| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. க²ந்த⁴யமகங்
2. Khandhayamakaṃ
1. பண்ணத்திஉத்³தே³ஸவாரவண்ணனா
1. Paṇṇattiuddesavāravaṇṇanā
1. இதா³னி மூலயமகே தே³ஸிதேயேவ குஸலாதி³த⁴ம்மே க²ந்த⁴வஸேன ஸங்க³ண்ஹித்வா மூலயமகானந்தரங் தே³ஸிதஸ்ஸ க²ந்த⁴யமகஸ்ஸ வண்ணனா ஹோதி. தத்த² பாளிவவத்தா²னங் தாவ ஏவங் வேதி³தப்³ப³ங் – இமஸ்மிஞ்ஹி க²ந்த⁴யமகே தயோ மஹாவாரா ஹொந்தி – பண்ணத்திவாரோ, பவத்திவாரோ, பரிஞ்ஞாவாரோதி. தேஸு பண்ணத்திவாரோ க²ந்தா⁴னங் நாமாபி⁴தா⁴னஸோத⁴னவஸேனேவ க³தத்தா பண்ணத்திவாரோதி வுச்சதி. பவத்திவாரோ தேன ஸோதி⁴தனாமாபி⁴தா⁴னானங் க²ந்தா⁴னங் உப்பாத³னிரோத⁴வஸேன பவத்திங் ஸோத⁴யமானோ க³தோ, தஸ்மா பவத்திவாரோதி வுச்சதி. பரிஞ்ஞாவாரோ இமினானுக்கமேன பவத்தானங் க²ந்தா⁴னங் ஸங்கே²பேனேவ திஸ்ஸோ பரிஞ்ஞா தீ³பயமானோ க³தோ, தஸ்மா பரிஞ்ஞாவாரோதி வுச்சதி. தத்த² பண்ணத்திவாரோ உத்³தே³ஸனித்³தே³ஸவஸேன த்³வீஹாகாரேஹி வவத்தி²தோ. இதரேஸு விஸுங் உத்³தே³ஸவாரோ நத்தி². ஆதி³தோ பட்டா²ய புச்சா²விஸ்ஸஜ்ஜனவஸேன ஏகதா⁴ வவத்தி²தா. தத்த² பஞ்சக்க²ந்தா⁴திபத³ங் ஆதி³ங் கத்வா யாவ ந க²ந்தா⁴, ந ஸங்கா²ராதி பத³ங் தாவ பண்ணத்திவாரஸ்ஸ உத்³தே³ஸவாரோ வேதி³தப்³போ³. புச்சா²வாரோதிபி தஸ்ஸேவ நாமங். தத்த² பஞ்சக்க²ந்தா⁴தி அயங் யமகவஸேன புச்சி²தப்³பா³னங் க²ந்தா⁴னங் உத்³தே³ஸோ. ரூபக்க²ந்தோ⁴…பே॰… விஞ்ஞாணக்க²ந்தோ⁴தி தேஸஞ்ஞேவ பபே⁴த³தோ நாமவவத்தா²னங்.
1. Idāni mūlayamake desiteyeva kusalādidhamme khandhavasena saṅgaṇhitvā mūlayamakānantaraṃ desitassa khandhayamakassa vaṇṇanā hoti. Tattha pāḷivavatthānaṃ tāva evaṃ veditabbaṃ – imasmiñhi khandhayamake tayo mahāvārā honti – paṇṇattivāro, pavattivāro, pariññāvāroti. Tesu paṇṇattivāro khandhānaṃ nāmābhidhānasodhanavaseneva gatattā paṇṇattivāroti vuccati. Pavattivāro tena sodhitanāmābhidhānānaṃ khandhānaṃ uppādanirodhavasena pavattiṃ sodhayamāno gato, tasmā pavattivāroti vuccati. Pariññāvāro iminānukkamena pavattānaṃ khandhānaṃ saṅkhepeneva tisso pariññā dīpayamāno gato, tasmā pariññāvāroti vuccati. Tattha paṇṇattivāro uddesaniddesavasena dvīhākārehi vavatthito. Itaresu visuṃ uddesavāro natthi. Ādito paṭṭhāya pucchāvissajjanavasena ekadhā vavatthitā. Tattha pañcakkhandhātipadaṃ ādiṃ katvā yāva na khandhā, na saṅkhārāti padaṃ tāva paṇṇattivārassa uddesavāro veditabbo. Pucchāvārotipi tasseva nāmaṃ. Tattha pañcakkhandhāti ayaṃ yamakavasena pucchitabbānaṃ khandhānaṃ uddeso. Rūpakkhandho…pe… viññāṇakkhandhoti tesaññeva pabhedato nāmavavatthānaṃ.
2-3. இதா³னி இமேஸங் க²ந்தா⁴னங் வஸேன பத³ஸோத⁴னவாரோ, பத³ஸோத⁴னமூலசக்கவாரோ, ஸுத்³த⁴க²ந்த⁴வாரோ, ஸுத்³த⁴க²ந்த⁴மூலசக்கவாரோதி சத்தாரோ நயவாரா ஹொந்தி. தத்த² ரூபங் ரூபக்க²ந்தோ⁴, ரூபக்க²ந்தோ⁴ ரூபந்திஆதி³னா நயேன பத³மேவ ஸோதெ⁴த்வா க³தோ பத³ஸோத⁴னவாரோ நாம. ஸோ அனுலோமபடிலோமவஸேன து³விதோ⁴ ஹோதி. தத்த² அனுலோமவாரே ‘ரூபங் ரூபக்க²ந்தோ⁴, ரூபக்க²ந்தோ⁴ ரூப’ந்திஆதீ³னி பஞ்ச யமகானி. படிலோமவாரேபி ‘ந ரூபங், ந ரூபக்க²ந்தோ⁴; ந ரூபக்க²ந்தோ⁴ ந ரூப’ந்திஆதீ³னி பஞ்சேவ. ததோ பரங் தேஸஞ்ஞேவ பத³ஸோத⁴னவாரே ஸோதி⁴தானங் க²ந்தா⁴னங் ‘ரூபங் ரூபக்க²ந்தோ⁴, க²ந்தா⁴ வேத³னாக்க²ந்தோ⁴’திஆதி³னா நயேன ஏகேகக²ந்த⁴மூலகானி சத்தாரி சத்தாரி சக்கானி ப³ந்தி⁴த்வா க³தோ பத³ஸோத⁴னமூலகானங் சக்கானங் அத்தி²தாய பத³ஸோத⁴னமூலசக்கவாரோ நாம. ஸோபி அனுலோமபடிலோமவஸேன து³விதோ⁴ ஹோதி. தத்த² அனுலோமவாரே ‘ரூபங் ரூபக்க²ந்தோ⁴, க²ந்தா⁴ வேத³னாக்க²ந்தோ⁴’திஆதீ³னி ஏகேகக²ந்த⁴மூலகானி சத்தாரி சத்தாரி கத்வா வீஸதி யமகானி. படிலோமவாரேபி ‘ந ரூபங், ந ரூபக்க²ந்தோ⁴; ந க²ந்தா⁴ ந வேத³னாக்க²ந்தோ⁴’திஆதீ³னி வீஸதிமேவ.
2-3. Idāni imesaṃ khandhānaṃ vasena padasodhanavāro, padasodhanamūlacakkavāro, suddhakhandhavāro, suddhakhandhamūlacakkavāroti cattāro nayavārā honti. Tattha rūpaṃ rūpakkhandho, rūpakkhandho rūpantiādinā nayena padameva sodhetvā gato padasodhanavāro nāma. So anulomapaṭilomavasena duvidho hoti. Tattha anulomavāre ‘rūpaṃ rūpakkhandho, rūpakkhandho rūpa’ntiādīni pañca yamakāni. Paṭilomavārepi ‘na rūpaṃ, na rūpakkhandho; na rūpakkhandho na rūpa’ntiādīni pañceva. Tato paraṃ tesaññeva padasodhanavāre sodhitānaṃ khandhānaṃ ‘rūpaṃ rūpakkhandho, khandhā vedanākkhandho’tiādinā nayena ekekakhandhamūlakāni cattāri cattāri cakkāni bandhitvā gato padasodhanamūlakānaṃ cakkānaṃ atthitāya padasodhanamūlacakkavāro nāma. Sopi anulomapaṭilomavasena duvidho hoti. Tattha anulomavāre ‘rūpaṃ rūpakkhandho, khandhā vedanākkhandho’tiādīni ekekakhandhamūlakāni cattāri cattāri katvā vīsati yamakāni. Paṭilomavārepi ‘na rūpaṃ, na rūpakkhandho; na khandhā na vedanākkhandho’tiādīni vīsatimeva.
ததோ பரங் ரூபங் க²ந்தோ⁴ க²ந்தா⁴ ரூபந்திஆதி³னா நயேன ஸுத்³த⁴க²ந்த⁴வஸேனேவ க³தோ ஸுத்³த⁴க²ந்த⁴வாரோ நாம. தத்த² க²ந்தா⁴ ரூபந்திஆதீ³ஸு க²ந்தா⁴ ரூபக்க²ந்தோ⁴, க²ந்தா⁴ வேத³னாக்க²ந்தோ⁴தி அத்தோ² க³ஹேதப்³போ³. கஸ்மா? நித்³தே³ஸவாரே ஏவங் பா⁴ஜிதத்தா. தத்த² ஹி ‘ரூபங் க²ந்தோ⁴தி ஆமந்தா. க²ந்தா⁴ ரூபக்க²ந்தோ⁴தி ரூபக்க²ந்தோ⁴ க²ந்தோ⁴ சேவ ரூபக்க²ந்தோ⁴ ச, அவஸேஸா க²ந்தா⁴ ந ரூபக்க²ந்தோ⁴’தி ஏவங் ‘க²ந்தா⁴ ரூப’ந்திஆதீ³னங் க²ந்தா⁴ ரூபக்க²ந்தோ⁴திஆதி³னா நயேன பத³ங் உத்³த⁴ரித்வா அத்தோ² விப⁴த்தோ. தேனேவ ச காரணேனேஸே ஸுத்³த⁴க²ந்த⁴வாரோதி வுத்தோ. வசனஸோத⁴னே விய ஹி எத்த² ந வசனங் பமாணங். யதா² யதா² பன ஸுத்³த⁴க²ந்தா⁴ லப்³ப⁴ந்தி, ததா² ததா² அத்தோ²வ பமாணங். பரதோ ஆயதனயமகாதீ³ஸுபி ஏஸேவ நயோ. ஏஸோபி ச ஸுத்³த⁴க²ந்த⁴வாரோ அனுலோமபடிலோமவஸேன து³விதோ⁴ ஹோதி. தத்த² அனுலோமவாரே ‘ரூபங் க²ந்தோ⁴ க²ந்தா⁴ ரூப’ந்திஆதீ³னி பஞ்ச யமகானி. படிலோமவாரேபி ‘ந ரூபங் ந க²ந்தோ⁴, ந க²ந்தா⁴ ந ரூப’ந்திஆதீ³னி பஞ்சேவ.
Tato paraṃ rūpaṃ khandho khandhā rūpantiādinā nayena suddhakhandhavaseneva gato suddhakhandhavāro nāma. Tattha khandhā rūpantiādīsu khandhā rūpakkhandho, khandhā vedanākkhandhoti attho gahetabbo. Kasmā? Niddesavāre evaṃ bhājitattā. Tattha hi ‘rūpaṃ khandhoti āmantā. Khandhā rūpakkhandhoti rūpakkhandho khandho ceva rūpakkhandho ca, avasesā khandhā na rūpakkhandho’ti evaṃ ‘khandhā rūpa’ntiādīnaṃ khandhā rūpakkhandhotiādinā nayena padaṃ uddharitvā attho vibhatto. Teneva ca kāraṇenese suddhakhandhavāroti vutto. Vacanasodhane viya hi ettha na vacanaṃ pamāṇaṃ. Yathā yathā pana suddhakhandhā labbhanti, tathā tathā atthova pamāṇaṃ. Parato āyatanayamakādīsupi eseva nayo. Esopi ca suddhakhandhavāro anulomapaṭilomavasena duvidho hoti. Tattha anulomavāre ‘rūpaṃ khandho khandhā rūpa’ntiādīni pañca yamakāni. Paṭilomavārepi ‘na rūpaṃ na khandho, na khandhā na rūpa’ntiādīni pañceva.
