| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૪. ખેત્તસુત્તં
4. Khettasuttaṃ
૩૪. ‘‘અટ્ઠઙ્ગસમન્નાગતે , ભિક્ખવે, ખેત્તે બીજં વુત્તં ન મહપ્ફલં હોતિ ન મહસ્સાદં ન ફાતિસેય્યં 1. કથં અટ્ઠઙ્ગસમન્નાગતે? ઇધ, ભિક્ખવે, ખેત્તં ઉન્નામનિન્નામિ ચ હોતિ, પાસાણસક્ખરિકઞ્ચ હોતિ, ઊસરઞ્ચ હોતિ, ન ચ ગમ્ભીરસિતં હોતિ, ન આયસમ્પન્નં હોતિ, ન અપાયસમ્પન્નં હોતિ, ન માતિકાસમ્પન્નં હોતિ, ન મરિયાદસમ્પન્નં હોતિ. એવં અટ્ઠઙ્ગસમન્નાગતે, ભિક્ખવે, ખેત્તે બીજં વુત્તં ન મહપ્ફલં હોતિ ન મહસ્સાદં ન ફાતિસેય્યં.
34. ‘‘Aṭṭhaṅgasamannāgate , bhikkhave, khette bījaṃ vuttaṃ na mahapphalaṃ hoti na mahassādaṃ na phātiseyyaṃ 2. Kathaṃ aṭṭhaṅgasamannāgate? Idha, bhikkhave, khettaṃ unnāmaninnāmi ca hoti, pāsāṇasakkharikañca hoti, ūsarañca hoti, na ca gambhīrasitaṃ hoti, na āyasampannaṃ hoti, na apāyasampannaṃ hoti, na mātikāsampannaṃ hoti, na mariyādasampannaṃ hoti. Evaṃ aṭṭhaṅgasamannāgate, bhikkhave, khette bījaṃ vuttaṃ na mahapphalaṃ hoti na mahassādaṃ na phātiseyyaṃ.
‘‘એવમેવં ખો, ભિક્ખવે, અટ્ઠઙ્ગસમન્નાગતેસુ સમણબ્રાહ્મણેસુ દાનં દિન્નં ન મહપ્ફલં હોતિ ન મહાનિસંસં ન મહાજુતિકં ન મહાવિપ્ફારં. કથં અટ્ઠઙ્ગસમન્નાગતેસુ? ઇધ, ભિક્ખવે, સમણબ્રાહ્મણા મિચ્છાદિટ્ઠિકા હોન્તિ, મિચ્છાસઙ્કપ્પા, મિચ્છાવાચા, મિચ્છાકમ્મન્તા, મિચ્છાઆજીવા, મિચ્છાવાયામા, મિચ્છાસતિનો, મિચ્છાસમાધિનો. એવં અટ્ઠઙ્ગસમન્નાગતેસુ, ભિક્ખવે, સમણબ્રાહ્મણેસુ દાનં દિન્નં ન મહપ્ફલં હોતિ ન મહાનિસંસં ન મહાજુતિકં ન મહાવિપ્ફારં.
‘‘Evamevaṃ kho, bhikkhave, aṭṭhaṅgasamannāgatesu samaṇabrāhmaṇesu dānaṃ dinnaṃ na mahapphalaṃ hoti na mahānisaṃsaṃ na mahājutikaṃ na mahāvipphāraṃ. Kathaṃ aṭṭhaṅgasamannāgatesu? Idha, bhikkhave, samaṇabrāhmaṇā micchādiṭṭhikā honti, micchāsaṅkappā, micchāvācā, micchākammantā, micchāājīvā, micchāvāyāmā, micchāsatino, micchāsamādhino. Evaṃ aṭṭhaṅgasamannāgatesu, bhikkhave, samaṇabrāhmaṇesu dānaṃ dinnaṃ na mahapphalaṃ hoti na mahānisaṃsaṃ na mahājutikaṃ na mahāvipphāraṃ.
‘‘અટ્ઠઙ્ગસમન્નાગતે, ભિક્ખવે, ખેત્તે બીજં વુત્તં મહપ્ફલં હોતિ મહસ્સાદં ફાતિસેય્યં. કથં અટ્ઠઙ્ગસમન્નાગતે? ઇધ, ભિક્ખવે, ખેત્તં અનુન્નામાનિન્નામિ ચ હોતિ, અપાસાણસક્ખરિકઞ્ચ હોતિ, અનૂસરઞ્ચ હોતિ, ગમ્ભીરસિતં હોતિ, આયસમ્પન્નં હોતિ, અપાયસમ્પન્નં હોતિ, માતિકાસમ્પન્નં હોતિ, મરિયાદસમ્પન્નં હોતિ. એવં અટ્ઠઙ્ગસમન્નાગતે, ભિક્ખવે, ખેત્તે બીજં વુત્તં મહપ્ફલં હોતિ મહસ્સાદં ફાતિસેય્યં.
‘‘Aṭṭhaṅgasamannāgate, bhikkhave, khette bījaṃ vuttaṃ mahapphalaṃ hoti mahassādaṃ phātiseyyaṃ. Kathaṃ aṭṭhaṅgasamannāgate? Idha, bhikkhave, khettaṃ anunnāmāninnāmi ca hoti, apāsāṇasakkharikañca hoti, anūsarañca hoti, gambhīrasitaṃ hoti, āyasampannaṃ hoti, apāyasampannaṃ hoti, mātikāsampannaṃ hoti, mariyādasampannaṃ hoti. Evaṃ aṭṭhaṅgasamannāgate, bhikkhave, khette bījaṃ vuttaṃ mahapphalaṃ hoti mahassādaṃ phātiseyyaṃ.
‘‘એવમેવં ખો, ભિક્ખવે, અટ્ઠઙ્ગસમન્નાગતેસુ સમણબ્રાહ્મણેસુ દાનં દિન્નં મહપ્ફલં હોતિ મહાનિસંસં મહાજુતિકં મહાવિપ્ફારં. કથં અટ્ઠઙ્ગસમન્નાગતેસુ? ઇધ, ભિક્ખવે, સમણબ્રાહ્મણા સમ્માદિટ્ઠિકા હોન્તિ, સમ્માસઙ્કપ્પા, સમ્માવાચા, સમ્માકમ્મન્તા, સમ્માઆજીવા, સમ્માવાયામા, સમ્માસતિનો, સમ્માસમાધિનો. એવં અટ્ઠઙ્ગસમન્નાગતેસુ, ભિક્ખવે, સમણબ્રાહ્મણેસુ દાનં દિન્નં મહપ્ફલં હોતિ મહાનિસંસં મહાજુતિકં મહાવિપ્ફાર’’ન્તિ.
‘‘Evamevaṃ kho, bhikkhave, aṭṭhaṅgasamannāgatesu samaṇabrāhmaṇesu dānaṃ dinnaṃ mahapphalaṃ hoti mahānisaṃsaṃ mahājutikaṃ mahāvipphāraṃ. Kathaṃ aṭṭhaṅgasamannāgatesu? Idha, bhikkhave, samaṇabrāhmaṇā sammādiṭṭhikā honti, sammāsaṅkappā, sammāvācā, sammākammantā, sammāājīvā, sammāvāyāmā, sammāsatino, sammāsamādhino. Evaṃ aṭṭhaṅgasamannāgatesu, bhikkhave, samaṇabrāhmaṇesu dānaṃ dinnaṃ mahapphalaṃ hoti mahānisaṃsaṃ mahājutikaṃ mahāvipphāra’’nti.
‘‘યથાપિ ખેત્તે સમ્પન્ને, પવુત્તા બીજસમ્પદા;
‘‘Yathāpi khette sampanne, pavuttā bījasampadā;
‘‘અનીતિસમ્પદા હોતિ, વિરૂળ્હી ભવતિ સમ્પદા;
‘‘Anītisampadā hoti, virūḷhī bhavati sampadā;
વેપુલ્લસમ્પદા હોતિ, ફલં વે હોતિ સમ્પદા.
Vepullasampadā hoti, phalaṃ ve hoti sampadā.
‘‘એવં સમ્પન્નસીલેસુ, દિન્ના ભોજનસમ્પદા;
‘‘Evaṃ sampannasīlesu, dinnā bhojanasampadā;
સમ્પદાનં ઉપનેતિ, સમ્પન્નં હિસ્સ તં કતં.
Sampadānaṃ upaneti, sampannaṃ hissa taṃ kataṃ.
‘‘તસ્મા સમ્પદમાકઙ્ખી, સમ્પન્નત્થૂધ પુગ્ગલો;
‘‘Tasmā sampadamākaṅkhī, sampannatthūdha puggalo;
સમ્પન્નપઞ્ઞે સેવેથ, એવં ઇજ્ઝન્તિ સમ્પદા.
Sampannapaññe sevetha, evaṃ ijjhanti sampadā.
‘‘વિજ્જાચરણસમ્પન્ને, લદ્ધા ચિત્તસ્સ સમ્પદં;
‘‘Vijjācaraṇasampanne, laddhā cittassa sampadaṃ;
કરોતિ કમ્મસમ્પદં, લભતિ ચત્થસમ્પદં.
Karoti kammasampadaṃ, labhati catthasampadaṃ.
‘‘લોકં ઞત્વા યથાભૂતં, પપ્પુય્ય દિટ્ઠિસમ્પદં;
‘‘Lokaṃ ñatvā yathābhūtaṃ, pappuyya diṭṭhisampadaṃ;
મગ્ગસમ્પદમાગમ્મ, યાતિ સમ્પન્નમાનસો.
Maggasampadamāgamma, yāti sampannamānaso.
‘‘ઓધુનિત્વા મલં સબ્બં, પત્વા નિબ્બાનસમ્પદં;
‘‘Odhunitvā malaṃ sabbaṃ, patvā nibbānasampadaṃ;
મુચ્ચતિ સબ્બદુક્ખેહિ, સા હોતિ સબ્બસમ્પદા’’તિ. ચતુત્થં;
Muccati sabbadukkhehi, sā hoti sabbasampadā’’ti. catutthaṃ;
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૪. ખેત્તસુત્તવણ્ણના • 4. Khettasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧-૪. પઠમદાનસુત્તાદિવણ્ણના • 1-4. Paṭhamadānasuttādivaṇṇanā
