| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
19. காயக³தாஸதிவக்³க³வண்ணனா
19. Kāyagatāsativaggavaṇṇanā
563. சேதஸா பு²டோதி எத்த² து³வித⁴ங் ப²ரணங் ஆபோப²ரணஞ்ச தி³ப்³ப³சக்கு²ப²ரணஞ்ச. தத்த² ஆபோகஸிணங் ஸமாபஜ்ஜித்வா ஆபேன ப²ரணங் ஆபோப²ரணங் நாம. ஏவங் பு²டேபி மஹாஸமுத்³தே³ ஸப்³பா³ ஸமுத்³த³ங்க³மா குன்னதி³யோ அந்தோக³தா⁴வ ஹொந்தி. ஆலோகங் பன வட்³டெ⁴த்வா தி³ப்³ப³சக்கு²னா ஸகலஸமுத்³த³த³ஸ்ஸனங் தி³ப்³ப³சக்கு²ப²ரணங் நாம. ஏவங் பு²டேபி மஹாஸமுத்³தே³ ஸப்³பா³ மஹாஸமுத்³த³ங்க³மா குன்னதி³யோ அந்தோக³தா⁴வ ஹொந்தி. அந்தோக³தா⁴ தஸ்ஸாதி தஸ்ஸ பி⁴க்கு²னோ பா⁴வனாய அப்³ப⁴ந்தரக³தாவ ஹொந்தி. விஜ்ஜாபா⁴கி³யாதி எத்த² ஸம்பயோக³வஸேன விஜ்ஜங் ப⁴ஜந்தீதி விஜ்ஜாபா⁴கி³யா, விஜ்ஜாபா⁴கே³ விஜ்ஜாகொட்டா²ஸே வத்தந்தீதிபி விஜ்ஜாபா⁴கி³யா. தத்த² விபஸ்ஸனாஞாணங் மனோமயித்³தி⁴ ச² அபி⁴ஞ்ஞாதி அட்ட² விஜ்ஜா, புரிமேன அத்தே²ன தாஹி ஸம்பயுத்தத⁴ம்மாபி விஜ்ஜாபா⁴கி³யா. பச்சி²மேன அத்தே²ன தாஸு யா காசி ஏகா விஜ்ஜா விஜ்ஜா, ஸேஸா விஜ்ஜாபா⁴கி³யாதி ஏவங் விஜ்ஜாபி விஜ்ஜாஸம்பயுத்தத⁴ம்மாபி விஜ்ஜாபா⁴கி³யாதேவ வேதி³தப்³பா³.
563.Cetasāphuṭoti ettha duvidhaṃ pharaṇaṃ āpopharaṇañca dibbacakkhupharaṇañca. Tattha āpokasiṇaṃ samāpajjitvā āpena pharaṇaṃ āpopharaṇaṃ nāma. Evaṃ phuṭepi mahāsamudde sabbā samuddaṅgamā kunnadiyo antogadhāva honti. Ālokaṃ pana vaḍḍhetvā dibbacakkhunā sakalasamuddadassanaṃ dibbacakkhupharaṇaṃ nāma. Evaṃ phuṭepi mahāsamudde sabbā mahāsamuddaṅgamā kunnadiyo antogadhāva honti. Antogadhā tassāti tassa bhikkhuno bhāvanāya abbhantaragatāva honti. Vijjābhāgiyāti ettha sampayogavasena vijjaṃ bhajantīti vijjābhāgiyā, vijjābhāge vijjākoṭṭhāse vattantītipi vijjābhāgiyā. Tattha vipassanāñāṇaṃ manomayiddhi cha abhiññāti aṭṭha vijjā, purimena atthena tāhi sampayuttadhammāpi vijjābhāgiyā. Pacchimena atthena tāsu yā kāci ekā vijjā vijjā, sesā vijjābhāgiyāti evaṃ vijjāpi vijjāsampayuttadhammāpi vijjābhāgiyāteva veditabbā.
564. மஹதோ ஸங்வேகா³யாதி மஹந்தஸ்ஸ ஸங்வேக³ஸ்ஸ அத்தா²ய. உபரிபத³த்³வயேபி ஏஸேவ நயோ. எத்த² ச மஹாஸங்வேகோ³ நாம விபஸ்ஸனா, மஹாஅத்தோ² நாம சத்தாரோ மக்³கா³, மஹாயோக³க்கே²மோ நாம சத்தாரி ஸாமஞ்ஞப²லானி. அத² வா மஹாஸங்வேகோ³ நாம ஸஹ விபஸ்ஸனாய மக்³கோ³, மஹாஅத்தோ² நாம சத்தாரி ஸாமஞ்ஞப²லானி, மஹாயோக³க்கே²மோ நாம நிப்³பா³னங். ஸதிஸம்பஜஞ்ஞாயாதி ஸதியா ச ஞாணஸ்ஸ ச அத்தா²ய. ஞாணத³ஸ்ஸனபடிலாபா⁴யாதி தி³ப்³ப³சக்கு²ஞாணாய. தி³ட்ட²த⁴ம்மஸுக²விஹாராயாதி இமஸ்மிங்யேவ பச்சக்கே² அத்தபா⁴வே ஸுக²விஹாரத்தா²ய. விஜ்ஜாவிமுத்திப²லஸச்சி²கிரியாயாதி விஜ்ஜாவிமுத்தீனங் ப²லஸ்ஸ பச்சவெக்க²கரணத்தா²ய. எத்த² ச விஜ்ஜாதி மக்³க³பஞ்ஞா, விமுத்தீதி தங்ஸம்பயுத்தா ஸேஸத⁴ம்மா. தேஸங் ப²லங் நாம அரஹத்தப²லங், தஸ்ஸ ஸச்சி²கிரியாயாதி அத்தோ².
564.Mahato saṃvegāyāti mahantassa saṃvegassa atthāya. Uparipadadvayepi eseva nayo. Ettha ca mahāsaṃvego nāma vipassanā, mahāattho nāma cattāro maggā, mahāyogakkhemo nāma cattāri sāmaññaphalāni. Atha vā mahāsaṃvego nāma saha vipassanāya maggo, mahāattho nāma cattāri sāmaññaphalāni, mahāyogakkhemo nāma nibbānaṃ. Satisampajaññāyāti satiyā ca ñāṇassa ca atthāya. Ñāṇadassanapaṭilābhāyāti dibbacakkhuñāṇāya. Diṭṭhadhammasukhavihārāyāti imasmiṃyeva paccakkhe attabhāve sukhavihāratthāya. Vijjāvimuttiphalasacchikiriyāyāti vijjāvimuttīnaṃ phalassa paccavekkhakaraṇatthāya. Ettha ca vijjāti maggapaññā, vimuttīti taṃsampayuttā sesadhammā. Tesaṃ phalaṃ nāma arahattaphalaṃ, tassa sacchikiriyāyāti attho.
571. காயோபி பஸ்ஸம்ப⁴தீதி நாமகாயோபி கரஜகாயோபி பஸ்ஸம்ப⁴தி, வூபஸந்தத³ரதோ² ஹோதி. விதக்கவிசாராபீதி ஏதே த⁴ம்மா து³தியஜ்ஜா²னேன வூபஸம்மந்தி நாம, இத⁴ பன ஓளாரிகவூபஸமங் ஸந்தா⁴ய வுத்தங். கேவலாதி ஸகலா, ஸப்³பே³ நிரவஸேஸாதி அத்தோ². விஜ்ஜாபா⁴கி³யாதி விஜ்ஜாகொட்டா²ஸியா, தே ஹெட்டா² விப⁴ஜித்வா த³ஸ்ஸிதாவ.
571.Kāyopi passambhatīti nāmakāyopi karajakāyopi passambhati, vūpasantadaratho hoti. Vitakkavicārāpīti ete dhammā dutiyajjhānena vūpasammanti nāma, idha pana oḷārikavūpasamaṃ sandhāya vuttaṃ. Kevalāti sakalā, sabbe niravasesāti attho. Vijjābhāgiyāti vijjākoṭṭhāsiyā, te heṭṭhā vibhajitvā dassitāva.
574. அவிஜ்ஜா பஹீயதீதி அட்ட²ஸு டா²னேஸு வட்டமூலகங் ப³ஹலந்த⁴காரங் மஹாதமங் அஞ்ஞாணங் பஹீயதி. விஜ்ஜா உப்பஜ்ஜதீதி அரஹத்தமக்³க³விஜ்ஜா உப்பஜ்ஜதி. அஸ்மிமானோ பஹீயதீதி அஸ்மீதி நவவிதோ⁴ மானோ பஹீயதி. அனுஸயாதி ஸத்த அனுஸயா. ஸங்யோஜனானீதி த³ஸ ஸங்யோஜனானி.
574.Avijjāpahīyatīti aṭṭhasu ṭhānesu vaṭṭamūlakaṃ bahalandhakāraṃ mahātamaṃ aññāṇaṃ pahīyati. Vijjā uppajjatīti arahattamaggavijjā uppajjati. Asmimāno pahīyatīti asmīti navavidho māno pahīyati. Anusayāti satta anusayā. Saṃyojanānīti dasa saṃyojanāni.
575. பஞ்ஞாபபே⁴தா³யாதி பஞ்ஞாய பபே⁴த³க³மனத்த²ங். அனுபாதா³பரினிப்³பா³னாயாதி அபச்சயபரினிப்³பா³னஸ்ஸ ஸச்சி²கிரியத்தா²ய.
575.Paññāpabhedāyāti paññāya pabhedagamanatthaṃ. Anupādāparinibbānāyāti apaccayaparinibbānassa sacchikiriyatthāya.
576. அனேகதா⁴துபடிவேதோ⁴ ஹோதீதி அட்டா²ரஸன்னங் தா⁴தூனங் லக்க²ணபடிவேதோ⁴ ஹோதி. நானாதா⁴துபடிவேதோ⁴ ஹோதீதி தாஸங்யேவ அட்டா²ரஸன்னங் தா⁴தூனங் நானாபா⁴வேன லக்க²ணபடிவேதோ⁴ ஹோதி. அனேகதா⁴துபடிஸம்பி⁴தா³ ஹோதீதி இமினா தா⁴துபே⁴த³ஞாணங் கதி²தங். தா⁴துபபே⁴த³ஞாணங் நாம ‘‘இமாய தா⁴துயா உஸ்ஸன்னாய இத³ங் நாம ஹோதீ’’தி ஜானநபஞ்ஞா. தங் பனேதங் தா⁴துபே⁴த³ஞாணங் ந ஸப்³பே³ஸங் ஹோதி, பு³த்³தா⁴னமேவ நிப்பதே³ஸங் ஹோதி. தங் ஸம்மாஸம்பு³த்³தே⁴ன ஸப்³ப³ஸோ ந கதி²தங். கஸ்மா? தஸ்மிங் கதி²தே அத்தோ² நத்தீ²தி.
576.Anekadhātupaṭivedho hotīti aṭṭhārasannaṃ dhātūnaṃ lakkhaṇapaṭivedho hoti. Nānādhātupaṭivedho hotīti tāsaṃyeva aṭṭhārasannaṃ dhātūnaṃ nānābhāvena lakkhaṇapaṭivedho hoti. Anekadhātupaṭisambhidā hotīti iminā dhātubhedañāṇaṃ kathitaṃ. Dhātupabhedañāṇaṃ nāma ‘‘imāya dhātuyā ussannāya idaṃ nāma hotī’’ti jānanapaññā. Taṃ panetaṃ dhātubhedañāṇaṃ na sabbesaṃ hoti, buddhānameva nippadesaṃ hoti. Taṃ sammāsambuddhena sabbaso na kathitaṃ. Kasmā? Tasmiṃ kathite attho natthīti.
584. பஞ்ஞாபடிலாபா⁴யாதிஆதீ³னி ஸோளஸ பதா³னி படிஸம்பி⁴தா³மக்³கே³ ‘‘ஸப்புரிஸஸங்ஸேவோ, ஸத்³த⁴ம்மஸவனங், யோனிஸோமனஸிகாரோ, த⁴ம்மானுத⁴ம்மபடிபத்தி. இமே கோ², பி⁴க்க²வே, சத்தாரோ த⁴ம்மா பா⁴விதா ப³ஹுலீகதா பஞ்ஞாபடிலாபா⁴ய ஸங்வத்தந்தி …பே॰… நிப்³பே³தி⁴கபஞ்ஞதாய ஸங்வத்தந்தீ’’தி ஏவங் மாதிகங் ட²பெத்வா வித்தா²ரிதானேவ. வுத்தஞ்ஹேதங் (படி॰ ம॰ 3.4) –
584.Paññāpaṭilābhāyātiādīni soḷasa padāni paṭisambhidāmagge ‘‘sappurisasaṃsevo, saddhammasavanaṃ, yonisomanasikāro, dhammānudhammapaṭipatti. Ime kho, bhikkhave, cattāro dhammā bhāvitā bahulīkatā paññāpaṭilābhāya saṃvattanti …pe… nibbedhikapaññatāya saṃvattantī’’ti evaṃ mātikaṃ ṭhapetvā vitthāritāneva. Vuttañhetaṃ (paṭi. ma. 3.4) –
பஞ்ஞாபடிலாபா⁴ய ஸங்வத்தந்தீதி. ‘‘கதமோ பஞ்ஞாபடிலாபோ⁴? சதுன்னங் மக்³க³ஞாணானங், சதுன்னங் ப²லஞாணானங், சதுன்னங் படிஸம்பி⁴தா³ஞாணானங், ச²ன்னங் அபி⁴ஞ்ஞாஞாணானங், தேஸத்ததீனங் ஞாணானங், ஸத்தஸத்ததீனங் ஞாணானங் லாபோ⁴ படிலாபோ⁴ பத்திஸம்பத்தி ப²ஸ்ஸனா ஸச்சி²கிரியா உபஸம்பதா³, பஞ்ஞாபடிலாபா⁴ய ஸங்வத்தந்தீதி அயங் பஞ்ஞாபடிலாபோ⁴.
Paññāpaṭilābhāya saṃvattantīti. ‘‘Katamo paññāpaṭilābho? Catunnaṃ maggañāṇānaṃ, catunnaṃ phalañāṇānaṃ, catunnaṃ paṭisambhidāñāṇānaṃ, channaṃ abhiññāñāṇānaṃ, tesattatīnaṃ ñāṇānaṃ, sattasattatīnaṃ ñāṇānaṃ lābho paṭilābho pattisampatti phassanā sacchikiriyā upasampadā, paññāpaṭilābhāya saṃvattantīti ayaṃ paññāpaṭilābho.
பஞ்ஞாவுத்³தி⁴யா ஸங்வத்தந்தீதி. ‘‘கதமா பஞ்ஞாவுத்³தி⁴? ஸத்தன்னஞ்ச ஸெக்கா²னங் புது²ஜ்ஜனகல்யாணகஸ்ஸ ச பஞ்ஞா வட்³ட⁴தி, அரஹதோ பஞ்ஞா வட்³டி⁴தவட்³ட⁴னா, பஞ்ஞாவுத்³தி⁴யா ஸங்வத்தந்தீதி அயங் பஞ்ஞாவுத்³தி⁴.
Paññāvuddhiyāsaṃvattantīti. ‘‘Katamā paññāvuddhi? Sattannañca sekkhānaṃ puthujjanakalyāṇakassa ca paññā vaḍḍhati, arahato paññā vaḍḍhitavaḍḍhanā, paññāvuddhiyā saṃvattantīti ayaṃ paññāvuddhi.
பஞ்ஞாவேபுல்லாய ஸங்வத்தந்தீதி. ‘‘கதமங் பஞ்ஞாவேபுல்லங்? ஸத்தன்னஞ்ச ஸெக்கா²னங் புது²ஜ்ஜனகல்யாணகஸ்ஸ ச பஞ்ஞா வேபுல்லங் க³ச்ச²தி, அரஹதோ பஞ்ஞா வேபுல்லங் க³தா, பஞ்ஞாவேபுல்லாய ஸங்வத்தந்தீதி இத³ங் பஞ்ஞாவேபுல்லங்.
Paññāvepullāyasaṃvattantīti. ‘‘Katamaṃ paññāvepullaṃ? Sattannañca sekkhānaṃ puthujjanakalyāṇakassa ca paññā vepullaṃ gacchati, arahato paññā vepullaṃ gatā, paññāvepullāya saṃvattantīti idaṃ paññāvepullaṃ.
மஹாபஞ்ஞதாய ஸங்வத்தந்தீதி. ‘‘கதமா மஹாபஞ்ஞா? மஹந்தே அத்தே² பரிக்³க³ண்ஹாதீதி மஹாபஞ்ஞா, மஹந்தே த⁴ம்மே…பே॰… மஹந்தா நிருத்தியோ, மஹந்தானி படிபா⁴னானி, மஹந்தே ஸீலக்க²ந்தே⁴, மஹந்தே ஸமாதி⁴பஞ்ஞாவிமுத்திவிமுத்திஞாணத³ஸ்ஸனக்க²ந்தே⁴, மஹந்தானி டா²னாட்டா²னானி, மஹந்தா விஹாரஸமாபத்தியோ, மஹந்தானி அரியஸச்சானி, மஹந்தே ஸதிபட்டா²னே, ஸம்மப்பதா⁴னே, இத்³தி⁴பாதே³, மஹந்தானி இந்த்³ரியானி, மஹந்தானி ப³லானி, மஹந்தே பொ³ஜ்ஜ²ங்கே³, மஹந்தே அரியமக்³கே³, மஹந்தானி ஸாமஞ்ஞப²லானி, மஹாபி⁴ஞ்ஞாயோ , மஹந்தங் பரமத்த²ங் நிப்³பா³னங் பரிக்³க³ண்ஹாதீதி மஹாபஞ்ஞா, மஹாபஞ்ஞதாய ஸங்வத்தந்தீதி அயங் மஹாபஞ்ஞா.
Mahāpaññatāya saṃvattantīti. ‘‘Katamā mahāpaññā? Mahante atthe pariggaṇhātīti mahāpaññā, mahante dhamme…pe… mahantā niruttiyo, mahantāni paṭibhānāni, mahante sīlakkhandhe, mahante samādhipaññāvimuttivimuttiñāṇadassanakkhandhe, mahantāni ṭhānāṭṭhānāni, mahantā vihārasamāpattiyo, mahantāni ariyasaccāni, mahante satipaṭṭhāne, sammappadhāne, iddhipāde, mahantāni indriyāni, mahantāni balāni, mahante bojjhaṅge, mahante ariyamagge, mahantāni sāmaññaphalāni, mahābhiññāyo , mahantaṃ paramatthaṃ nibbānaṃ pariggaṇhātīti mahāpaññā, mahāpaññatāya saṃvattantīti ayaṃ mahāpaññā.
