| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. ပဉ္စမပဏ္ဏာသကံ
5. Pañcamapaṇṇāsakaṃ
(၂၁) ၁. ကိမိလဝဂ္ဂော
(21) 1. Kimilavaggo
၁. ကိမိလသုတ္တဝဏ္ဏနာ
1. Kimilasuttavaṇṇanā
၂၀၁. ပဉ္စမသ္သ ပဌမေ ကိမိလာယန္တိ ဧဝံနာမကေ နဂရေ။ နိစုလဝနေတိ မုစလိန္ဒဝနေ။ ဧတဒဝောစာတိ အယံ ကိရ ထေရော တသ္မိံယေဝ နဂရေ သေဋ္ဌိပုတ္တော သတ္ထု သန္တိကေ ပဗ္ဗဇိတ္ဝာ ပုဗ္ဗေနိဝာသဉာဏံ ပဋိလဘိ။ သော အတ္တနာ နိဝုတ္ထံ ခန္ဓသန္တာနံ အနုသ္သရန္တော ကသ္သပဒသဗလသ္သ သာသနောသက္ကနကာလေ ပဗ္ဗဇိတ္ဝာ စတူသု ပရိသာသု သာသနေ အဂာရဝံ ကရောန္တီသု နိသ္သေဏိံ ဗန္ဓိတ္ဝာ ပဗ္ဗတံ အာရုယ္ဟ တတ္ထ သမဏဓမ္မံ ကတ္ဝာ အတ္တနော နိဝုတ္ထဘာဝံ အဒ္ဒသ။ သော ‘‘သတ္ထာရံ ဥပသင္ကမိတ္ဝာ တံ ကာရဏံ ပုစ္ဆိသ္သာမီ’’တိ ဧတံ ‘‘ကော နု ခော, ဘန္တေ’’တိအာဒိဝစနံ အဝောစ။
201. Pañcamassa paṭhame kimilāyanti evaṃnāmake nagare. Niculavaneti mucalindavane. Etadavocāti ayaṃ kira thero tasmiṃyeva nagare seṭṭhiputto satthu santike pabbajitvā pubbenivāsañāṇaṃ paṭilabhi. So attanā nivutthaṃ khandhasantānaṃ anussaranto kassapadasabalassa sāsanosakkanakāle pabbajitvā catūsu parisāsu sāsane agāravaṃ karontīsu nisseṇiṃ bandhitvā pabbataṃ āruyha tattha samaṇadhammaṃ katvā attano nivutthabhāvaṃ addasa. So ‘‘satthāraṃ upasaṅkamitvā taṃ kāraṇaṃ pucchissāmī’’ti etaṃ ‘‘ko nu kho, bhante’’tiādivacanaṃ avoca.
သတ္ထရိ အဂာရဝာ ဝိဟရန္တိ အပ္ပတိသ္သာတိ သတ္ထရိ ဂာရဝဉ္စေဝ ဇေဋ္ဌကဘာဝဉ္စ အနုပဋ္ဌပေတ္ဝာ ဝိဟရန္တိ။ သေသေသုပိ ဧသေဝ နယော။ တတ္ထ စေတိယင္ဂဏာဒီသု ဆတ္တံ ဓာရေတ္ဝာ ဥပာဟနာ အာရုယ္ဟ ဝိစရန္တော နာနပ္ပကာရဉ္စ နိရတ္ထကကထံ ကထေန္တော သတ္ထရိ အဂာရဝော ဝိဟရတိ နာမ။ ဓမ္မသ္သဝနဂ္ဂေ ပန နိသီဒိတ္ဝာ နိဒ္ဒာယန္တော စေဝ နာနပ္ပကာရဉ္စ နိရတ္ထကကထံ ကထေန္တော ဓမ္မေ အဂာရဝော ဝိဟရတိ နာမ။ သင္ဃမဇ္ဈေ ဗာဟာဝိက္ခေပကံ နာနတ္တကထံ ကထေန္တော ထေရနဝမဇ္ဈိမေသု စ စိတ္တီကာရံ အကရောန္တော သင္ဃေ အဂာရဝော ဝိဟရတိ နာမ။ သိက္ခံ အပရိပူရေန္တော သိက္ခာယ အဂာရဝော ဝိဟရတိ နာမ။ အညမညံ ကလဟဘဏ္ဍနာဒီနိ ကရောန္တော အညမညံ အဂာရဝော ဝိဟရတိ နာမ။ ဒုတိယံ ဥတ္တာနတ္ထမေဝ။
Satthari agāravā viharanti appatissāti satthari gāravañceva jeṭṭhakabhāvañca anupaṭṭhapetvā viharanti. Sesesupi eseva nayo. Tattha cetiyaṅgaṇādīsu chattaṃ dhāretvā upāhanā āruyha vicaranto nānappakārañca niratthakakathaṃ kathento satthari agāravo viharati nāma. Dhammassavanagge pana nisīditvā niddāyanto ceva nānappakārañca niratthakakathaṃ kathento dhamme agāravo viharati nāma. Saṅghamajjhe bāhāvikkhepakaṃ nānattakathaṃ kathento theranavamajjhimesu ca cittīkāraṃ akaronto saṅghe agāravo viharati nāma. Sikkhaṃ aparipūrento sikkhāya agāravo viharati nāma. Aññamaññaṃ kalahabhaṇḍanādīni karonto aññamaññaṃ agāravo viharati nāma. Dutiyaṃ uttānatthameva.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. ကိမိလသုတ္တံ • 1. Kimilasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၄. ကိမိလသုတ္တာဒိဝဏ္ဏနာ • 1-4. Kimilasuttādivaṇṇanā
