| Library / Tipiṭaka / д̇ибидага • Tipiṭaka / бан̃жабагаран̣а-мууладийгаа • Pañcapakaraṇa-mūlaṭīkā |
2. канд̇хаяамагам̣
2. Khandhayamakaṃ
1. бан̣н̣ад̇д̇ивааро
1. Paṇṇattivāro
уд̣̇д̣̇зсаваараван̣н̣анаа
Uddesavāravaṇṇanā
2-3. канд̇хаяамагз часу гаалабхзд̣̇зсу буг̇г̇алаогаасабуг̇г̇алогаасавасзна канд̇хаанам̣ уббаад̣̇анирод̇хаа д̇зсам̣ барин̃н̃аа жа вад̇д̇аб̣б̣аа. д̇з бана канд̇хаа ‘‘руубагканд̇хо’’д̇иаад̣̇ийхи бан̃жахи бад̣̇зхи вужжанд̇и, д̇зсам̣ д̣̇аса аваяавабад̣̇аани. д̇ад̇т̇а яо руубаад̣̇иаваяавабад̣̇аабхихид̇о д̇хаммо, гим̣ со зва самуд̣̇ааяабад̣̇асса ад̇т̇о. яо жа самуд̣̇ааяабад̣̇зна вуд̇д̇о, со зва аваяавабад̣̇ассаад̇и зд̇асмим̣ сам̣саяадтаанз руубаад̣̇иаваяавабад̣̇зхи вуд̇д̇о згад̣̇зсо сагало ваа самуд̣̇ааяабад̣̇аанам̣ ад̇т̇о, самуд̣̇ааяабад̣̇зхи бана вуд̇д̇о зганд̇зна руубаад̣̇иаваяавабад̣̇аанам̣ ад̇т̇од̇и имамад̇т̇ам̣ д̣̇ассзд̇ум̣ ‘‘руубам̣ руубагканд̇хо, руубагканд̇хо рууба’’нд̇иаад̣̇инаа бад̣̇асод̇ханавааро вуд̇д̇о.
2-3. Khandhayamake chasu kālabhedesu puggalaokāsapuggalokāsavasena khandhānaṃ uppādanirodhā tesaṃ pariññā ca vattabbā. Te pana khandhā ‘‘rūpakkhandho’’tiādīhi pañcahi padehi vuccanti, tesaṃ dasa avayavapadāni. Tattha yo rūpādiavayavapadābhihito dhammo, kiṃ so eva samudāyapadassa attho. Yo ca samudāyapadena vutto, so eva avayavapadassāti etasmiṃ saṃsayaṭṭhāne rūpādiavayavapadehi vutto ekadeso sakalo vā samudāyapadānaṃ attho, samudāyapadehi pana vutto ekantena rūpādiavayavapadānaṃ atthoti imamatthaṃ dassetuṃ ‘‘rūpaṃ rūpakkhandho, rūpakkhandho rūpa’’ntiādinā padasodhanavāro vutto.
буна ‘‘руубагканд̇хо’’д̇иаад̣̇ийнам̣ самаасабад̣̇аанам̣ уд̇д̇арабад̣̇ад̇т̇аббад̇хаанад̇д̇аа бад̇хаанабхууд̇асса канд̇хабад̣̇асса взд̣̇анаад̣̇иубабад̣̇ад̇т̇асса жа самбхавад̇о яат̇аа ‘‘руубагканд̇хо’’д̇и зд̇асмим̣ бад̣̇з руубааваяавабад̣̇зна вуд̇д̇асса руубагканд̇хабхааво ход̇и руубасад̣̇д̣̇асса канд̇хасад̣̇д̣̇асса жа самаанаад̇хигаран̣абхаавад̇од̇и, звам̣ д̇ад̇т̇а бад̇хаанабхууд̇зна канд̇хааваяавабад̣̇зна вуд̇д̇асса взд̣̇анаагканд̇хаад̣̇ибхааво ход̇и канд̇хабад̣̇зна взд̣̇анаад̣̇ибад̣̇аанам̣ самаанаад̇хигаран̣ад̇д̇аад̇и зд̇асмим̣ сам̣саяадтаанз канд̇хааваяавабад̣̇зна вуд̇д̇о д̇хаммо гожи гзнажи самуд̣̇ааяабад̣̇зна вужжад̇и, на саб̣б̣о саб̣б̣знаад̇и имамад̇т̇ам̣ д̣̇ассзд̇ум̣ ‘‘руубам̣ руубагканд̇хо, канд̇хаа взд̣̇анаагканд̇хо’’д̇иаад̣̇инаа бад̣̇асод̇ханамуулажаггавааро вуд̇д̇о. зван̃жа д̣̇ассзнд̇зна руубаад̣̇исад̣̇д̣̇асса висзсанабхааво, канд̇хасад̣̇д̣̇асса висзсид̇аб̣б̣абхааво, висзсанависзсид̇аб̣б̣аанам̣ самаанаад̇хигаран̣абхааво жа д̣̇ассид̇о ход̇и.
Puna ‘‘rūpakkhandho’’tiādīnaṃ samāsapadānaṃ uttarapadatthappadhānattā padhānabhūtassa khandhapadassa vedanādiupapadatthassa ca sambhavato yathā ‘‘rūpakkhandho’’ti etasmiṃ pade rūpāvayavapadena vuttassa rūpakkhandhabhāvo hoti rūpasaddassa khandhasaddassa ca samānādhikaraṇabhāvatoti, evaṃ tattha padhānabhūtena khandhāvayavapadena vuttassa vedanākkhandhādibhāvo hoti khandhapadena vedanādipadānaṃ samānādhikaraṇattāti etasmiṃ saṃsayaṭṭhāne khandhāvayavapadena vutto dhammo koci kenaci samudāyapadena vuccati, na sabbo sabbenāti imamatthaṃ dassetuṃ ‘‘rūpaṃ rūpakkhandho, khandhā vedanākkhandho’’tiādinā padasodhanamūlacakkavāro vutto. Evañca dassentena rūpādisaddassa visesanabhāvo, khandhasaddassa visesitabbabhāvo, visesanavisesitabbānaṃ samānādhikaraṇabhāvo ca dassito hoti.