ததோ பரங் தேஸஞ்ஞேவ ஸுத்³த⁴க²ந்தா⁴னங் ரூபங் க²ந்தோ⁴, க²ந்தா⁴ வேத³னாதிஆதி³னா நயேன ஏகேகக²ந்த⁴மூலகானி சத்தாரி சத்தாரி சக்கானி ப³ந்தி⁴த்வா க³தோ ஸுத்³த⁴க²ந்த⁴மூலகானங் சக்கானங் அத்தி²தாய ஸுத்³த⁴க²ந்த⁴மூலசக்கவாரோ நாம. தத்த² க²ந்தா⁴ வேத³னாதிஆதீ³ஸு க²ந்தா⁴ வேத³னாக்க²ந்தோ⁴திஆதி³னா நயேன அத்தோ² வேதி³தப்³போ³. இதரதா² நித்³தே³ஸவாரேன ஸத்³தி⁴ங் விரோதோ⁴ ஹோதி. ஸோபி அனுலோமபடிலோமவஸேன து³விதோ⁴ ஹோதி. தத்த² அனுலோமவாரே ‘ரூபங் க²ந்தோ⁴, க²ந்தா⁴ வேத³னா’திஆதீ³னி ஏகேகக²ந்த⁴மூலகானி சத்தாரி சத்தாரி கத்வா வீஸதி யமகானி. படிலோமவாரேபி ‘ந ரூபங், ந க²ந்தோ⁴, ந க²ந்தா⁴ ந வேத³னா’திஆதீ³னி வீஸதிமேவ. ஏவங் தாவ ஏகேன யமகஸதேன த்³வீஹி புச்சா²ஸதேஹி ஏகேகபுச்சா²ய ஸன்னிட்டா²னஸங்ஸயவஸேன த்³வே த்³வே அத்தே² கத்வா சதூஹி ச அத்த²ஸதேஹி படிமண்டி³தோ பண்ணத்திவாரஸ்ஸ உத்³தே³ஸவாரோ வேதி³தப்³போ³தி.
Tato paraṃ tesaññeva suddhakhandhānaṃ rūpaṃ khandho, khandhā vedanātiādinā nayena ekekakhandhamūlakāni cattāri cattāri cakkāni bandhitvā gato suddhakhandhamūlakānaṃ cakkānaṃ atthitāya suddhakhandhamūlacakkavāro nāma. Tattha khandhā vedanātiādīsu khandhā vedanākkhandhotiādinā nayena attho veditabbo. Itarathā niddesavārena saddhiṃ virodho hoti. Sopi anulomapaṭilomavasena duvidho hoti. Tattha anulomavāre ‘rūpaṃ khandho, khandhā vedanā’tiādīni ekekakhandhamūlakāni cattāri cattāri katvā vīsati yamakāni. Paṭilomavārepi ‘na rūpaṃ, na khandho, na khandhā na vedanā’tiādīni vīsatimeva. Evaṃ tāva ekena yamakasatena dvīhi pucchāsatehi ekekapucchāya sanniṭṭhānasaṃsayavasena dve dve atthe katvā catūhi ca atthasatehi paṭimaṇḍito paṇṇattivārassa uddesavāro veditabboti.
பண்ணத்திஉத்³தே³ஸவாரவண்ணனா.
Paṇṇattiuddesavāravaṇṇanā.
1. பண்ணத்தினித்³தே³ஸவாரவண்ணனா
1. Paṇṇattiniddesavāravaṇṇanā
26. இதா³னி ரூபங் ரூபக்க²ந்தோ⁴திஆதி³னா நயேன நித்³தே³ஸவாரோ ஆரத்³தோ⁴. தத்த² ரூபங் ரூபக்க²ந்தோ⁴தி யங்கிஞ்சி ரூபந்தி வுச்சதி. ஸப்³ப³ங் தங் ரூபங் ரூபக்க²ந்தோ⁴தி வசனஸோத⁴னத்த²ங் புச்ச²தி. பியரூபங் ஸாதரூபங், ரூபங், ந ரூபக்க²ந்தோ⁴தி யங் ‘பியரூபங் ஸாதரூப’ந்தி எத்த² ரூபந்தி வுத்தங், தங் ரூபமேவ, ந ரூபக்க²ந்தோ⁴தி அத்தோ². ரூபக்க²ந்தோ⁴ ரூபஞ்சேவ ரூபக்க²ந்தோ⁴ சாதி யோ பன ரூபக்க²ந்தோ⁴, ஸோ ரூபந்திபி ரூபக்க²ந்தோ⁴திபி வத்துங் வட்டதீதி அத்தோ². ரூபக்க²ந்தோ⁴ ரூபந்தி எத்த² பன யஸ்மா ரூபக்க²ந்தோ⁴ நியமேனேவ ரூபந்தி வத்தப்³போ³. தஸ்மா ஆமந்தாதி ஆஹ. இமினா உபாயேன ஸப்³ப³விஸ்ஸஜ்ஜனேஸு அத்தோ² வேதி³தப்³போ³. யோ பன யத்த² விஸேஸோ ப⁴விஸ்ஸதி, ததே²வ தங் வண்ணயிஸ்ஸாம . ஸஞ்ஞாயமகே தாவ தி³ட்டி²ஸஞ்ஞாதி ‘பபஞ்சஸஞ்ஞா’திஆதீ³ஸு ஆக³தா தி³ட்டி²ஸஞ்ஞா. ஸங்கா²ரயமகே அவஸேஸா ஸங்கா²ராதி ‘அனிச்சா வத ஸங்கா²ரா’திஆதீ³ஸு ஆக³தா ஸங்கா²ரக்க²ந்த⁴தோ அவஸேஸா ஸங்க²தத⁴ம்மா. படிலோமவாரேபி ஏஸேவ நயோதி.
26. Idāni rūpaṃ rūpakkhandhotiādinā nayena niddesavāro āraddho. Tattha rūpaṃ rūpakkhandhoti yaṃkiñci rūpanti vuccati. Sabbaṃ taṃ rūpaṃ rūpakkhandhoti vacanasodhanatthaṃ pucchati. Piyarūpaṃ sātarūpaṃ, rūpaṃ, na rūpakkhandhoti yaṃ ‘piyarūpaṃ sātarūpa’nti ettha rūpanti vuttaṃ, taṃ rūpameva, na rūpakkhandhoti attho. Rūpakkhandho rūpañceva rūpakkhandho cāti yo pana rūpakkhandho, so rūpantipi rūpakkhandhotipi vattuṃ vaṭṭatīti attho. Rūpakkhandho rūpanti ettha pana yasmā rūpakkhandho niyameneva rūpanti vattabbo. Tasmā āmantāti āha. Iminā upāyena sabbavissajjanesu attho veditabbo. Yo pana yattha viseso bhavissati, tatheva taṃ vaṇṇayissāma . Saññāyamake tāva diṭṭhisaññāti ‘papañcasaññā’tiādīsu āgatā diṭṭhisaññā. Saṅkhārayamake avasesā saṅkhārāti ‘aniccā vata saṅkhārā’tiādīsu āgatā saṅkhārakkhandhato avasesā saṅkhatadhammā. Paṭilomavārepi eseva nayoti.
பத³ஸோத⁴னவாரோ நிட்டி²தோ.
Padasodhanavāro niṭṭhito.
28. பத³ஸோத⁴னமூலசக்கவாரே க²ந்தா⁴ வேத³னாக்க²ந்தோ⁴தி யேகேசி க²ந்தா⁴, ஸப்³பே³ தே வேத³னாக்க²ந்தோ⁴தி புச்ச²தி. ஸேஸபுச்சா²ஸுபி ஏஸேவ நயோ. படிலோமே ந க²ந்தா⁴ ந வேத³னாக்க²ந்தோ⁴தி எத்த² யே பஞ்ஞத்தினிப்³பா³னஸங்கா²தா த⁴ம்மா க²ந்தா⁴ ந ஹொந்தி, தே யஸ்மா வேத³னாக்க²ந்தோ⁴பி ந ஹொந்தி, தஸ்மா ஆமந்தாதி ஆஹ. ஸேஸவிஸ்ஸஜ்ஜனேஸுபி ஏஸேவ நயோதி.
28. Padasodhanamūlacakkavāre khandhā vedanākkhandhoti yekeci khandhā, sabbe te vedanākkhandhoti pucchati. Sesapucchāsupi eseva nayo. Paṭilome na khandhā na vedanākkhandhoti ettha ye paññattinibbānasaṅkhātā dhammā khandhā na honti, te yasmā vedanākkhandhopi na honti, tasmā āmantāti āha. Sesavissajjanesupi eseva nayoti.
பத³ஸோத⁴னமூலசக்கவாரோ நிட்டி²தோ.
Padasodhanamūlacakkavāro niṭṭhito.
38. ஸுத்³த⁴க²ந்த⁴வாரே ரூபங் க²ந்தோ⁴தி யங்கிஞ்சி ரூபந்தி வுத்தங், ஸப்³ப³ங் தங் க²ந்தோ⁴தி புச்ச²தி. தத்த² யஸ்மா பியரூபஸாதரூபஸங்கா²தங் வா ரூபங் ஹோது, பூ⁴துபாதா³ரூபங் வா, ஸப்³ப³ங் பஞ்சஸு க²ந்தே⁴ஸு ஸங்க³ஹங் க³ச்ச²தேவ. தஸ்மா ஆமந்தாதி படிஜானாதி. து³தியபதே³ ‘க²ந்தா⁴ ரூப’ந்தி புச்சி²தப்³பே³ யஸ்மா ரூபந்திவசனேன ரூபக்க²ந்தோ⁴வ அதி⁴ப்பேதோ, தஸ்மா வசனங் அனாதி³யித்வா அத்த²வஸேன புச்ச²ந்தோ க²ந்தா⁴ ரூபக்க²ந்தோ⁴தி ஆஹ. இமினா நயேன ஸப்³ப³பதே³ஸு அத்தோ² வேதி³தப்³போ³. பரதோ ஆயதனயமகாதீ³னங் நித்³தே³ஸவாரேபி ஏஸேவ நயோ. ஸஞ்ஞா க²ந்தோ⁴தி எத்தா²பி தி³ட்டி²ஸஞ்ஞா வா ஹோது, ஸஞ்ஞா ஏவ வா, ஸப்³பா³யபி க²ந்த⁴பா⁴வதோ ஆமந்தாதி வுத்தங். ஸங்கா²ரா க²ந்தோ⁴தி பதே³பி ஏஸேவ நயோ. க²ந்த⁴வினிமுத்தகோ ஹி ஸங்கா²ரோ நாம நத்தி².
38. Suddhakhandhavāre rūpaṃ khandhoti yaṃkiñci rūpanti vuttaṃ, sabbaṃ taṃ khandhoti pucchati. Tattha yasmā piyarūpasātarūpasaṅkhātaṃ vā rūpaṃ hotu, bhūtupādārūpaṃ vā, sabbaṃ pañcasu khandhesu saṅgahaṃ gacchateva. Tasmā āmantāti paṭijānāti. Dutiyapade ‘khandhā rūpa’nti pucchitabbe yasmā rūpantivacanena rūpakkhandhova adhippeto, tasmā vacanaṃ anādiyitvā atthavasena pucchanto khandhā rūpakkhandhoti āha. Iminā nayena sabbapadesu attho veditabbo. Parato āyatanayamakādīnaṃ niddesavārepi eseva nayo. Saññā khandhoti etthāpi diṭṭhisaññā vā hotu, saññā eva vā, sabbāyapi khandhabhāvato āmantāti vuttaṃ. Saṅkhārā khandhoti padepi eseva nayo. Khandhavinimuttako hi saṅkhāro nāma natthi.
39. படிலோமே ந ரூபங் ந க²ந்தோ⁴தி யங் த⁴ம்மஜாதங் ரூபங் ந ஹோதி, தங் க²ந்தோ⁴பி ந ஹோதீதி புச்ச²தி. விஸ்ஸஜ்ஜனே பனஸ்ஸ ரூபங் ட²பெத்வா அவஸேஸா க²ந்தா⁴ ந ரூபங், க²ந்தா⁴தி ரூபதோ அஞ்ஞே வேத³னாத³யோ க²ந்தா⁴ ரூபமேவ ந ஹொந்தி, க²ந்தா⁴ பன ஹொந்தீதி அத்தோ². ரூபஞ்ச க²ந்தே⁴ ச ட²பெத்வா அவஸேஸாதி பஞ்சக்க²ந்த⁴வினிமுத்தங் நிப்³பா³னஞ்சேவ பஞ்ஞத்தி ச. இதோ பரேஸுபி ‘அவஸேஸா’தி பதே³ஸு ஏஸேவ நயோதி.
39. Paṭilome na rūpaṃ na khandhoti yaṃ dhammajātaṃ rūpaṃ na hoti, taṃ khandhopi na hotīti pucchati. Vissajjane panassa rūpaṃ ṭhapetvā avasesā khandhā na rūpaṃ, khandhāti rūpato aññe vedanādayo khandhā rūpameva na honti, khandhā pana hontīti attho. Rūpañca khandhe ca ṭhapetvā avasesāti pañcakkhandhavinimuttaṃ nibbānañceva paññatti ca. Ito paresupi ‘avasesā’ti padesu eseva nayoti.
ஸுத்³த⁴க²ந்த⁴வாரோ நிட்டி²தோ.
Suddhakhandhavāro niṭṭhito.
40-44. ஸுத்³த⁴க²ந்த⁴மூலசக்கவாரே ரூபங் க²ந்தோ⁴திஆதீ³னங் ஹெட்டா² வுத்தனயேனேவ அத்தோ² வேதி³தப்³போ³தி.
