| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
ကေဏိယဇဋိလဝတ္ထုကထာဝဏ္ဏနာ
Keṇiyajaṭilavatthukathāvaṇṇanā
၃၀၀. ဇဋိလောတိ အာဟရိမဇဋာဓရော တာပသဝေသဓာရကော ယညယုတ္တော လောကပူဇိတော ဗ္ရာဟ္မဏော။ ပဝတ္တာရော ပာဝစနဝသေန ဝတ္တာရော။ ယေသံ သန္တကမိဒံ, ယေဟိ ဝာ ဣဒံ ဂီတန္တိ အတ္ထော။ ဂီတံ ပဝုတ္တံ သမိဟိတန္တိ အညမညသ္သ ပရိယာယဝစနံ ဝုတ္တန္တိ အတ္ထော။ တဒနုဂာယန္တီတိ တံ တေဟိ ပုဗ္ဗေ ဂီတံ အနုဂာယန္တိ။ ဧဝံ သေသေသု စ။
300.Jaṭiloti āharimajaṭādharo tāpasavesadhārako yaññayutto lokapūjito brāhmaṇo. Pavattāro pāvacanavasena vattāro. Yesaṃ santakamidaṃ, yehi vā idaṃ gītanti attho. Gītaṃ pavuttaṃ samihitanti aññamaññassa pariyāyavacanaṃ vuttanti attho. Tadanugāyantīti taṃ tehi pubbe gītaṃ anugāyanti. Evaṃ sesesu ca.
ယာဝကာလိကပက္ကာနန္တိ ပက္ကေ သန္ဓာယ ဝုတ္တံ, အာမာနိ ပန အနုပသမ္ပန္နေဟိ သီတုဒကေ မဒ္ဒိတ္ဝာ ပရိသ္သာဝေတ္ဝာ ဒိန္နပာနံ ပစ္ဆာဘတ္တမ္ပိ ကပ္ပတိ ဧဝ။ အယဉ္စ အတ္ထော မဟာအဋ္ဌကထာယံ သရူပတော အဝုတ္တောတိ အာဟ ‘‘ကုရုန္ဒိယံ ပနာ’’တိအာဒိ။ ‘‘ဥစ္ဆုရသော နိကသဋော’’တိ ဣဒံ ပာတဗ္ဗသာမညေန ယာမကာလိကကထာယံ ဝုတ္တံ, တံ ပန သတ္တာဟကာလိကမေဝာတိ ဂဟေတဗ္ဗံ။ ဣမေ စတ္တာရော ရသာတိ ဖလပတ္တပုပ္ဖဥစ္ဆုရသာ စတ္တာရော။
Yāvakālikapakkānanti pakke sandhāya vuttaṃ, āmāni pana anupasampannehi sītudake madditvā parissāvetvā dinnapānaṃ pacchābhattampi kappati eva. Ayañca attho mahāaṭṭhakathāyaṃ sarūpato avuttoti āha ‘‘kurundiyaṃ panā’’tiādi. ‘‘Ucchuraso nikasaṭo’’ti idaṃ pātabbasāmaññena yāmakālikakathāyaṃ vuttaṃ, taṃ pana sattāhakālikamevāti gahetabbaṃ. Ime cattāro rasāti phalapattapupphaucchurasā cattāro.
ပာဠိယံ အဂ္ဂိဟုတ္တမုခာတိ အဂ္ဂိဇုဟနပုဗ္ဗကာ။ ဆန္ဒသောတိ ဝေဒသ္သ။ သာဝိတ္တီ မုခံ ပဌမံ သဇ္ဈာယိတဗ္ဗာတိ အတ္ထော။ တပတန္တိ ဝိဇောတန္တာနံ။
Pāḷiyaṃ aggihuttamukhāti aggijuhanapubbakā. Chandasoti vedassa. Sāvittī mukhaṃ paṭhamaṃ sajjhāyitabbāti attho. Tapatanti vijotantānaṃ.
ကေဏိယဇဋိလဝတ္ထုကထာဝဏ္ဏနာ နိဋ္ဌိတာ။
Keṇiyajaṭilavatthukathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၁၈၂. ကေဏိယဇဋိလဝတ္ထု • 182. Keṇiyajaṭilavatthu
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ကေဏိယဇဋိလဝတ္ထုကထာ • Keṇiyajaṭilavatthukathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ကေဏိယဇဋိလဝတ္ထုကထာဝဏ္ဏနာ • Keṇiyajaṭilavatthukathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ကေဏိယဇဋိလဝတ္ထုကထာဝဏ္ဏနာ • Keṇiyajaṭilavatthukathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၈၂. ကေဏိယဇဋိလဝတ္ထုကထာ • 182. Keṇiyajaṭilavatthukathā
