| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. கேஸமுத்திஸுத்தவண்ணனா
5. Kesamuttisuttavaṇṇanā
66. பஞ்சமே காலாமானங் நிக³மோதி காலாமா நாம க²த்தியா, தேஸங் நிக³மோ. கேஸமுத்தியாதி கேஸமுத்தனிக³மவாஸினோ. உபஸங்கமிங்ஸூதி ஸப்பினவனீதாதி³பே⁴ஸஜ்ஜானி சேவ அட்ட²வித⁴பானகானி ச கா³ஹாபெத்வா உபஸங்கமிங்ஸு. ஸகங்யேவ வாத³ங் தீ³பெந்தீதி அத்தனோயேவ லத்³தி⁴ங் கதெ²ந்தி. ஜோதெந்தீதி பகாஸெந்தி. கு²ங்ஸெந்தீதி க⁴ட்டெந்தி. வம்பெ⁴ந்தீதி அவஜானந்தி. பரிப⁴வந்தீதி லாமகங் கரொந்தி. ஓமக்கி²ங் கரொந்தீதி உக்கி²த்தகங் கரொந்தி, உக்கி²பித்வா ச²ட்³டெ³ந்தி. அபரேபி, ப⁴ந்தேதி ஸோ கிர அடவிமுகே² கா³மோ, தஸ்மா தத்த² அடவிங் அதிக்கந்தா ச அதிக்கமிதுகாமா ச வாஸங் கப்பெந்தி. தேஸுபி பட²மங் ஆக³தா அத்தனோ லத்³தி⁴ங் தீ³பெத்வா பக்கமிங்ஸு, பச்சா² ஆக³தா ‘‘கிங் தே ஜானந்தி, அம்ஹாகங் அந்தேவாஸிகா தே, அம்ஹாகங் ஸந்திகே கிஞ்சி கிஞ்சி ஸிப்பங் உக்³க³ண்ஹிங்ஸூ’’தி அத்தனோ லத்³தி⁴ங் தீ³பெத்வா பக்கமிங்ஸு. காலாமா ஏகலத்³தி⁴யம்பி ஸண்ட²ஹிதுங் ந ஸக்கி²ங்ஸு. தே ஏதமத்த²ங் தீ³பெத்வா ப⁴க³வதோ ஏவமாரோசெத்வா தேஸங் நோ, ப⁴ந்தேதிஆதி³மாஹங்ஸு. தத்த² ஹோதேவ கங்கா²தி ஹோதியேவ கங்கா². விசிகிச்சா²தி தஸ்ஸேவ வேவசனங். அலந்தி யுத்தங்.
66. Pañcame kālāmānaṃ nigamoti kālāmā nāma khattiyā, tesaṃ nigamo. Kesamuttiyāti kesamuttanigamavāsino. Upasaṅkamiṃsūti sappinavanītādibhesajjāni ceva aṭṭhavidhapānakāni ca gāhāpetvā upasaṅkamiṃsu. Sakaṃyeva vādaṃ dīpentīti attanoyeva laddhiṃ kathenti. Jotentīti pakāsenti. Khuṃsentīti ghaṭṭenti. Vambhentīti avajānanti. Paribhavantīti lāmakaṃ karonti. Omakkhiṃ karontīti ukkhittakaṃ karonti, ukkhipitvā chaḍḍenti. Aparepi, bhanteti so kira aṭavimukhe gāmo, tasmā tattha aṭaviṃ atikkantā ca atikkamitukāmā ca vāsaṃ kappenti. Tesupi paṭhamaṃ āgatā attano laddhiṃ dīpetvā pakkamiṃsu, pacchā āgatā ‘‘kiṃ te jānanti, amhākaṃ antevāsikā te, amhākaṃ santike kiñci kiñci sippaṃ uggaṇhiṃsū’’ti attano laddhiṃ dīpetvā pakkamiṃsu. Kālāmā ekaladdhiyampi saṇṭhahituṃ na sakkhiṃsu. Te etamatthaṃ dīpetvā bhagavato evamārocetvā tesaṃ no, bhantetiādimāhaṃsu. Tattha hoteva kaṅkhāti hotiyeva kaṅkhā. Vicikicchāti tasseva vevacanaṃ. Alanti yuttaṃ.
மா அனுஸ்ஸவேனாதி அனுஸ்ஸவகதா²யபி மா க³ண்ஹித்த². மா பரம்பராயாதி பரம்பரகதா²யபி மா க³ண்ஹித்த². மா இதிகிராயாதி ஏவங் கிர ஏதந்தி மா க³ண்ஹித்த². மா பிடகஸம்பதா³னேனாதி அம்ஹாகங் பிடகதந்தியா ஸத்³தி⁴ங் ஸமேதீதி மா க³ண்ஹித்த². மா தக்கஹேதூதி தக்கக்³கா³ஹேனபி மா க³ண்ஹித்த². மா நயஹேதூதி நயக்³கா³ஹேனபி மா க³ண்ஹித்த². மா ஆகாரபரிவிதக்கேனாதி ஸுந்த³ரமித³ங் காரணந்தி ஏவங் காரணபரிவிதக்கேனபி மா க³ண்ஹித்த². மா தி³ட்டி²னிஜ்ஜா²னக்க²ந்தியாதி அம்ஹாகங் நிஜ்ஜா²யித்வா க²மித்வா க³ஹிததி³ட்டி²யா ஸத்³தி⁴ங் ஸமேதீதிபி மா க³ண்ஹித்த². மா ப⁴ப்³ப³ரூபதாயாதி அயங் பி⁴க்கு² ப⁴ப்³ப³ரூபோ, இமஸ்ஸ கத²ங் க³ஹேதுங் யுத்தந்திபி மா க³ண்ஹித்த². மா ஸமணோ நோ க³ரூதி அயங் ஸமணோ அம்ஹாகங் க³ரு, இமஸ்ஸ கத²ங் க³ஹேதுங் யுத்தந்திபி மா க³ண்ஹித்த². ஸமத்தாதி பரிபுண்ணா. ஸமாதி³ன்னாதி க³ஹிதா பராமட்டா². யங்ஸ ஹோதீதி யங் காரணங் தஸ்ஸ புக்³க³லஸ்ஸ ஹோதி. அலோபா⁴த³யோ லோபா⁴தி³படிபக்க²வஸேன வேதி³தப்³பா³. விக³தாபி⁴ஜ்ஜோ²திஆதீ³ஹி மெத்தாய புப்³ப³பா⁴கோ³ கதி²தோ.
Māanussavenāti anussavakathāyapi mā gaṇhittha. Mā paramparāyāti paramparakathāyapi mā gaṇhittha. Mā itikirāyāti evaṃ kira etanti mā gaṇhittha. Mā piṭakasampadānenāti amhākaṃ piṭakatantiyā saddhiṃ sametīti mā gaṇhittha. Mā takkahetūti takkaggāhenapi mā gaṇhittha. Mā nayahetūti nayaggāhenapi mā gaṇhittha. Mā ākāraparivitakkenāti sundaramidaṃ kāraṇanti evaṃ kāraṇaparivitakkenapi mā gaṇhittha. Mā diṭṭhinijjhānakkhantiyāti amhākaṃ nijjhāyitvā khamitvā gahitadiṭṭhiyā saddhiṃ sametītipi mā gaṇhittha. Mā bhabbarūpatāyāti ayaṃ bhikkhu bhabbarūpo, imassa kathaṃ gahetuṃ yuttantipi mā gaṇhittha. Mā samaṇo no garūti ayaṃ samaṇo amhākaṃ garu, imassa kathaṃ gahetuṃ yuttantipi mā gaṇhittha. Samattāti paripuṇṇā. Samādinnāti gahitā parāmaṭṭhā. Yaṃsa hotīti yaṃ kāraṇaṃ tassa puggalassa hoti. Alobhādayo lobhādipaṭipakkhavasena veditabbā. Vigatābhijjhotiādīhi mettāya pubbabhāgo kathito.