புது²பஞ்ஞதாய ஸங்வத்தந்தீதி. ‘‘கதமா புது²பஞ்ஞா? புது² நானாக்க²ந்தே⁴ஸு ஞாணங் பவத்ததீதி புது²பஞ்ஞா. புது² நானாதா⁴தூஸு, புது² நானாஆயதனேஸு, புது² நானாபடிச்சஸமுப்பாதே³ஸு, புது² நானாஸுஞ்ஞதமனுபலப்³பே⁴ஸு, புது² நானாஅத்தே²ஸு, த⁴ம்மேஸு, நிருத்தீஸு, படிபா⁴னேஸு, புது² நானாஸீலக்க²ந்தே⁴ஸு, ஸமாதி⁴பஞ்ஞாவிமுத்திவிமுத்திஞாணத³ஸ்ஸனக்க²ந்தே⁴ஸு, புது² நானாடா²னாட்டா²னேஸு, புது² நானாவிஹாரஸமாபத்தீஸு, புது² நானாஅரியஸச்சேஸு, புது² நானாஸதிபட்டா²னேஸு, ஸம்மப்பதா⁴னேஸு, இத்³தி⁴பாதே³ஸு, இந்த்³ரியேஸு, ப³லேஸு, பொ³ஜ்ஜ²ங்கே³ஸு, புது² நானாஅரியமக்³கே³ஸு, புது² நானாஸாமஞ்ஞப²லேஸு, புது² நானாஅபி⁴ஞ்ஞாஸு ஞாணங் பவத்ததீதி புது²பஞ்ஞா. புது² நானாஜனஸாதா⁴ரணே த⁴ம்மே ஸமதிக்கம்ம பரமத்தே² நிப்³பா³னே ஞாணங் பவத்ததீதி புது²பஞ்ஞா. புது²பஞ்ஞதாய ஸங்வத்தந்தீதி அயங் புது²பஞ்ஞா.
Puthupaññatāya saṃvattantīti. ‘‘Katamā puthupaññā? Puthu nānākkhandhesu ñāṇaṃ pavattatīti puthupaññā. Puthu nānādhātūsu, puthu nānāāyatanesu, puthu nānāpaṭiccasamuppādesu, puthu nānāsuññatamanupalabbhesu, puthu nānāatthesu, dhammesu, niruttīsu, paṭibhānesu, puthu nānāsīlakkhandhesu, samādhipaññāvimuttivimuttiñāṇadassanakkhandhesu, puthu nānāṭhānāṭṭhānesu, puthu nānāvihārasamāpattīsu, puthu nānāariyasaccesu, puthu nānāsatipaṭṭhānesu, sammappadhānesu, iddhipādesu, indriyesu, balesu, bojjhaṅgesu, puthu nānāariyamaggesu, puthu nānāsāmaññaphalesu, puthu nānāabhiññāsu ñāṇaṃ pavattatīti puthupaññā. Puthu nānājanasādhāraṇe dhamme samatikkamma paramatthe nibbāne ñāṇaṃ pavattatīti puthupaññā. Puthupaññatāya saṃvattantīti ayaṃ puthupaññā.
விபுலபஞ்ஞதாய ஸங்வத்தந்தீதி. ‘‘கதமா விபுலபஞ்ஞா? விபுலே அத்தே² பரிக³ண்ஹாதீதி விபுலபஞ்ஞா…பே॰… விபுலங் பரமத்த²ங் நிப்³பா³னங் பரிக³ண்ஹாதீதி விபுலபஞ்ஞா, விபுலபஞ்ஞதாய ஸங்வத்தந்தீதி அயங் விபுலபஞ்ஞா.
Vipulapaññatāyasaṃvattantīti. ‘‘Katamā vipulapaññā? Vipule atthe parigaṇhātīti vipulapaññā…pe… vipulaṃ paramatthaṃ nibbānaṃ parigaṇhātīti vipulapaññā, vipulapaññatāya saṃvattantīti ayaṃ vipulapaññā.
க³ம்பீ⁴ரபஞ்ஞதாய ஸங்வத்தந்தீதி. ‘‘கதமா க³ம்பீ⁴ரபஞ்ஞா? க³ம்பீ⁴ரேஸு க²ந்தே⁴ஸு ஞாணங் பவத்ததீதி க³ம்பீ⁴ரபஞ்ஞா. புது²பஞ்ஞாஸதி³ஸோ வித்தா²ரோ. க³ம்பீ⁴ரே பரமத்தே² நிப்³பா³னே ஞாணங் பவத்ததீதி க³ம்பீ⁴ரபஞ்ஞா, க³ம்பீ⁴ரபஞ்ஞதாய ஸங்வத்தந்தீதி அயங் க³ம்பீ⁴ரபஞ்ஞா.
Gambhīrapaññatāya saṃvattantīti. ‘‘Katamā gambhīrapaññā? Gambhīresu khandhesu ñāṇaṃ pavattatīti gambhīrapaññā. Puthupaññāsadiso vitthāro. Gambhīre paramatthe nibbāne ñāṇaṃ pavattatīti gambhīrapaññā, gambhīrapaññatāya saṃvattantīti ayaṃ gambhīrapaññā.
அஸாமந்தபஞ்ஞதாய ஸங்வத்தந்தீதி. ‘‘கதமா அஸாமந்தபஞ்ஞா? யஸ்ஸ புக்³க³லஸ்ஸ அத்த²வவத்தா²னதோ அத்த²படிஸம்பி⁴தா³ அதி⁴க³தா ஹோதி ஸச்சி²கதா ப²ஸ்ஸிதா பஞ்ஞாய. த⁴ம்மனிருத்திபடிபா⁴னவவத்தா²னதோ படிபா⁴னபடிஸம்பி⁴தா³ அதி⁴க³தா ஹோதி ஸச்சி²கதா ப²ஸ்ஸிதா பஞ்ஞாய, தஸ்ஸ அத்தே² ச த⁴ம்மே ச நிருத்தியா ச படிபா⁴னே ச ந அஞ்ஞோ கோசி ஸக்கோதி அபி⁴ஸம்ப⁴விதுங், அனபி⁴ஸம்ப⁴வனீயோ ச ஸோ அஞ்ஞேஹீதி அஸாமந்தபஞ்ஞோ.
Asāmantapaññatāyasaṃvattantīti. ‘‘Katamā asāmantapaññā? Yassa puggalassa atthavavatthānato atthapaṭisambhidā adhigatā hoti sacchikatā phassitā paññāya. Dhammaniruttipaṭibhānavavatthānato paṭibhānapaṭisambhidā adhigatā hoti sacchikatā phassitā paññāya, tassa atthe ca dhamme ca niruttiyā ca paṭibhāne ca na añño koci sakkoti abhisambhavituṃ, anabhisambhavanīyo ca so aññehīti asāmantapañño.
புது²ஜ்ஜனகல்யாணகஸ்ஸ பஞ்ஞா அட்ட²மகஸ்ஸ பஞ்ஞாய தூ³ரே விதூ³ரே ஸுவிதூ³ரே ந ஸந்திகே ந ஸாமந்தா, புது²ஜ்ஜனகல்யாணகங் உபாதா³ய அட்ட²மகோ அஸாமந்தபஞ்ஞோ. அட்ட²மகஸ்ஸ பஞ்ஞா ஸோதாபன்னஸ்ஸ பஞ்ஞாய தூ³ரே…பே॰… அட்ட²மகங் உபாதா³ய ஸோதாபன்னோ அஸாமந்தபஞ்ஞோ. ஸோதாபன்னஸ்ஸ பஞ்ஞா ஸகதா³கா³மிஸ்ஸ பஞ்ஞாய. ஸகதா³கா³மிஸ்ஸ பஞ்ஞா அனாகா³மிஸ்ஸ பஞ்ஞாய. அனாகா³மிஸ்ஸ பஞ்ஞா அரஹதோ பஞ்ஞாய. அரஹதோ பஞ்ஞா பச்சேகபு³த்³த⁴ஸ்ஸ பஞ்ஞாய தூ³ரே விதூ³ரே ஸுவிதூ³ரே ந ஸந்திகே ந ஸாமந்தா, அரஹந்தங் உபாதா³ய பச்சேகபு³த்³தோ⁴ அஸாமந்தபஞ்ஞோ. பச்சேகபு³த்³த⁴ஞ்ச ஸதே³வகஞ்ச லோகங் உபாதா³ய ததா²க³தோ அரஹங் ஸம்மாஸம்பு³த்³தோ⁴ அக்³கோ³ அஸாமந்தபஞ்ஞோ.
Puthujjanakalyāṇakassa paññā aṭṭhamakassa paññāya dūre vidūre suvidūre na santike na sāmantā, puthujjanakalyāṇakaṃ upādāya aṭṭhamako asāmantapañño. Aṭṭhamakassa paññā sotāpannassa paññāya dūre…pe… aṭṭhamakaṃ upādāya sotāpanno asāmantapañño. Sotāpannassa paññā sakadāgāmissa paññāya. Sakadāgāmissa paññā anāgāmissa paññāya. Anāgāmissa paññā arahato paññāya. Arahato paññā paccekabuddhassa paññāya dūre vidūre suvidūre na santike na sāmantā, arahantaṃ upādāya paccekabuddho asāmantapañño. Paccekabuddhañca sadevakañca lokaṃ upādāya tathāgato arahaṃ sammāsambuddho aggo asāmantapañño.
பஞ்ஞாபபே⁴த³குஸலோ பபி⁴ன்னஞாணோ…பே॰… தே பஞ்ஹங் அபி⁴ஸங்க²ரித்வா அபி⁴ஸங்க²ரித்வா ததா²க³தங் உபஸங்கமித்வா புச்ச²ந்தி கூ³ள்ஹானி ச படிச்ச²ன்னானி ச, கதி²தா விஸஜ்ஜிதா ச தே பஞ்ஹா ப⁴க³வதா ஹொந்தி நித்³தி³ட்ட²காரணா, உபக்கி²த்தகா ச தே ப⁴க³வதா ஸம்பஜ்ஜந்தி. அத² கோ² ப⁴க³வா தத்த² அதிரோசதி யதி³த³ங் பஞ்ஞாயாதி அக்³கோ³ அஸாமந்தபஞ்ஞோ, அஸாமந்தபஞ்ஞதாய ஸங்வத்தந்தீதி அயங் அஸாமந்தபஞ்ஞா.
Paññāpabhedakusalo pabhinnañāṇo…pe… te pañhaṃ abhisaṅkharitvā abhisaṅkharitvā tathāgataṃ upasaṅkamitvā pucchanti gūḷhāni ca paṭicchannāni ca, kathitā visajjitā ca te pañhā bhagavatā honti niddiṭṭhakāraṇā, upakkhittakā ca te bhagavatā sampajjanti. Atha kho bhagavā tattha atirocati yadidaṃ paññāyāti aggo asāmantapañño, asāmantapaññatāya saṃvattantīti ayaṃ asāmantapaññā.
பூ⁴ரிபஞ்ஞதாய ஸங்வத்தந்தீதி. ‘‘கதமா பூ⁴ரிபஞ்ஞா? ராக³ங் அபி⁴பு⁴ய்யதீதி பூ⁴ரிபஞ்ஞா, அபி⁴ப⁴விதாதி பூ⁴ரிபஞ்ஞா. தோ³ஸங், மோஹங், கோத⁴ங், உபனாஹங், மக்க²ங், பலாஸங், இஸ்ஸங், மச்ச²ரியங், மாயங், ஸாடெ²ய்யங், த²ம்ப⁴ங், ஸாரம்ப⁴ங், மானங், அதிமானங், மத³ங், பமாத³ங், ஸப்³பே³ கிலேஸே, ஸப்³பே³ து³ச்சரிதே, ஸப்³பே³ அபி⁴ஸங்கா²ரே, ஸப்³பே³ ப⁴வகா³மிகம்மே அபி⁴பு⁴ய்யதீதி பூ⁴ரிபஞ்ஞா, அபி⁴ப⁴விதாதி பூ⁴ரிபஞ்ஞா . ராகோ³ அரி, தங் அரிங் மத்³த³னிபஞ்ஞாதி பூ⁴ரிபஞ்ஞா, தோ³ஸோ, மோஹோ…பே॰… ஸப்³பே³ ப⁴வகா³மிகம்மா அரி, தங் அரிங் மத்³த³னிபஞ்ஞாதி பூ⁴ரிபஞ்ஞா. பூ⁴ரி வுச்சதி பத²வீ, தாய பத²விஸமாய வித்த²தாய விபுலாய பஞ்ஞாய ஸமன்னாக³தோதி பூ⁴ரிபஞ்ஞோ. அபிச பஞ்ஞாய ஏதங் அதி⁴வசனங் பூ⁴ரி மேதா⁴ பரிணாயிகாதி, பூ⁴ரிபஞ்ஞதாய ஸங்வத்தந்தீதி அயங் பூ⁴ரிபஞ்ஞா.
Bhūripaññatāyasaṃvattantīti. ‘‘Katamā bhūripaññā? Rāgaṃ abhibhuyyatīti bhūripaññā, abhibhavitāti bhūripaññā. Dosaṃ, mohaṃ, kodhaṃ, upanāhaṃ, makkhaṃ, palāsaṃ, issaṃ, macchariyaṃ, māyaṃ, sāṭheyyaṃ, thambhaṃ, sārambhaṃ, mānaṃ, atimānaṃ, madaṃ, pamādaṃ, sabbe kilese, sabbe duccarite, sabbe abhisaṅkhāre, sabbe bhavagāmikamme abhibhuyyatīti bhūripaññā, abhibhavitāti bhūripaññā . Rāgo ari, taṃ ariṃ maddanipaññāti bhūripaññā, doso, moho…pe… sabbe bhavagāmikammā ari, taṃ ariṃ maddanipaññāti bhūripaññā. Bhūri vuccati pathavī, tāya pathavisamāya vitthatāya vipulāya paññāya samannāgatoti bhūripañño. Apica paññāya etaṃ adhivacanaṃ bhūri medhā pariṇāyikāti, bhūripaññatāya saṃvattantīti ayaṃ bhūripaññā.
பஞ்ஞாபா³ஹுல்லாய ஸங்வத்தந்தீதி. ‘‘கதமங் பஞ்ஞாபா³ஹுல்லங்? இதே⁴கச்சோ பஞ்ஞாக³ருகோ ஹோதி பஞ்ஞாசரிதோ பஞ்ஞாஸயோ பஞ்ஞாதி⁴முத்தோ பஞ்ஞாத⁴ஜோ பஞ்ஞாகேது பஞ்ஞாதி⁴பதெய்யோ விசயப³ஹுலோ பவிசயப³ஹுலோ ஒக்கா²யனப³ஹுலோ ஸமொக்கா²யனப³ஹுலோ ஸம்பெக்கா²யனத⁴ம்மோ விபூ⁴தவிஹாரீ தச்சரிதோ தக்³க³ருகோ தப்³ப³ஹுலோ தன்னின்னோ தப்போணோ தப்பப்³பா⁴ரோ தத³தி⁴முத்தோ ததா³தி⁴பதெய்யோ, யதா² க³ணக³ருகோ வுச்சதி க³ணபா³ஹுலிகோதி, சீவரக³ருகோ பத்தக³ருகோ ஸேனாஸனக³ருகோ வுச்சதி ஸேனாஸனபா³ஹுலிகோதி, ஏவமேவங் இதே⁴கச்சோ பஞ்ஞாக³ருகோ ஹோதி பஞ்ஞாசரிதோ…பே॰… ததா³தி⁴பதெய்யோ, பஞ்ஞாபா³ஹுல்லாய ஸங்வத்தந்தீதி இத³ங் பஞ்ஞாபா³ஹுல்லங்.
Paññābāhullāya saṃvattantīti. ‘‘Katamaṃ paññābāhullaṃ? Idhekacco paññāgaruko hoti paññācarito paññāsayo paññādhimutto paññādhajo paññāketu paññādhipateyyo vicayabahulo pavicayabahulo okkhāyanabahulo samokkhāyanabahulo sampekkhāyanadhammo vibhūtavihārī taccarito taggaruko tabbahulo tanninno tappoṇo tappabbhāro tadadhimutto tadādhipateyyo, yathā gaṇagaruko vuccati gaṇabāhulikoti, cīvaragaruko pattagaruko senāsanagaruko vuccati senāsanabāhulikoti, evamevaṃ idhekacco paññāgaruko hoti paññācarito…pe… tadādhipateyyo, paññābāhullāya saṃvattantīti idaṃ paññābāhullaṃ.
ஸீக⁴பஞ்ஞதாய ஸங்வத்தந்தீதி. ‘‘கதமா ஸீக⁴பஞ்ஞா? ஸீக⁴ங் ஸீக⁴ங் ஸீலானி பரிபூரேதீதி ஸீக⁴பஞ்ஞா. ஸீக⁴ங் ஸீக⁴ங் இந்த்³ரியஸங்வரங், போ⁴ஜனே மத்தஞ்ஞுதங், ஜாக³ரியானுயோக³ங், ஸீலக்க²ந்த⁴ங், ஸமாதி⁴-பஞ்ஞா-விமுத்தி-விமுத்திஞாணத³ஸ்ஸனக்க²ந்த⁴ங் பரிபூரேதீதி ஸீக⁴பஞ்ஞா. ஸீக⁴ங் ஸீக⁴ங் டா²னாட்டா²னானி படிவிஜ்ஜ²தி. விஹாரஸமாபத்தியோ பரிபூரேதி. அரியஸச்சானி படிவிஜ்ஜ²தி. ஸதிபட்டா²னே பா⁴வேதி. ஸம்மப்பதா⁴னே இத்³தி⁴பாதே³ இந்த்³ரியானி ப³லானி பொ³ஜ்ஜ²ங்கே³ அரியமக்³க³ங் பா⁴வேதீதி ஸீக⁴பஞ்ஞா. ஸீக⁴ங் ஸீக⁴ங் ஸாமஞ்ஞப²லானி ஸச்சி²கரோதீதி ஸீக⁴பஞ்ஞா. ஸீக⁴ங் ஸீக⁴ங் அபி⁴ஞ்ஞாயோ படிவிஜ்ஜ²தீதி ஸீக⁴பஞ்ஞா. ஸீக⁴ங் ஸீக⁴ங் பரமத்த²ங் நிப்³பா³னங் ஸச்சி²கரோதீதி ஸீக⁴பஞ்ஞா, ஸீக⁴பஞ்ஞதாய ஸங்வத்தந்தீதி அயங் ஸீக⁴பஞ்ஞா.
Sīghapaññatāya saṃvattantīti. ‘‘Katamā sīghapaññā? Sīghaṃ sīghaṃ sīlāni paripūretīti sīghapaññā. Sīghaṃ sīghaṃ indriyasaṃvaraṃ, bhojane mattaññutaṃ, jāgariyānuyogaṃ, sīlakkhandhaṃ, samādhi-paññā-vimutti-vimuttiñāṇadassanakkhandhaṃ paripūretīti sīghapaññā. Sīghaṃ sīghaṃ ṭhānāṭṭhānāni paṭivijjhati. Vihārasamāpattiyo paripūreti. Ariyasaccāni paṭivijjhati. Satipaṭṭhāne bhāveti. Sammappadhāne iddhipāde indriyāni balāni bojjhaṅge ariyamaggaṃ bhāvetīti sīghapaññā. Sīghaṃ sīghaṃ sāmaññaphalāni sacchikarotīti sīghapaññā. Sīghaṃ sīghaṃ abhiññāyo paṭivijjhatīti sīghapaññā. Sīghaṃ sīghaṃ paramatthaṃ nibbānaṃ sacchikarotīti sīghapaññā, sīghapaññatāya saṃvattantīti ayaṃ sīghapaññā.
லஹுபஞ்ஞதாய ஸங்வத்தந்தீதி. ‘‘கதமா லஹுபஞ்ஞா? லஹுங் லஹுங் ஸீலானி பரிபூரேதீதி லஹுபஞ்ஞா…பே॰… லஹுபஞ்ஞதாய ஸங்வத்தந்தீதி அயங் லஹுபஞ்ஞா.
Lahupaññatāyasaṃvattantīti. ‘‘Katamā lahupaññā? Lahuṃ lahuṃ sīlāni paripūretīti lahupaññā…pe… lahupaññatāya saṃvattantīti ayaṃ lahupaññā.
ஹாஸபஞ்ஞதாய ஸங்வத்தந்தீதி. ‘‘கதமா ஹாஸபஞ்ஞா? இதே⁴கச்சோ வேத³ப³ஹுலோ துட்டி²ப³ஹுலோ ஹாஸப³ஹுலோ பாமோஜ்ஜப³ஹுலோ ஸீலானி பரிபூரேதீதி ஹாஸபஞ்ஞா…பே॰… பரமத்த²ங் நிப்³பா³னங் ஸச்சி²கரோதீதி ஹாஸபஞ்ஞா, ஹாஸபஞ்ஞதாய ஸங்வத்தந்தீதி அயங் ஹாஸபஞ்ஞா.
Hāsapaññatāya saṃvattantīti. ‘‘Katamā hāsapaññā? Idhekacco vedabahulo tuṭṭhibahulo hāsabahulo pāmojjabahulo sīlāni paripūretīti hāsapaññā…pe… paramatthaṃ nibbānaṃ sacchikarotīti hāsapaññā, hāsapaññatāya saṃvattantīti ayaṃ hāsapaññā.
ஜவனபஞ்ஞதாய ஸங்வத்தந்தீதி. ‘‘கதமா ஜவனபஞ்ஞா? யங் கிஞ்சி ரூபங் அதீதானாக³தபச்சுப்பன்னங் , யா காசி வேத³னா, யா காசி ஸஞ்ஞா, யே கேசி ஸங்கா²ரா, யங்கிஞ்சி விஞ்ஞாணங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் விஞ்ஞாணங் அனிச்சதோ கி²ப்பங் ஜவதீதி ஜவனபஞ்ஞா, து³க்க²தோ, அனத்ததோ கி²ப்பங் ஜவதீதி ஜவனபஞ்ஞா. சக்கு²ங்…பே॰… ஜராமரணங் அதீதானாக³தபச்சுப்பன்னங் அனிச்சதோ, து³க்க²தோ, அனத்ததோ கி²ப்பங் ஜவதீதி ஜவனபஞ்ஞா. ரூபங் அதீதானாக³தபச்சுப்பன்னங் அனிச்சங் க²யட்டே²ன, து³க்க²ங் ப⁴யட்டே²ன, அனத்தா அஸாரகட்டே²னாதி துலயித்வா தீரயித்வா விபா⁴வயித்வா விபூ⁴தங் கத்வா ரூபனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா…பே॰… ஜராமரணனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா. ரூபங்…பே॰… ஜராமரணங் அதீதானாக³தபச்சுப்பன்னங் க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்மந்தி துலயித்வா தீரயித்வா விபா⁴வயித்வா விபூ⁴தங் கத்வா ஜராமரணனிரோதே⁴ நிப்³பா³னே கி²ப்பங் ஜவதீதி ஜவனபஞ்ஞா, ஜவனபஞ்ஞதாய ஸங்வத்தந்தீதி அயங் ஜவனபஞ்ஞா.
Javanapaññatāya saṃvattantīti. ‘‘Katamā javanapaññā? Yaṃ kiñci rūpaṃ atītānāgatapaccuppannaṃ , yā kāci vedanā, yā kāci saññā, ye keci saṅkhārā, yaṃkiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ aniccato khippaṃ javatīti javanapaññā, dukkhato, anattato khippaṃ javatīti javanapaññā. Cakkhuṃ…pe… jarāmaraṇaṃ atītānāgatapaccuppannaṃ aniccato, dukkhato, anattato khippaṃ javatīti javanapaññā. Rūpaṃ atītānāgatapaccuppannaṃ aniccaṃ khayaṭṭhena, dukkhaṃ bhayaṭṭhena, anattā asārakaṭṭhenāti tulayitvā tīrayitvā vibhāvayitvā vibhūtaṃ katvā rūpanirodhe nibbāne khippaṃ javatīti javanapaññā…pe… jarāmaraṇanirodhe nibbāne khippaṃ javatīti javanapaññā. Rūpaṃ…pe… jarāmaraṇaṃ atītānāgatapaccuppannaṃ khayadhammaṃ vayadhammaṃ virāgadhammaṃ nirodhadhammanti tulayitvā tīrayitvā vibhāvayitvā vibhūtaṃ katvā jarāmaraṇanirodhe nibbāne khippaṃ javatīti javanapaññā, javanapaññatāya saṃvattantīti ayaṃ javanapaññā.
திக்க²பஞ்ஞதாய ஸங்வத்தந்தீதி. ‘‘கதமா திக்க²பஞ்ஞா? கி²ப்பங் கிலேஸே சி²ந்த³தீதி திக்க²பஞ்ஞா. உப்பன்னங் காமவிதக்கங், வ்யாபாத³விதக்கங், விஹிங்ஸாவிதக்கங் உப்பன்னுப்பன்னே பாபகே அகுஸலே த⁴ம்மே நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வங் க³மேதீதி திக்க²பஞ்ஞா. உப்பன்னங் ராக³ங், தோ³ஸங், மோஹங்…பே॰… ஸப்³பே³ ப⁴வகா³மிகம்மே நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வங் க³மேதீதி திக்க²பஞ்ஞா. ஏகஸ்மிங் ஆஸனே சத்தாரோ அரியமக்³கா³ சத்தாரி ஸாமஞ்ஞப²லானி சதஸ்ஸோ படிஸம்பி⁴தா³யோ ச² அபி⁴ஞ்ஞாயோ அதி⁴க³தா ஹொந்தி ஸச்சி²கதா ப²ஸ்ஸிதா பஞ்ஞாயாதி திக்க²பஞ்ஞா, திக்க²பஞ்ஞதாய ஸங்வத்தந்தீதி அயங் திக்க²பஞ்ஞா.
Tikkhapaññatāya saṃvattantīti. ‘‘Katamā tikkhapaññā? Khippaṃ kilese chindatīti tikkhapaññā. Uppannaṃ kāmavitakkaṃ, vyāpādavitakkaṃ, vihiṃsāvitakkaṃ uppannuppanne pāpake akusale dhamme nādhivāseti pajahati vinodeti byantīkaroti anabhāvaṃ gametīti tikkhapaññā. Uppannaṃ rāgaṃ, dosaṃ, mohaṃ…pe… sabbe bhavagāmikamme nādhivāseti pajahati vinodeti byantīkaroti anabhāvaṃ gametīti tikkhapaññā. Ekasmiṃ āsane cattāro ariyamaggā cattāri sāmaññaphalāni catasso paṭisambhidāyo cha abhiññāyo adhigatā honti sacchikatā phassitā paññāyāti tikkhapaññā, tikkhapaññatāya saṃvattantīti ayaṃ tikkhapaññā.
நிப்³பே³தி⁴கபஞ்ஞதாய ஸங்வத்தந்தீதி. ‘‘கதமா நிப்³பே³தி⁴கபஞ்ஞா? இதே⁴கச்சோ ஸப்³ப³ஸங்கா²ரேஸு உப்³பே³க³ப³ஹுலோ ஹோதி உத்தாஸப³ஹுலோ உக்கண்ட²னப³ஹுலோ அரதிப³ஹுலோ அனபி⁴ரதிப³ஹுலோ ப³ஹிமுகோ² ந ரமதி ஸப்³ப³ஸங்கா²ரேஸு, அனிப்³பி³த்³த⁴புப்³ப³ங் அப்பதா³லிதபுப்³ப³ங் லோப⁴க்க²ந்த⁴ங் நிப்³பி³ஜ்ஜ²தி பதா³லேதீதி நிப்³பே³தி⁴கபஞ்ஞா, அனிப்³பி³த்³த⁴புப்³ப³ங் அப்பதா³லிதபுப்³ப³ங் தோ³ஸக்க²ந்த⁴ங், மோஹக்க²ந்த⁴ங், கோத⁴ங், உபனாஹங்…பே॰… ஸப்³பே³ ப⁴வகா³மிகம்மே நிப்³பி³ஜ்ஜ²தி பதா³லேதீதி நிப்³பே³தி⁴கபஞ்ஞா, நிப்³பே³தி⁴கபஞ்ஞதாய ஸங்வத்தந்தீதி அயங் நிப்³பே³தி⁴கபஞ்ஞா’’.
Nibbedhikapaññatāyasaṃvattantīti. ‘‘Katamā nibbedhikapaññā? Idhekacco sabbasaṅkhāresu ubbegabahulo hoti uttāsabahulo ukkaṇṭhanabahulo aratibahulo anabhiratibahulo bahimukho na ramati sabbasaṅkhāresu, anibbiddhapubbaṃ appadālitapubbaṃ lobhakkhandhaṃ nibbijjhati padāletīti nibbedhikapaññā, anibbiddhapubbaṃ appadālitapubbaṃ dosakkhandhaṃ, mohakkhandhaṃ, kodhaṃ, upanāhaṃ…pe… sabbe bhavagāmikamme nibbijjhati padāletīti nibbedhikapaññā, nibbedhikapaññatāya saṃvattantīti ayaṃ nibbedhikapaññā’’.
ஏவங் படிஸம்பி⁴தா³மக்³கே³ வுத்தனயேனேவெத்த² அத்தோ² வேதி³தப்³போ³. கேவலஞ்ஹி தத்த² ப³ஹுவசனங், இத⁴ ஏகவசனந்தி அயமேவ விஸேஸோ. ஸேஸங் தாதி³ஸமேவாதி. இமா ச பன ஸோளஸ மஹாபஞ்ஞா லோகியலோகுத்தரமிஸ்ஸகாவ கதி²தா.
Evaṃ paṭisambhidāmagge vuttanayenevettha attho veditabbo. Kevalañhi tattha bahuvacanaṃ, idha ekavacananti ayameva viseso. Sesaṃ tādisamevāti. Imā ca pana soḷasa mahāpaññā lokiyalokuttaramissakāva kathitā.
காயக³தாஸதிவக்³க³வண்ணனா.
Kāyagatāsativaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 19. காயக³தாஸதிவக்³கோ³ • 19. Kāyagatāsativaggo
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 19. காயக³தாஸதிவக்³க³வண்ணனா • 19. Kāyagatāsativaggavaṇṇanā