40-44. Suddhakhandhamūlacakkavāre rūpaṃ khandhotiādīnaṃ heṭṭhā vuttanayeneva attho veditabboti.
ஸுத்³த⁴க²ந்த⁴மூலசக்கவாரோ நிட்டி²தோ.
Suddhakhandhamūlacakkavāro niṭṭhito.
பண்ணத்தினித்³தே³ஸவாரவண்ணனா.
Paṇṇattiniddesavāravaṇṇanā.
2. பவத்திவாரவண்ணனா
2. Pavattivāravaṇṇanā
50-205. இதா³னி யஸ்ஸ ரூபக்க²ந்தோ⁴திஆதி³னா நயேன பவத்திவாரோ ஆரத்³தோ⁴. கஸ்மா பனெத்த² உத்³தே³ஸவாரோ ந வுத்தோதி? ஹெட்டா² த³ஸ்ஸிதனயத்தா. பண்ணத்திவாரஸ்மிஞ்ஹி உத்³தே³ஸவாரே நயோ த³ஸ்ஸிதோ. தேன பன நயேன ஸக்கா ஸோ இத⁴ அவுத்தோபி ஜானிதுந்தி தங் அவத்வா நித்³தே³ஸவாரோவ ஆரத்³தோ⁴. இமஸ்மிங் பன பவத்திவாரஸங்கா²தே மஹாவாரே உப்பாத³வாரோ, நிரோத⁴வாரோ, உப்பாத³னிரோத⁴வாரோதி தயோ அந்தரவாரா ஹொந்தி. தேஸு பட²மோ த⁴ம்மானங் உப்பாத³லக்க²ணஸ்ஸ தீ³பிதத்தா உப்பாத³வாரோதி வுச்சதி. து³தியோ தேஸஞ்ஞேவ நிரோத⁴லக்க²ணஸ்ஸ தீ³பிதத்தா நிரோத⁴வாரோதி வுச்சதி. ததியோ உபி⁴ன்னம்பி லக்க²ணானங் தீ³பிதத்தா உப்பாத³னிரோத⁴வாரோதி வுச்சதி. உப்பாத³வாரேன செத்த² த⁴ம்மானங் உப்பஜ்ஜனாகாரோவ தீ³பிதோ. நிரோத⁴வாரேன ‘உப்பன்னங் நாம நிச்சங் நத்தீ²’தி தேஸஞ்ஞேவ அனிச்சதா தீ³பிதா. உப்பாத³னிரோத⁴வாரேன தது³ப⁴யங்.
50-205. Idāni yassa rūpakkhandhotiādinā nayena pavattivāro āraddho. Kasmā panettha uddesavāro na vuttoti? Heṭṭhā dassitanayattā. Paṇṇattivārasmiñhi uddesavāre nayo dassito. Tena pana nayena sakkā so idha avuttopi jānitunti taṃ avatvā niddesavārova āraddho. Imasmiṃ pana pavattivārasaṅkhāte mahāvāre uppādavāro, nirodhavāro, uppādanirodhavāroti tayo antaravārā honti. Tesu paṭhamo dhammānaṃ uppādalakkhaṇassa dīpitattā uppādavāroti vuccati. Dutiyo tesaññeva nirodhalakkhaṇassa dīpitattā nirodhavāroti vuccati. Tatiyo ubhinnampi lakkhaṇānaṃ dīpitattā uppādanirodhavāroti vuccati. Uppādavārena cettha dhammānaṃ uppajjanākārova dīpito. Nirodhavārena ‘uppannaṃ nāma niccaṃ natthī’ti tesaññeva aniccatā dīpitā. Uppādanirodhavārena tadubhayaṃ.
தத்த² உப்பாத³வாரே தாவ திண்ணங் அத்³தா⁴னங் வஸேன ச² காலபே⁴தா³ ஹொந்தி – பச்சுப்பன்னோ, அதீதோ, அனாக³தோ, பச்சுப்பன்னேனாதீதோ, பச்சுப்பன்னேனானாக³தோ, அதீதேனானாக³தோதி. தேஸு ‘யஸ்ஸ ரூபக்க²ந்தோ⁴ உப்பஜ்ஜதீ’தி பச்சுப்பன்னாபி⁴தா⁴னவஸேன பச்சுப்பன்னோ வேதி³தப்³போ³. ஸோ பச்சுப்பன்னானங் த⁴ம்மானங் பச்சக்க²தோ க³ஹேதப்³ப³த்தா அதிவிய ஸுவிஞ்ஞெய்யோதி பட²மங் வுத்தோ. யஸ்ஸ ரூபக்க²ந்தோ⁴ உப்பஜ்ஜித்தா²தி அதீதாபி⁴தா⁴னவஸேன அதீதோ வேதி³தப்³போ³. ஸோ பச்சக்க²தோ அனுபூ⁴தபுப்³பா³னங் அதீதத⁴ம்மானங் அனுமானேன அனாக³தேஹி ஸுவிஞ்ஞெய்யதரத்தா து³தியங் வுத்தோ. யஸ்ஸ ரூபக்க²ந்தோ⁴ உப்பஜ்ஜிஸ்ஸதீதி அனாக³தாபி⁴தா⁴னவஸேன அனாக³தோ வேதி³தப்³போ³. ஸோ பச்சக்க²தோ ச அனுபூ⁴தபுப்³ப³வஸேன ச க³ஹிதத⁴ம்மானுமானேன ‘அனாக³தேபி ஏவரூபா த⁴ம்மா உப்பஜ்ஜிஸ்ஸந்தீ’தி க³ஹேதப்³ப³தோ ததியங் வுத்தோ.
Tattha uppādavāre tāva tiṇṇaṃ addhānaṃ vasena cha kālabhedā honti – paccuppanno, atīto, anāgato, paccuppannenātīto, paccuppannenānāgato, atītenānāgatoti. Tesu ‘yassa rūpakkhandho uppajjatī’ti paccuppannābhidhānavasena paccuppanno veditabbo. So paccuppannānaṃ dhammānaṃ paccakkhato gahetabbattā ativiya suviññeyyoti paṭhamaṃ vutto. Yassa rūpakkhandho uppajjitthāti atītābhidhānavasena atīto veditabbo. So paccakkhato anubhūtapubbānaṃ atītadhammānaṃ anumānena anāgatehi suviññeyyatarattā dutiyaṃ vutto. Yassa rūpakkhandho uppajjissatīti anāgatābhidhānavasena anāgato veditabbo. So paccakkhato ca anubhūtapubbavasena ca gahitadhammānumānena ‘anāgatepi evarūpā dhammā uppajjissantī’ti gahetabbato tatiyaṃ vutto.
யஸ்ஸ ரூபக்க²ந்தோ⁴ உப்பஜ்ஜதி, தஸ்ஸ வேத³னாக்க²ந்தோ⁴ உப்பஜ்ஜித்தா²தி பச்சுப்பன்னேன ஸத்³தி⁴ங் அதீதாபி⁴தா⁴னவஸேன பச்சுப்பன்னேனாதீதோ வேதி³தப்³போ³. ஸோ மிஸ்ஸகேஸு தீஸு ஸுவிஞ்ஞெய்யதரத்தா சதுத்த²ங் வுத்தோ. யஸ்ஸ ரூபக்க²ந்தோ⁴ உப்பஜ்ஜதி தஸ்ஸ வேத³னாக்க²ந்தோ⁴ உப்பஜ்ஜிஸ்ஸதீதி பச்சுப்பன்னேன ஸத்³தி⁴ங் அனாக³தாபி⁴தா⁴னவஸேன பச்சுப்பன்னேனானாக³தோ வேதி³தப்³போ³. ஸோ பச்சக்க²தோ க³ஹேதப்³பா³னங் த⁴ம்மானங் அத்தி²தாய அத்த²தோ ஸுவிஞ்ஞெய்யதரோதி பஞ்சமங் வுத்தோ. யஸ்ஸ ரூபக்க²ந்தோ⁴ உப்பஜ்ஜித்த², தஸ்ஸ வேத³னாக்க²ந்தோ⁴ உப்பஜ்ஜிஸ்ஸதீதி அதீதேன ஸத்³தி⁴ங் அனாக³தாபி⁴தா⁴னவஸேன அதீதேனானாக³தோ வேதி³தப்³போ³. ஸோ புரிமேஹி து³விஞ்ஞெய்யோதி ச²ட்ட²ங் வுத்தோ.
Yassarūpakkhandho uppajjati, tassa vedanākkhandho uppajjitthāti paccuppannena saddhiṃ atītābhidhānavasena paccuppannenātīto veditabbo. So missakesu tīsu suviññeyyatarattā catutthaṃ vutto. Yassa rūpakkhandho uppajjati tassa vedanākkhandho uppajjissatīti paccuppannena saddhiṃ anāgatābhidhānavasena paccuppannenānāgato veditabbo. So paccakkhato gahetabbānaṃ dhammānaṃ atthitāya atthato suviññeyyataroti pañcamaṃ vutto. Yassa rūpakkhandho uppajjittha, tassa vedanākkhandho uppajjissatīti atītena saddhiṃ anāgatābhidhānavasena atītenānāgato veditabbo. So purimehi duviññeyyoti chaṭṭhaṃ vutto.
ஏவமேதேஸு ச²ஸு காலபே⁴தே³ஸு ய்வாயங் பட²மோ பச்சுப்பன்னோ, தத்த² புக்³க³லதோ, ஓகாஸதோ, புக்³க³லோகாஸதோதி தயோ வாரா ஹொந்தி. தேஸு யஸ்ஸாதி புக்³க³லவஸேன க²ந்தா⁴னங் உப்பத்திதீ³பனோ புக்³க³லவாரோ. யத்தா²தி ஓகாஸவஸேன க²ந்தா⁴னங் உப்பத்திதீ³பனோ ஓகாஸவாரோ. யஸ்ஸ யத்தா²தி புக்³க³லோகாஸவஸேன க²ந்தா⁴னங் உப்பத்திதீ³பனோ புக்³க³லோகாஸவாரோ. இமே பன தயோபி வாரா பட²மங் அனுலோமனயேன நித்³தி³ஸித்வா பச்சா² படிலோமனயேன நித்³தி³ட்டா². தேஸு ‘உப்பஜ்ஜதி’ ‘உப்பஜ்ஜித்த²,’ ‘உப்பஜ்ஜிஸ்ஸதீ’தி வசனதோ உப்பத்திதீ³பனோ அனுலோமனயோ. ‘நுப்பஜ்ஜதி’, ‘நுப்பஜ்ஜித்த²,’ ‘நுப்பஜ்ஜிஸ்ஸதீ’தி வசனதோ அனுப்பத்திதீ³பனோ படிலோமனயோ.
Evametesu chasu kālabhedesu yvāyaṃ paṭhamo paccuppanno, tattha puggalato, okāsato, puggalokāsatoti tayo vārā honti. Tesu yassāti puggalavasena khandhānaṃ uppattidīpano puggalavāro. Yatthāti okāsavasena khandhānaṃ uppattidīpano okāsavāro. Yassa yatthāti puggalokāsavasena khandhānaṃ uppattidīpano puggalokāsavāro. Ime pana tayopi vārā paṭhamaṃ anulomanayena niddisitvā pacchā paṭilomanayena niddiṭṭhā. Tesu ‘uppajjati’ ‘uppajjittha,’ ‘uppajjissatī’ti vacanato uppattidīpano anulomanayo. ‘Nuppajjati’, ‘nuppajjittha,’ ‘nuppajjissatī’ti vacanato anuppattidīpano paṭilomanayo.
தத்த² பச்சுப்பன்னகாலே தாவ புக்³க³லவாரஸ்ஸ அனுலோமனயே ‘‘யஸ்ஸ ரூபக்க²ந்தோ⁴ உப்பஜ்ஜதி, தஸ்ஸ வேத³னாக்க²ந்தோ⁴ உப்பஜ்ஜதி. யஸ்ஸ வா பன வேத³னாக்க²ந்தோ⁴ உப்பஜ்ஜதி, தஸ்ஸ ரூபக்க²ந்தோ⁴ உப்பஜ்ஜதி. யஸ்ஸ ரூபக்க²ந்தோ⁴ உப்பஜ்ஜதி, தஸ்ஸ ஸஞ்ஞாக்க²ந்தோ⁴ ஸங்கா²ரக்க²ந்தோ⁴, விஞ்ஞாணக்க²ந்தோ⁴, உப்பஜ்ஜதி. யஸ்ஸ வா பன விஞ்ஞாணக்க²ந்தோ⁴ உப்பஜ்ஜதி, தஸ்ஸ ரூபக்க²ந்தோ⁴ உப்பஜ்ஜதீ’’தி ஏவங் ரூபக்க²ந்த⁴மூலகானி சத்தாரி யமகானி; ‘‘யஸ்ஸ வேத³னாக்க²ந்தோ⁴ உப்பஜ்ஜதி, தஸ்ஸ ஸஞ்ஞாக்க²ந்தோ⁴ உப்பஜ்ஜதீ’’திஆதி³னா நயேன வேத³னாக்க²ந்த⁴மூலகானி தீணி; ஸஞ்ஞாக்க²ந்த⁴மூலகானி த்³வே; ஸங்கா²ரக்க²ந்த⁴மூலகங் ஏகந்தி அக்³க³ஹிதக்³க³ஹணேன த³ஸ யமகானி ஹொந்தி.
