A World of Knowledge
    Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi

    ೧೬. ತಿಂಸನಿಪಾತೋ

    16. Tiṃsanipāto

    ೫೧೧. ಕಿಂಛನ್ದಜಾತಕಂ (೧)

    511. Kiṃchandajātakaṃ (1)

    .

    1.

    ಕಿಂಛನ್ದೋ ಕಿಮಧಿಪ್ಪಾಯೋ, ಏಕೋ ಸಮ್ಮಸಿ ಘಮ್ಮನಿ।

    Kiṃchando kimadhippāyo, eko sammasi ghammani;

    ಕಿಂ ಪತ್ಥಯಾನೋ ಕಿಂ ಏಸಂ, ಕೇನ ಅತ್ಥೇನ ಬ್ರಾಹ್ಮಣ॥

    Kiṃ patthayāno kiṃ esaṃ, kena atthena brāhmaṇa.

    .

    2.

    ಯಥಾ ಮಹಾ ವಾರಿಧರೋ, ಕುಮ್ಭೋ ಸುಪರಿಣಾಹವಾ 1

    Yathā mahā vāridharo, kumbho supariṇāhavā 2;

    ತಥೂಪಮಂ ಅಮ್ಬಪಕ್ಕಂ, ವಣ್ಣಗನ್ಧರಸುತ್ತಮಂ॥

    Tathūpamaṃ ambapakkaṃ, vaṇṇagandharasuttamaṃ.

    .

    3.

    ತಂ ವುಯ್ಹಮಾನಂ ಸೋತೇನ, ದಿಸ್ವಾನಾಮಲಮಜ್ಝಿಮೇ।

    Taṃ vuyhamānaṃ sotena, disvānāmalamajjhime;

    ಪಾಣೀಹಿ ನಂ ಗಹೇತ್ವಾನ, ಅಗ್ಯಾಯತನಮಾಹರಿಂ॥

    Pāṇīhi naṃ gahetvāna, agyāyatanamāhariṃ.

    .

    4.

    ತತೋ ಕದಲಿಪತ್ತೇಸು, ನಿಕ್ಖಿಪಿತ್ವಾ ಸಯಂ ಅಹಂ।

    Tato kadalipattesu, nikkhipitvā sayaṃ ahaṃ;

    ಸತ್ಥೇನ ನಂ ವಿಕಪ್ಪೇತ್ವಾ, ಖುಪ್ಪಿಪಾಸಂ ಅಹಾಸಿ ಮೇ॥

    Satthena naṃ vikappetvā, khuppipāsaṃ ahāsi me.

    .

    5.

    ಸೋಹಂ ಅಪೇತದರಥೋ, ಬ್ಯನ್ತೀಭೂತೋ 3 ದುಖಕ್ಖಮೋ।

    Sohaṃ apetadaratho, byantībhūto 4 dukhakkhamo;

    ಅಸ್ಸಾದಂ ನಾಧಿಗಚ್ಛಾಮಿ, ಫಲೇಸ್ವಞ್ಞೇಸು ಕೇಸುಚಿ 5

    Assādaṃ nādhigacchāmi, phalesvaññesu kesuci 6.

    .

    6.

    ಸೋಸೇತ್ವಾ ನೂನ ಮರಣಂ, ತಂ ಮಮಂ ಆವಹಿಸ್ಸತಿ।

    Sosetvā nūna maraṇaṃ, taṃ mamaṃ āvahissati;

    ಅಮ್ಬಂ ಯಸ್ಸ ಫಲಂ ಸಾದು, ಮಧುರಗ್ಗಂ ಮನೋರಮಂ।

    Ambaṃ yassa phalaṃ sādu, madhuraggaṃ manoramaṃ;

    ಯಮುದ್ಧರಿಂ ವುಯ್ಹಮಾನಂ, ಉದಧಿಸ್ಮಾ ಮಹಣ್ಣವೇ॥

    Yamuddhariṃ vuyhamānaṃ, udadhismā mahaṇṇave.

    .

    7.

    ಅಕ್ಖಾತಂ ತೇ ಮಯಾ ಸಬ್ಬಂ, ಯಸ್ಮಾ ಉಪವಸಾಮಹಂ।

    Akkhātaṃ te mayā sabbaṃ, yasmā upavasāmahaṃ;

    ರಮ್ಮಂ ಪತಿ ನಿಸಿನ್ನೋಸ್ಮಿ, ಪುಥುಲೋಮಾಯುತಾ ಪುಥು॥

    Rammaṃ pati nisinnosmi, puthulomāyutā puthu.

    .

    8.

    ತ್ವಞ್ಚ ಖೋ ಮೇವ 7 ಅಕ್ಖಾಹಿ, ಅತ್ತಾನಮಪಲಾಯಿನಿ।

    Tvañca kho meva 8 akkhāhi, attānamapalāyini;

    ಕಾ ವಾ ತ್ವಮಸಿ ಕಲ್ಯಾಣಿ, ಕಿಸ್ಸ ವಾ ತ್ವಂ ಸುಮಜ್ಝಿಮೇ॥

    Kā vā tvamasi kalyāṇi, kissa vā tvaṃ sumajjhime.

    .

    9.

    ರುಪ್ಪಪಟ್ಟಪಲಿಮಟ್ಠೀವ 9, ಬ್ಯಗ್ಘೀವ ಗಿರಿಸಾನುಜಾ।

    Ruppapaṭṭapalimaṭṭhīva 10, byagghīva girisānujā;

    ಯಾ ಸನ್ತಿ ನಾರಿಯೋ ದೇವೇಸು, ದೇವಾನಂ ಪರಿಚಾರಿಕಾ॥

    Yā santi nāriyo devesu, devānaṃ paricārikā.

    ೧೦.

    10.

    ಯಾ ಚ ಮನುಸ್ಸಲೋಕಸ್ಮಿಂ, ರೂಪೇನಾನ್ವಾಗತಿತ್ಥಿಯೋ।

    Yā ca manussalokasmiṃ, rūpenānvāgatitthiyo;

    ರೂಪೇನ ತೇ ಸದಿಸೀ ನತ್ಥಿ, ದೇವೇಸು ಗನ್ಧಬ್ಬಮನುಸ್ಸಲೋಕೇ 11

    Rūpena te sadisī natthi, devesu gandhabbamanussaloke 12;

    ಪುಟ್ಠಾಸಿ ಮೇ ಚಾರುಪುಬ್ಬಙ್ಗಿ, ಬ್ರೂಹಿ ನಾಮಞ್ಚ ಬನ್ಧವೇ॥

    Puṭṭhāsi me cārupubbaṅgi, brūhi nāmañca bandhave.

    ೧೧.

    11.

    ಯಂ ತ್ವಂ ಪತಿ ನಿಸಿನ್ನೋಸಿ, ರಮ್ಮಂ ಬ್ರಾಹ್ಮಣ ಕೋಸಿಕಿಂ।

    Yaṃ tvaṃ pati nisinnosi, rammaṃ brāhmaṇa kosikiṃ;

    ಸಾಹಂ ಭುಸಾಲಯಾ ವುತ್ಥಾ, ವರವಾರಿವಹೋಘಸಾ॥

    Sāhaṃ bhusālayā vutthā, varavārivahoghasā.

    ೧೨.

    12.

    ನಾನಾದುಮಗಣಾಕಿಣ್ಣಾ, ಬಹುಕಾ ಗಿರಿಕನ್ದರಾ।

    Nānādumagaṇākiṇṇā, bahukā girikandarā;

    ಮಮೇವ ಪಮುಖಾ ಹೋನ್ತಿ, ಅಭಿಸನ್ದನ್ತಿ ಪಾವುಸೇ॥

    Mameva pamukhā honti, abhisandanti pāvuse.

    ೧೩.

    13.

    ಅಥೋ ಬಹೂ ವನತೋದಾ, ನೀಲವಾರಿವಹಿನ್ಧರಾ।

    Atho bahū vanatodā, nīlavārivahindharā;

    ಬಹುಕಾ ನಾಗವಿತ್ತೋದಾ, ಅಭಿಸನ್ದನ್ತಿ ವಾರಿನಾ॥

    Bahukā nāgavittodā, abhisandanti vārinā.

    ೧೪.

    14.

    ತಾ ಅಮ್ಬಜಮ್ಬುಲಬುಜಾ, ನೀಪಾ ತಾಲಾ ಚುದುಮ್ಬರಾ 13

    Tā ambajambulabujā, nīpā tālā cudumbarā 14;

    ಬಹೂನಿ ಫಲಜಾತಾನಿ, ಆವಹನ್ತಿ ಅಭಿಣ್ಹಸೋ॥

    Bahūni phalajātāni, āvahanti abhiṇhaso.

    ೧೫.

    15.

    ಯಂ ಕಿಞ್ಚಿ ಉಭತೋ ತೀರೇ, ಫಲಂ ಪತತಿ ಅಮ್ಬುನಿ।

    Yaṃ kiñci ubhato tīre, phalaṃ patati ambuni;

    ಅಸಂಸಯಂ ತಂ ಸೋತಸ್ಸ, ಫಲಂ ಹೋತಿ ವಸಾನುಗಂ॥

    Asaṃsayaṃ taṃ sotassa, phalaṃ hoti vasānugaṃ.

    ೧೬.

    16.

    ಏತದಞ್ಞಾಯ ಮೇಧಾವಿ, ಪುಥುಪಞ್ಞ ಸುಣೋಹಿ ಮೇ।

    Etadaññāya medhāvi, puthupañña suṇohi me;

    ಮಾ ರೋಚಯ ಮಭಿಸಙ್ಗಂ, ಪಟಿಸೇಧ ಜನಾಧಿಪ॥

    Mā rocaya mabhisaṅgaṃ, paṭisedha janādhipa.

    ೧೭.

    17.

    ನ ವಾಹಂ ವಡ್ಢವಂ 15 ಮಞ್ಞೇ, ಯಂ ತ್ವಂ ರಟ್ಠಾಭಿವಡ್ಢನ।

    Na vāhaṃ vaḍḍhavaṃ 16 maññe, yaṃ tvaṃ raṭṭhābhivaḍḍhana;

    ಆಚೇಯ್ಯಮಾನೋ ರಾಜಿಸಿ, ಮರಣಂ ಅಭಿಕಙ್ಖಸಿ॥

    Āceyyamāno rājisi, maraṇaṃ abhikaṅkhasi.

    ೧೮.

    18.

    ತಸ್ಸ ಜಾನನ್ತಿ ಪಿತರೋ, ಗನ್ಧಬ್ಬಾ ಚ ಸದೇವಕಾ।

    Tassa jānanti pitaro, gandhabbā ca sadevakā;

    ಯೇ ಚಾಪಿ ಇಸಯೋ ಲೋಕೇ, ಸಞ್ಞತತ್ತಾ ತಪಸ್ಸಿನೋ।

    Ye cāpi isayo loke, saññatattā tapassino;

    ಅಸಂಸಯಂ ತೇಪಿ 17 ಜಾನನ್ತಿ, ಪಟ್ಠಭೂತಾ 18 ಯಸಸ್ಸಿನೋ॥

    Asaṃsayaṃ tepi 19 jānanti, paṭṭhabhūtā 20 yasassino.

    ೧೯.

    19.

    ಏವಂ ವಿದಿತ್ವಾ ವಿದೂ ಸಬ್ಬಧಮ್ಮಂ, ವಿದ್ಧಂಸನಂ ಚವನಂ ಜೀವಿತಸ್ಸ।

    Evaṃ viditvā vidū sabbadhammaṃ, viddhaṃsanaṃ cavanaṃ jīvitassa;

    ನ ಚೀಯತೀ ತಸ್ಸ ನರಸ್ಸ ಪಾಪಂ, ಸಚೇ ನ ಚೇತೇತಿ ವಧಾಯ ತಸ್ಸ॥

    Na cīyatī tassa narassa pāpaṃ, sace na ceteti vadhāya tassa.

