Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൨. ഖണസുത്തവണ്ണനാ
2. Khaṇasuttavaṇṇanā
൧൩൫. ദുതിയേ ഛഫസ്സായതനികാ നാമാതി വിസും ഛഫസ്സായതനികാ നാമ നിരയാ നത്ഥി. സബ്ബേസുപി ഹി ഏകതിംസമഹാനിരയേസു ഛദ്വാരഫസ്സായതനപഞ്ഞത്തി ഹോതിയേവ. ഇദം പന അവീചിമഹാനിരയം സന്ധായ വുത്തം. സഗ്ഗാതി ഇധാപി താവതിംസപുരമേവ അധിപ്പേതം. കാമാവചരദേവലോകേ പന ഏകസ്മിമ്പി ഛഫസ്സായതനപഞ്ഞത്തിയാ അഭാവോ നാമ നത്ഥി. ഇമിനാ കിം ദീപേതി? നിരയേ ഏകന്തദുക്ഖസമപ്പിതഭാവേന, ദേവലോകേ ച ഏകന്തസുഖസമപ്പിതത്താ ഏകന്തഖിഡ്ഡാരതിവസേന ഉപ്പന്നപമാദേന മഗ്ഗബ്രഹ്മചരിയവാസം വസിതും ന സക്കാ. മനുസ്സലോകോ പന വോകിണ്ണസുഖദുക്ഖോ, ഇധേവ അപായോപി സഗ്ഗോപി പഞ്ഞായതി. അയം മഗ്ഗബ്രഹ്മചരിയസ്സ കമ്മഭൂമി നാമ, സാ തുമ്ഹേഹി ലദ്ധാ. തസ്മാ യേ വോ ഇമേ മാനുസ്സകാ ഖന്ധാ ലദ്ധാ, തേ വോ ലാഭാ. യഞ്ച വോ ഇദം മനുസ്സത്തം ലദ്ധം, പടിലദ്ധോ വോ ബ്രഹ്മചരിയവാസസ്സ ഖണോ സമയോതി. വുത്തമ്പി ഹേതം പോരാണേഹി –
135. Dutiye chaphassāyatanikā nāmāti visuṃ chaphassāyatanikā nāma nirayā natthi. Sabbesupi hi ekatiṃsamahānirayesu chadvāraphassāyatanapaññatti hotiyeva. Idaṃ pana avīcimahānirayaṃ sandhāya vuttaṃ. Saggāti idhāpi tāvatiṃsapurameva adhippetaṃ. Kāmāvacaradevaloke pana ekasmimpi chaphassāyatanapaññattiyā abhāvo nāma natthi. Iminā kiṃ dīpeti? Niraye ekantadukkhasamappitabhāvena, devaloke ca ekantasukhasamappitattā ekantakhiḍḍārativasena uppannapamādena maggabrahmacariyavāsaṃ vasituṃ na sakkā. Manussaloko pana vokiṇṇasukhadukkho, idheva apāyopi saggopi paññāyati. Ayaṃ maggabrahmacariyassa kammabhūmi nāma, sā tumhehi laddhā. Tasmā ye vo ime mānussakā khandhā laddhā, te vo lābhā. Yañca vo idaṃ manussattaṃ laddhaṃ, paṭiladdho vo brahmacariyavāsassa khaṇo samayoti. Vuttampi hetaṃ porāṇehi –
‘‘അയം കമ്മഭൂമി ഇധ മഗ്ഗഭാവനാ,
‘‘Ayaṃ kammabhūmi idha maggabhāvanā,
ഠാനാനി സംവേജനിയാ ബഹൂ ഇധ;
Ṭhānāni saṃvejaniyā bahū idha;
സംവേഗസംവേജനിയേസു വത്ഥുസു,
Saṃvegasaṃvejaniyesu vatthusu,
സംവേഗജാതോവ പയുഞ്ച യോനിസോ’’തി.
Saṃvegajātova payuñca yoniso’’ti.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൨. ഖണസുത്തം • 2. Khaṇasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൨. ഖണസുത്തവണ്ണനാ • 2. Khaṇasuttavaṇṇanā