Tattha paccuppannakāle tāva puggalavārassa anulomanaye ‘‘yassa rūpakkhandho uppajjati, tassa vedanākkhandho uppajjati. Yassa vā pana vedanākkhandho uppajjati, tassa rūpakkhandho uppajjati. Yassa rūpakkhandho uppajjati, tassa saññākkhandho saṅkhārakkhandho, viññāṇakkhandho, uppajjati. Yassa vā pana viññāṇakkhandho uppajjati, tassa rūpakkhandho uppajjatī’’ti evaṃ rūpakkhandhamūlakāni cattāri yamakāni; ‘‘yassa vedanākkhandho uppajjati, tassa saññākkhandho uppajjatī’’tiādinā nayena vedanākkhandhamūlakāni tīṇi; saññākkhandhamūlakāni dve; saṅkhārakkhandhamūlakaṃ ekanti aggahitaggahaṇena dasa yamakāni honti.
தத்த² ரூபக்க²ந்த⁴மூலகேஸு சதூஸு ஆதி³தோ ஏகமேவ விஸ்ஸஜ்ஜிதங். ஸேஸானி தேன ஸதி³ஸவிஸ்ஸஜ்ஜனானீதி தந்தியா லஹுபா⁴வத்த²ங் ஸங்கி²த்தானி. வேத³னாக்க²ந்தா⁴தி³மூலகேஸுபி ‘ஆமந்தா’தி ஏகஸதி³ஸமேவ விஸ்ஸஜ்ஜனங். தஸ்மா தானிபி தந்தியா லஹுபா⁴வத்த²ங் ஸங்கி²த்தானேவாதி ஏவமேதானி பச்சுப்பன்னகாலே புக்³க³லவாரே அனுலோமனயே ஏகயமகவிஸ்ஸஜ்ஜனேனேவ த³ஸ யமகானி விஸ்ஸஜ்ஜிதானி நாம ஹொந்தீதி வேதி³தப்³பா³னி. யதா² ச புக்³க³லவாரே த³ஸ, ஏவங் ஓகாஸவாரே த³ஸ, புக்³க³லோகாஸவாரே த³ஸாதி பச்சுப்பன்னகாலே தீஸு வாரேஸு அனுலோமனயே திங்ஸ யமகானி ஹொந்தி. யதா² ச அனுலோமனயே, ஏவங் படிலோமனயேபீதி ஸப்³பா³னிபி பச்சுப்பன்னகாலே ஸட்டி² யமகானி ஹொந்தி. தேஸு வீஸபுச்சா²ஸதங், சத்தாரீஸானி ச த்³வே அத்த²ஸதானி ஹொந்தீதி வேதி³தப்³பா³னி. ஏவங் ஸேஸேஸுபி பஞ்சஸு காலபே⁴தே³ஸு புக்³க³லாதி³பே⁴த³தோ அனுலோமபடிலோமனயவஸேன ச² ச² வாரா. ஏகேகஸ்மிங் வாரே த³ஸ த³ஸ கத்வா ஸட்டி² ஸட்டி² யமகானீதி தீணி யமகஸதானி. தானி புரிமேஹி ஸத்³தி⁴ங் ஸட்டா²தி⁴கானி தீணி யமகஸதானி, வீஸாதி⁴கானி ஸத்தபுச்சா²ஸதானி, சத்தாரீஸானி ச சுத்³த³ஸ அத்த²ஸதானி ஹொந்தி. இத³ங் தாவ உப்பாத³வாரே பாளிவவத்தா²னங். யதா² ச உப்பாத³வாரே, ததா² நிரோத⁴வாரேபி, உப்பாத³னிரோத⁴வாரேபீதி ஸப்³ப³ஸ்மிம்பி பவத்திமஹாவாரே அஸீதி யமகஸஹஸ்ஸங், ஸட்டி²ஸதாதி⁴கானி த்³வே புச்சா²ஸஹஸ்ஸானி, வீஸங் திஸதாதி⁴கானி ச சத்தாரி அத்த²ஸஹஸ்ஸானி வேதி³தப்³பா³னி.
Tattha rūpakkhandhamūlakesu catūsu ādito ekameva vissajjitaṃ. Sesāni tena sadisavissajjanānīti tantiyā lahubhāvatthaṃ saṅkhittāni. Vedanākkhandhādimūlakesupi ‘āmantā’ti ekasadisameva vissajjanaṃ. Tasmā tānipi tantiyā lahubhāvatthaṃ saṅkhittānevāti evametāni paccuppannakāle puggalavāre anulomanaye ekayamakavissajjaneneva dasa yamakāni vissajjitāni nāma hontīti veditabbāni. Yathā ca puggalavāre dasa, evaṃ okāsavāre dasa, puggalokāsavāre dasāti paccuppannakāle tīsu vāresu anulomanaye tiṃsa yamakāni honti. Yathā ca anulomanaye, evaṃ paṭilomanayepīti sabbānipi paccuppannakāle saṭṭhi yamakāni honti. Tesu vīsapucchāsataṃ, cattārīsāni ca dve atthasatāni hontīti veditabbāni. Evaṃ sesesupi pañcasu kālabhedesu puggalādibhedato anulomapaṭilomanayavasena cha cha vārā. Ekekasmiṃ vāre dasa dasa katvā saṭṭhi saṭṭhi yamakānīti tīṇi yamakasatāni. Tāni purimehi saddhiṃ saṭṭhādhikāni tīṇi yamakasatāni, vīsādhikāni sattapucchāsatāni, cattārīsāni ca cuddasa atthasatāni honti. Idaṃ tāva uppādavāre pāḷivavatthānaṃ. Yathā ca uppādavāre, tathā nirodhavārepi, uppādanirodhavārepīti sabbasmimpi pavattimahāvāre asīti yamakasahassaṃ, saṭṭhisatādhikāni dve pucchāsahassāni, vīsaṃ tisatādhikāni ca cattāri atthasahassāni veditabbāni.
பாளி பன உப்பாத³வாரே நிரோத⁴வாரே ச தீஸு அஸம்மிஸ்ஸககாலபே⁴தே³ஸு தஸ்மிங் தஸ்மிங் வாரே ஏகேகமேவ யமகங் விஸ்ஸஜ்ஜெத்வா ஸங்கி²த்தா. தீஸு மிஸ்ஸககாலபே⁴தே³ஸு ‘யஸ்ஸ வேத³னாக்க²ந்தோ⁴ உப்பஜ்ஜதி, தஸ்ஸ ஸஞ்ஞாக்க²ந்தோ⁴ உப்பஜ்ஜித்தா²’திஆதி³னா நயேன வேத³னாக்க²ந்தா⁴தி³மூலகேஸுபி ஏகங் யமகங் விஸ்ஸஜ்ஜிதங். உப்பாத³னிரோத⁴வாரே பன ச²ஸுபி காலபே⁴தே³ஸு தங் விஸ்ஸஜ்ஜிதமேவ. ஸேஸானி தேன ஸமானவிஸ்ஸஜ்ஜனத்தா ஸங்கி²த்தானீதி. இத³ங் ஸகலேபி பவத்திமஹாவாரே பாளிவவத்தா²னங்.
Pāḷi pana uppādavāre nirodhavāre ca tīsu asammissakakālabhedesu tasmiṃ tasmiṃ vāre ekekameva yamakaṃ vissajjetvā saṅkhittā. Tīsu missakakālabhedesu ‘yassa vedanākkhandho uppajjati, tassa saññākkhandho uppajjitthā’tiādinā nayena vedanākkhandhādimūlakesupi ekaṃ yamakaṃ vissajjitaṃ. Uppādanirodhavāre pana chasupi kālabhedesu taṃ vissajjitameva. Sesāni tena samānavissajjanattā saṅkhittānīti. Idaṃ sakalepi pavattimahāvāre pāḷivavatthānaṃ.
அத்த²வினிச்ச²யத்த²ங் பனஸ்ஸ இத³ங் லக்க²ணங் வேதி³தப்³ப³ங் – இமஸ்மிஞ்ஹி பவத்திமஹாவாரே சதுன்னங் பஞ்ஹானங் பஞ்ச விஸ்ஸஜ்ஜனானி ஸத்தவீஸதியா டா²னேஸு பக்கி²பித்வா அத்த²வினிச்ச²யோ வேதி³தப்³போ³. தத்த² புரேபஞ்ஹோ, பச்சா²பஞ்ஹோ, பரிபுண்ணபஞ்ஹோ, மோக⁴பஞ்ஹோதி இமே சத்தாரோ பஞ்ஹா நாம. ஏகேகஸ்மிஞ்ஹி யமகே த்³வே த்³வே புச்சா². ஏகேகபுச்சா²யபி த்³வே த்³வே பதா³னி. தத்த² யாய புச்சா²ய விஸ்ஸஜ்ஜனே ஏகேனேவ பதே³ன க³ஹிதக்க²ந்த⁴ஸ்ஸ உப்பாதோ³ வா நிரோதோ⁴ வா லப்³ப⁴தி , அயங் புரேபஞ்ஹோ நாம. யாய பன புச்சா²ய விஸ்ஸஜ்ஜனே த்³வீஹிபி பதே³ஹி க³ஹிதக்க²ந்தா⁴னங் உப்பாதோ³ வா நிரோதோ⁴ வா லப்³ப⁴தி, அயங் பச்சா²பஞ்ஹோ நாம. யாய பன புச்சா²ய விஸ்ஸஜ்ஜனே ஏகேனபி பதே³ன க³ஹிதக்க²ந்த⁴ஸ்ஸ த்³வீஹிபி பதே³ஹி க³ஹிதக்க²ந்தா⁴னங் உப்பாதோ³ வா, நிரோதோ⁴ வா லப்³ப⁴தி, அயங் பரிபுண்ணபஞ்ஹோ நாம. யாய பன புச்சா²ய விஸ்ஸஜ்ஜனே படிக்கே²போ வா, படிஸேதோ⁴ வா லப்³ப⁴தி, அயங் மோக⁴பஞ்ஹோ நாம. யஸ்மா பனேஸ அத³ஸ்ஸியமானோ ந ஸக்கா ஜானிதுங், தஸ்மா நங் த³ஸ்ஸயிஸ்ஸாம.
Atthavinicchayatthaṃ panassa idaṃ lakkhaṇaṃ veditabbaṃ – imasmiñhi pavattimahāvāre catunnaṃ pañhānaṃ pañca vissajjanāni sattavīsatiyā ṭhānesu pakkhipitvā atthavinicchayo veditabbo. Tattha purepañho, pacchāpañho, paripuṇṇapañho, moghapañhoti ime cattāro pañhā nāma. Ekekasmiñhi yamake dve dve pucchā. Ekekapucchāyapi dve dve padāni. Tattha yāya pucchāya vissajjane ekeneva padena gahitakkhandhassa uppādo vā nirodho vā labbhati , ayaṃ purepañho nāma. Yāya pana pucchāya vissajjane dvīhipi padehi gahitakkhandhānaṃ uppādo vā nirodho vā labbhati, ayaṃ pacchāpañho nāma. Yāya pana pucchāya vissajjane ekenapi padena gahitakkhandhassa dvīhipi padehi gahitakkhandhānaṃ uppādo vā, nirodho vā labbhati, ayaṃ paripuṇṇapañho nāma. Yāya pana pucchāya vissajjane paṭikkhepo vā, paṭisedho vā labbhati, ayaṃ moghapañho nāma. Yasmā panesa adassiyamāno na sakkā jānituṃ, tasmā naṃ dassayissāma.
‘யத்த² ரூபக்க²ந்தோ⁴ நுப்பஜ்ஜதி, தத்த² வேத³னாக்க²ந்தோ⁴ நுப்பஜ்ஜதீ’தி புச்சா²ய தாவ உப்பஜ்ஜதீதி இமஸ்மிங் விஸ்ஸஜ்ஜனே ஏகேனேவ பதே³ன க³ஹிதஸ்ஸ வேத³னாக்க²ந்த⁴ஸ்ஸ உப்பாதோ³ லப்³ப⁴தி, இதி அயஞ்சேவ அஞ்ஞோ ச ஏவரூபோ பஞ்ஹோ புரேபஞ்ஹோதி வேதி³தப்³போ³. ‘யஸ்ஸ ரூபக்க²ந்தோ⁴ உப்பஜ்ஜித்த², தஸ்ஸ வேத³னாக்க²ந்தோ⁴ உப்பஜ்ஜித்தா²’தி புச்சா²ய பன ‘ஆமந்தா’தி இமஸ்மிங் விஸ்ஸஜ்ஜனே த்³வீஹி பதே³ஹி க³ஹிதானங் ரூபவேத³னாக்க²ந்தா⁴னங் யஸ்ஸ கஸ்ஸசி ஸத்தஸ்ஸ அதீதே உப்பாதோ³ லப்³ப⁴தி. இதி அயஞ்சேவ அஞ்ஞோ ச ஏவரூபோ பஞ்ஹோ பச்சா²பஞ்ஹோதி வேதி³தப்³போ³.
‘Yattha rūpakkhandho nuppajjati, tattha vedanākkhandho nuppajjatī’ti pucchāya tāva uppajjatīti imasmiṃ vissajjane ekeneva padena gahitassa vedanākkhandhassa uppādo labbhati, iti ayañceva añño ca evarūpo pañho purepañhoti veditabbo. ‘Yassa rūpakkhandho uppajjittha, tassa vedanākkhandho uppajjitthā’ti pucchāya pana ‘āmantā’ti imasmiṃ vissajjane dvīhi padehi gahitānaṃ rūpavedanākkhandhānaṃ yassa kassaci sattassa atīte uppādo labbhati. Iti ayañceva añño ca evarūpo pañho pacchāpañhoti veditabbo.
‘யஸ்ஸ ரூபக்க²ந்தோ⁴ உப்பஜ்ஜதி, தஸ்ஸ வேத³னாக்க²ந்தோ⁴ உப்பஜ்ஜதீ’தி இமாய பன பட²மபுச்சா²ய ‘அஸஞ்ஞஸத்தங் உபபஜ்ஜந்தான’ந்திஆதி³கே இமஸ்மிங் விஸ்ஸஜ்ஜனே ‘அஸஞ்ஞஸத்தங் உபபஜ்ஜந்தானங் தேஸங் ரூபக்க²ந்தோ⁴ உப்பஜ்ஜதி, நோ ச தேஸங் வேத³னாக்க²ந்தோ⁴ உப்பஜ்ஜதீ’தி இமஸ்மிங் கொட்டா²ஸே ஏகேனேவ பதே³ன க³ஹிதஸ்ஸ ரூபக்க²ந்த⁴ஸ்ஸபி உப்பாதோ³ லப்³ப⁴தி. ‘பஞ்சவோகாரங் உபபஜ்ஜந்தானங் தேஸங் ரூபக்க²ந்தோ⁴ ச உப்பஜ்ஜதி வேத³னாக்க²ந்தோ⁴ ச உப்பஜ்ஜதீ’தி இமஸ்மிங் கொட்டா²ஸே த்³வீஹிபி பதே³ஹி ஸங்க³ஹிதானங் ரூபவேத³னாக்க²ந்தா⁴னம்பி உப்பாதோ³ லப்³ப⁴தி. இதி அயஞ்சேவ அஞ்ஞோ ச ஏவரூபோ பஞ்ஹோ பரிபுண்ணபஞ்ஹோதி வேதி³தப்³போ³. புரேபச்சா²பஞ்ஹோதிபி ஏதஸ்ஸேவ நாமங். ஏதஸ்ஸ ஹி விஸ்ஸஜ்ஜனே புரிமகொட்டா²ஸே ஏகேன பதே³ன ஸங்க³ஹிதஸ்ஸ ரூபக்க²ந்த⁴ஸ்ஸேவ உப்பாதோ³ த³ஸ்ஸிதோ. து³தியகொட்டா²ஸே த்³வீஹி பதே³ஹி ஸங்க³ஹிதானங் ரூபவேத³னாக்க²ந்தா⁴னங். இமினாயேவ ச லக்க²ணேன யத்த² ஏகேன பதே³ன ஸங்க³ஹிதஸ்ஸ க²ந்த⁴ஸ்ஸ உப்பாதோ³ வா நிரோதோ⁴ வா லப்³ப⁴தி, ஸோ புரேபஞ்ஹோதி வுத்தோ. யத்த² த்³வீஹிபி பதே³ஹி ஸங்க³ஹிதானங் க²ந்தா⁴னங் உப்பாதோ³ வா நிரோதோ⁴ வா லப்³ப⁴தி, ஸோ பச்சா²பஞ்ஹோதி வுத்தோ.
‘Yassa rūpakkhandho uppajjati, tassa vedanākkhandho uppajjatī’ti imāya pana paṭhamapucchāya ‘asaññasattaṃ upapajjantāna’ntiādike imasmiṃ vissajjane ‘asaññasattaṃ upapajjantānaṃ tesaṃ rūpakkhandho uppajjati, no ca tesaṃ vedanākkhandho uppajjatī’ti imasmiṃ koṭṭhāse ekeneva padena gahitassa rūpakkhandhassapi uppādo labbhati. ‘Pañcavokāraṃ upapajjantānaṃ tesaṃ rūpakkhandho ca uppajjati vedanākkhandho ca uppajjatī’ti imasmiṃ koṭṭhāse dvīhipi padehi saṅgahitānaṃ rūpavedanākkhandhānampi uppādo labbhati. Iti ayañceva añño ca evarūpo pañho paripuṇṇapañhoti veditabbo. Purepacchāpañhotipi etasseva nāmaṃ. Etassa hi vissajjane purimakoṭṭhāse ekena padena saṅgahitassa rūpakkhandhasseva uppādo dassito. Dutiyakoṭṭhāse dvīhi padehi saṅgahitānaṃ rūpavedanākkhandhānaṃ. Imināyeva ca lakkhaṇena yattha ekena padena saṅgahitassa khandhassa uppādo vā nirodho vā labbhati, so purepañhoti vutto. Yattha dvīhipi padehi saṅgahitānaṃ khandhānaṃ uppādo vā nirodho vā labbhati, so pacchāpañhoti vutto.
‘யஸ்ஸ ரூபக்க²ந்தோ⁴ நுப்பஜ்ஜித்த², தஸ்ஸ வேத³னாக்க²ந்தோ⁴ நுப்பஜ்ஜித்தா²’தி இமாய பன புச்சா²ய ‘நத்தீ²’தி இமஸ்மிங் விஸ்ஸஜ்ஜனே படிக்கே²போ லப்³ப⁴தி. ‘யஸ்ஸ ரூபக்க²ந்தோ⁴ உப்பஜ்ஜதி, தஸ்ஸ வேத³னாக்க²ந்தோ⁴ நிருஜ்ஜ²தீ’தி புச்சா²ய ‘நோ’தி இமஸ்மிங் விஸ்ஸஜ்ஜனே படிஸேதோ⁴ லப்³ப⁴தி. தஸ்மா அயஞ்சேவ து³விதோ⁴ அஞ்ஞோ ச ஏவரூபோ பஞ்ஹோ மோக⁴பஞ்ஹோதி வேதி³தப்³போ³. துச்ச²பஞ்ஹோதிபி வுச்சதி. ஏவங் தாவ சத்தாரோ பஞ்ஹா வேதி³தப்³பா³.
‘Yassa rūpakkhandho nuppajjittha, tassa vedanākkhandho nuppajjitthā’ti imāya pana pucchāya ‘natthī’ti imasmiṃ vissajjane paṭikkhepo labbhati. ‘Yassa rūpakkhandho uppajjati, tassa vedanākkhandho nirujjhatī’ti pucchāya ‘no’ti imasmiṃ vissajjane paṭisedho labbhati. Tasmā ayañceva duvidho añño ca evarūpo pañho moghapañhoti veditabbo. Tucchapañhotipi vuccati. Evaṃ tāva cattāro pañhā veditabbā.
பாளிக³தியா விஸ்ஸஜ்ஜனங், படிவசனவிஸ்ஸஜ்ஜனங், ஸரூபத³ஸ்ஸனேன விஸ்ஸஜ்ஜனங், படிக்கே²பேன விஸ்ஸஜ்ஜனங், படிஸேதே⁴ன விஸ்ஸஜ்ஜனந்தி இமானி பன பஞ்ச விஸ்ஸஜ்ஜனானி நாம . தத்த² யங் விஸ்ஸஜ்ஜனங் பாளிபத³மேவ ஹுத்வா அத்த²ங் விஸ்ஸஜ்ஜேதி, இத³ங் பாளிக³தியா விஸ்ஸஜ்ஜனங் நாம. தங் புரேபஞ்ஹே லப்³ப⁴தி. ‘யத்த² ரூபக்க²ந்தோ⁴ நுப்பஜ்ஜதி தத்த² வேத³னாக்க²ந்தோ⁴ நுப்பஜ்ஜதீ’தி ஹி பஞ்ஹே ‘உப்பஜ்ஜதீ’தி இத³ங் விஸ்ஸஜ்ஜனங் பாளிபத³மேவ ஹுத்வா அத்த²ங் விஸ்ஸஜ்ஜயமானங் க³தங், தஸ்மா ஏவரூபேஸு டா²னேஸு பாளிக³தியா விஸ்ஸஜ்ஜனங் வேதி³தப்³ப³ங். யங் பன விஸ்ஸஜ்ஜனங் படிவசனபா⁴வேன அத்த²ங் விஸ்ஸஜ்ஜேதி, இத³ங் படிவசனவிஸ்ஸஜ்ஜனங் நாம. தங் பச்சா²பஞ்ஹே லப்³ப⁴தி. ‘யஸ்ஸ ரூபக்க²ந்தோ⁴ உப்பஜ்ஜித்த², தஸ்ஸ வேத³னாக்க²ந்தோ⁴ உப்பஜ்ஜித்தா²’தி ஹி பஞ்ஹே ‘ஆமந்தா’தி இத³ங் விஸ்ஸஜ்ஜனங் படிவசனவஸேனேவ அத்த²ங் விஸ்ஸஜ்ஜயமானங் க³தங், தஸ்மா ஏவரூபேஸு டா²னேஸு படிவசனவிஸ்ஸஜ்ஜனங் வேதி³தப்³ப³ங். யங் விஸ்ஸஜ்ஜனங் ஸரூபேன த³ஸ்ஸெத்வா அத்த²ங் விஸ்ஸஜ்ஜேதி; இத³ங் ஸரூபத³ஸ்ஸனேன விஸ்ஸஜ்ஜனங் நாம. தங் பரிபுண்ணபஞ்ஹே லப்³ப⁴தி. ‘யஸ்ஸ ரூபக்க²ந்தோ⁴ உப்பஜ்ஜதி; தஸ்ஸ வேத³னாக்க²ந்தோ⁴ உப்பஜ்ஜதீ’தி ஹி பஞ்ஹே ‘அஸஞ்ஞஸத்தங் உபபஜ்ஜந்தான’ந்தி இத³ங் விஸ்ஸஜ்ஜனங் ‘இமேஸங் ரூபக்க²ந்தோ⁴ உப்பஜ்ஜதி, நோ ச வேத³னாக்க²ந்தோ⁴, இமேஸங் ரூபக்க²ந்தோ⁴ ச உப்பஜ்ஜதி, வேத³னாக்க²ந்தோ⁴ சா’தி ஸரூபத³ஸ்ஸனேனேவ அத்த²ங் விஸ்ஸஜ்ஜயமானங் க³தங். தஸ்மா ஏவரூபேஸு டா²னேஸு ஸரூபத³ஸ்ஸனேன விஸ்ஸஜ்ஜனங் வேதி³தப்³ப³ங். யங் பன விஸ்ஸஜ்ஜனங் ததா²ரூபஸ்ஸ அத்த²ஸ்ஸாபா⁴வதோ அத்த²படிக்கே²பேன பஞ்ஹங் விஸ்ஸஜ்ஜேதி, இத³ங் படிக்கே²பேன விஸ்ஸஜ்ஜனங் நாம. யங் ததா²ரூபஸ்ஸ அத்த²ஸ்ஸ ஏகக்க²ணே அலாப⁴தோ அத்த²படிஸேத⁴னேன பஞ்ஹங் விஸ்ஸஜ்ஜேதி, இத³ங் படிஸேதே⁴ன விஸ்ஸஜ்ஜனங் நாம. தங் மோக⁴பஞ்ஹே லப்³ப⁴தி. ‘யஸ்ஸ ரூபக்க²ந்தோ⁴ நுப்பஜ்ஜித்த², தஸ்ஸ வேத³னாக்க²ந்தோ⁴ நுப்பஜ்ஜித்தா²’தி ஹி பஞ்ஹே ‘நத்தீ²’தி இத³ங் விஸ்ஸஜ்ஜனங்; ஏவரூபோ நாம ஸத்தோ நத்தீ²தி அத்த²படிக்கே²பேன பஞ்ஹங் விஸ்ஸஜ்ஜயமானங் க³தங்; தஸ்மா ஏவரூபேஸு டா²னேஸு படிக்கே²பேன விஸ்ஸஜ்ஜனங் வேதி³தப்³ப³ங். ‘யஸ்ஸ ரூபக்க²ந்தோ⁴ உப்பஜ்ஜதி, தஸ்ஸ வேத³னாக்க²ந்தோ⁴ நிருஜ்ஜ²தீ’தி பஞ்ஹே பன ‘நோ’தி இத³ங் விஸ்ஸஜ்ஜனங் ஏகஸ்மிங் படிஸந்தி⁴க்க²ணே உப்பாதே³ன ஸத்³தி⁴ங் நிரோதோ⁴ நாம ந லப்³ப⁴தீதி அத்த²படிஸேத⁴னேன பஞ்ஹங் விஸ்ஸஜ்ஜயமானங் க³தங், தஸ்மா ஏவரூபேஸு டா²னேஸு படிஸேதே⁴ன விஸ்ஸஜ்ஜனங் வேதி³தப்³ப³ங்.
Pāḷigatiyā vissajjanaṃ, paṭivacanavissajjanaṃ, sarūpadassanena vissajjanaṃ, paṭikkhepena vissajjanaṃ, paṭisedhena vissajjananti imāni pana pañca vissajjanāni nāma . Tattha yaṃ vissajjanaṃ pāḷipadameva hutvā atthaṃ vissajjeti, idaṃ pāḷigatiyā vissajjanaṃ nāma. Taṃ purepañhe labbhati. ‘Yattha rūpakkhandho nuppajjati tattha vedanākkhandho nuppajjatī’ti hi pañhe ‘uppajjatī’ti idaṃ vissajjanaṃ pāḷipadameva hutvā atthaṃ vissajjayamānaṃ gataṃ, tasmā evarūpesu ṭhānesu pāḷigatiyā vissajjanaṃ veditabbaṃ. Yaṃ pana vissajjanaṃ paṭivacanabhāvena atthaṃ vissajjeti, idaṃ paṭivacanavissajjanaṃ nāma. Taṃ pacchāpañhe labbhati. ‘Yassa rūpakkhandho uppajjittha, tassa vedanākkhandho uppajjitthā’ti hi pañhe ‘āmantā’ti idaṃ vissajjanaṃ paṭivacanavaseneva atthaṃ vissajjayamānaṃ gataṃ, tasmā evarūpesu ṭhānesu paṭivacanavissajjanaṃ veditabbaṃ. Yaṃ vissajjanaṃ sarūpena dassetvā atthaṃ vissajjeti; idaṃ sarūpadassanena vissajjanaṃ nāma. Taṃ paripuṇṇapañhe labbhati. ‘Yassa rūpakkhandho uppajjati; tassa vedanākkhandho uppajjatī’ti hi pañhe ‘asaññasattaṃ upapajjantāna’nti idaṃ vissajjanaṃ ‘imesaṃ rūpakkhandho uppajjati, no ca vedanākkhandho, imesaṃ rūpakkhandho ca uppajjati, vedanākkhandho cā’ti sarūpadassaneneva atthaṃ vissajjayamānaṃ gataṃ. Tasmā evarūpesu ṭhānesu sarūpadassanena vissajjanaṃ veditabbaṃ. Yaṃ pana vissajjanaṃ tathārūpassa atthassābhāvato atthapaṭikkhepena pañhaṃ vissajjeti, idaṃ paṭikkhepena vissajjanaṃ nāma. Yaṃ tathārūpassa atthassa ekakkhaṇe alābhato atthapaṭisedhanena pañhaṃ vissajjeti, idaṃ paṭisedhena vissajjanaṃ nāma. Taṃ moghapañhe labbhati. ‘Yassa rūpakkhandho nuppajjittha, tassa vedanākkhandho nuppajjitthā’ti hi pañhe ‘natthī’ti idaṃ vissajjanaṃ; evarūpo nāma satto natthīti atthapaṭikkhepena pañhaṃ vissajjayamānaṃ gataṃ; tasmā evarūpesu ṭhānesu paṭikkhepena vissajjanaṃ veditabbaṃ. ‘Yassa rūpakkhandho uppajjati, tassa vedanākkhandho nirujjhatī’ti pañhe pana ‘no’ti idaṃ vissajjanaṃ ekasmiṃ paṭisandhikkhaṇe uppādena saddhiṃ nirodho nāma na labbhatīti atthapaṭisedhanena pañhaṃ vissajjayamānaṃ gataṃ, tasmā evarūpesu ṭhānesu paṭisedhena vissajjanaṃ veditabbaṃ.
இதா³னி இமே சத்தாரோ பஞ்ஹா, இமானி ச பஞ்ச விஸ்ஸஜ்ஜனானி, யேஸு ஸத்தவீஸதியா டா²னேஸு பக்கி²பிதப்³பா³னி, தானி ஏவங் வேதி³தப்³பா³னி – அஸஞ்ஞஸத்தங் உபபஜ்ஜந்தானந்தி ஏகங் டா²னங், அஸஞ்ஞஸத்தே தத்தா²தி ஏகங், அஸஞ்ஞஸத்தானந்தி ஏகங்; அஸஞ்ஞஸத்தா சவந்தானந்தி ஏகங்; அரூபங் உபபஜ்ஜந்தானந்தி ஏகங், அரூபே தத்தா²தி ஏகங், அரூபானந்தி ஏகங், அரூபா சவந்தானந்தி ஏகங் , அரூபே பச்சி²மப⁴விகானந்தி ஏகங், அரூபே பரினிப்³ப³ந்தானந்தி ஏகங்; யே ச அரூபங் உபபஜ்ஜித்வா பரினிப்³பா³யிஸ்ஸந்தீதி ஏகங்; பஞ்சவோகாரங் உபபஜ்ஜந்தானந்தி ஏகங், பஞ்சவோகாரே தத்தா²தி ஏகங், பஞ்சவோகாரானந்தி ஏகங் பஞ்சவோகாரா சவந்தானந்தி ஏகங், பஞ்சவோகாரே பச்சி²மப⁴விகானந்தி ஏகங், பஞ்சவோகாரே பரினிப்³ப³ந்தானந்தி ஏகங்; ஸுத்³தா⁴வாஸங் உபபஜ்ஜந்தானந்தி ஏகங், ஸுத்³தா⁴வாஸே தத்தா²தி ஏகங், ஸுத்³தா⁴வாஸானந்தி ஏகங், ஸுத்³தா⁴வாஸே பரினிப்³ப³ந்தானந்தி ஏகங்; ஸப்³பே³ஸங் உபபஜ்ஜந்தானந்தி ஏகங், ஸப்³பே³ஸங் சவந்தானந்தி ஏகங்; ஸப்³ப³ஸாதா⁴ரணவஸேன பச்சி²மப⁴விகானந்தி ஏகங், பரினிப்³ப³ந்தானந்தி ஏகங், சதுவோகாரங் பஞ்சவோகாரங் உபபஜ்ஜந்தானந்தி ஏகங், சவந்தானந்தி ஏகங். ஏவங் இமேஸங் சதுன்னங் பஞ்ஹானங் இமானி பஞ்ச விஸ்ஸஜ்ஜனானி இமேஸு ஸத்தவீஸதியா டா²னேஸு பக்கி²பித்வா இமஸ்மிங் பவத்திமஹாவாரே அத்த²வினிச்ச²யோ வேதி³தப்³போ³. ஏவங் விதி³த்வா ஹி பஞ்ஹங் விஸ்ஸஜ்ஜந்தேன ஸுவிஸ்ஸஜ்ஜிதோ ஹோதி, அத்த²ஞ்ச வினிச்ச²யந்தேன ஸுவினிச்சி²தோ ஹோதி.
Idāni ime cattāro pañhā, imāni ca pañca vissajjanāni, yesu sattavīsatiyā ṭhānesu pakkhipitabbāni, tāni evaṃ veditabbāni – asaññasattaṃ upapajjantānanti ekaṃ ṭhānaṃ, asaññasatte tatthāti ekaṃ, asaññasattānanti ekaṃ; asaññasattā cavantānanti ekaṃ; arūpaṃ upapajjantānanti ekaṃ, arūpe tatthāti ekaṃ, arūpānanti ekaṃ, arūpā cavantānanti ekaṃ , arūpe pacchimabhavikānanti ekaṃ, arūpe parinibbantānanti ekaṃ; ye ca arūpaṃ upapajjitvā parinibbāyissantīti ekaṃ; pañcavokāraṃ upapajjantānanti ekaṃ, pañcavokāre tatthāti ekaṃ, pañcavokārānanti ekaṃ pañcavokārā cavantānanti ekaṃ, pañcavokāre pacchimabhavikānanti ekaṃ, pañcavokāre parinibbantānanti ekaṃ; suddhāvāsaṃ upapajjantānanti ekaṃ, suddhāvāse tatthāti ekaṃ, suddhāvāsānanti ekaṃ, suddhāvāse parinibbantānanti ekaṃ; sabbesaṃ upapajjantānanti ekaṃ, sabbesaṃ cavantānanti ekaṃ; sabbasādhāraṇavasena pacchimabhavikānanti ekaṃ, parinibbantānanti ekaṃ, catuvokāraṃ pañcavokāraṃ upapajjantānanti ekaṃ, cavantānanti ekaṃ. Evaṃ imesaṃ catunnaṃ pañhānaṃ imāni pañca vissajjanāni imesu sattavīsatiyā ṭhānesu pakkhipitvā imasmiṃ pavattimahāvāre atthavinicchayo veditabbo. Evaṃ viditvā hi pañhaṃ vissajjantena suvissajjito hoti, atthañca vinicchayantena suvinicchito hoti.
தத்தா²யங் நயோ – யஸ்ஸ ரூபக்க²ந்தோ⁴ உப்பஜ்ஜதீதி யஸ்ஸ புக்³க³லஸ்ஸ உப்பாத³க்க²ணஸமங்கி³தாய ரூபக்க²ந்தோ⁴ உப்பஜ்ஜதி. தஸ்ஸ வேத³னாக்க²ந்தோ⁴ உப்பஜ்ஜதீதி வேத³னாக்க²ந்தோ⁴பி தஸ்ஸ தஸ்மிஞ்ஞேவ க²ணே உப்பஜ்ஜதீதி புச்ச²தி. அஸஞ்ஞஸத்தங் உபபஜ்ஜந்தானந்தி அசித்தகபடிஸந்தி⁴வஸேன அஸஞ்ஞஸத்தப⁴வங் உபபஜ்ஜந்தானங். தேஸங் ரூபக்க²ந்தோ⁴ உப்பஜ்ஜதீதி தேஸங் ஏகந்தேன ரூபக்க²ந்தோ⁴ உப்பஜ்ஜதியேவ. பவத்தே உப்பன்னானங் ரூபக்க²ந்தோ⁴ உப்பஜ்ஜதிபி நிருஜ்ஜ²திபி, தஸ்மா ‘அஸஞ்ஞஸத்தான’ந்தி அவத்வா’அஸஞ்ஞஸத்தங் உபபஜ்ஜந்தான’ந்தி வுத்தங். நோ ச தேஸங் வேத³னாக்க²ந்தோ⁴ உப்பஜ்ஜதீதி அசித்தகத்தா பன தேஸங் வேத³னாக்க²ந்தோ⁴ நுப்பஜ்ஜதேவ. இத³ங் ஸத்தவீஸதியா டா²னேஸு பட²மே டா²னே பரிபுண்ணபஞ்ஹஸ்ஸ புரிமகொட்டா²ஸே ஸரூபத³ஸ்ஸனேன விஸ்ஸஜ்ஜனங். பஞ்சவோகாரங் உபபஜ்ஜந்தானந்தி ரூபாரூபமிஸ்ஸகபடிஸந்தி⁴வஸேன பஞ்சவோகாரப⁴வங் உபபஜ்ஜந்தானங். தேஸங் ரூபக்க²ந்தோ⁴ ச உப்பஜ்ஜதி, வேத³னாக்க²ந்தோ⁴ சாதி தேஸங் ஏகந்தேன ரூபவேத³னாக்க²ந்த⁴ஸங்கா²தா த்³வேபி க²ந்தா⁴ உப்பஜ்ஜந்தியேவ. பவத்தே பன தத்த² உப்பன்னானங் தே க²ந்தா⁴ உப்பஜ்ஜந்திபி நிருஜ்ஜ²ந்திபி, தஸ்மா ‘பஞ்சவோகாரான’ந்தி அவத்வா ‘பஞ்சவோகாரங் உபபஜ்ஜந்தான’ந்தி வுத்தங். இத³ங் பஞ்சவோகாரங் உபபஜ்ஜந்தானந்தி டா²னே பரிபுண்ணபஞ்ஹஸ்ஸ பச்சி²மகொட்டா²ஸே ஸரூபத³ஸ்ஸனேன விஸ்ஸஜ்ஜனங். இமினா உபாயேன ஸப்³பா³னி விஸ்ஸஜ்ஜனானி வேதி³தப்³பா³னி.
