж̇жхад̇д̇амзваад̇и г̇ожараж̇жхад̇д̇асмим̣язва. гааяаг̇ад̇аасад̇инд̇и гааяабариг̇г̇аахигамби гааяаарамман̣амби сад̇им̣. гааяабариг̇г̇аахиганд̇и вуд̇д̇з самат̇о гат̇ид̇о ход̇и, гааяаарамман̣анд̇и вуд̇д̇з вибассанаа. убхаязна самат̇авибассанаа гат̇ид̇аа хонд̇и.
153-4.Evaṃme sutanti kāyagatāsatisuttaṃ. Tattha gehasitāti pañcakāmaguṇanissitā. Sarasaṅkappāti dhāvanasaṅkappā. Sarantīti hi sarā, dhāvantīti attho. Ajjhattamevāti gocarajjhattasmiṃyeva. Kāyagatāsatinti kāyapariggāhikampi kāyārammaṇampi satiṃ. Kāyapariggāhikanti vutte samatho kathito hoti, kāyārammaṇanti vutte vipassanā. Ubhayena samathavipassanā kathitā honti.
буна жабарам̣…бз… звамби, бхигкавз, бхигку гааяаг̇ад̇аасад̇им̣ бхаавзд̇ийд̇и сад̇ибадтаанз жуд̣̇д̣̇асавид̇хзна гааяаанубассанаа гат̇ид̇аа.
Puna caparaṃ…pe… evampi, bhikkhave, bhikkhu kāyagatāsatiṃ bhāvetīti satipaṭṭhāne cuddasavidhena kāyānupassanā kathitā.
156. анд̇ог̇ад̇хааваассаад̇и д̇асса бхигкуно бхааванааяа аб̣бханд̇араг̇ад̇аава хонд̇и. виж̇ж̇аабхааг̇ияаад̇и зд̇т̇а самбаяог̇авасзна виж̇ж̇ам̣ бхаж̇анд̇ийд̇и виж̇ж̇аабхааг̇ияаа. виж̇ж̇аабхааг̇з виж̇ж̇аагодтаасз вад̇д̇анд̇ийд̇иби виж̇ж̇аабхааг̇ияаа. д̇ад̇т̇а вибассанаан̃аан̣ам̣, маномаяид̣̇д̇хи, ча абхин̃н̃аад̇и адта виж̇ж̇аа. буримзна ад̇т̇зна д̇аахи самбаяуд̇д̇ад̇хаммааби виж̇ж̇аабхааг̇ияаа. бажчимзна ад̇т̇зна д̇аасу яаа гаажи згаа виж̇ж̇аа виж̇ж̇аа, сзсаа виж̇ж̇аабхааг̇ияаад̇и звам̣ виж̇ж̇ааби виж̇ж̇ааяа самбаяуд̇д̇аа д̇хаммааби виж̇ж̇аабхааг̇ияаад̇зва взд̣̇ид̇аб̣б̣аа. жзд̇асаа пудод̇и зд̇т̇а д̣̇увид̇хам̣ паран̣ам̣ аабопаран̣ан̃жа, д̣̇иб̣б̣ажагкупаран̣ан̃жа, д̇ад̇т̇а аабогасин̣ам̣ самаабаж̇ж̇ид̇ваа аабзна паран̣ам̣ аабопаран̣ам̣ наама. звам̣ пудзби махаасамуд̣̇д̣̇з саб̣б̣аа самуд̣̇д̣̇ан̇г̇амаа гуннад̣̇ияо анд̇ог̇ад̇хаава хонд̇и, аалогам̣ бана вад̣дхзд̇ваа д̣̇иб̣б̣ажагкунаа сагаласамуд̣̇д̣̇асса д̣̇ассанам̣ д̣̇иб̣б̣ажагкупаран̣ам̣ наама. звам̣ паран̣зби махаасамуд̣̇д̣̇з саб̣б̣аа самуд̣̇д̣̇ан̇г̇амаа гуннад̣̇ияо анд̇ог̇ад̇хаава хонд̇и.
156.Antogadhāvāssāti tassa bhikkhuno bhāvanāya abbhantaragatāva honti. Vijjābhāgiyāti ettha sampayogavasena vijjaṃ bhajantīti vijjābhāgiyā. Vijjābhāge vijjākoṭṭhāse vattantītipi vijjābhāgiyā. Tattha vipassanāñāṇaṃ, manomayiddhi, cha abhiññāti aṭṭha vijjā. Purimena atthena tāhi sampayuttadhammāpi vijjābhāgiyā. Pacchimena atthena tāsu yā kāci ekā vijjā vijjā, sesā vijjābhāgiyāti evaṃ vijjāpi vijjāya sampayuttā dhammāpi vijjābhāgiyāteva veditabbā. Cetasā phuṭoti ettha duvidhaṃ pharaṇaṃ āpopharaṇañca, dibbacakkhupharaṇañca, tattha āpokasiṇaṃ samāpajjitvā āpena pharaṇaṃ āpopharaṇaṃ nāma. Evaṃ phuṭepi mahāsamudde sabbā samuddaṅgamā kunnadiyo antogadhāva honti, ālokaṃ pana vaḍḍhetvā dibbacakkhunā sakalasamuddassa dassanaṃ dibbacakkhupharaṇaṃ nāma. Evaṃ pharaṇepi mahāsamudde sabbā samuddaṅgamā kunnadiyo antogadhāva honti.
од̇ааранд̇и виварам̣ чид̣̇д̣̇ам̣. аарамман̣анд̇и гилзсуббад̇д̇ибажжаяам̣. лабхзт̇а од̇ааранд̇и лабхзяяа бавзсанам̣, винивиж̇жхид̇ваа яаава барияосаанаа г̇ажчзяяаад̇и ад̇т̇о. нигкзбананд̇и нигкибанадтаанам̣.
Otāranti vivaraṃ chiddaṃ. Ārammaṇanti kilesuppattipaccayaṃ. Labhetha otāranti labheyya pavesanaṃ, vinivijjhitvā yāva pariyosānā gaccheyyāti attho. Nikkhepananti nikkhipanaṭṭhānaṃ.
157. звам̣ абхаавид̇агааяаг̇ад̇аасад̇им̣ буг̇г̇алам̣ алламад̇д̇игабун̃ж̇аад̣̇ийхи убамзд̇ваа ид̣̇аани бхаавид̇агааяаг̇ад̇аасад̇им̣ саарапалагаад̣̇ийхи убамзд̇ум̣ сзяяат̇аабийд̇иаад̣̇имааха. д̇ад̇т̇а аг̇г̇ал̣апалаганд̇и гаваадам̣.
157. Evaṃ abhāvitakāyagatāsatiṃ puggalaṃ allamattikapuñjādīhi upametvā idāni bhāvitakāyagatāsatiṃ sāraphalakādīhi upametuṃ seyyathāpītiādimāha. Tattha aggaḷaphalakanti kavāṭaṃ.
158. гаагабзяяод̇и мукаваддияам̣ нисийд̣̇ид̇ваа гаагзна г̇ийвам̣ анаамзд̇ваава баад̇аб̣б̣о. абхин̃н̃аасажчигаран̣ийяассаад̇и абхин̃н̃ааяа сажчигаад̇аб̣б̣асса. сагкибхаб̣б̣ад̇ам̣ баабун̣аад̇ийд̇и бажжагкабхаавам̣ баабун̣аад̇и. сад̇и сад̇и ааяад̇анзд̇и сад̇исад̇и гааран̣з. гим̣ банзд̇т̇а гааран̣анд̇и? абхин̃н̃аава гааран̣ам̣. аал̣иб̣анд̇хаад̇и марияаад̣̇аб̣ад̣̇д̇хаа.
158.Kākapeyyoti mukhavaṭṭiyaṃ nisīditvā kākena gīvaṃ anāmetvāva pātabbo. Abhiññāsacchikaraṇīyassāti abhiññāya sacchikātabbassa. Sakkhibhabbataṃpāpuṇātīti paccakkhabhāvaṃ pāpuṇāti. Sati sati āyataneti satisati kāraṇe. Kiṃ panettha kāraṇanti? Abhiññāva kāraṇaṃ. Āḷibandhāti mariyādabaddhā.
яаанийгад̇ааяаад̇и яуд̇д̇аяаанам̣ вияа гад̇ааяа. вад̇т̇угад̇ааяаад̇и бад̇идтаагад̇ааяа. анудтид̇ааяаад̇и ануббавад̇д̇ид̇ааяа. барижид̇ааяаад̇и барижаяагад̇ааяа. сусамаарад̣̇д̇хааяаад̇и судту самаарад̣̇д̇хааяа сусамбаг̇г̇ахид̇ааяа. сзсам̣ саб̣б̣ад̇т̇а уд̇д̇аанамзваад̇и.
Yānīkatāyāti yuttayānaṃ viya katāya. Vatthukatāyāti patiṭṭhākatāya. Anuṭṭhitāyāti anuppavattitāya. Paricitāyāti paricayakatāya. Susamāraddhāyāti suṭṭhu samāraddhāya susampaggahitāya. Sesaṃ sabbattha uttānamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
гааяаг̇ад̇аасад̇исуд̇д̇аван̣н̣анаа нидтид̇аа.
Kāyagatāsatisuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 9. гааяаг̇ад̇аасад̇исуд̇д̇ам̣ • 9. Kāyagatāsatisuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 9. гааяаг̇ад̇аасад̇исуд̇д̇аван̣н̣анаа • 9. Kāyagatāsatisuttavaṇṇanā