இதா³னி மெத்தாதி³கங் கம்மட்டா²னங் கதெ²ந்தோ மெத்தாஸஹக³தேனாதிஆதி³மாஹ. தத்த² கம்மட்டா²னகதா²ய வா பா⁴வனானயே வா பாளிவண்ணனாய வா யங் வத்தப்³ப³ங் ஸியா, தங் ஸப்³ப³ங் விஸுத்³தி⁴மக்³கே³ (விஸுத்³தி⁴॰ 1.240) வுத்தமேவ. ஏவங் அவேரசித்தோதி ஏவங் அகுஸலவேரஸ்ஸ ச புக்³க³லவேரினோ ச நத்தி²தாய அவேரசித்தோ. அப்³யாப³ஜ்ஜ²சித்தோதி கோத⁴சித்தஸ்ஸ அபா⁴வேன நித்³து³க்க²சித்தோ. அஸங்கிலிட்ட²சித்தோதி கிலேஸஸ்ஸ நத்தி²தாய அஸங்கிலிட்ட²சித்தோ. விஸுத்³த⁴சித்தோதி கிலேஸமலாபா⁴வேன விஸுத்³த⁴சித்தோ ஹோதீதி அத்தோ². தஸ்ஸாதி தஸ்ஸ ஏவரூபஸ்ஸ அரியஸாவகஸ்ஸ. அஸ்ஸாஸாதி அவஸ்ஸயா பதிட்டா². ஸசே கோ² பன அத்தி² பரோ லோகோதி யதி³ இமம்ஹா லோகா பரலோகோ நாம அத்தி². அதா²ஹங் காயஸ்ஸ பே⁴தா³ பரம்மரணா…பே॰… உபபஜ்ஜிஸ்ஸாமீதி அத்தே²தங் காரணங், யேனாஹங் காயஸ்ஸ பே⁴தா³ பரம்மரணா ஸுக³திங் ஸக்³க³ங் லோகங் உபபஜ்ஜிஸ்ஸாமீதி ஏவங் ஸப்³ப³த்த² நயோ வேதி³தப்³போ³. அனீக⁴ந்தி நித்³து³க்க²ங். ஸுகி²ந்தி ஸுகி²தங். உப⁴யேனேவ விஸுத்³த⁴ங் அத்தானங் ஸமனுபஸ்ஸாமீதி யஞ்ச பாபங் ந கரோமி, யஞ்ச கரோதோபி ந கரீயதி, இமினா உப⁴யேனாபி விஸுத்³த⁴ங் அத்தானங் ஸமனுபஸ்ஸாமி. ஸேஸங் ஸப்³ப³த்த² உத்தானத்த²மேவாதி.
Idāni mettādikaṃ kammaṭṭhānaṃ kathento mettāsahagatenātiādimāha. Tattha kammaṭṭhānakathāya vā bhāvanānaye vā pāḷivaṇṇanāya vā yaṃ vattabbaṃ siyā, taṃ sabbaṃ visuddhimagge (visuddhi. 1.240) vuttameva. Evaṃ averacittoti evaṃ akusalaverassa ca puggalaverino ca natthitāya averacitto. Abyābajjhacittoti kodhacittassa abhāvena niddukkhacitto. Asaṃkiliṭṭhacittoti kilesassa natthitāya asaṃkiliṭṭhacitto. Visuddhacittoti kilesamalābhāvena visuddhacitto hotīti attho. Tassāti tassa evarūpassa ariyasāvakassa. Assāsāti avassayā patiṭṭhā. Sace kho pana atthi paro lokoti yadi imamhā lokā paraloko nāma atthi. Athāhaṃ kāyassa bhedā parammaraṇā…pe… upapajjissāmīti atthetaṃ kāraṇaṃ, yenāhaṃ kāyassa bhedā parammaraṇā sugatiṃ saggaṃ lokaṃ upapajjissāmīti evaṃ sabbattha nayo veditabbo. Anīghanti niddukkhaṃ. Sukhinti sukhitaṃ. Ubhayeneva visuddhaṃ attānaṃ samanupassāmīti yañca pāpaṃ na karomi, yañca karotopi na karīyati, iminā ubhayenāpi visuddhaṃ attānaṃ samanupassāmi. Sesaṃ sabbattha uttānatthamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. கேஸமுத்திஸுத்தங் • 5. Kesamuttisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. கேஸமுத்திஸுத்தவண்ணனா • 5. Kesamuttisuttavaṇṇanā
