| Library / Tipiṭaka / तिपिटक • Tipiṭaka / थेरगाथापाळि • Theragāthāpāḷi |
१२. कोसियत्थेरगाथा
12. Kosiyattheragāthā
३७०.
370.
‘‘यो वे गरूनं वचनञ्ञु धीरो, वसे च तम्हि जनयेथ पेमं।
‘‘Yo ve garūnaṃ vacanaññu dhīro, vase ca tamhi janayetha pemaṃ;
सो भत्तिमा नाम च होति पण्डितो, ञत्वा च धम्मेसु विसेसि अस्स॥
So bhattimā nāma ca hoti paṇḍito, ñatvā ca dhammesu visesi assa.
३७१.
371.
‘‘यं आपदा उप्पतिता उळारा, नक्खम्भयन्ते पटिसङ्खयन्तं।
‘‘Yaṃ āpadā uppatitā uḷārā, nakkhambhayante paṭisaṅkhayantaṃ;
सो थामवा नाम च होति पण्डितो, ञत्वा च धम्मेसु विसेसि अस्स॥
So thāmavā nāma ca hoti paṇḍito, ñatvā ca dhammesu visesi assa.
३७२.
372.
‘‘यो वे समुद्दोव ठितो अनेजो, गम्भीरपञ्ञो निपुणत्थदस्सी।
‘‘Yo ve samuddova ṭhito anejo, gambhīrapañño nipuṇatthadassī;
असंहारियो नाम च होति पण्डितो, ञत्वा च धम्मेसु विसेसि अस्स॥
Asaṃhāriyo nāma ca hoti paṇḍito, ñatvā ca dhammesu visesi assa.
३७३.
373.
‘‘बहुस्सुतो धम्मधरो च होति, धम्मस्स होति अनुधम्मचारी।
‘‘Bahussuto dhammadharo ca hoti, dhammassa hoti anudhammacārī;
सो तादिसो नाम च होति पण्डितो, ञत्वा च धम्मेसु विसेसि अस्स॥
So tādiso nāma ca hoti paṇḍito, ñatvā ca dhammesu visesi assa.
३७४.
374.
‘‘अत्थञ्च यो जानाति भासितस्स, अत्थञ्च ञत्वान तथा करोति।
‘‘Atthañca yo jānāti bhāsitassa, atthañca ñatvāna tathā karoti;
अत्थन्तरो नाम स होति पण्डितो, ञत्वा च धम्मेसु विसेसि अस्सा’’ति॥
Atthantaro nāma sa hoti paṇḍito, ñatvā ca dhammesu visesi assā’’ti.
… कोसियो थेरो…।
… Kosiyo thero….
पञ्चकनिपातो निट्ठितो।
Pañcakanipāto niṭṭhito.
तत्रुद्दानं –
Tatruddānaṃ –
राजदत्तो सुभूतो च, गिरिमानन्दसुमना।
Rājadatto subhūto ca, girimānandasumanā;
वड्ढो च कस्सपो थेरो, गयाकस्सपवक्कली॥
Vaḍḍho ca kassapo thero, gayākassapavakkalī.
विजितो यसदत्तो च, सोणो कोसियसव्हयो।
Vijito yasadatto ca, soṇo kosiyasavhayo;
सट्ठि च पञ्च गाथायो, थेरा च एत्थ द्वादसाति॥
Saṭṭhi ca pañca gāthāyo, therā ca ettha dvādasāti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरगाथा-अट्ठकथा • Theragāthā-aṭṭhakathā / १२. कोसियत्थेरगाथावण्णना • 12. Kosiyattheragāthāvaṇṇanā