д̇знзд̇т̇а сам̣саяо ход̇и – гим̣ канд̇хад̇о ан̃н̃амби руубам̣ ад̇т̇и, яад̇о винивад̇д̇ам̣ руубам̣ канд̇хависзсанам̣ ход̇и, саб̣б̣зва канд̇хаа гим̣ канд̇хависзсанабхууд̇зна руубзна висзсид̇аб̣б̣аад̇и, гим̣ бана д̇ам̣ канд̇хависзсанабхууд̇ам̣ руубанд̇и? бхууд̇убаад̣̇ааяаруубам̣ д̇ассзва г̇ахид̇ад̇д̇аа. нид̣̇д̣̇зсз ‘‘канд̇хаа руубагканд̇хо’’д̇и бад̣̇ам̣ уд̣̇д̇харид̇ваа виссаж̇ж̇анам̣ гад̇анд̇и. звам̣ зд̇асмим̣ сам̣саяадтаанз на канд̇хад̇о ан̃н̃ам̣ руубам̣ ад̇т̇и, д̇знзва жзд̇зна руубасад̣̇д̣̇зна вужжамаанам̣ суд̣̇д̇хзна канд̇хасад̣̇д̣̇зна вужжад̇з, на жа саб̣б̣з канд̇хаа канд̇хависзсанабхууд̇зна руубзна висзсид̇аб̣б̣аа, д̇знзва д̇з вибхаж̇ид̇аб̣б̣аа, зса наяо взд̣̇анаагканд̇хаад̣̇ийсубийд̇и имамад̇т̇ам̣ д̣̇ассзд̇ум̣ ‘‘руубам̣ канд̇хо, канд̇хаа рууба’’нд̇иаад̣̇инаа суд̣̇д̇хаканд̇хавааро вуд̇д̇о.
Tenettha saṃsayo hoti – kiṃ khandhato aññampi rūpaṃ atthi, yato vinivattaṃ rūpaṃ khandhavisesanaṃ hoti, sabbeva khandhā kiṃ khandhavisesanabhūtena rūpena visesitabbāti, kiṃ pana taṃ khandhavisesanabhūtaṃ rūpanti? Bhūtupādāyarūpaṃ tasseva gahitattā. Niddese ‘‘khandhā rūpakkhandho’’ti padaṃ uddharitvā vissajjanaṃ katanti. Evaṃ etasmiṃ saṃsayaṭṭhāne na khandhato aññaṃ rūpaṃ atthi, teneva cetena rūpasaddena vuccamānaṃ suddhena khandhasaddena vuccate, na ca sabbe khandhā khandhavisesanabhūtena rūpena visesitabbā, teneva te vibhajitabbā, esa nayo vedanākkhandhādīsupīti imamatthaṃ dassetuṃ ‘‘rūpaṃ khandho, khandhā rūpa’’ntiādinā suddhakhandhavāro vutto.
д̇ад̇о ‘‘руубам̣ канд̇хо’’д̇и зд̇асмим̣ анун̃н̃ааяамаанз ‘‘на гзвалам̣ аяам̣ канд̇хасад̣̇д̣̇о руубависзсанова, ат̇а ко взд̣̇анаад̣̇ивисзсано жаа’’д̇и руубасса канд̇хабхааванижчаяаананд̇арам̣ канд̇хаанам̣ руубависзсанаяог̇з жа сам̣саяо ход̇и. д̇ад̇т̇а на саб̣б̣з канд̇хаа взд̣̇анаад̣̇ивисзсанаяуд̇д̇аа, ат̇а ко гзжи гзнажи висзсанзна яун̃ж̇анд̇ийд̇и д̣̇ассзд̇ум̣ суд̣̇д̇хаканд̇хамуулажаггавааро вуд̇д̇од̇и. звам̣ язсам̣ уббаад̣̇аад̣̇аяо вад̇д̇аб̣б̣аа, д̇зсам̣ канд̇хаанам̣ бан̣н̣ад̇д̇исод̇ханавасзна д̇аннижчаяад̇т̇ам̣ бан̣н̣ад̇д̇ивааро вуд̇д̇од̇и взд̣̇ид̇аб̣б̣о.
Tato ‘‘rūpaṃ khandho’’ti etasmiṃ anuññāyamāne ‘‘na kevalaṃ ayaṃ khandhasaddo rūpavisesanova, atha kho vedanādivisesano cā’’ti rūpassa khandhabhāvanicchayānantaraṃ khandhānaṃ rūpavisesanayoge ca saṃsayo hoti. Tattha na sabbe khandhā vedanādivisesanayuttā, atha kho keci kenaci visesanena yuñjantīti dassetuṃ suddhakhandhamūlacakkavāro vuttoti. Evaṃ yesaṃ uppādādayo vattabbā, tesaṃ khandhānaṃ paṇṇattisodhanavasena tannicchayatthaṃ paṇṇattivāro vuttoti veditabbo.
жад̇д̇аари жад̇д̇аари жаггаани б̣анд̇хид̇ваад̇и зд̇т̇а жаггааваяавабхаавад̇о жаггаанийд̇и яамагаани вуд̇д̇аани згзгаканд̇хамуулаани жад̇д̇аари жад̇д̇аари яамагаани б̣анд̇хид̇ваад̇и. иминаа хи зд̇т̇а ад̇т̇зна бхавид̇аб̣б̣анд̇и. жад̇д̇аари жад̇д̇аари яамагаани яат̇аа згзгаканд̇хамуулагаани хонд̇и, звам̣ б̣анд̇хид̇ваад̇и ваа ад̇т̇о д̣̇адтаб̣б̣о. д̇ад̇т̇а ‘‘руубам̣ руубагканд̇хо’’д̇и звамаад̣̇игам̣ муулабад̣̇ам̣ наабхим̣ гад̇ваа ‘‘канд̇хаа’’д̇и ид̣̇ам̣ нзмим̣, ‘‘взд̣̇анаагканд̇хо’’д̇иаад̣̇ийни арз гад̇ваа жаггабхааво вуд̇д̇од̇и взд̣̇ид̇аб̣б̣о, на ман̣д̣алабхаавзна самб̣аж̇жханад̇о. взд̣̇анаагканд̇хамуулагаад̣̇ийсуби хи хздтимам̣ сод̇хзд̇ваава баато г̇ад̇о, на ман̣д̣аласамб̣анд̇хзнаад̇и. д̇знзва жа гааран̣знаад̇и суд̣̇д̇хаканд̇халаабхамад̇д̇амзва г̇ахзд̇ваа канд̇хависзсанз руубаад̣̇имхи суд̣̇д̇харуубаад̣̇имад̇д̇ад̇ааяа адтад̇ваа канд̇хависзсанабхаавасан̇каад̇ам̣ руубаад̣̇иад̇т̇ам̣ д̣̇ассзд̇ум̣ канд̇хасад̣̇д̣̇зна саха яож̇зд̇ваа ‘‘канд̇хаа руубагканд̇хо’’д̇иаад̣̇инаа наязна бад̣̇ам̣ уд̣̇д̇харид̇ваа ад̇т̇асса вибхад̇д̇ад̇д̇аад̇и ад̇т̇о.
Cattāri cattāri cakkāni bandhitvāti ettha cakkāvayavabhāvato cakkānīti yamakāni vuttāni ekekakhandhamūlāni cattāri cattāri yamakāni bandhitvāti. Iminā hi ettha atthena bhavitabbanti. Cattāri cattāri yamakāni yathā ekekakhandhamūlakāni honti, evaṃ bandhitvāti vā attho daṭṭhabbo. Tattha ‘‘rūpaṃ rūpakkhandho’’ti evamādikaṃ mūlapadaṃ nābhiṃ katvā ‘‘khandhā’’ti idaṃ nemiṃ, ‘‘vedanākkhandho’’tiādīni are katvā cakkabhāvo vuttoti veditabbo, na maṇḍalabhāvena sambajjhanato. Vedanākkhandhamūlakādīsupi hi heṭṭhimaṃ sodhetvāva pāṭho gato, na maṇḍalasambandhenāti. Teneva ca kāraṇenāti suddhakhandhalābhamattameva gahetvā khandhavisesane rūpādimhi suddharūpādimattatāya aṭṭhatvā khandhavisesanabhāvasaṅkhātaṃ rūpādiatthaṃ dassetuṃ khandhasaddena saha yojetvā ‘‘khandhā rūpakkhandho’’tiādinā nayena padaṃ uddharitvā atthassa vibhattattāti attho.
уд̣̇д̣̇зсаваараван̣н̣анаа нидтид̇аа.
Uddesavāravaṇṇanā niṭṭhitā.
нид̣̇д̣̇зсаваараван̣н̣анаа
Niddesavāravaṇṇanā
26. бияаруубам̣ саад̇аруубанд̇и ‘‘жагкум̣ логз бияаруубам̣…бз… руубаа логз…бз… жагкувин̃н̃аан̣ам̣…бз… жагкусампассо…бз… жагкусампассаж̇аа взд̣̇анаа…бз… руубасан̃н̃аа…бз… руубасан̃жзд̇анаа…бз… руубад̇ан̣хаа…бз… руубавид̇агго…бз… руубавижааро’’д̇и (д̣̇ий. ни. 2.400; ма. ни. 1.133; вибха. 203) звам̣ вуд̇д̇ам̣ д̇ан̣хаавад̇т̇убхууд̇ам̣ д̇збхуумагам̣ взд̣̇ид̇аб̣б̣ам̣, д̇асмаа яам̣ бан̃жагканд̇хасамуд̣̇ааяабхууд̇ам̣ бияаруубасаад̇аруубам̣, д̇ам̣ згад̣̇зсзна руубагканд̇хо ход̇ийд̇и ааха ‘‘бияаруубам̣ саад̇аруубам̣ руубам̣ на руубагканд̇хо’’д̇и. бияасабхаавад̇ааяа ваа руубагканд̇хо бияаруубз бависад̇и, на руббанасабхаавзнаад̇и ‘‘бияаруубам̣ саад̇аруубам̣ руубам̣ на руубагканд̇хо’’д̇и вуд̇д̇ам̣. сан̃н̃ааяамагз д̇аава д̣̇идтисан̃н̃аад̇и ‘‘висзсо’’д̇и важанасзсо. д̇ад̇т̇а д̣̇идти зва сан̃н̃аа д̣̇идтисан̃н̃аа. ‘‘саяам̣ самаад̣̇ааяа вад̇аани ж̇анд̇у, ужжааважам̣ г̇ажчад̇и сан̃н̃асад̇д̇о’’д̇и (су. ни. 798), ‘‘сан̃н̃аавирад̇д̇асса на санд̇и г̇ант̇аа’’д̇и (су. ни. 853) жа звамаад̣̇ийсу хи д̣̇идти жа ‘‘сан̃н̃аа’’д̇и вуд̇д̇аад̇и.
26. Piyarūpaṃ sātarūpanti ‘‘cakkhuṃ loke piyarūpaṃ…pe… rūpā loke…pe… cakkhuviññāṇaṃ…pe… cakkhusamphasso…pe… cakkhusamphassajā vedanā…pe… rūpasaññā…pe… rūpasañcetanā…pe… rūpataṇhā…pe… rūpavitakko…pe… rūpavicāro’’ti (dī. ni. 2.400; ma. ni. 1.133; vibha. 203) evaṃ vuttaṃ taṇhāvatthubhūtaṃ tebhūmakaṃ veditabbaṃ, tasmā yaṃ pañcakkhandhasamudāyabhūtaṃ piyarūpasātarūpaṃ, taṃ ekadesena rūpakkhandho hotīti āha ‘‘piyarūpaṃ sātarūpaṃ rūpaṃ na rūpakkhandho’’ti. Piyasabhāvatāya vā rūpakkhandho piyarūpe pavisati, na ruppanasabhāvenāti ‘‘piyarūpaṃ sātarūpaṃ rūpaṃ na rūpakkhandho’’ti vuttaṃ. Saññāyamake tāva diṭṭhisaññāti ‘‘viseso’’ti vacanaseso. Tattha diṭṭhi eva saññā diṭṭhisaññā. ‘‘Sayaṃ samādāya vatāni jantu, uccāvacaṃ gacchati saññasatto’’ti (su. ni. 798), ‘‘saññāvirattassa na santi ganthā’’ti (su. ni. 853) ca evamādīsu hi diṭṭhi ca ‘‘saññā’’ti vuttāti.
28. ‘‘на канд̇хаа на взд̣̇анаагканд̇ход̇и? ааманд̇аа’’д̇и звам̣ канд̇хасад̣̇д̣̇аббавад̇д̇ияаа абхаавз взд̣̇анаагканд̇хасад̣̇д̣̇аббавад̇д̇ияаа жа абхаавод̇и бан̣н̣ад̇д̇исод̇ханамад̇д̇амзва гарод̇ийд̇и д̣̇адтаб̣б̣ам̣, на ан̃н̃ад̇хаммасаб̣бхааво звзд̇т̇а бамаан̣ам̣. зван̃жа гад̇ваа ‘‘нааяад̇анаа на сод̇ааяад̇ананд̇и? ааманд̇аа’’д̇иаад̣̇им̣ вагкад̇ийд̇и.
28. ‘‘Na khandhā na vedanākkhandhoti? Āmantā’’ti evaṃ khandhasaddappavattiyā abhāve vedanākkhandhasaddappavattiyā ca abhāvoti paṇṇattisodhanamattameva karotīti daṭṭhabbaṃ, na aññadhammasabbhāvo evettha pamāṇaṃ. Evañca katvā ‘‘nāyatanā na sotāyatananti? Āmantā’’tiādiṃ vakkhatīti.
39. руубад̇о ан̃н̃з взд̣̇анаад̣̇аяод̇и зд̇т̇а логуд̇д̇араа взд̣̇анаад̣̇аяо д̣̇адтаб̣б̣аа. д̇з хи бияаруубаа жа саад̇аруубаа жа на хонд̇и д̇ан̣хааяа анаарамман̣ад̇д̇аад̇и руубад̇о ан̃н̃з хонд̇ийд̇и. руубан̃жа канд̇хз жа табзд̇ваа авасзсаад̇и ид̣̇амби зд̇зхи сад̣̇д̇хим̣ на-сад̣̇д̣̇аанам̣ аббавад̇д̇имад̇д̇амзва санд̇хааяа вуд̇д̇анд̇и д̣̇адтаб̣б̣ам̣. зван̃жа гад̇ваа ‘‘жагкун̃жа ааяад̇анз жа табзд̇ваа авасзсаа на жзва жагку на жа ааяад̇анаа’’д̇иаад̣̇им̣ (яама. 1.ааяад̇анаяамага.15) вагкад̇и. на хи д̇ад̇т̇а авасзсаг̇г̇ахан̣зна г̇аяхамаанам̣ ган̃жи ад̇т̇и. яад̣̇и сияаа, д̇хаммааяад̇анам̣ сияаа. вагкад̇и хи ‘‘д̇хаммо ааяад̇ананд̇и? ааманд̇аа’’д̇и (яама. 1.ааяад̇анаяамага.16). д̇ан̣хаавад̇т̇у жа на д̇ам̣ сияаа. яад̣̇и сияаа, бияаруубасаад̇аруубабхаавад̇о руубам̣ сияаа ‘‘руубам̣ канд̇ход̇и? ааманд̇аа’’д̇и (яама. 1.канд̇хаяамага.40) важанад̇о канд̇хо жаад̇и. адтагат̇ааяам̣ бана авиж̇ж̇амаанзби виж̇ж̇амаанам̣ убаад̣̇ааяа ид̇т̇ибурисаад̣̇иг̇г̇ахан̣асаб̣бхаавам̣ санд̇хааяа авасзсаад̇и зд̇т̇а бан̃н̃ад̇д̇ияаа г̇ахан̣ам̣ гад̇анд̇и взд̣̇ид̇аб̣б̣ам̣.
39. Rūpato aññe vedanādayoti ettha lokuttarā vedanādayo daṭṭhabbā. Te hi piyarūpā ca sātarūpā ca na honti taṇhāya anārammaṇattāti rūpato aññe hontīti. Rūpañca khandhe caṭhapetvā avasesāti idampi etehi saddhiṃ na-saddānaṃ appavattimattameva sandhāya vuttanti daṭṭhabbaṃ. Evañca katvā ‘‘cakkhuñca āyatane ca ṭhapetvā avasesā na ceva cakkhu na ca āyatanā’’tiādiṃ (yama. 1.āyatanayamaka.15) vakkhati. Na hi tattha avasesaggahaṇena gayhamānaṃ kañci atthi. Yadi siyā, dhammāyatanaṃ siyā. Vakkhati hi ‘‘dhammo āyatananti? Āmantā’’ti (yama. 1.āyatanayamaka.16). Taṇhāvatthu ca na taṃ siyā. Yadi siyā, piyarūpasātarūpabhāvato rūpaṃ siyā ‘‘rūpaṃ khandhoti? Āmantā’’ti (yama. 1.khandhayamaka.40) vacanato khandho cāti. Aṭṭhakathāyaṃ pana avijjamānepi vijjamānaṃ upādāya itthipurisādiggahaṇasabbhāvaṃ sandhāya avasesāti ettha paññattiyā gahaṇaṃ katanti veditabbaṃ.
нид̣̇д̣̇зсаваараван̣н̣анаа нидтид̇аа.
Niddesavāravaṇṇanā niṭṭhitā.
2. бавад̇д̇иваараван̣н̣анаа
2. Pavattivāravaṇṇanā
50-205. бавад̇д̇иваарз взд̣̇анаагканд̇хаад̣̇имуулагаани бажчимзнзва саха яож̇зд̇ваа д̇ийн̣и д̣̇вз зган̃жа яамагаани вуд̇д̇аани, на буримзна. гасмаа? амиссагагаалабхзд̣̇зсу ваарзсу ад̇т̇ависзсаабхаавад̇о. буримасса хи бажчимзна яож̇ид̇аяамагамзва бажчимасса буримзна яож̇анааяа бужчаанам̣ уббадибаадияаа вужжзяяа, ад̇т̇з бана на гожи висзсод̇и. бужчаависсаж̇ж̇анзсуби висзсо над̇т̇и, д̇зна д̇ат̇аа яож̇анаа на гад̇аад̇и. гаалабхзд̣̇аа банзд̇т̇а ча зва вуд̇д̇аа. ад̇ийд̇зна бажжуббанно, анааг̇ад̇зна бажжуббанно, анааг̇ад̇знаад̇ийд̇од̇и зд̇з бана д̇аяо яат̇аад̣̇ассид̇аа миссагагаалабхзд̣̇аа зва д̇аяо, на висум̣ виж̇ж̇анд̇ийд̇и на г̇ахид̇аа. д̇ад̇т̇а д̇ад̇т̇а хи бадиломабужчаахи ад̇ийд̇зна бажжуббаннаад̣̇аяо гаалабхзд̣̇аа д̣̇ассид̇аа, д̇знзва жа наязна ‘‘яасса руубагканд̇хо уббаж̇ж̇ид̇т̇а, д̇асса взд̣̇анаагканд̇хо уббаж̇ж̇ад̇ий’’д̇иаад̣̇и саггаа яож̇зд̇ум̣. д̇знзва хи миссагагаалабхзд̣̇зсу жа на бажчимабажчимасса канд̇хасса буримабуримзна яож̇анам̣ гад̇ваа яамагаани вуд̇д̇аани, амиссагагаалабхзд̣̇зсу г̇ахид̇анияаамзна сукаг̇г̇ахан̣ад̇т̇амби бажчимабажчимзнзва яож̇зд̇ваа вуд̇д̇аанийд̇и.
50-205. Pavattivāre vedanākkhandhādimūlakāni pacchimeneva saha yojetvā tīṇi dve ekañca yamakāni vuttāni, na purimena. Kasmā? Amissakakālabhedesu vāresu atthavisesābhāvato. Purimassa hi pacchimena yojitayamakameva pacchimassa purimena yojanāya pucchānaṃ uppaṭipāṭiyā vucceyya, atthe pana na koci visesoti. Pucchāvissajjanesupi viseso natthi, tena tathā yojanā na katāti. Kālabhedā panettha cha eva vuttā. Atītena paccuppanno, anāgatena paccuppanno, anāgatenātītoti ete pana tayo yathādassitā missakakālabhedā eva tayo, na visuṃ vijjantīti na gahitā. Tattha tattha hi paṭilomapucchāhi atītena paccuppannādayo kālabhedā dassitā, teneva ca nayena ‘‘yassa rūpakkhandho uppajjittha, tassa vedanākkhandho uppajjatī’’tiādi sakkā yojetuṃ. Teneva hi missakakālabhedesu ca na pacchimapacchimassa khandhassa purimapurimena yojanaṃ katvā yamakāni vuttāni, amissakakālabhedesu gahitaniyāmena sukhaggahaṇatthampi pacchimapacchimeneva yojetvā vuttānīti.
иминааязва жа лагкан̣знаад̇иаад̣̇инаа язна гааран̣зна ‘‘бурзбан̃хо’’д̇и жа ‘‘бажчаабан̃хо’’д̇и жа наамам̣ вуд̇д̇ам̣, д̇ам̣ д̣̇ассзд̇и. яасса хи саруубад̣̇ассанзна виссаж̇ж̇анам̣ ход̇и, со барибуурзд̇ваа виссаж̇ж̇зд̇аб̣б̣ад̇т̇асан̇г̇ан̣ханад̇о барибун̣н̣абан̃хо наама. д̇ам̣виссаж̇ж̇анасса бана буримагодтаасзна сад̣̇исад̇т̇ад̇ааяа бурзбан̃хо, бажчимагодтаасасад̣̇исад̇т̇ад̇ааяа ‘‘бажчаабан̃хо’’д̇и жа наамам̣ вуд̇д̇ам̣. сад̣̇исад̇т̇ад̇аа жа саннидтаанасам̣саяабад̣̇ависзсам̣ авижаарзд̇ваа згзна бад̣̇зна сан̇г̇ахид̇асса канд̇хасса уббаад̣̇анирод̇халаабхасааман̃н̃амад̇д̇зна бурзбан̃хз д̣̇адтаб̣б̣аа. саннидтаанабад̣̇асан̇г̇ахид̇асса ваа канд̇хасса анун̃н̃аад̇авасзна бурзбан̃хо вуд̇д̇од̇и яуд̇д̇ам̣.
Imināyevaca lakkhaṇenātiādinā yena kāraṇena ‘‘purepañho’’ti ca ‘‘pacchāpañho’’ti ca nāmaṃ vuttaṃ, taṃ dasseti. Yassa hi sarūpadassanena vissajjanaṃ hoti, so paripūretvā vissajjetabbatthasaṅgaṇhanato paripuṇṇapañho nāma. Taṃvissajjanassa pana purimakoṭṭhāsena sadisatthatāya purepañho, pacchimakoṭṭhāsasadisatthatāya ‘‘pacchāpañho’’ti ca nāmaṃ vuttaṃ. Sadisatthatā ca sanniṭṭhānasaṃsayapadavisesaṃ avicāretvā ekena padena saṅgahitassa khandhassa uppādanirodhalābhasāmaññamattena purepañhe daṭṭhabbā. Sanniṭṭhānapadasaṅgahitassa vā khandhassa anuññātavasena purepañho vuttoti yuttaṃ.
саннидтаанад̇т̇ассзва бадигкибанам̣ бадигкзбо, сам̣саяад̇т̇анивааран̣ам̣ бадисзд̇ход̇и аяам̣ бадигкзбабадисзд̇хаанам̣ висзсо. баал̣ибад̣̇амзва худ̇ваад̇и бужчаабаал̣ияаа ‘‘нуббаж̇ж̇ад̇ий’’д̇и яам̣ бад̣̇ам̣ вуд̇д̇ам̣, на-гааравирахид̇ам̣ д̇ад̣̇зва бад̣̇ам̣ худ̇ваад̇и ад̇т̇о. д̇ад̇т̇а уббад̇д̇инирод̇хабадисзд̇хасса бадисзд̇ханад̇т̇ам̣ баал̣иг̇ад̇ияаа виссаж̇ж̇анам̣ уббад̇д̇инирод̇хаанамзва бадисзд̇ханад̇т̇ам̣ бадисзд̇хзна виссаж̇ж̇анам̣ гад̇анд̇и взд̣̇ид̇аб̣б̣ам̣.
