| Library / Tipiṭaka / तिपिटक • Tipiṭaka / अपदानपाळि • Apadānapāḷi |
८. कोरण्डपुप्फियत्थेरअपदानं
8. Koraṇḍapupphiyattheraapadānaṃ
३५.
35.
‘‘अक्कन्तञ्च पदं दिस्वा, चक्कालङ्कारभूसितं।
‘‘Akkantañca padaṃ disvā, cakkālaṅkārabhūsitaṃ;
पदेनानुपदं यन्तो, विपस्सिस्स महेसिनो॥
Padenānupadaṃ yanto, vipassissa mahesino.
३६.
36.
‘‘कोरण्डं पुप्फितं दिस्वा, समूलं पूजितं मया।
‘‘Koraṇḍaṃ pupphitaṃ disvā, samūlaṃ pūjitaṃ mayā;
हट्ठो हट्ठेन चित्तेन, अवन्दिं पदमुत्तमं॥
Haṭṭho haṭṭhena cittena, avandiṃ padamuttamaṃ.
३७.
37.
‘‘एकनवुतितो कप्पे, यं पुप्फमभिपूजयिं।
‘‘Ekanavutito kappe, yaṃ pupphamabhipūjayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
३८.
38.
‘‘सत्तपञ्ञासकप्पम्हि, एको वीतमलो अहुं।
‘‘Sattapaññāsakappamhi, eko vītamalo ahuṃ;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
३९.
39.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा कोरण्डपुप्फियो थेरो इमा गाथायो अभासित्थाति।
Itthaṃ sudaṃ āyasmā koraṇḍapupphiyo thero imā gāthāyo abhāsitthāti.
कोरण्डपुप्फियत्थेरस्सापदानं अट्ठमं।
Koraṇḍapupphiyattherassāpadānaṃ aṭṭhamaṃ.