Tatthāyaṃ nayo – yassa rūpakkhandho uppajjatīti yassa puggalassa uppādakkhaṇasamaṅgitāya rūpakkhandho uppajjati. Tassa vedanākkhandho uppajjatīti vedanākkhandhopi tassa tasmiññeva khaṇe uppajjatīti pucchati. Asaññasattaṃ upapajjantānanti acittakapaṭisandhivasena asaññasattabhavaṃ upapajjantānaṃ. Tesaṃ rūpakkhandho uppajjatīti tesaṃ ekantena rūpakkhandho uppajjatiyeva. Pavatte uppannānaṃ rūpakkhandho uppajjatipi nirujjhatipi, tasmā ‘asaññasattāna’nti avatvā’asaññasattaṃ upapajjantāna’nti vuttaṃ. No ca tesaṃ vedanākkhandho uppajjatīti acittakattā pana tesaṃ vedanākkhandho nuppajjateva. Idaṃ sattavīsatiyā ṭhānesu paṭhame ṭhāne paripuṇṇapañhassa purimakoṭṭhāse sarūpadassanena vissajjanaṃ. Pañcavokāraṃ upapajjantānanti rūpārūpamissakapaṭisandhivasena pañcavokārabhavaṃ upapajjantānaṃ. Tesaṃ rūpakkhandho ca uppajjati, vedanākkhandho cāti tesaṃ ekantena rūpavedanākkhandhasaṅkhātā dvepi khandhā uppajjantiyeva. Pavatte pana tattha uppannānaṃ te khandhā uppajjantipi nirujjhantipi, tasmā ‘pañcavokārāna’nti avatvā ‘pañcavokāraṃ upapajjantāna’nti vuttaṃ. Idaṃ pañcavokāraṃ upapajjantānanti ṭhāne paripuṇṇapañhassa pacchimakoṭṭhāse sarūpadassanena vissajjanaṃ. Iminā upāyena sabbāni vissajjanāni veditabbāni.
இத³ங் பனெத்த² உப்பாத³னிரோதே⁴ஸு நியமலக்க²ணங் – ஸகலேபி ஹி இமஸ்மிங் க²ந்த⁴யமகே தத்த² தத்த² உப்பன்னானங் பவத்தே யாவ மரணா க²ந்தா⁴னங் அபரியந்தேஸு உப்பாத³னிரோதே⁴ஸு விஜ்ஜமானேஸுபி லஹுபரிவத்தானங் த⁴ம்மானங் வினிப்³போ⁴க³ங் கத்வா உப்பாத³னிரோதே⁴ த³ஸ்ஸேதுங் ந ஸுகரந்தி பவத்தியங் உப்பாத³னிரோதே⁴ அனாமஸித்வா அபி⁴னவங் விபாகவட்டங் நிப்பா²த³யமானேன நானாகம்மேன நிப்³ப³த்தானங் படிஸந்தி⁴க²ந்தா⁴னங் உப்பாத³ங் த³ஸ்ஸேதுங் ஸுக²ந்தி படிஸந்தி⁴காலே உப்பாத³வஸேனேவ உப்பாத³வாரோ கதி²தோ. உப்பன்னஸ்ஸ பன விபாகவட்டஸ்ஸ பரியோஸானேன நிரோத⁴ங் த³ஸ்ஸேதுங் ஸுக²ந்தி மரணகாலே நிரோத⁴வஸேன நிரோத⁴வாரோ கதி²தோ.
Idaṃ panettha uppādanirodhesu niyamalakkhaṇaṃ – sakalepi hi imasmiṃ khandhayamake tattha tattha uppannānaṃ pavatte yāva maraṇā khandhānaṃ apariyantesu uppādanirodhesu vijjamānesupi lahuparivattānaṃ dhammānaṃ vinibbhogaṃ katvā uppādanirodhe dassetuṃ na sukaranti pavattiyaṃ uppādanirodhe anāmasitvā abhinavaṃ vipākavaṭṭaṃ nipphādayamānena nānākammena nibbattānaṃ paṭisandhikhandhānaṃ uppādaṃ dassetuṃ sukhanti paṭisandhikāle uppādavaseneva uppādavāro kathito. Uppannassa pana vipākavaṭṭassa pariyosānena nirodhaṃ dassetuṃ sukhanti maraṇakāle nirodhavasena nirodhavāro kathito.
கிங் பனெத்த² பவத்தியங் உப்பாத³னிரோதா⁴னங் அனாமட்ட²பா⁴வே பமாணந்தி? பாளியேவ. பாளியஞ்ஹி விஸேஸேன உப்பாத³வாரஸ்ஸ அனாக³தகாலவாரே ‘பச்சி²மப⁴விகானங் தேஸங் ரூபக்க²ந்தோ⁴ ச நுப்பஜ்ஜிஸ்ஸதி, வேத³னாக்க²ந்தோ⁴ ச நுப்பஜ்ஜிஸ்ஸதீ’தி அயங் பாளி அதிபமாணமேவ. பச்சி²மப⁴விகானஞ்ஹி பவத்தே ரூபாரூபத⁴ம்மானங் உப்பஜ்ஜிதுங் யுத்தபா⁴வே ஸதிபி ‘ரூபக்க²ந்தோ⁴ ச நுப்பஜ்ஜிஸ்ஸதி, வேத³னாக்க²ந்தோ⁴ ச நுப்பஜ்ஜிஸ்ஸதீ’தி ஸன்னிட்டா²னங் கத்வா வுத்தபா⁴வேன பவத்தே உப்பாதோ³ ந க³ஹிதோதி வேதி³தப்³போ³. ‘ஸுத்³தா⁴வாஸே பரினிப்³ப³ந்தானங் தேஸங் தத்த² ஸஞ்ஞாக்க²ந்தோ⁴ ந நிருஜ்ஜி²த்த², நோ ச தேஸங் தத்த² வேத³னாக்க²ந்தோ⁴ ந நிருஜ்ஜ²தீ’தி அயங் பன பாளி பவத்தே நிரோத⁴ஸ்ஸ அனாமட்ட²பா⁴வே அதிவிய பமாணங். ஸுத்³தா⁴வாஸே பரினிப்³ப³ந்தானஞ்ஹி சுதிசித்தஸ்ஸ ப⁴ங்க³க்க²ணே டி²தானங் படிஸந்தி⁴தோ பட்டா²ய பவத்தே உப்பஜ்ஜித்வா நிருத்³த⁴ஸஞ்ஞாக்க²ந்தா⁴னங் க³ணனபதோ² நத்தி². ‘ஏவங் ஸந்தேபி தேஸங் தத்த² ஸஞ்ஞாக்க²ந்தோ⁴ ந நிருஜ்ஜி²த்தா²’தி ஸன்னிட்டா²னங் கத்வா வுத்தபா⁴வேன பவத்தே நிரோதோ⁴ ந க³ஹிதோதி வேதி³தப்³போ³.
Kiṃ panettha pavattiyaṃ uppādanirodhānaṃ anāmaṭṭhabhāve pamāṇanti? Pāḷiyeva. Pāḷiyañhi visesena uppādavārassa anāgatakālavāre ‘pacchimabhavikānaṃ tesaṃ rūpakkhandho ca nuppajjissati, vedanākkhandho ca nuppajjissatī’ti ayaṃ pāḷi atipamāṇameva. Pacchimabhavikānañhi pavatte rūpārūpadhammānaṃ uppajjituṃ yuttabhāve satipi ‘rūpakkhandho ca nuppajjissati, vedanākkhandho ca nuppajjissatī’ti sanniṭṭhānaṃ katvā vuttabhāvena pavatte uppādo na gahitoti veditabbo. ‘Suddhāvāse parinibbantānaṃ tesaṃ tattha saññākkhandho na nirujjhittha, no ca tesaṃ tattha vedanākkhandho na nirujjhatī’ti ayaṃ pana pāḷi pavatte nirodhassa anāmaṭṭhabhāve ativiya pamāṇaṃ. Suddhāvāse parinibbantānañhi cuticittassa bhaṅgakkhaṇe ṭhitānaṃ paṭisandhito paṭṭhāya pavatte uppajjitvā niruddhasaññākkhandhānaṃ gaṇanapatho natthi. ‘Evaṃ santepi tesaṃ tattha saññākkhandho na nirujjhitthā’ti sanniṭṭhānaṃ katvā vuttabhāvena pavatte nirodho na gahitoti veditabbo.
ஏவமெத்த² உப்பாத³னிரோதே⁴ஸு நியமலக்க²ணங் விதி³த்வா படிஸந்தி⁴உப்பாத³மேவ சுதினிரோத⁴மேவ ச க³ஹெத்வா தேஸு தேஸு டா²னேஸு ஆக³தானங் விஸ்ஸஜ்ஜனானங் அத்த²வினிச்ச²யோ வேதி³தப்³போ³. ஸோ பன ஸக்கா ஆதி³விஸ்ஸஜ்ஜனே வுத்தனயேன ஸப்³ப³த்த² விதி³துந்தி விஸ்ஸஜ்ஜனபடிபாடியா ந வித்தா²ரிதோ. இமினா பன ஏவங் தி³ன்னேனபி நயேன யோ ஏதேஸங் அத்த²வினிச்ச²யங் ஜானிதுங் ந ஸக்கோதி, தேன ஆசரியே பயிருபாஸித்வா ஸாது⁴கங் ஸுத்வாபி ஜானிதப்³போ³.
Evamettha uppādanirodhesu niyamalakkhaṇaṃ viditvā paṭisandhiuppādameva cutinirodhameva ca gahetvā tesu tesu ṭhānesu āgatānaṃ vissajjanānaṃ atthavinicchayo veditabbo. So pana sakkā ādivissajjane vuttanayena sabbattha viditunti vissajjanapaṭipāṭiyā na vitthārito. Iminā pana evaṃ dinnenapi nayena yo etesaṃ atthavinicchayaṃ jānituṃ na sakkoti, tena ācariye payirupāsitvā sādhukaṃ sutvāpi jānitabbo.
உப்பாத³ஸ்ஸ நிரோத⁴ஸ்ஸ, உப்பன்னஞ்சாபி ஏகதோ;
Uppādassa nirodhassa, uppannañcāpi ekato;
நயஸ்ஸ அனுலோமஸ்ஸ, படிலோமனயஸ்ஸ ச.
Nayassa anulomassa, paṭilomanayassa ca.
வஸேன யானி க²ந்தே⁴ஸு, யமகானி ச பஞ்சஸு;
Vasena yāni khandhesu, yamakāni ca pañcasu;
புக்³க³லங் அத² ஓகாஸங், புக்³க³லோகாஸமேவ ச.
Puggalaṃ atha okāsaṃ, puggalokāsameva ca.
ஆமஸித்வா பவத்தேஸு, டா²னேஸு கத²யீ ஜினோ;
Āmasitvā pavattesu, ṭhānesu kathayī jino;
தேஸங் பாளிவவத்தா²னங், த³ஸ்ஸிதங் அனுபுப்³ப³தோ.
Tesaṃ pāḷivavatthānaṃ, dassitaṃ anupubbato.
வினிச்ச²யத்த²ங் அத்த²ஸ்ஸ, பஞ்ஹாவிஸ்ஸஜ்ஜனானி ச;
Vinicchayatthaṃ atthassa, pañhāvissajjanāni ca;
விஸ்ஸஜ்ஜனானங் டா²னானி, யானி தானி ச ஸப்³ப³ஸோ.
Vissajjanānaṃ ṭhānāni, yāni tāni ca sabbaso.
த³ஸ்ஸெத்வா ஏகபஞ்ஹஸ்மிங், யோஜனாபி பகாஸிதா;
Dassetvā ekapañhasmiṃ, yojanāpi pakāsitā;
வித்தா²ரேன க³தே எத்த², பஞ்ஹாவிஸ்ஸஜ்ஜனக்கமே.
Vitthārena gate ettha, pañhāvissajjanakkame.
அத்த²ங் வண்ணயதா காதுங், கிங் நு ஸக்கா இதோ பரங்;
Atthaṃ vaṇṇayatā kātuṃ, kiṃ nu sakkā ito paraṃ;
நயேன இமினா தஸ்மா, அத்த²ங் ஜானந்து பண்டி³தாதி.
Nayena iminā tasmā, atthaṃ jānantu paṇḍitāti.
பவத்திமஹாவாரவண்ணனா.
Pavattimahāvāravaṇṇanā.
3. பரிஞ்ஞாவாரவண்ணனா
3. Pariññāvāravaṇṇanā
206-208. தத³னந்தரே பரிஞ்ஞாவாரேபி ச²ளேவ காலபே⁴தா³. அனுலோமபடிலோமதோ த்³வேயேவ நயா. புக்³க³லவாரோ, ஓகாஸவாரோ, புக்³க³லோகாஸவாரோதி இமேஸு பன தீஸு புக்³க³லவாரோவ லப்³ப⁴தி, ந இதரே த்³வே. கிங் காரணா? ஸதி³ஸவிஸ்ஸஜ்ஜனதாய. யோ ஹி கோசி புக்³க³லோ யத்த² கத்த²சி டா²னே ரூபக்க²ந்த⁴ங் சே பரிஜானாதி, வேத³னாக்க²ந்த⁴ம்பி பரிஜானாதியேவ. வேத³னாக்க²ந்த⁴ங் சே பரிஜானாதி, ரூபக்க²ந்த⁴ம்பி பரிஜானாதியேவ. ரூபக்க²ந்த⁴ங் சே ந பரிஜானாதி, வேத³னாக்க²ந்த⁴ம்பி ந பரிஜானாதியேவ. வேத³னாக்க²ந்த⁴ங் சே ந பரிஜானாதி, ரூபக்க²ந்த⁴ம்பி ந பரிஜானாதியேவ. தஸ்மா தேஸுபி ‘யத்த² ரூபக்க²ந்த⁴ங் பரிஜானாதி, தத்த² வேத³னாக்க²ந்த⁴ங் பரிஜானாதீ’தி ஆதி³வஸேன புச்ச²ங் கத்வா ‘ஆமந்தா’த்வேவ விஸ்ஸஜ்ஜனங் காதப்³ப³ங் . ஸியாதி ஸதி³ஸவிஸ்ஸஜ்ஜனதாய தே இத⁴ ந லப்³ப⁴ந்தீதி வேதி³தப்³பா³.
206-208. Tadanantare pariññāvārepi chaḷeva kālabhedā. Anulomapaṭilomato dveyeva nayā. Puggalavāro, okāsavāro, puggalokāsavāroti imesu pana tīsu puggalavārova labbhati, na itare dve. Kiṃ kāraṇā? Sadisavissajjanatāya. Yo hi koci puggalo yattha katthaci ṭhāne rūpakkhandhaṃ ce parijānāti, vedanākkhandhampi parijānātiyeva. Vedanākkhandhaṃ ce parijānāti, rūpakkhandhampi parijānātiyeva. Rūpakkhandhaṃ ce na parijānāti, vedanākkhandhampi na parijānātiyeva. Vedanākkhandhaṃ ce na parijānāti, rūpakkhandhampi na parijānātiyeva. Tasmā tesupi ‘yattha rūpakkhandhaṃ parijānāti, tattha vedanākkhandhaṃ parijānātī’ti ādivasena pucchaṃ katvā ‘āmantā’tveva vissajjanaṃ kātabbaṃ . Siyāti sadisavissajjanatāya te idha na labbhantīti veditabbā.
அத² வா பரிஞ்ஞாகிச்சங் நாம புக்³க³லஸ்ஸேவ ஹோதி, நோ ஓகாஸஸ்ஸ, புக்³க³லோவ பரிஜானிதுங் ஸமத்தோ², நோ ஓகாஸோதி புக்³க³லவாரோவெத்த² க³ஹிதோ, ந ஓகாஸவாரோ. தஸ்ஸ பன அக்³க³ஹிதத்தா தத³னந்தரோ புக்³க³லோகாஸவாரோ லப்³ப⁴மானோபி ந க³ஹிதோ. யோ பனேஸ புக்³க³லவாரோ க³ஹிதோ, தத்த² பச்சுப்பன்னகாலே ரூபக்க²ந்த⁴மூலகானி சத்தாரி, வேத³னாக்க²ந்த⁴மூலகானி தீணி, ஸஞ்ஞாக்க²ந்த⁴மூலகானி த்³வே, ஸங்கா²ரக்க²ந்த⁴மூலகங் ஏகந்தி ஹெட்டா² வுத்தனயேனேவ அனுலோமனயே அக்³க³ஹிதக்³க³ஹணேன த³ஸ யமகானி. படிலோமனயே த³ஸாதி வீஸதி. ததா² ஸேஸேஸுபீதி ஏகேகஸ்மிங் காலே வீஸதி வீஸதி கத்வா ச²ஸு காலேஸு வீஸங் யமகஸதங், சத்தாரீஸானி த்³வே புச்சா²ஸதானி, அஸீத்யாதி⁴கானி சத்தாரி அத்த²ஸதானி ச ஹொந்தீதி இத³மெத்த² பாளிவவத்தா²னங்.
Atha vā pariññākiccaṃ nāma puggalasseva hoti, no okāsassa, puggalova parijānituṃ samattho, no okāsoti puggalavārovettha gahito, na okāsavāro. Tassa pana aggahitattā tadanantaro puggalokāsavāro labbhamānopi na gahito. Yo panesa puggalavāro gahito, tattha paccuppannakāle rūpakkhandhamūlakāni cattāri, vedanākkhandhamūlakāni tīṇi, saññākkhandhamūlakāni dve, saṅkhārakkhandhamūlakaṃ ekanti heṭṭhā vuttanayeneva anulomanaye aggahitaggahaṇena dasa yamakāni. Paṭilomanaye dasāti vīsati. Tathā sesesupīti ekekasmiṃ kāle vīsati vīsati katvā chasu kālesu vīsaṃ yamakasataṃ, cattārīsāni dve pucchāsatāni, asītyādhikāni cattāri atthasatāni ca hontīti idamettha pāḷivavatthānaṃ.
அத்த²வினிச்ச²யே பனெத்த² அதீதானாக³தபச்சுப்பன்னஸங்கா²தா தயோ அத்³தா⁴ பவத்திவாரே விய சுதிபடிஸந்தி⁴வஸேன ந லப்³ப⁴ந்தி. பவத்தே சித்தக்க²ணவஸேனேவ லப்³ப⁴ந்தி. தேனேவெத்த² ‘யோ ரூபக்க²ந்த⁴ங் பரிஜானாதி, ஸோ வேத³னாக்க²ந்த⁴ங் பரிஜானாதீ’திஆதீ³ஸு புச்சா²ஸு ‘ஆமந்தா’தி விஸ்ஸஜ்ஜனங் கதங். லோகுத்தரமக்³க³க்க²ணஸ்மிஞ்ஹி நிப்³பா³னாரம்மணேன சித்தேன பஞ்சஸு க²ந்தே⁴ஸு பரிஞ்ஞாகிச்சனிப்³ப³த்தியா யங் கிஞ்சி ஏகங் க²ந்த⁴ங் பரிஜானந்தோ இதரம்பி பரிஜானாதீதி வுச்சதி. ஏவமெத்த² ‘பரிஜானாதீ’தி பஞ்ஹேஸு அனுலோமனயே பரிஞ்ஞாகிச்சஸ்ஸ மத்த²கப்பத்தங் அக்³க³மக்³க³ஸமங்கி³ங் ஸந்தா⁴ய ‘ஆமந்தா’தி வுத்தந்தி வேதி³தப்³ப³ங். படிலோமனயே பன ‘ந பரிஜானாதீ’தி பஞ்ஹேஸு புது²ஜ்ஜனாத³யோ ஸந்தா⁴ய ‘ஆமந்தா’தி வுத்தங். ‘பரிஜானித்தா²’தி இமஸ்மிங் பன அதீதகாலவாரே மக்³கா³னந்தரஅக்³க³ப²லே டி²தோபி பரிஞ்ஞாகிச்சஸ்ஸ நிட்டி²தத்தா பரிஜானித்த²யேவ நாம.
Atthavinicchaye panettha atītānāgatapaccuppannasaṅkhātā tayo addhā pavattivāre viya cutipaṭisandhivasena na labbhanti. Pavatte cittakkhaṇavaseneva labbhanti. Tenevettha ‘yo rūpakkhandhaṃ parijānāti, so vedanākkhandhaṃ parijānātī’tiādīsu pucchāsu ‘āmantā’ti vissajjanaṃ kataṃ. Lokuttaramaggakkhaṇasmiñhi nibbānārammaṇena cittena pañcasu khandhesu pariññākiccanibbattiyā yaṃ kiñci ekaṃ khandhaṃ parijānanto itarampi parijānātīti vuccati. Evamettha ‘parijānātī’ti pañhesu anulomanaye pariññākiccassa matthakappattaṃ aggamaggasamaṅgiṃ sandhāya ‘āmantā’ti vuttanti veditabbaṃ. Paṭilomanaye pana ‘na parijānātī’ti pañhesu puthujjanādayo sandhāya ‘āmantā’ti vuttaṃ. ‘Parijānitthā’ti imasmiṃ pana atītakālavāre maggānantaraaggaphale ṭhitopi pariññākiccassa niṭṭhitattā parijānitthayeva nāma.
209. யோ ரூபக்க²ந்த⁴ங் பரிஜானாதி, ஸோ வேத³னாக்க²ந்த⁴ங் பரிஜானித்தா²தி பஞ்ஹேன அக்³க³மக்³க³ஸமங்கி³ங் புச்ச²தி. யஸ்மா பனேஸ க²ந்த⁴பஞ்சகங் பரிஜானாதியேவ நாம, ந தாவ நிட்டி²தபரிஞ்ஞாகிச்சோ; தஸ்மா ‘நோ’தி படிஸேதோ⁴ கதோ. து³தியபஞ்ஹே பன பரிஜானித்தா²தி அரஹந்தங் புச்ச²தி. யஸ்மா பனேஸோ நிட்டி²தபரிஞ்ஞாகிச்சோ. நத்தி² தஸ்ஸ பரிஞ்ஞெய்யங் நாம; தஸ்மா ‘நோ’தி படிஸேதோ⁴ கதோ. படிலோமனயவிஸ்ஸஜ்ஜனே பனெத்த² அரஹா ரூபக்க²ந்த⁴ங் ந பரிஜானாதீதி அரஹதோ பரிஞ்ஞாய அபா⁴வேன வுத்தங். அக்³க³மக்³க³ஸமங்கீ³ வேத³னாக்க²ந்த⁴ங் ந பரிஜானித்தா²தி அரஹத்தமக்³க³ட்ட²ஸ்ஸ அனிட்டி²தபரிஞ்ஞாகிச்சதாய வுத்தங். ந கேவலஞ்ச வேத³னாக்க²ந்த⁴மேவ, ஏகத⁴ம்மம்பி ஸோ ந பரிஜானித்தே²வ. இத³ங் பன புச்சா²வஸேன வுத்தங். நோ ச ரூபக்க²ந்த⁴ந்தி இத³ம்பி புச்சா²வஸேனேவ வுத்தங். அஞ்ஞம்பி பன ஸோ க²ந்த⁴ங் பரிஜானாதி.
209. Yo rūpakkhandhaṃ parijānāti, so vedanākkhandhaṃ parijānitthāti pañhena aggamaggasamaṅgiṃ pucchati. Yasmā panesa khandhapañcakaṃ parijānātiyeva nāma, na tāva niṭṭhitapariññākicco; tasmā ‘no’ti paṭisedho kato. Dutiyapañhe pana parijānitthāti arahantaṃ pucchati. Yasmā paneso niṭṭhitapariññākicco. Natthi tassa pariññeyyaṃ nāma; tasmā ‘no’ti paṭisedho kato. Paṭilomanayavissajjane panettha arahā rūpakkhandhaṃ na parijānātīti arahato pariññāya abhāvena vuttaṃ. Aggamaggasamaṅgī vedanākkhandhaṃ na parijānitthāti arahattamaggaṭṭhassa aniṭṭhitapariññākiccatāya vuttaṃ. Na kevalañca vedanākkhandhameva, ekadhammampi so na parijānittheva. Idaṃ pana pucchāvasena vuttaṃ. No ca rūpakkhandhanti idampi pucchāvaseneva vuttaṃ. Aññampi pana so khandhaṃ parijānāti.
210-211. யோ ரூபக்க²ந்த⁴ங் பரிஜானாதி, ஸோ வேத³னாக்க²ந்த⁴ங் பரிஜானிஸ்ஸதீதி எத்த² யஸ்மா மக்³க³ட்ட²புக்³க³லோ ஏகசித்தக்க²ணிகோ, தஸ்மா ஸோ பரிஜானிஸ்ஸதீதி ஸங்க²ங் ந க³ச்ச²தி. தேன வுத்தங் ‘நோ’தி. தே ரூபக்க²ந்த⁴ஞ்ச ந பரிஜானித்தா²தி புச்சா²ஸபா⁴கே³ன வுத்தங், ந பரிஜானிங்ஸூதி பனெத்த² அத்தோ². இமினா உபாயேன ஸப்³ப³த்த² அத்த²வினிச்ச²யோ வேதி³தப்³போ³தி.
210-211. Yo rūpakkhandhaṃ parijānāti, so vedanākkhandhaṃ parijānissatīti ettha yasmā maggaṭṭhapuggalo ekacittakkhaṇiko, tasmā so parijānissatīti saṅkhaṃ na gacchati. Tena vuttaṃ ‘no’ti. Te rūpakkhandhañca naparijānitthāti pucchāsabhāgena vuttaṃ, na parijāniṃsūti panettha attho. Iminā upāyena sabbattha atthavinicchayo veditabboti.
பரிஞ்ஞாவாரவண்ணனா.
Pariññāvāravaṇṇanā.
க²ந்த⁴யமகவண்ணனா நிட்டி²தா.
Khandhayamakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / யமகபாளி • Yamakapāḷi / 2. க²ந்த⁴யமகங் • 2. Khandhayamakaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. க²ந்த⁴யமகங் • 2. Khandhayamakaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. க²ந்த⁴யமகங் • 2. Khandhayamakaṃ
