A World of Knowledge
    Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi

    ൧൯. ഏകൂനവീസതിമവഗ്ഗോ

    19. Ekūnavīsatimavaggo

    (൧൮൬) ൧. കിലേസജഹനകഥാ

    (186) 1. Kilesajahanakathā

    ൮൨൮. അതീതേ കിലേസേ ജഹതീതി? ആമന്താ. നിരുദ്ധം നിരോധേതി, വിഗതം വിഗമേതി, ഖീണം ഖേപേതി, അത്ഥങ്ഗതം അത്ഥങ്ഗമേതി, അബ്ഭത്ഥങ്ഗതം അബ്ഭത്ഥങ്ഗമേതീതി? ന ഹേവം വത്തബ്ബേ…പേ॰… അതീതേ കിലേസേ ജഹതീതി? ആമന്താ. നനു അതീതം നിരുദ്ധന്തി? ആമന്താ. ഹഞ്ചി അതീതം നിരുദ്ധം , നോ ച വത രേ വത്തബ്ബേ – ‘‘അതീതേ കിലേസേ ജഹതീ’’തി. അതീതേ കിലേസേ ജഹതീതി? ആമന്താ. നനു അതീതം നത്ഥീതി? ആമന്താ. ഹഞ്ചി അതീതം നത്ഥി, നോ ച വത രേ വത്തബ്ബേ – ‘‘അതീതേ കിലേസേ ജഹതീ’’തി.

    828. Atīte kilese jahatīti? Āmantā. Niruddhaṃ nirodheti, vigataṃ vigameti, khīṇaṃ khepeti, atthaṅgataṃ atthaṅgameti, abbhatthaṅgataṃ abbhatthaṅgametīti? Na hevaṃ vattabbe…pe… atīte kilese jahatīti? Āmantā. Nanu atītaṃ niruddhanti? Āmantā. Hañci atītaṃ niruddhaṃ , no ca vata re vattabbe – ‘‘atīte kilese jahatī’’ti. Atīte kilese jahatīti? Āmantā. Nanu atītaṃ natthīti? Āmantā. Hañci atītaṃ natthi, no ca vata re vattabbe – ‘‘atīte kilese jahatī’’ti.

    ൮൨൯. അനാഗതേ കിലേസേ ജഹതീതി? ആമന്താ. അജാതം അജനേതി, അസഞ്ജാതം അസഞ്ജനേതി, അനിബ്ബത്തം അനിബ്ബത്തേതി, അപാതുഭൂതം അപാതുഭാവേതീതി? ന ഹേവം വത്തബ്ബേ…പേ॰… അനാഗതേ കിലേസേ ജഹതീതി? ആമന്താ. നനു അനാഗതം അജാതന്തി? ആമന്താ. ഹഞ്ചി അനാഗതം അജാതം, നോ ച വത രേ വത്തബ്ബേ – ‘‘അനാഗതേ കിലേസേ ജഹതീ’’തി . അനാഗതേ കിലേസേ ജഹതീതി? ആമന്താ. നനു അനാഗതം നത്ഥീതി? ആമന്താ. ഹഞ്ചി അനാഗതം നത്ഥി, നോ ച വത രേ വത്തബ്ബേ – ‘‘അനാഗതേ കിലേസേ ജഹതീ’’തി.

    829. Anāgate kilese jahatīti? Āmantā. Ajātaṃ ajaneti, asañjātaṃ asañjaneti, anibbattaṃ anibbatteti, apātubhūtaṃ apātubhāvetīti? Na hevaṃ vattabbe…pe… anāgate kilese jahatīti? Āmantā. Nanu anāgataṃ ajātanti? Āmantā. Hañci anāgataṃ ajātaṃ, no ca vata re vattabbe – ‘‘anāgate kilese jahatī’’ti . Anāgate kilese jahatīti? Āmantā. Nanu anāgataṃ natthīti? Āmantā. Hañci anāgataṃ natthi, no ca vata re vattabbe – ‘‘anāgate kilese jahatī’’ti.

    ൮൩൦. പച്ചുപ്പന്നേ കിലേസേ ജഹതീതി? ആമന്താ. രത്തോ രാഗം ജഹതി, ദുട്ഠോ ദോസം ജഹതി, മൂള്ഹോ മോഹം ജഹതി, കിലിട്ഠോ കിലേസേ ജഹതീതി? ന ഹേവം വത്തബ്ബേ…പേ॰… രാഗേന രാഗം ജഹതി, ദോസേന ദോസം ജഹതി, മോഹേന മോഹം ജഹതി, കിലേസേഹി കിലേസേ ജഹതീതി? ന ഹേവം വത്തബ്ബേ…പേ॰….

    830. Paccuppanne kilese jahatīti? Āmantā. Ratto rāgaṃ jahati, duṭṭho dosaṃ jahati, mūḷho mohaṃ jahati, kiliṭṭho kilese jahatīti? Na hevaṃ vattabbe…pe… rāgena rāgaṃ jahati, dosena dosaṃ jahati, mohena mohaṃ jahati, kilesehi kilese jahatīti? Na hevaṃ vattabbe…pe….

    രാഗോ ചിത്തസമ്പയുത്തോ, മഗ്ഗോ ചിത്തസമ്പയുത്തോതി? ആമന്താ. ദ്വിന്നം ചിത്താനം സമോധാനം ഹോതീതി? ന ഹേവം വത്തബ്ബേ…പേ॰….

    Rāgo cittasampayutto, maggo cittasampayuttoti? Āmantā. Dvinnaṃ cittānaṃ samodhānaṃ hotīti? Na hevaṃ vattabbe…pe….

    രാഗോ അകുസലോ, മഗ്ഗോ കുസലോതി? ആമന്താ. കുസലാകുസലാ സാവജ്ജാനവജ്ജാ ഹീനപണീതാ കണ്ഹസുക്കസപ്പടിഭാഗാ ധമ്മാ സമ്മുഖീഭാവം ആഗച്ഛന്തീതി? ന ഹേവം വത്തബ്ബേ…പേ॰….

    Rāgo akusalo, maggo kusaloti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Na hevaṃ vattabbe…pe….

    കുസലാകുസലാ സാവജ്ജാനവജ്ജാ ഹീനപണീതാ കണ്ഹസുക്കസപ്പടിഭാഗാ ധമ്മാ സമ്മുഖീഭാവം ആഗച്ഛന്തീതി? ആമന്താ. നനു വുത്തം ഭഗവതാ – ‘‘ചത്താരിമാനി, ഭിക്ഖവേ, സുവിദൂരവിദൂരാനി! കതമാനി ചത്താരി? നഭഞ്ച, ഭിക്ഖവേ, പഥവീ ച – ഇദം പഠമം സുവിദൂരവിദൂരം…പേ॰… തസ്മാ സതം ധമ്മോ അസബ്ഭി ആരകാ’’തി. അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘കുസലാകുസലാ…പേ॰… സമ്മുഖീഭാവം ആഗച്ഛന്തീ’’തി.

    Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṃ āgacchantīti? Āmantā. Nanu vuttaṃ bhagavatā – ‘‘cattārimāni, bhikkhave, suvidūravidūrāni! Katamāni cattāri? Nabhañca, bhikkhave, pathavī ca – idaṃ paṭhamaṃ suvidūravidūraṃ…pe… tasmā sataṃ dhammo asabbhi ārakā’’ti. Attheva suttantoti? Āmantā. Tena hi na vattabbaṃ – ‘‘kusalākusalā…pe… sammukhībhāvaṃ āgacchantī’’ti.

    ൮൩൧. ന വത്തബ്ബം – ‘‘അതീതേ കിലേസേ ജഹതി, അനാഗതേ കിലേസേ ജഹതി, പച്ചുപ്പന്നേ കിലേസേ ജഹതീ’’തി? ആമന്താ. നത്ഥി കിലേസേ ജഹതീതി ? ന ഹേവം വത്തബ്ബേ…പേ॰… തേന ഹി അതീതേ കിലേസേ ജഹതി, അനാഗതേ കിലേസേ ജഹതി, പച്ചുപ്പന്നേ കിലേസേ ജഹതീതി.

    831. Na vattabbaṃ – ‘‘atīte kilese jahati, anāgate kilese jahati, paccuppanne kilese jahatī’’ti? Āmantā. Natthi kilese jahatīti ? Na hevaṃ vattabbe…pe… tena hi atīte kilese jahati, anāgate kilese jahati, paccuppanne kilese jahatīti.

    കിലേസജഹനകഥാ നിട്ഠിതാ.

    Kilesajahanakathā niṭṭhitā.







    Related texts:



    അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൧. കിലേസപജഹനകഥാവണ്ണനാ • 1. Kilesapajahanakathāvaṇṇanā

    ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൧. കിലേസപജഹനകഥാവണ്ണനാ • 1. Kilesapajahanakathāvaṇṇanā

    ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൧. കിലേസപജഹനകഥാവണ്ണനാ • 1. Kilesapajahanakathāvaṇṇanā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact