Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya

    ೫. ಕೇಸಕಮ್ಬಲಸುತ್ತಂ

    5. Kesakambalasuttaṃ

    ೧೩೮. ‘‘ಸೇಯ್ಯಥಾಪಿ, ಭಿಕ್ಖವೇ, ಯಾನಿ ಕಾನಿಚಿ ತನ್ತಾವುತಾನಂ ವತ್ಥಾನಂ, ಕೇಸಕಮ್ಬಲೋ ತೇಸಂ ಪಟಿಕಿಟ್ಠೋ ಅಕ್ಖಾಯತಿ। ಕೇಸಕಮ್ಬಲೋ, ಭಿಕ್ಖವೇ, ಸೀತೇ ಸೀತೋ, ಉಣ್ಹೇ ಉಣ್ಹೋ, ದುಬ್ಬಣ್ಣೋ, ದುಗ್ಗನ್ಧೋ, ದುಕ್ಖಸಮ್ಫಸ್ಸೋ। ಏವಮೇವಂ ಖೋ, ಭಿಕ್ಖವೇ, ಯಾನಿ ಕಾನಿಚಿ ಪುಥುಸಮಣಬ್ರಾಹ್ಮಣವಾದಾನಂ 1 ಮಕ್ಖಲಿವಾದೋ ತೇಸಂ ಪಟಿಕಿಟ್ಠೋ ಅಕ್ಖಾಯತಿ।

    138. ‘‘Seyyathāpi, bhikkhave, yāni kānici tantāvutānaṃ vatthānaṃ, kesakambalo tesaṃ paṭikiṭṭho akkhāyati. Kesakambalo, bhikkhave, sīte sīto, uṇhe uṇho, dubbaṇṇo, duggandho, dukkhasamphasso. Evamevaṃ kho, bhikkhave, yāni kānici puthusamaṇabrāhmaṇavādānaṃ 2 makkhalivādo tesaṃ paṭikiṭṭho akkhāyati.

    ‘‘ಮಕ್ಖಲಿ, ಭಿಕ್ಖವೇ, ಮೋಘಪುರಿಸೋ ಏವಂವಾದೀ ಏವಂದಿಟ್ಠಿ – ‘ನತ್ಥಿ ಕಮ್ಮಂ, ನತ್ಥಿ ಕಿರಿಯಂ, ನತ್ಥಿ ವೀರಿಯ’ನ್ತಿ। ಯೇಪಿ ತೇ, ಭಿಕ್ಖವೇ, ಅಹೇಸುಂ ಅತೀತಮದ್ಧಾನಂ ಅರಹನ್ತೋ ಸಮ್ಮಾಸಮ್ಬುದ್ಧಾ, ತೇಪಿ ಭಗವನ್ತೋ ಕಮ್ಮವಾದಾ ಚೇವ ಅಹೇಸುಂ ಕಿರಿಯವಾದಾ ಚ ವೀರಿಯವಾದಾ ಚ। ತೇಪಿ, ಭಿಕ್ಖವೇ, ಮಕ್ಖಲಿ ಮೋಘಪುರಿಸೋ ಪಟಿಬಾಹತಿ – ‘ನತ್ಥಿ ಕಮ್ಮಂ, ನತ್ಥಿ ಕಿರಿಯಂ, ನತ್ಥಿ ವೀರಿಯ’ನ್ತಿ। ಯೇಪಿ ತೇ, ಭಿಕ್ಖವೇ, ಭವಿಸ್ಸನ್ತಿ ಅನಾಗತಮದ್ಧಾನಂ ಅರಹನ್ತೋ ಸಮ್ಮಾಸಮ್ಬುದ್ಧಾ, ತೇಪಿ ಭಗವನ್ತೋ ಕಮ್ಮವಾದಾ ಚೇವ ಭವಿಸ್ಸನ್ತಿ ಕಿರಿಯವಾದಾ ಚ ವೀರಿಯವಾದಾ ಚ। ತೇಪಿ, ಭಿಕ್ಖವೇ, ಮಕ್ಖಲಿ ಮೋಘಪುರಿಸೋ ಪಟಿಬಾಹತಿ – ‘ನತ್ಥಿ ಕಮ್ಮಂ, ನತ್ಥಿ ಕಿರಿಯಂ, ನತ್ಥಿ ವೀರಿಯ’ನ್ತಿ। ಅಹಮ್ಪಿ, ಭಿಕ್ಖವೇ, ಏತರಹಿ ಅರಹಂ ಸಮ್ಮಾಸಮ್ಬುದ್ಧೋ ಕಮ್ಮವಾದೋ ಚೇವ ಕಿರಿಯವಾದೋ ಚ ವೀರಿಯವಾದೋ ಚ। ಮಮ್ಪಿ, ಭಿಕ್ಖವೇ, ಮಕ್ಖಲಿ ಮೋಘಪುರಿಸೋ ಪಟಿಬಾಹತಿ – ‘ನತ್ಥಿ ಕಮ್ಮಂ, ನತ್ಥಿ ಕಿರಿಯಂ, ನತ್ಥಿ ವೀರಿಯ’’’ನ್ತಿ।

    ‘‘Makkhali, bhikkhave, moghapuriso evaṃvādī evaṃdiṭṭhi – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, ahesuṃ atītamaddhānaṃ arahanto sammāsambuddhā, tepi bhagavanto kammavādā ceva ahesuṃ kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Yepi te, bhikkhave, bhavissanti anāgatamaddhānaṃ arahanto sammāsambuddhā, tepi bhagavanto kammavādā ceva bhavissanti kiriyavādā ca vīriyavādā ca. Tepi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’nti. Ahampi, bhikkhave, etarahi arahaṃ sammāsambuddho kammavādo ceva kiriyavādo ca vīriyavādo ca. Mampi, bhikkhave, makkhali moghapuriso paṭibāhati – ‘natthi kammaṃ, natthi kiriyaṃ, natthi vīriya’’’nti.

    ‘‘ಸೇಯ್ಯಥಾಪಿ , ಭಿಕ್ಖವೇ, ನದೀಮುಖೇ ಖಿಪ್ಪಂ ಉಡ್ಡೇಯ್ಯ 3 ಬಹೂನಂ 4 ಮಚ್ಛಾನಂ ಅಹಿತಾಯ ದುಕ್ಖಾಯ ಅನಯಾಯ ಬ್ಯಸನಾಯ; ಏವಮೇವಂ ಖೋ, ಭಿಕ್ಖವೇ, ಮಕ್ಖಲಿ ಮೋಘಪುರಿಸೋ ಮನುಸ್ಸಖಿಪ್ಪಂ ಮಞ್ಞೇ ಲೋಕೇ ಉಪ್ಪನ್ನೋ ಬಹೂನಂ ಸತ್ತಾನಂ ಅಹಿತಾಯ ದುಕ್ಖಾಯ ಅನಯಾಯ ಬ್ಯಸನಾಯಾ’’ತಿ। ಪಞ್ಚಮಂ।

    ‘‘Seyyathāpi , bhikkhave, nadīmukhe khippaṃ uḍḍeyya 5 bahūnaṃ 6 macchānaṃ ahitāya dukkhāya anayāya byasanāya; evamevaṃ kho, bhikkhave, makkhali moghapuriso manussakhippaṃ maññe loke uppanno bahūnaṃ sattānaṃ ahitāya dukkhāya anayāya byasanāyā’’ti. Pañcamaṃ.




    Next: ೬. ಸಮ್ಪದಾಸುತ್ತಂ • 6. Sampadāsuttaṃ




    Footnotes:
    1. ಸಮಣಪ್ಪವಾದಾನಂ (ಸೀ॰ ಸ್ಯಾ॰ ಕಂ॰ ಪೀ॰)
    2. samaṇappavādānaṃ (sī. syā. kaṃ. pī.)
    3. ಓಡ್ಡೇಯ್ಯ (ಸೀ॰)
    4. ಬಹುನ್ನಂ (ಸೀ॰ ಸ್ಯಾ॰ ಕಂ॰ ಪೀ॰)
    5. oḍḍeyya (sī.)
    6. bahunnaṃ (sī. syā. kaṃ. pī.)



    Related texts:



    ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೫. ಕೇಸಕಮ್ಬಲಸುತ್ತವಣ್ಣನಾ • 5. Kesakambalasuttavaṇṇanā

    ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೫-೧೦. ಕೇಸಕಮ್ಬಲಸುತ್ತಾದಿವಣ್ಣನಾ • 5-10. Kesakambalasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact