| Library / Tipiṭaka / ತಿಪಿಟಕ • Tipiṭaka / ಕಙ್ಖಾವಿತರಣೀ-ಅಭಿನವ-ಟೀಕಾ • Kaṅkhāvitaraṇī-abhinava-ṭīkā |
೧೦. ಕಯವಿಕ್ಕಯಸಿಕ್ಖಾಪದವಣ್ಣನಾ
10. Kayavikkayasikkhāpadavaṇṇanā
ರೂಪಿಯಸಂವೋಹಾರಸ್ಸ ಪನ ಹೇಟ್ಠಾಸಿಕ್ಖಾಪದೇನ ಗಹಿತತ್ತಾ ಕಪ್ಪಿಯಭಣ್ಡಾನಮೇವೇತ್ಥ ಗಹಣನ್ತಿ ಆಹ ‘‘ಚೀವರಾದೀನ’’ನ್ತಿಆದಿ। ತತ್ಥ ಚೀವರಾದೀನಂ ಕಪ್ಪಿಯಭಣ್ಡಾನನ್ತಿ ಅನ್ತಮಸೋ ದಸಿಕಸುತ್ತಂ ಉಪಾದಾಯ ಚೀವರಪಿಣ್ಡಪಾತಸೇನಾಸನಗಿಲಾನಪಚ್ಚಯಾನಂ ಯೇಸಂ ಕೇಸಞ್ಚಿ ಕಪ್ಪಿಯಭಣ್ಡಾನಂ। ಕಯಂ ನಾಮ ಪರಭಣ್ಡಸ್ಸ ಗಹಣಂ। ವಿಕ್ಕಯಂ ನಾಮ ಅತ್ತನೋ ಭಣ್ಡಸ್ಸ ದಾನಂ। ತೇನಾಹ ‘‘ಇಮಿನಾ ಇಮಂ ದೇಹೀ’’ತಿಆದಿ। ಪರಸ್ಸಾತಿ ಠಪೇತ್ವಾ ಪಞ್ಚ ಸಹಧಮ್ಮಿಕೇ ಅಞ್ಞಸ್ಸ। ಏತ್ಥ ಚ ‘‘ಅಹಂ, ಭನ್ತೇ, ನಾನಪ್ಪಕಾರಕಂ ಕಯವಿಕ್ಕಯಂ ಸಮಾಪಜ್ಜಿಂ, ಇದಂ ಮೇ ನಿಸ್ಸಗ್ಗಿಯಂ, ಇಮಾಹಂ ಸಙ್ಘಸ್ಸ ನಿಸ್ಸಜ್ಜಾಮೀ’’ತಿಆದಿನಾ (ಪಾರಾ॰ ೫೯೫) ನಯೇನ ನಿಸ್ಸಜ್ಜಿತಬ್ಬಂ। ತೇನಾಹ ‘‘ವುತ್ತಲಕ್ಖಣವಸೇನಾ’’ತಿಆದಿ। ನನು ಚೇತ್ಥ ಚೀವರಧೋವನೇ ವಾ ಕೇಸಚ್ಛೇದನೇ ವಾ ಭೂಮಿಸೋಧನಾದಿನವಕಮ್ಮೇ ವಾ ಪರಭಣ್ಡಂ ಅತ್ತನೋ ಹತ್ಥಗತಂ ನಿಸ್ಸಜ್ಜಿತಬ್ಬಂ ನಾಮ ನತ್ಥಿ, ತತ್ಥ ಕಿಂ ಕಾತಬ್ಬನ್ತಿ ಆಹ ‘‘ಅಸನ್ತೇ ಪಾಚಿತ್ತಿಯಂ ದೇಸೇತಬ್ಬಮೇವಾ’’ತಿ। ಯಥಾ ನಿಸ್ಸಗ್ಗಿಯವತ್ಥುಮ್ಹಿ ಪರಿಭುತ್ತೇ ವಾ ನಟ್ಠೇ ವಾ ಪಾಚಿತ್ತಿಯಂ ದೇಸೇತಿ, ಏವಂ ಇಧಾಪಿ ದೇಸೇತಬ್ಬಮೇವಾತಿ ಅಧಿಪ್ಪಾಯೋ।
Rūpiyasaṃvohārassa pana heṭṭhāsikkhāpadena gahitattā kappiyabhaṇḍānamevettha gahaṇanti āha ‘‘cīvarādīna’’ntiādi. Tattha cīvarādīnaṃ kappiyabhaṇḍānanti antamaso dasikasuttaṃ upādāya cīvarapiṇḍapātasenāsanagilānapaccayānaṃ yesaṃ kesañci kappiyabhaṇḍānaṃ. Kayaṃ nāma parabhaṇḍassa gahaṇaṃ. Vikkayaṃ nāma attano bhaṇḍassa dānaṃ. Tenāha ‘‘iminā imaṃ dehī’’tiādi. Parassāti ṭhapetvā pañca sahadhammike aññassa. Ettha ca ‘‘ahaṃ, bhante, nānappakārakaṃ kayavikkayaṃ samāpajjiṃ, idaṃ me nissaggiyaṃ, imāhaṃ saṅghassa nissajjāmī’’tiādinā (pārā. 595) nayena nissajjitabbaṃ. Tenāha ‘‘vuttalakkhaṇavasenā’’tiādi. Nanu cettha cīvaradhovane vā kesacchedane vā bhūmisodhanādinavakamme vā parabhaṇḍaṃ attano hatthagataṃ nissajjitabbaṃ nāma natthi, tattha kiṃ kātabbanti āha ‘‘asante pācittiyaṃ desetabbamevā’’ti. Yathā nissaggiyavatthumhi paribhutte vā naṭṭhe vā pācittiyaṃ deseti, evaṃ idhāpi desetabbamevāti adhippāyo.
ಇದಂ ಅಮ್ಹಾಕಂ ಅತ್ಥೀತಿ ಇದಂ ಪಟಿಗ್ಗಹಿತಂ ತೇಲಂ ವಾ ಸಪ್ಪಿ ವಾ ಅಮ್ಹಾಕಂ ಸಂವಿಜ್ಜತಿ। ಅಮ್ಹಾಕಞ್ಚ ಇಮಿನಾ ಚ ಇಮಿನಾ ಚ ಅತ್ಥೋತಿ ಅಮ್ಹಾಕಞ್ಚ ತದಞ್ಞೇನ ಇಮಿನಾ ಚ ಇಮಿನಾ ಚ ಅಪ್ಪಟಿಗ್ಗಹಿತಕೇನ ಅತ್ಥೋ। ‘‘ರೂಪಿಯಸಂವೋಹಾರೇ ವುತ್ತನಯಮೇವಾ’’ತಿ ಇಮಿನಾ ‘‘ತಿಕಪಾಚಿತ್ತಿಯಂ ಅಕಯವಿಕ್ಕಯೇ ಕಯವಿಕ್ಕಯಸಞ್ಞಿನೋ ಚ ವೇಮತಿಕಸ್ಸ ಚ ದುಕ್ಕಟ’’ನ್ತಿ ಇಮಂ ನಯಮತಿದಿಸತಿ।
Idaṃamhākaṃ atthīti idaṃ paṭiggahitaṃ telaṃ vā sappi vā amhākaṃ saṃvijjati. Amhākañca iminā ca iminā ca atthoti amhākañca tadaññena iminā ca iminā ca appaṭiggahitakena attho. ‘‘Rūpiyasaṃvohāre vuttanayamevā’’ti iminā ‘‘tikapācittiyaṃ akayavikkaye kayavikkayasaññino ca vematikassa ca dukkaṭa’’nti imaṃ nayamatidisati.
ಕಯವಿಕ್ಕಯಸಿಕ್ಖಾಪದವಣ್ಣನಾ ನಿಟ್ಠಿತಾ।
Kayavikkayasikkhāpadavaṇṇanā niṭṭhitā.
ಏಳಕಲೋಮವಗ್ಗೋ ದುತಿಯೋ।
Eḷakalomavaggo dutiyo.