Sanniṭṭhānatthasseva paṭikkhipanaṃ paṭikkhepo, saṃsayatthanivāraṇaṃ paṭisedhoti ayaṃ paṭikkhepapaṭisedhānaṃ viseso. Pāḷipadameva hutvāti pucchāpāḷiyā ‘‘nuppajjatī’’ti yaṃ padaṃ vuttaṃ, na-kāravirahitaṃ tadeva padaṃ hutvāti attho. Tattha uppattinirodhapaṭisedhassa paṭisedhanatthaṃ pāḷigatiyā vissajjanaṃ uppattinirodhānameva paṭisedhanatthaṃ paṭisedhena vissajjanaṃ katanti veditabbaṃ.
жад̇уннам̣ бан̃хаанам̣ бан̃жаннан̃жа виссаж̇ж̇анаанам̣ сад̇д̇авийсад̇ияаа таанзсу багкзбо д̇ад̣̇згад̣̇зсабагкзбавасзна вуд̇д̇од̇и взд̣̇ид̇аб̣б̣о. барибун̣н̣абан̃хо зва хи саруубад̣̇ассанзна жа виссаж̇ж̇анам̣ сад̇д̇авийсад̇ияаа таанзсу багкибид̇аб̣б̣анд̇и.
Catunnaṃ pañhānaṃ pañcannañca vissajjanānaṃ sattavīsatiyā ṭhānesu pakkhepo tadekadesapakkhepavasena vuttoti veditabbo. Paripuṇṇapañho eva hi sarūpadassanena ca vissajjanaṃ sattavīsatiyā ṭhānesu pakkhipitabbanti.
гим̣ ну саггаа ид̇о баранд̇и ид̇о баал̣ивавад̇т̇аанад̣̇ассанаад̣̇ид̇о ан̃н̃о гим̣ ну саггаа гаад̇унд̇и ан̃н̃асса саггун̣зяяасса абхаавам̣ д̣̇ассзд̇и.
Kiṃ nu sakkā ito paranti ito pāḷivavatthānadassanādito añño kiṃ nu sakkā kātunti aññassa sakkuṇeyyassa abhāvaṃ dasseti.
‘‘суд̣̇д̇хааваасаанам̣ д̇зсам̣ д̇ад̇т̇а руубагканд̇хо жа нуббаж̇ж̇ид̇т̇а взд̣̇анаагканд̇хо жа нуббаж̇ж̇ид̇т̇аа’’д̇и зд̇зна суд̣̇д̇хааваасабхуумийсу згабхуумияамби д̣̇уд̇ияаа убабад̇д̇и над̇т̇ийд̇и н̃аабид̇ам̣ ход̇и. бадисанд̇хид̇о бабхуд̇и хи яаава жуд̇и, д̇аава бавад̇д̇агаммаж̇асанд̇аанам̣ згад̇д̇зна г̇ахзд̇ваа д̇асса уббаад̣̇анирод̇хавасзна аяам̣ д̣̇зсанаа бавад̇д̇аа. д̇асмин̃хи аб̣б̣ожчиннз гусалаад̣̇ийнан̃жа бавад̇д̇и ход̇и, вожчиннз жа аббавад̇д̇ийд̇и д̇знзва жа уббаад̣̇анирод̇хаа д̣̇ассид̇аа, д̇асмаа д̇асса згасад̇д̇асса бадисанд̇хиуббаад̣̇ад̇о яаава жуд̇инирод̇хо, д̇аава ад̇ийд̇ад̇аа над̇т̇и, на жа д̇ад̇о буб̣б̣з д̇ад̇т̇а бадисанд̇хивасзна гаммаж̇асанд̇аанам̣ уббаннабуб̣б̣анд̇и канд̇хад̣̇ваяамби ‘‘нуббаж̇ж̇ид̇т̇аа’’д̇и вуд̇д̇ам̣. гасмаа бана зд̇ааяа баал̣ияаа сагалзби суд̣̇д̇хааваасз д̣̇уд̇ияаа бадисанд̇хи над̇т̇ийд̇и на вин̃н̃ааяад̇ийд̇и? уд̣̇д̇хам̣сод̇абаал̣исаб̣бхааваа. д̣̇взби хи баал̣ияо сам̣санд̣̇зд̇аб̣б̣аад̇и.
‘‘Suddhāvāsānaṃ tesaṃ tattha rūpakkhandho ca nuppajjittha vedanākkhandho ca nuppajjitthā’’ti etena suddhāvāsabhūmīsu ekabhūmiyampi dutiyā upapatti natthīti ñāpitaṃ hoti. Paṭisandhito pabhuti hi yāva cuti, tāva pavattakammajasantānaṃ ekattena gahetvā tassa uppādanirodhavasena ayaṃ desanā pavattā. Tasmiñhi abbocchinne kusalādīnañca pavatti hoti, vocchinne ca appavattīti teneva ca uppādanirodhā dassitā, tasmā tassa ekasattassa paṭisandhiuppādato yāva cutinirodho, tāva atītatā natthi, na ca tato pubbe tattha paṭisandhivasena kammajasantānaṃ uppannapubbanti khandhadvayampi ‘‘nuppajjitthā’’ti vuttaṃ. Kasmā pana etāya pāḷiyā sakalepi suddhāvāse dutiyā paṭisandhi natthīti na viññāyatīti? Uddhaṃsotapāḷisabbhāvā. Dvepi hi pāḷiyo saṃsandetabbāti.
‘‘асан̃н̃асад̇д̇аанам̣ д̇зсам̣ д̇ад̇т̇а руубагканд̇хо уббаж̇ж̇иссад̇ий’’д̇и зд̇т̇а ‘‘яасса яад̇т̇а руубагканд̇хо уббаж̇ж̇иссад̇ий’’д̇и зд̇зна саннидтаанзна висзсид̇аа асан̃н̃асад̇д̇ааби санд̇ийд̇и д̇з зва г̇ахзд̇ваа ‘‘асан̃н̃асад̇д̇аана’’нд̇и вуд̇д̇ам̣. д̇зна яз саннидтаанзна важ̇ж̇ид̇аа, д̇з д̇ад̇о бан̃жавогаарам̣ г̇анд̇ваа бариниб̣б̣ааяиссанд̇и, на д̇зсам̣ буна асан̃н̃з убабад̇д̇иббасан̇г̇о ад̇т̇ийд̇и д̇з санд̇хааяааха – ‘‘бажчимабхавигаанам̣ д̇зсам̣ д̇ад̇т̇а руубагканд̇хо жа нуббаж̇ж̇иссад̇и взд̣̇анаагканд̇хо жа нуббаж̇ж̇иссад̇ий’’д̇и (яама. 1.канд̇хаяамага.65). зд̇т̇а гим̣ бан̃жавогаараад̣̇ибхааво вияа бажчимабхавоби гожи ад̇т̇и, яад̇т̇а д̇зсамануббад̇д̇и бхависсад̇ийд̇и? над̇т̇и бан̃жавогаараад̣̇ибхавзсвзва яад̇т̇а ваа д̇ад̇т̇а ваа тид̇аанам̣ бажчимабхавигаанам̣ ‘‘яасса яад̇т̇а руубагканд̇хо нуббаж̇ж̇иссад̇ий’’д̇и зд̇зна саннидтаанзна сан̇г̇ахид̇ад̇д̇аа. д̇зсам̣ д̇ад̇т̇а ид̇араануббад̇д̇ибхааван̃жа ануж̇аананд̇о ‘‘взд̣̇анаагканд̇хо жа нуббаж̇ж̇иссад̇ий’’д̇и аахаад̇и.
‘‘Asaññasattānaṃ tesaṃ tattha rūpakkhandho uppajjissatī’’ti ettha ‘‘yassa yattha rūpakkhandho uppajjissatī’’ti etena sanniṭṭhānena visesitā asaññasattāpi santīti te eva gahetvā ‘‘asaññasattāna’’nti vuttaṃ. Tena ye sanniṭṭhānena vajjitā, te tato pañcavokāraṃ gantvā parinibbāyissanti, na tesaṃ puna asaññe upapattippasaṅgo atthīti te sandhāyāha – ‘‘pacchimabhavikānaṃ tesaṃ tattha rūpakkhandho ca nuppajjissati vedanākkhandho ca nuppajjissatī’’ti (yama. 1.khandhayamaka.65). Ettha kiṃ pañcavokārādibhāvo viya pacchimabhavopi koci atthi, yattha tesamanuppatti bhavissatīti? Natthi pañcavokārādibhavesveva yattha vā tattha vā ṭhitānaṃ pacchimabhavikānaṃ ‘‘yassa yattha rūpakkhandho nuppajjissatī’’ti etena sanniṭṭhānena saṅgahitattā. Tesaṃ tattha itarānuppattibhāvañca anujānanto ‘‘vedanākkhandho ca nuppajjissatī’’ti āhāti.
‘‘суд̣̇д̇хааваасз бариниб̣б̣анд̇аана’’нд̇и ид̣̇ам̣ саббадисанд̇хигаанам̣ аббадисанд̇хигаанан̃жа суд̣̇д̇хааваасаанам̣ д̇ам̣д̇ам̣бхуумияам̣ канд̇хабариниб̣б̣аанавасзна вуд̇д̇анд̇и взд̣̇ид̇аб̣б̣ам̣. саб̣б̣зсан̃хи д̇зсам̣ д̇ад̇т̇а взд̣̇анаагканд̇хо нуббаж̇ж̇ид̇т̇аад̇и. яат̇аа бана ‘‘нируж̇жхиссад̇ий’’д̇и важанам̣ бажжуббаннзби уббаад̣̇агкан̣асаман̇г̇имхи бавад̇д̇ад̇и, на звам̣ ‘‘уббаж̇ж̇ид̇т̇аа’’д̇и важанам̣ бажжуббаннз бавад̇д̇ад̇и, ат̇а ко уббаж̇ж̇ид̇ваа виг̇ад̇з ад̇ийд̇з зва, д̇асмаа ‘‘бариниб̣б̣анд̇аанам̣ нуббаж̇ж̇ид̇т̇аа’’д̇и вуд̇д̇ам̣ уббаннасанд̇аанасса авиг̇ад̇ад̇д̇аа. ананд̇аа логад̇хаад̇уяод̇и огаасасса абарижчиннад̇д̇аа огаасавасзна вужжамаанаанам̣ уббаад̣̇анирод̇хаанамби барижчзд̣̇аабхаавад̇о сам̣гин̣н̣ад̇аа ход̇ийд̇и ‘‘яад̇т̇а взд̣̇анаагканд̇хо уббаж̇ж̇ад̇и, д̇ад̇т̇а сан̃н̃аагканд̇хо нируж̇жхад̇ийд̇и? ааманд̇аа’’д̇и вуд̇д̇ам̣.
‘‘Suddhāvāse parinibbantāna’’nti idaṃ sappaṭisandhikānaṃ appaṭisandhikānañca suddhāvāsānaṃ taṃtaṃbhūmiyaṃ khandhaparinibbānavasena vuttanti veditabbaṃ. Sabbesañhi tesaṃ tattha vedanākkhandho nuppajjitthāti. Yathā pana ‘‘nirujjhissatī’’ti vacanaṃ paccuppannepi uppādakkhaṇasamaṅgimhi pavattati, na evaṃ ‘‘uppajjitthā’’ti vacanaṃ paccuppanne pavattati, atha kho uppajjitvā vigate atīte eva, tasmā ‘‘parinibbantānaṃ nuppajjitthā’’ti vuttaṃ uppannasantānassa avigatattā. Anantā lokadhātuyoti okāsassa aparicchinnattā okāsavasena vuccamānānaṃ uppādanirodhānampi paricchedābhāvato saṃkiṇṇatā hotīti ‘‘yattha vedanākkhandho uppajjati, tattha saññākkhandho nirujjhatīti? Āmantā’’ti vuttaṃ.
бавад̇д̇иваараван̣н̣анаа нидтид̇аа.
Pavattivāravaṇṇanā niṭṭhitā.
3. барин̃н̃ааваараван̣н̣анаа
3. Pariññāvāravaṇṇanā
206-208. буг̇г̇алогаасавааро лаб̣бхамаанобийд̇и гасмаа вуд̇д̇ам̣, нану огаасаваарасса алаабхз д̇ассаби алаабхзна бхавид̇аб̣б̣анд̇и? на, д̇ад̇т̇а буг̇г̇алассзва барин̃н̃ааважанад̇о. буг̇г̇алогаасаваарзби хи огаасз буг̇г̇алассзва барин̃н̃аа вужжад̇и, на огаасасса. огаасаваароби жа яад̣̇и вужжзяяа, ‘‘яад̇т̇а руубагканд̇хам̣ бариж̇аанаад̇ий’’д̇и огаасз буг̇г̇алассзва бариж̇аананавасзна вужжзяяа, д̇асмаа буг̇г̇алогаасаваарассзва лаб̣бхамаанад̇аа вуд̇д̇аа, на огаасаваарассаад̇и. д̇знааха – ‘‘ааманд̇аа…бз… сияаа’’д̇и.
206-208. Puggalokāsavārolabbhamānopīti kasmā vuttaṃ, nanu okāsavārassa alābhe tassapi alābhena bhavitabbanti? Na, tattha puggalasseva pariññāvacanato. Puggalokāsavārepi hi okāse puggalasseva pariññā vuccati, na okāsassa. Okāsavāropi ca yadi vucceyya, ‘‘yattha rūpakkhandhaṃ parijānātī’’ti okāse puggalasseva parijānanavasena vucceyya, tasmā puggalokāsavārasseva labbhamānatā vuttā, na okāsavārassāti. Tenāha – ‘‘āmantā…pe… siyā’’ti.
д̇знзваад̇и бавад̇д̇з жид̇д̇агкан̣авасзна д̇ин̣н̣ам̣ ад̣̇д̇хаанам̣ лаабхад̇о зва, ан̃н̃ат̇аа жуд̇ибадисанд̇хигкан̣з руубагканд̇хабариж̇аананасса абхааваа ‘‘яо руубагканд̇хам̣ бариж̇аанаад̇и, со взд̣̇анаагканд̇хам̣ бариж̇аанаад̇ий’’д̇и зд̇т̇а ‘‘над̇т̇ий’’д̇и виссаж̇ж̇анзна бхавид̇аб̣б̣ам̣ сияаа, ‘‘ааманд̇аа’’д̇и жа гад̇анд̇и. саннидтаанасам̣саяабад̣̇асан̇г̇ахид̇аанам̣ барин̃н̃аанам̣ бавад̇д̇з жид̇д̇агкан̣з зва лаабхам̣ д̣̇ассзнд̇о ‘‘логуд̇д̇арамаг̇г̇агкан̣асмин̃хий’’д̇иаад̣̇имааха. на бариж̇аанаад̇ийд̇и бан̃хз бут̇уж̇ж̇анам̣ санд̇хааяа ааманд̇аад̇и вуд̇д̇анд̇и ид̣̇ам̣ бут̇уж̇ж̇анасса саб̣б̣ат̇аа барин̃н̃аагижжасса абхаавад̇о вуд̇д̇ам̣. ‘‘арахаа руубагканд̇хам̣ на бариж̇аанаад̇и но жа взд̣̇анаагканд̇хам̣ на бариж̇аанид̇т̇а, аг̇г̇амаг̇г̇асаман̇г̇ин̃жа араханд̇ан̃жа табзд̇ваа авасзсаа буг̇г̇алаа руубагканд̇хан̃жа на бариж̇аананд̇и взд̣̇анаагканд̇хан̃жа на бариж̇аанид̇т̇аа’’д̇и бана важанзна ‘‘аг̇г̇амаг̇г̇асаман̇г̇им̣ табзд̇ваа ан̃н̃о гожи бариж̇аанаад̇ий’’д̇и вад̇д̇аб̣б̣о над̇т̇ийд̇и д̣̇ассид̇ам̣ ход̇и, д̇зна д̇ад̣̇авасзсабуг̇г̇алз санд̇хааяа ‘‘ааманд̇аа’’д̇и вуд̇д̇анд̇и вин̃н̃ааяад̇ийд̇и.
Tenevāti pavatte cittakkhaṇavasena tiṇṇaṃ addhānaṃ lābhato eva, aññathā cutipaṭisandhikkhaṇe rūpakkhandhaparijānanassa abhāvā ‘‘yo rūpakkhandhaṃ parijānāti, so vedanākkhandhaṃ parijānātī’’ti ettha ‘‘natthī’’ti vissajjanena bhavitabbaṃ siyā, ‘‘āmantā’’ti ca katanti. Sanniṭṭhānasaṃsayapadasaṅgahitānaṃ pariññānaṃ pavatte cittakkhaṇe eva lābhaṃ dassento ‘‘lokuttaramaggakkhaṇasmiñhī’’tiādimāha. Na parijānātīti pañhe puthujjanaṃ sandhāya āmantāti vuttanti idaṃ puthujjanassa sabbathā pariññākiccassa abhāvato vuttaṃ. ‘‘Arahā rūpakkhandhaṃ na parijānāti no ca vedanākkhandhaṃ na parijānittha, aggamaggasamaṅgiñca arahantañca ṭhapetvā avasesā puggalā rūpakkhandhañca na parijānanti vedanākkhandhañca na parijānitthā’’ti pana vacanena ‘‘aggamaggasamaṅgiṃ ṭhapetvā añño koci parijānātī’’ti vattabbo natthīti dassitaṃ hoti, tena tadavasesapuggale sandhāya ‘‘āmantā’’ti vuttanti viññāyatīti.
барин̃н̃ааваараван̣н̣анаа нидтид̇аа.
Pariññāvāravaṇṇanā niṭṭhitā.
канд̇хаяамагаван̣н̣анаа нидтид̇аа.
Khandhayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 2. канд̇хаяамагам̣ • 2. Khandhayamakaṃ
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 2. канд̇хаяамагам̣ • 2. Khandhayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 2. канд̇хаяамагам̣ • 2. Khandhayamakaṃ
