| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೯. ಕಾಯಗತಾಸತಿವಗ್ಗೋ
19. Kāyagatāsativaggo
೫೬೩. ‘‘ಯಸ್ಸ ಕಸ್ಸಚಿ, ಭಿಕ್ಖವೇ, ಮಹಾಸಮುದ್ದೋ ಚೇತಸಾ ಫುಟೋ ಅನ್ತೋಗಧಾ ತಸ್ಸ ಕುನ್ನದಿಯೋ ಯಾ ಕಾಚಿ ಸಮುದ್ದಙ್ಗಮಾ; ಏವಮೇವಂ, ಭಿಕ್ಖವೇ, ಯಸ್ಸ ಕಸ್ಸಚಿ ಕಾಯಗತಾ ಸತಿ ಭಾವಿತಾ ಬಹುಲೀಕತಾ ಅನ್ತೋಗಧಾ ತಸ್ಸ ಕುಸಲಾ ಧಮ್ಮಾ ಯೇ ಕೇಚಿ ವಿಜ್ಜಾಭಾಗಿಯಾ’’ತಿ।
563. ‘‘Yassa kassaci, bhikkhave, mahāsamuddo cetasā phuṭo antogadhā tassa kunnadiyo yā kāci samuddaṅgamā; evamevaṃ, bhikkhave, yassa kassaci kāyagatā sati bhāvitā bahulīkatā antogadhā tassa kusalā dhammā ye keci vijjābhāgiyā’’ti.
೫೬೪-೫೭೦. ‘‘ಏಕಧಮ್ಮೋ, ಭಿಕ್ಖವೇ, ಭಾವಿತೋ ಬಹುಲೀಕತೋ ಮಹತೋ ಸಂವೇಗಾಯ ಸಂವತ್ತತಿ… ಮಹತೋ ಅತ್ಥಾಯ ಸಂವತ್ತತಿ… ಮಹತೋ ಯೋಗಕ್ಖೇಮಾಯ ಸಂವತ್ತತಿ… ಸತಿಸಮ್ಪಜಞ್ಞಾಯ ಸಂವತ್ತತಿ… ಞಾಣದಸ್ಸನಪ್ಪಟಿಲಾಭಾಯ ಸಂವತ್ತತಿ… ದಿಟ್ಠಧಮ್ಮಸುಖವಿಹಾರಾಯ ಸಂವತ್ತತಿ… ವಿಜ್ಜಾವಿಮುತ್ತಿಫಲಸಚ್ಛಿಕಿರಿಯಾಯ ಸಂವತ್ತತಿ। ಕತಮೋ ಏಕಧಮ್ಮೋ? ಕಾಯಗತಾ ಸತಿ। ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಮಹತೋ ಸಂವೇಗಾಯ ಸಂವತ್ತತಿ… ಮಹತೋ ಅತ್ಥಾಯ ಸಂವತ್ತತಿ… ಮಹತೋ ಯೋಗಕ್ಖೇಮಾಯ ಸಂವತ್ತತಿ… ಸತಿಸಮ್ಪಜಞ್ಞಾಯ ಸಂವತ್ತತಿ… ಞಾಣದಸ್ಸನಪ್ಪಟಿಲಾಭಾಯ ಸಂವತ್ತತಿ… ದಿಟ್ಠಧಮ್ಮಸುಖವಿಹಾರಾಯ ಸಂವತ್ತತಿ… ವಿಜ್ಜಾವಿಮುತ್ತಿಫಲಸಚ್ಛಿಕಿರಿಯಾಯ ಸಂವತ್ತತೀ’’ತಿ।
564-570. ‘‘Ekadhammo, bhikkhave, bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato mahato saṃvegāya saṃvattati… mahato atthāya saṃvattati… mahato yogakkhemāya saṃvattati… satisampajaññāya saṃvattati… ñāṇadassanappaṭilābhāya saṃvattati… diṭṭhadhammasukhavihārāya saṃvattati… vijjāvimuttiphalasacchikiriyāya saṃvattatī’’ti.
೫೭೧. ‘‘ಏಕಧಮ್ಮೇ , ಭಿಕ್ಖವೇ, ಭಾವಿತೇ ಬಹುಲೀಕತೇ ಕಾಯೋಪಿ ಪಸ್ಸಮ್ಭತಿ, ಚಿತ್ತಮ್ಪಿ ಪಸ್ಸಮ್ಭತಿ, ವಿತಕ್ಕವಿಚಾರಾಪಿ ವೂಪಸಮ್ಮನ್ತಿ, ಕೇವಲಾಪಿ ವಿಜ್ಜಾಭಾಗಿಯಾ ಧಮ್ಮಾ ಭಾವನಾಪಾರಿಪೂರಿಂ ಗಚ್ಛನ್ತಿ। ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ। ಇಮಸ್ಮಿಂ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಕಾಯೋಪಿ ಪಸ್ಸಮ್ಭತಿ, ಚಿತ್ತಮ್ಪಿ ಪಸ್ಸಮ್ಭತಿ, ವಿತಕ್ಕವಿಚಾರಾಪಿ ವೂಪಸಮ್ಮನ್ತಿ, ಕೇವಲಾಪಿ ವಿಜ್ಜಾಭಾಗಿಯಾ ಧಮ್ಮಾ ಭಾವನಾಪಾರಿಪೂರಿಂ ಗಚ್ಛನ್ತೀ’’ತಿ।
571. ‘‘Ekadhamme , bhikkhave, bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate kāyopi passambhati, cittampi passambhati, vitakkavicārāpi vūpasammanti, kevalāpi vijjābhāgiyā dhammā bhāvanāpāripūriṃ gacchantī’’ti.
೫೭೨. ‘‘ಏಕಧಮ್ಮೇ, ಭಿಕ್ಖವೇ, ಭಾವಿತೇ ಬಹುಲೀಕತೇ ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ನುಪ್ಪಜ್ಜನ್ತಿ, ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪಹೀಯನ್ತಿ। ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ। ಇಮಸ್ಮಿಂ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಅನುಪ್ಪನ್ನಾ ಚೇವ ಅಕುಸಲಾ ಧಮ್ಮಾ ನುಪ್ಪಜ್ಜನ್ತಿ, ಉಪ್ಪನ್ನಾ ಚ ಅಕುಸಲಾ ಧಮ್ಮಾ ಪಹೀಯನ್ತೀ’’ತಿ।
572. ‘‘Ekadhamme, bhikkhave, bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva akusalā dhammā nuppajjanti, uppannā ca akusalā dhammā pahīyantī’’ti.
೫೭೩. ‘‘ಏಕಧಮ್ಮೇ , ಭಿಕ್ಖವೇ, ಭಾವಿತೇ ಬಹುಲೀಕತೇ ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ, ಉಪ್ಪನ್ನಾ ಚ ಕುಸಲಾ ಧಮ್ಮಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ। ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ। ಇಮಸ್ಮಿಂ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಅನುಪ್ಪನ್ನಾ ಚೇವ ಕುಸಲಾ ಧಮ್ಮಾ ಉಪ್ಪಜ್ಜನ್ತಿ, ಉಪ್ಪನ್ನಾ ಚ ಕುಸಲಾ ಧಮ್ಮಾ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತೀ’’ತಿ।
573. ‘‘Ekadhamme , bhikkhave, bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anuppannā ceva kusalā dhammā uppajjanti, uppannā ca kusalā dhammā bhiyyobhāvāya vepullāya saṃvattantī’’ti.
೫೭೪. ‘‘ಏಕಧಮ್ಮೇ, ಭಿಕ್ಖವೇ, ಭಾವಿತೇ ಬಹುಲೀಕತೇ ಅವಿಜ್ಜಾ ಪಹೀಯತಿ, ವಿಜ್ಜಾ ಉಪ್ಪಜ್ಜತಿ, ಅಸ್ಮಿಮಾನೋ ಪಹೀಯತಿ, ಅನುಸಯಾ ಸಮುಗ್ಘಾತಂ ಗಚ್ಛನ್ತಿ, ಸಂಯೋಜನಾ ಪಹೀಯನ್ತಿ। ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ। ಇಮಸ್ಮಿಂ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಅವಿಜ್ಜಾ ಪಹೀಯತಿ, ವಿಜ್ಜಾ ಉಪ್ಪಜ್ಜತಿ, ಅಸ್ಮಿಮಾನೋ ಪಹೀಯತಿ, ಅನುಸಯಾ ಸಮುಗ್ಘಾತಂ ಗಚ್ಛನ್ತಿ, ಸಂಯೋಜನಾ ಪಹೀಯನ್ತೀ’’ತಿ।
574. ‘‘Ekadhamme, bhikkhave, bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyanti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate avijjā pahīyati, vijjā uppajjati, asmimāno pahīyati, anusayā samugghātaṃ gacchanti, saṃyojanā pahīyantī’’ti.
೫೭೫-೫೭೬. ‘‘ಏಕಧಮ್ಮೋ, ಭಿಕ್ಖವೇ, ಭಾವಿತೋ ಬಹುಲೀಕತೋ ಪಞ್ಞಾಪಭೇದಾಯ ಸಂವತ್ತತಿ… ಅನುಪಾದಾಪರಿನಿಬ್ಬಾನಾಯ ಸಂವತ್ತತಿ। ಕತಮೋ ಏಕಧಮ್ಮೋ? ಕಾಯಗತಾ ಸತಿ। ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಪಞ್ಞಾಪಭೇದಾಯ ಸಂವತ್ತತಿ… ಅನುಪಾದಾಪರಿನಿಬ್ಬಾನಾಯ ಸಂವತ್ತತೀ’’ತಿ।
575-576. ‘‘Ekadhammo, bhikkhave, bhāvito bahulīkato paññāpabhedāya saṃvattati… anupādāparinibbānāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpabhedāya saṃvattati… anupādāparinibbānāya saṃvattatī’’ti.
೫೭೭-೫೭೯. ‘‘ಏಕಧಮ್ಮೇ , ಭಿಕ್ಖವೇ, ಭಾವಿತೇ ಬಹುಲೀಕತೇ ಅನೇಕಧಾತುಪಟಿವೇಧೋ ಹೋತಿ… ನಾನಾಧಾತುಪಟಿವೇಧೋ ಹೋತಿ… ಅನೇಕಧಾತುಪಟಿಸಮ್ಭಿದಾ ಹೋತಿ। ಕತಮಸ್ಮಿಂ ಏಕಧಮ್ಮೇ? ಕಾಯಗತಾಯ ಸತಿಯಾ। ಇಮಸ್ಮಿಂ ಖೋ, ಭಿಕ್ಖವೇ, ಏಕಧಮ್ಮೇ ಭಾವಿತೇ ಬಹುಲೀಕತೇ ಅನೇಕಧಾತುಪಟಿವೇಧೋ ಹೋತಿ… ನಾನಾಧಾತುಪಟಿವೇಧೋ ಹೋತಿ… ಅನೇಕಧಾತುಪಟಿಸಮ್ಭಿದಾ ಹೋತೀ’’ತಿ।
577-579. ‘‘Ekadhamme , bhikkhave, bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hoti. Katamasmiṃ ekadhamme? Kāyagatāya satiyā. Imasmiṃ kho, bhikkhave, ekadhamme bhāvite bahulīkate anekadhātupaṭivedho hoti… nānādhātupaṭivedho hoti… anekadhātupaṭisambhidā hotī’’ti.
೫೮೦-೫೮೩. ‘‘ಏಕಧಮ್ಮೋ, ಭಿಕ್ಖವೇ, ಭಾವಿತೋ ಬಹುಲೀಕತೋ ಸೋತಾಪತ್ತಿಫಲಸಚ್ಛಿಕಿರಿಯಾಯ ಸಂವತ್ತತಿ… ಸಕದಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತತಿ… ಅನಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತತಿ… ಅರಹತ್ತಫಲಸಚ್ಛಿಕಿರಿಯಾಯ ಸಂವತ್ತತಿ। ಕತಮೋ ಏಕಧಮ್ಮೋ? ಕಾಯಗತಾ ಸತಿ। ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಸೋತಾಪತ್ತಿಫಲಸಚ್ಛಿಕಿರಿಯಾಯ ಸಂವತ್ತತಿ… ಸಕದಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತತಿ… ಅನಾಗಾಮಿಫಲಸಚ್ಛಿಕಿರಿಯಾಯ ಸಂವತ್ತತಿ… ಅರಹತ್ತಫಲಸಚ್ಛಿಕಿರಿಯಾಯ ಸಂವತ್ತತೀ’’ತಿ।
580-583. ‘‘Ekadhammo, bhikkhave, bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato sotāpattiphalasacchikiriyāya saṃvattati… sakadāgāmiphalasacchikiriyāya saṃvattati… anāgāmiphalasacchikiriyāya saṃvattati… arahattaphalasacchikiriyāya saṃvattatī’’ti.
೫೮೪-೫೯೯. ‘‘ಏಕಧಮ್ಮೋ , ಭಿಕ್ಖವೇ, ಭಾವಿತೋ ಬಹುಲೀಕತೋ ಪಞ್ಞಾಪಟಿಲಾಭಾಯ ಸಂವತ್ತತಿ… ಪಞ್ಞಾವುದ್ಧಿಯಾ ಸಂವತ್ತತಿ… ಪಞ್ಞಾವೇಪುಲ್ಲಾಯ ಸಂವತ್ತತಿ… ಮಹಾಪಞ್ಞತಾಯ ಸಂವತ್ತತಿ… ಪುಥುಪಞ್ಞತಾಯ ಸಂವತ್ತತಿ… ವಿಪುಲಪಞ್ಞತಾಯ ಸಂವತ್ತತಿ… ಗಮ್ಭೀರಪಞ್ಞತಾಯ ಸಂವತ್ತತಿ… ಅಸಾಮನ್ತಪಞ್ಞತಾಯ 1 ಸಂವತ್ತತಿ… ಭೂರಿಪಞ್ಞತಾಯ ಸಂವತ್ತತಿ… ಪಞ್ಞಾಬಾಹುಲ್ಲಾಯ ಸಂವತ್ತತಿ… ಸೀಘಪಞ್ಞತಾಯ ಸಂವತ್ತತಿ… ಲಹುಪಞ್ಞತಾಯ ಸಂವತ್ತತಿ… ಹಾಸಪಞ್ಞತಾಯ 2 ಸಂವತ್ತತಿ… ಜವನಪಞ್ಞತಾಯ ಸಂವತ್ತತಿ… ತಿಕ್ಖಪಞ್ಞತಾಯ ಸಂವತ್ತತಿ… ನಿಬ್ಬೇಧಿಕಪಞ್ಞತಾಯ ಸಂವತ್ತತಿ। ಕತಮೋ ಏಕಧಮ್ಮೋ? ಕಾಯಗತಾ ಸತಿ। ಅಯಂ ಖೋ, ಭಿಕ್ಖವೇ, ಏಕಧಮ್ಮೋ ಭಾವಿತೋ ಬಹುಲೀಕತೋ ಪಞ್ಞಾಪಟಿಲಾಭಾಯ ಸಂವತ್ತತಿ… ಪಞ್ಞಾವುದ್ಧಿಯಾ ಸಂವತ್ತತಿ… ಪಞ್ಞಾವೇಪುಲ್ಲಾಯ ಸಂವತ್ತತಿ… ಮಹಾಪಞ್ಞತಾಯ ಸಂವತ್ತತಿ… ಪುಥುಪಞ್ಞತಾಯ ಸಂವತ್ತತಿ… ವಿಪುಲಪಞ್ಞತಾಯ ಸಂವತ್ತತಿ… ಗಮ್ಭೀರಪಞ್ಞತಾಯ ಸಂವತ್ತತಿ… ಅಸಾಮನ್ತಪಞ್ಞತಾಯ ಸಂವತ್ತತಿ… ಭೂರಿಪಞ್ಞತಾಯ ಸಂವತ್ತತಿ… ಪಞ್ಞಾಬಾಹುಲ್ಲಾಯ ಸಂವತ್ತತಿ… ಸೀಘಪಞ್ಞತಾಯ ಸಂವತ್ತತಿ… ಲಹುಪಞ್ಞತಾಯ ಸಂವತ್ತತಿ… ಹಾಸಪಞ್ಞತಾಯ ಸಂವತ್ತತಿ… ಜವನಪಞ್ಞತಾಯ ಸಂವತ್ತತಿ… ತಿಕ್ಖಪಞ್ಞತಾಯ ಸಂವತ್ತತಿ… ನಿಬ್ಬೇಧಿಕಪಞ್ಞತಾಯ ಸಂವತ್ತತೀ’’ತಿ।
584-599. ‘‘Ekadhammo , bhikkhave, bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya 3 saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya 4 saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattati. Katamo ekadhammo? Kāyagatā sati. Ayaṃ kho, bhikkhave, ekadhammo bhāvito bahulīkato paññāpaṭilābhāya saṃvattati… paññāvuddhiyā saṃvattati… paññāvepullāya saṃvattati… mahāpaññatāya saṃvattati… puthupaññatāya saṃvattati… vipulapaññatāya saṃvattati… gambhīrapaññatāya saṃvattati… asāmantapaññatāya saṃvattati… bhūripaññatāya saṃvattati… paññābāhullāya saṃvattati… sīghapaññatāya saṃvattati… lahupaññatāya saṃvattati… hāsapaññatāya saṃvattati… javanapaññatāya saṃvattati… tikkhapaññatāya saṃvattati… nibbedhikapaññatāya saṃvattatī’’ti.
ಕಾಯಗತಾಸತಿವಗ್ಗೋ ಏಕೂನವೀಸತಿಮೋ।
Kāyagatāsativaggo ekūnavīsatimo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧೯. ಕಾಯಗತಾಸತಿವಗ್ಗವಣ್ಣನಾ • 19. Kāyagatāsativaggavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೯. ಕಾಯಗತಾಸತಿವಗ್ಗವಣ್ಣನಾ • 19. Kāyagatāsativaggavaṇṇanā
