| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೦. ಅಬ್ಯಾಕತಸಂಯುತ್ತಂ
10. Abyākatasaṃyuttaṃ
೧. ಖೇಮಾಸುತ್ತವಣ್ಣನಾ
1. Khemāsuttavaṇṇanā
೪೧೦. ಬಿಮ್ಬಿಸಾರಸ್ಸ ಉಪಾಸಿಕಾತಿ ಬಿಮ್ಬಿಸಾರಸ್ಸ ಓರೋಧಭೂತಾ ಉಪಾಸಿಕಾ। ಪಣ್ಡಿಚ್ಚಂ ಸಿಕ್ಖಿತಭಾವೇನ। ವೇಯ್ಯತ್ತಿಯಂ ವಿಸಾರದಭಾವೇನ। ವಿಸಾರದಾ ನಾಮ ತಿಹೇತುಕಪಟಿಸನ್ಧಿಸಿದ್ಧಸಾಭಾವಿಕಪಞ್ಞಾ, ತಾಯ ಸಮನ್ನಾಗತಾ।
410.Bimbisārassaupāsikāti bimbisārassa orodhabhūtā upāsikā. Paṇḍiccaṃ sikkhitabhāvena. Veyyattiyaṃ visāradabhāvena. Visāradā nāma tihetukapaṭisandhisiddhasābhāvikapaññā, tāya samannāgatā.
ಅಚ್ಛಿದ್ದಕಗಣನಾಯ ಕುಸಲೋತಿ ನವನ್ತಗಣನಾಯ ಕುಸಲೋ। ಅಙ್ಗುಲಿಮುದ್ದಾಯ ಗಣನಾಯ ಕುಸಲೋತಿ ಅಙ್ಗುಲಿಕಾಯ ಏವ ಗಣನಾಯ ಕುಸಲೋ ಸೇಯ್ಯಥಾಪಿ ಪಾದಸಿಕಾ। ಪಿಣ್ಡಗಣನಾಯಾತಿ ಸಙ್ಕಲನಪಟುಪ್ಪನ್ನಕಾರಿನೋ ಪಿಣ್ಡವಸೇನ ಗಣನಾ। ತಥಾಗತೋತಿ ಖೀಣಾಸವೋ, ತಥಾಗತಂ ಸನ್ಧಾಯ ಪುಚ್ಛತೀತಿ ಖೀಣಾಸವೋತಿ ಚಸ್ಸ ಅರಹತ್ತಫಲವಸಿಭಾವಿತಖನ್ಧೇ ಉಪಾದಾಯ ಅಯಂ ಪಞ್ಞತ್ತಿ ಹೋತಿ। ತೇಸು ಖನ್ಧೇಸು ಸತಿ ಖೀಣಾಸವಾ ಸತ್ತಸಙ್ಖಾತಾ ಹೋನ್ತೀತಿ ವೋಹಾರೇನ ಪಞ್ಞಪೇತುಂ ಸಕ್ಕಾ ಭವೇಯ್ಯ, ಅಸನ್ತೇಸು ನ ಸಕ್ಕಾ, ತಸ್ಮಾ ಪರಂ ಮರಣಾತಿ ವುತ್ತತ್ತಾ ತೇಸಂ ಅಭಾವಾ ‘‘ಅಬ್ಯಾಕತಮೇತ’’ನ್ತಿ ವುತ್ತಂ। ಯದಿ ಏವಂ ತೇಸಂ ಅಭಾವತೋ ‘‘ನ ಹೋತಿ ತಥಾಗತೋ ಪರಂ ಮರಣಾ’’ತಿ ಪುಟ್ಠಾಯ ‘‘ಆಮಾ’’ತಿ ಪಟಿಜಾನಿತಬ್ಬಾ ಸಿಯಾ, ತಂ ಪನ ಸತ್ತಸಙ್ಖಾತಸ್ಸ ಪುಚ್ಛಿತತ್ತಾ ನ ಪಟಿಞ್ಞಾತನ್ತಿ ದಟ್ಠಬ್ಬಂ। ಯೇನ ರೂಪೇನಾತಿ ಸತ್ತತಥಾಗತೇ ವುತ್ತರೂಪಂ ಸಬ್ಬಞ್ಞುತಥಾಗತೇ ಪಟಿಕ್ಖಿಪಿತುಂ ‘‘ತಂ ರೂಪ’’ನ್ತಿಆದಿ ವುತ್ತಂ। ಯಂ ಉಪಾದಾಯಾತಿ ಯಂ ಖನ್ಧಪಞ್ಚಕಂ ಉಪಾದಾಯ। ತದಭಾವೇನಾತಿ ತಸ್ಸ ಖನ್ಧಪಞ್ಚಕಸ್ಸ ಅಭಾವೇನ। ತಸ್ಸಾ ಪಞ್ಞತ್ತಿಯಾತಿ ಸತ್ತಪಞ್ಞತ್ತಿಯಾ ಅಭಾವಂ। ನಿರುದ್ಧಂ ನ ನಿದಸ್ಸೇತಿ।
Acchiddakagaṇanāya kusaloti navantagaṇanāya kusalo. Aṅgulimuddāya gaṇanāya kusaloti aṅgulikāya eva gaṇanāya kusalo seyyathāpi pādasikā. Piṇḍagaṇanāyāti saṅkalanapaṭuppannakārino piṇḍavasena gaṇanā. Tathāgatoti khīṇāsavo, tathāgataṃ sandhāya pucchatīti khīṇāsavoti cassa arahattaphalavasibhāvitakhandhe upādāya ayaṃ paññatti hoti. Tesu khandhesu sati khīṇāsavā sattasaṅkhātā hontīti vohārena paññapetuṃ sakkā bhaveyya, asantesu na sakkā, tasmā paraṃ maraṇāti vuttattā tesaṃ abhāvā ‘‘abyākatameta’’nti vuttaṃ. Yadi evaṃ tesaṃ abhāvato ‘‘na hoti tathāgato paraṃ maraṇā’’ti puṭṭhāya ‘‘āmā’’ti paṭijānitabbā siyā, taṃ pana sattasaṅkhātassa pucchitattā na paṭiññātanti daṭṭhabbaṃ. Yena rūpenāti sattatathāgate vuttarūpaṃ sabbaññutathāgate paṭikkhipituṃ ‘‘taṃ rūpa’’ntiādi vuttaṃ. Yaṃ upādāyāti yaṃ khandhapañcakaṃ upādāya. Tadabhāvenāti tassa khandhapañcakassa abhāvena. Tassā paññattiyāti sattapaññattiyā abhāvaṃ. Niruddhaṃ na nidasseti.
ಖೇಮಾಯ ಥೇರಿಯಾ ವುತ್ತಂ ಪಠಮಂ ಸುತ್ತಂ ಭಗವತೋ ಸೇಟ್ಠತ್ಥದೀಪನತೋ ಅಗ್ಗಪದಾವಚರಂವ ಹೋತೀತಿ ವುತ್ತಂ ‘‘ಅಗ್ಗಪದಸ್ಮಿ’’ನ್ತಿ।
Khemāya theriyā vuttaṃ paṭhamaṃ suttaṃ bhagavato seṭṭhatthadīpanato aggapadāvacaraṃva hotīti vuttaṃ ‘‘aggapadasmi’’nti.
ಖೇಮಾಸುತ್ತವಣ್ಣನಾ ನಿಟ್ಠಿತಾ।
Khemāsuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ಖೇಮಾಸುತ್ತಂ • 1. Khemāsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧. ಖೇಮಾಸುತ್ತವಣ್ಣನಾ • 1. Khemāsuttavaṇṇanā