    ೨೦.

    20.

    ಇಸಿಪೂಗಸಮಞ್ಞಾತೇ, ಏವಂ ಲೋಕ್ಯಾ ವಿದಿತಾ ಸತಿ 21

    Isipūgasamaññāte, evaṃ lokyā viditā sati 22;

    ಅನರಿಯಪರಿಸಮ್ಭಾಸೇ, ಪಾಪಕಮ್ಮಂ ಜಿಗೀಸಸಿ 23

    Anariyaparisambhāse, pāpakammaṃ jigīsasi 24.

    ೨೧.

    21.

    ಸಚೇ ಅಹಂ ಮರಿಸ್ಸಾಮಿ, ತೀರೇ ತೇ ಪುಥುಸುಸ್ಸೋಣಿ।

    Sace ahaṃ marissāmi, tīre te puthusussoṇi;

    ಅಸಂಸಯಂ ತಂ ಅಸಿಲೋಕೋ, ಮಯಿ ಪೇತೇ ಆಗಮಿಸ್ಸತಿ॥

    Asaṃsayaṃ taṃ asiloko, mayi pete āgamissati.

    ೨೨.

    22.

    ತಸ್ಮಾ ಹಿ ಪಾಪಕಂ ಕಮ್ಮಂ, ರಕ್ಖಸ್ಸೇವ 25 ಸುಮಜ್ಝಿಮೇ।

    Tasmā hi pāpakaṃ kammaṃ, rakkhasseva 26 sumajjhime;

    ಮಾ ತಂ ಸಬ್ಬೋ ಜನೋ ಪಚ್ಛಾ, ಪಕುಟ್ಠಾಯಿ 27 ಮಯಿ ಮತೇ॥

    Mā taṃ sabbo jano pacchā, pakuṭṭhāyi 28 mayi mate.

    ೨೩.

    23.

    ಅಞ್ಞಾತಮೇತಂ ಅವಿಸಯ್ಹಸಾಹಿ, ಅತ್ತಾನಮಮ್ಬಞ್ಚ ದದಾಮಿ ತೇ ತಂ।

    Aññātametaṃ avisayhasāhi, attānamambañca dadāmi te taṃ;

    ಸೋ ದುಚ್ಚಜೇ ಕಾಮಗುಣೇ ಪಹಾಯ, ಸನ್ತಿಞ್ಚ ಧಮ್ಮಞ್ಚ ಅಧಿಟ್ಠಿತೋಸಿ॥

    So duccaje kāmaguṇe pahāya, santiñca dhammañca adhiṭṭhitosi.

    ೨೪.

    24.

    ಯೋ ಹಿತ್ವಾ ಪುಬ್ಬಸಞ್ಞೋಗಂ, ಪಚ್ಛಾ ಸಂಯೋಜನೇ ಠಿತೋ।

    Yo hitvā pubbasaññogaṃ, pacchā saṃyojane ṭhito;

    ಅಧಮ್ಮಞ್ಚೇವ ಚರತಿ, ಪಾಪಞ್ಚಸ್ಸ ಪವಡ್ಢತಿ॥

    Adhammañceva carati, pāpañcassa pavaḍḍhati.

    ೨೫.

    25.

    ಏಹಿ ತಂ ಪಾಪಯಿಸ್ಸಾಮಿ, ಕಾಮಂ ಅಪ್ಪೋಸ್ಸುಕೋ ಭವ।

    Ehi taṃ pāpayissāmi, kāmaṃ appossuko bhava;

    ಉಪಾನಯಾಮಿ ಸೀತಸ್ಮಿಂ, ವಿಹರಾಹಿ ಅನುಸ್ಸುಕೋ॥

    Upānayāmi sītasmiṃ, viharāhi anussuko.

    ೨೬.

    26.

    ತಂ ಪುಪ್ಫರಸಮತ್ತೇಭಿ, ವಕ್ಕಙ್ಗೇಹಿ ಅರಿನ್ದಮ।

    Taṃ puppharasamattebhi, vakkaṅgehi arindama;

    ಕೋಞ್ಚಾ ಮಯೂರಾ ದಿವಿಯಾ, ಕೋಲಟ್ಠಿಮಧುಸಾಳಿಕಾ।

    Koñcā mayūrā diviyā, kolaṭṭhimadhusāḷikā;

    ಕೂಜಿತಾ ಹಂಸಪೂಗೇಹಿ, ಕೋಕಿಲೇತ್ಥ ಪಬೋಧರೇ॥

    Kūjitā haṃsapūgehi, kokilettha pabodhare.

    ೨೭.

    27.

    ಅಮ್ಬೇತ್ಥ ವಿಪ್ಪಸಾಖಗ್ಗಾ 29, ಪಲಾಲಖಲಸನ್ನಿಭಾ।

    Ambettha vippasākhaggā 30, palālakhalasannibhā;

    ಕೋಸಮ್ಬಸಳಲಾ 31 ನೀಪಾ, ಪಕ್ಕತಾಲವಿಲಮ್ಬಿನೋ॥

    Kosambasaḷalā 32 nīpā, pakkatālavilambino.

    ೨೮.

    28.

    ಮಾಲೀ ತಿರಿಟೀ ಕಾಯೂರೀ, ಅಙ್ಗದೀ ಚನ್ದನುಸ್ಸದೋ 33

    Mālī tiriṭī kāyūrī, aṅgadī candanussado 34;

    ರತ್ತಿಂ ತ್ವಂ ಪರಿಚಾರೇಸಿ, ದಿವಾ ವೇದೇಸಿ ವೇದನಂ॥

    Rattiṃ tvaṃ paricāresi, divā vedesi vedanaṃ.

    ೨೯.

    29.

    ಸೋಳಸಿತ್ಥಿಸಹಸ್ಸಾನಿ, ಯಾ ತೇಮಾ ಪರಿಚಾರಿಕಾ।

    Soḷasitthisahassāni, yā temā paricārikā;

    ಏವಂ ಮಹಾನುಭಾವೋಸಿ, ಅಬ್ಭುತೋ ಲೋಮಹಂಸನೋ॥

    Evaṃ mahānubhāvosi, abbhuto lomahaṃsano.

    ೩೦.

    30.

    ಕಿಂ ಕಮ್ಮಮಕರೀ ಪುಬ್ಬೇ, ಪಾಪಂ ಅತ್ತದುಖಾವಹಂ।

    Kiṃ kammamakarī pubbe, pāpaṃ attadukhāvahaṃ;

    ಯಂ ಕರಿತ್ವಾ ಮನುಸ್ಸೇಸು, ಪಿಟ್ಠಿಮಂಸಾನಿ ಖಾದಸಿ॥

    Yaṃ karitvā manussesu, piṭṭhimaṃsāni khādasi.

    ೩೧.

    31.

    ಅಜ್ಝೇನಾನಿ ಪಟಿಗ್ಗಯ್ಹ, ಕಾಮೇಸು ಗಧಿತೋ 35 ಅಹಂ।

    Ajjhenāni paṭiggayha, kāmesu gadhito 36 ahaṃ;

    ಅಚರಿಂ ದೀಘಮದ್ಧಾನಂ, ಪರೇಸಂ ಅಹಿತಾಯಹಂ॥

    Acariṃ dīghamaddhānaṃ, paresaṃ ahitāyahaṃ.

    ೩೨.

    32.

    ಯೋ ಪಿಟ್ಠಿಮಂಸಿಕೋ ಹೋತಿ, ಏವಂ ಉಕ್ಕಚ್ಚ ಖಾದತಿ।

    Yo piṭṭhimaṃsiko hoti, evaṃ ukkacca khādati;

    ಯಥಾಹಂ ಅಜ್ಜ ಖಾದಾಮಿ, ಪಿಟ್ಠಿಮಂಸಾನಿ ಅತ್ತನೋತಿ॥

    Yathāhaṃ ajja khādāmi, piṭṭhimaṃsāni attanoti.

    ಕಿಂಛನ್ದಜಾತಕಂ ಪಠಮಂ।

    Kiṃchandajātakaṃ paṭhamaṃ.







    Footnotes:
    1. ಸುಪರಿಣಾಮವಾ (ಕ॰)
    2. supariṇāmavā (ka.)
    3. ಬ್ಯನ್ತಿಭೂತೋ (ಸೀ॰ ಪೀ॰ ಕ॰)
    4. byantibhūto (sī. pī. ka.)
    5. ಕೇಸುಪಿ (ಕ॰ ಸೀ॰)
    6. kesupi (ka. sī.)
    7. ಮೇ (ಸೀ॰), ಮಮ (?)
    8. me (sī.), mama (?)
    9. ರುಪ್ಪಪಟ್ಟಪ್ಲಮಟ್ಠೀವ (ಸ್ಯಾ॰), ರೂಪಪಟ್ಟಪಮಟ್ಠೀವ (ಕ॰)
    10. ruppapaṭṭaplamaṭṭhīva (syā.), rūpapaṭṭapamaṭṭhīva (ka.)
    11. ದೇವಗನ್ಧಬ್ಬಮಾನುಸೇ (ಸ್ಯಾ॰)
    12. devagandhabbamānuse (syā.)
    13. ತಾಲಮುದುಮ್ಬರಾ (ಸ್ಯಾ॰ ಕ॰)
    14. tālamudumbarā (syā. ka.)
    15. ವದ್ಧವಂ (ಸೀ॰ ಪೀ॰)
    16. vaddhavaṃ (sī. pī.)
    17. ತೇ (ಸೀ॰ ಪೀ॰)
    18. ವದ್ಧಭೂತಾ (ಸೀ॰ ಪೀ॰)
    19. te (sī. pī.)
    20. vaddhabhūtā (sī. pī.)
    21. ಪತಿ (ಕ॰ ಸ್ಯಾ॰ ಕ॰)
    22. pati (ka. syā. ka.)
    23. ಜಿಗಿಂಸಸಿ (ಸೀ॰ ಸ್ಯಾ॰ ಪೀ॰)
    24. jigiṃsasi (sī. syā. pī.)
    25. ರಕ್ಖಸ್ಸು ಚ (ಸ್ಯಾ॰)
    26. rakkhassu ca (syā.)
    27. ಪಕತ್ಥಾಸಿ (ಸೀ॰ ಪೀ॰), ಪತ್ವಕ್ಖಾಸಿ (ಸ್ಯಾ॰)
    28. pakatthāsi (sī. pī.), patvakkhāsi (syā.)
    29. ವಿಪ್ಪಸೂನಗ್ಗಾ (ಸೀ॰ ಸ್ಯಾ॰ ಪೀ॰), ವಿಪ್ಪಓನಗ್ಗಾ (ಕ॰)
    30. vippasūnaggā (sī. syā. pī.), vippaonaggā (ka.)
    31. ಕೋಸುಮ್ಭಸಲಲಾ (ಸೀ॰ ಸ್ಯಾ॰ ಪೀ॰)
    32. kosumbhasalalā (sī. syā. pī.)
    33. ಚನ್ದನಸ್ಸದೋ (ಸೀ॰)
    34. candanassado (sī.)
    35. ಗಥಿತೋ (ಸೀ॰ ಪೀ॰), ಗಿದ್ಧಿತೋ (ಸ್ಯಾ॰ ಕ॰), ಗಿದ್ಧಿಕೋ (ಕ॰ ಅಟ್ಠ॰)
    36. gathito (sī. pī.), giddhito (syā. ka.), giddhiko (ka. aṭṭha.)



    Related texts:



    ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೧೫೧] ೧. ಕಿಂಛನ್ದಜಾತಕವಣ್ಣನಾ • [151] 1. Kiṃchandajātakavaṇṇanā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact