| Library / Tipiṭaka / ತಿಪಿಟಕ • Tipiṭaka / ಧಮ್ಮಸಙ್ಗಣಿ-ಅಟ್ಠಕಥಾ • Dhammasaṅgaṇi-aṭṭhakathā |
ಕೋಟ್ಠಾಸವಾರೋ
Koṭṭhāsavāro
೫೮-೧೨೦. ಇದಾನಿ ತಸ್ಮಿಂ ಖೋ ಪನ ಸಮಯೇ ಚತ್ತಾರೋ ಖನ್ಧಾ ಹೋನ್ತೀತಿ ಸಙ್ಗಹವಾರೋ ಆರದ್ಧೋ। ಸೋ ಉದ್ದೇಸನಿದ್ದೇಸಪಟಿನಿದ್ದೇಸಾನಂ ವಸೇನ ತಿವಿಧೋ ಹೋತಿ। ತತ್ಥ ‘ತಸ್ಮಿಂ ಖೋ ಪನ ಸಮಯೇ ಚತ್ತಾರೋ ಖನ್ಧಾ’ತಿ ಏವಮಾದಿಕೋ ಉದ್ದೇಸೋ। ಕತಮೇ ತಸ್ಮಿಂ ಸಮಯೇ ಚತ್ತಾರೋ ಖನ್ಧಾ’ತಿಆದಿಕೋ ನಿದ್ದೇಸೋ। ಕತಮೋ ತಸ್ಮಿಂ ಸಮಯೇ ವೇದನಾಕ್ಖನ್ಧೋತಿಆದಿಕೋ ಪಟಿನಿದ್ದೇಸೋತಿ ವೇದಿತಬ್ಬೋ।
58-120. Idāni tasmiṃ kho pana samaye cattāro khandhā hontīti saṅgahavāro āraddho. So uddesaniddesapaṭiniddesānaṃ vasena tividho hoti. Tattha ‘tasmiṃ kho pana samaye cattāro khandhā’ti evamādiko uddeso. Katame tasmiṃ samaye cattāro khandhā’tiādiko niddeso. Katamo tasmiṃ samaye vedanākkhandhotiādiko paṭiniddesoti veditabbo.
ತತ್ಥ ಉದ್ದೇಸವಾರೇ ಚತ್ತಾರೋ ಖನ್ಧಾತಿಆದಯೋ ತೇವೀಸತಿ ಕೋಟ್ಠಾಸಾ ಹೋನ್ತಿ। ತೇಸಂ ಏವಮತ್ಥೋ ವೇದಿತಬ್ಬೋ – ಯಸ್ಮಿಂ ಸಮಯೇ ಕಾಮಾವಚರಂ ಪಠಮಂ ಮಹಾಕುಸಲಚಿತ್ತಂ ಉಪ್ಪಜ್ಜತಿ, ಯೇ ತಸ್ಮಿಂ ಸಮಯೇ ಚಿತ್ತಙ್ಗವಸೇನ ಉಪ್ಪನ್ನಾ, ಠಪೇತ್ವಾ ಯೇವಾಪನಕೇ, ಪಾಳಿಆರುಳ್ಹಾ ಅತಿರೇಕಪಣ್ಣಾಸಧಮ್ಮಾ, ತೇ ಸಬ್ಬೇಪಿ ಸಙ್ಗಯ್ಹಮಾನಾ ರಾಸಟ್ಠೇನ ಚತ್ತಾರೋವ ಖನ್ಧಾ ಹೋನ್ತಿ । ಹೇಟ್ಠಾ ವುತ್ತೇನ ಆಯತನಟ್ಠೇನ ದ್ವೇ ಆಯತನಾನಿ ಹೋನ್ತಿ। ಸಭಾವಟ್ಠೇನ ಸುಞ್ಞತಟ್ಠೇನ ನಿಸ್ಸತ್ತಟ್ಠೇನ ದ್ವೇವ ಧಾತುಯೋ ಹೋನ್ತಿ। ಪಚ್ಚಯಸಙ್ಖಾತೇನ ಆಹಾರಟ್ಠೇನ ತಯೋವೇತ್ಥ ಧಮ್ಮಾ ಆಹಾರಾ ಹೋನ್ತಿ। ಅವಸೇಸಾ ನೋ ಆಹಾರಾ।
Tattha uddesavāre cattāro khandhātiādayo tevīsati koṭṭhāsā honti. Tesaṃ evamattho veditabbo – yasmiṃ samaye kāmāvacaraṃ paṭhamaṃ mahākusalacittaṃ uppajjati, ye tasmiṃ samaye cittaṅgavasena uppannā, ṭhapetvā yevāpanake, pāḷiāruḷhā atirekapaṇṇāsadhammā, te sabbepi saṅgayhamānā rāsaṭṭhena cattārova khandhā honti . Heṭṭhā vuttena āyatanaṭṭhena dve āyatanāni honti. Sabhāvaṭṭhena suññataṭṭhena nissattaṭṭhena dveva dhātuyo honti. Paccayasaṅkhātena āhāraṭṭhena tayovettha dhammā āhārā honti. Avasesā no āhārā.
‘ಕಿಂ ಪನೇತೇ ಅಞ್ಞಮಞ್ಞಂ ವಾ ತಂಸಮುಟ್ಠಾನರೂಪಸ್ಸ ವಾ ಪಚ್ಚಯಾ ನ ಹೋನ್ತೀ’ತಿ? ‘ನೋ ನ ಹೋನ್ತಿ। ಇಮೇ ಪನ ತಥಾ ಚ ಹೋನ್ತಿ, ಅಞ್ಞಥಾ ಚಾತಿ ಸಮಾನೇಪಿ ಪಚ್ಚಯತ್ತೇ ಅತಿರೇಕಪಚ್ಚಯಾ ಹೋನ್ತಿ, ತಸ್ಮಾ ಆಹಾರಾತಿ ವುತ್ತಾ। ಕಥಂ? ಏತೇಸು ಹಿ ಫಸ್ಸಾಹಾರೋ, ಯೇಸಂ ಧಮ್ಮಾನಂ ಅವಸೇಸಾ ಚಿತ್ತಚೇತಸಿಕಾ ಪಚ್ಚಯಾ ಹೋನ್ತಿ, ತೇಸಞ್ಚ ಪಚ್ಚಯೋ ಹೋತಿ, ತಿಸ್ಸೋ ಚ ವೇದನಾ ಆಹರತಿ। ಮನೋಸಞ್ಚೇತನಾಹಾರೋ ತೇಸಞ್ಚ ಪಚ್ಚಯೋ ಹೋತಿ ತಯೋ ಚ ಭವೇ ಆಹರತಿ। ವಿಞ್ಞಾಣಾಹಾರೋ ತೇಸಞ್ಚ ಪಚ್ಚಯೋ ಹೋತಿ ಪಟಿಸನ್ಧಿನಾಮರೂಪಞ್ಚ ಆಹರತೀ’ತಿ। ‘ನನು ಚ ಸೋ ವಿಪಾಕೋವ ಇದಂ ಪನ ಕುಸಲವಿಞ್ಞಾಣ’ನ್ತಿ? ‘ಕಿಞ್ಚಾಪಿ ಕುಸಲವಿಞ್ಞಾಣಂ, ತಂಸರಿಕ್ಖತಾಯ ಪನ ವಿಞ್ಞಾಣಾಹಾರೋ’ತ್ವೇವ ವುತ್ತಂ। ಉಪತ್ಥಮ್ಭಕಟ್ಠೇನ ವಾ ಇಮೇ ತಯೋ ಆಹಾರಾತಿ ವುತ್ತಾ। ಇಮೇ ಹಿ ಸಮ್ಪಯುತ್ತಧಮ್ಮಾನಂ, ಕಬಳೀಕಾರಾಹಾರೋ ವಿಯ ರೂಪಕಾಯಸ್ಸ, ಉಪತ್ಥಮ್ಭಕಪಚ್ಚಯಾ ಹೋನ್ತಿ। ತೇನೇವ ವುತ್ತಂ – ‘‘ಅರೂಪಿನೋ ಆಹಾರಾ ಸಮ್ಪಯುತ್ತಕಾನಂ ಧಮ್ಮಾನಂ ತಂಸಮುಟ್ಠಾನಾನಞ್ಚ ರೂಪಾನಂ ಆಹಾರಪಚ್ಚಯೇನ ಪಚ್ಚಯೋ’’ತಿ (ಪಟ್ಠಾ॰ ೧.೧.೧೫)।
‘Kiṃ panete aññamaññaṃ vā taṃsamuṭṭhānarūpassa vā paccayā na hontī’ti? ‘No na honti. Ime pana tathā ca honti, aññathā cāti samānepi paccayatte atirekapaccayā honti, tasmā āhārāti vuttā. Kathaṃ? Etesu hi phassāhāro, yesaṃ dhammānaṃ avasesā cittacetasikā paccayā honti, tesañca paccayo hoti, tisso ca vedanā āharati. Manosañcetanāhāro tesañca paccayo hoti tayo ca bhave āharati. Viññāṇāhāro tesañca paccayo hoti paṭisandhināmarūpañca āharatī’ti. ‘Nanu ca so vipākova idaṃ pana kusalaviññāṇa’nti? ‘Kiñcāpi kusalaviññāṇaṃ, taṃsarikkhatāya pana viññāṇāhāro’tveva vuttaṃ. Upatthambhakaṭṭhena vā ime tayo āhārāti vuttā. Ime hi sampayuttadhammānaṃ, kabaḷīkārāhāro viya rūpakāyassa, upatthambhakapaccayā honti. Teneva vuttaṃ – ‘‘arūpino āhārā sampayuttakānaṃ dhammānaṃ taṃsamuṭṭhānānañca rūpānaṃ āhārapaccayena paccayo’’ti (paṭṭhā. 1.1.15).
ಅಪರೋ ನಯೋ – ಅಜ್ಝತ್ತಿಕಸನ್ತತಿಯಾ ವಿಸೇಸಪಚ್ಚಯತ್ತಾ ಕಬಳೀಕಾರಾಹಾರೋ ಚ ಇಮೇ ಚ ತಯೋ ಧಮ್ಮಾ ಆಹಾರಾತಿ ವುತ್ತಾ। ವಿಸೇಸಪಚ್ಚಯೋ ಹಿ ಕಬಳೀಕಾರಾಹಾರಭಕ್ಖಾನಂ ಸತ್ತಾನಂ ರೂಪಕಾಯಸ್ಸ ಕಬಳೀಕಾರೋ ಆಹಾರೋ; ನಾಮಕಾಯೇ ವೇದನಾಯ ಫಸ್ಸೋ, ವಿಞ್ಞಾಣಸ್ಸ ಮನೋಸಞ್ಚೇತನಾ, ನಾಮರೂಪಸ್ಸ ವಿಞ್ಞಾಣಂ। ಯಥಾಹ –
Aparo nayo – ajjhattikasantatiyā visesapaccayattā kabaḷīkārāhāro ca ime ca tayo dhammā āhārāti vuttā. Visesapaccayo hi kabaḷīkārāhārabhakkhānaṃ sattānaṃ rūpakāyassa kabaḷīkāro āhāro; nāmakāye vedanāya phasso, viññāṇassa manosañcetanā, nāmarūpassa viññāṇaṃ. Yathāha –
‘‘ಸೇಯ್ಯಥಾಪಿ, ಭಿಕ್ಖವೇ, ಅಯಂ ಕಾಯೋ ಆಹಾರಟ್ಠಿತಿಕೋ, ಆಹಾರಂ ಪಟಿಚ್ಚ ತಿಟ್ಠತಿ, ಅನಾಹಾರೋ ನೋ ತಿಟ್ಠತಿ’’ (ಸಂ॰ ನಿ॰ ೫.೧೮೩)। ತಥಾ ಫಸ್ಸಪಚ್ಚಯಾ ವೇದನಾ, ಸಙ್ಖಾರಪಚ್ಚಯಾ ವಿಞ್ಞಾಣಂ, ವಿಞ್ಞಾಣಪಚ್ಚಯಾ ನಾಮರೂಪನ್ತಿ (ಸಂ॰ ನಿ॰ ೨.೧)।
‘‘Seyyathāpi, bhikkhave, ayaṃ kāyo āhāraṭṭhitiko, āhāraṃ paṭicca tiṭṭhati, anāhāro no tiṭṭhati’’ (saṃ. ni. 5.183). Tathā phassapaccayā vedanā, saṅkhārapaccayā viññāṇaṃ, viññāṇapaccayā nāmarūpanti (saṃ. ni. 2.1).
ಅಧಿಪತಿಯಟ್ಠೇನ ಪನ ಅಟ್ಠೇವ ಧಮ್ಮಾ ಇನ್ದ್ರಿಯಾನಿ ಹೋನ್ತಿ, ನ ಅವಸೇಸಾ। ತೇನ ವುತ್ತಂ – ಅಟ್ಠಿನ್ದ್ರಿಯಾನಿ ಹೋನ್ತೀತಿ। ಉಪನಿಜ್ಝಾಯನಟ್ಠೇನ ಪಞ್ಚೇವ ಧಮ್ಮಾ ಝಾನಙ್ಗಾನಿ ಹೋನ್ತಿ। ತೇನ ವುತ್ತಂ – ಪಞ್ಚಙ್ಗಿಕಂ ಝಾನಂ ಹೋತೀತಿ।
Adhipatiyaṭṭhena pana aṭṭheva dhammā indriyāni honti, na avasesā. Tena vuttaṃ – aṭṭhindriyāni hontīti. Upanijjhāyanaṭṭhena pañceva dhammā jhānaṅgāni honti. Tena vuttaṃ – pañcaṅgikaṃ jhānaṃ hotīti.
ನಿಯ್ಯಾನಟ್ಠೇನ ಚ ಹೇತ್ವಟ್ಠೇನ ಚ ಪಞ್ಚೇವ ಧಮ್ಮಾ ಮಗ್ಗಙ್ಗಾನಿ ಹೋನ್ತಿ। ತೇನ ವುತ್ತಂ – ಪಞ್ಚಙ್ಗಿಕೋ ಮಗ್ಗೋ ಹೋತೀತಿ। ಕಿಞ್ಚಾಪಿ ಹಿ ಅಟ್ಠಙ್ಗಿಕೋ ಅರಿಯಮಗ್ಗೋ, ಲೋಕಿಯಚಿತ್ತೇ ಪನ ಏಕಕ್ಖಣೇ ತಿಸ್ಸೋ ವಿರತಿಯೋ ನ ಲಬ್ಭನ್ತಿ, ತಸ್ಮಾ ಪಞ್ಚಙ್ಗಿಕೋತಿ ವುತ್ತೋ। ‘ನನು ಚ ‘‘ಯಥಾಗತಮಗ್ಗೋತಿ ಖೋ, ಭಿಕ್ಖು, ಅರಿಯಸ್ಸೇತಂ ಅಟ್ಠಙ್ಗಿಕಸ್ಸ ಮಗ್ಗಸ್ಸ ಅಧಿವಚನ’’ನ್ತಿ (ಸಂ॰ ನಿ॰ ೪.೨೪೫) ಇಮಸ್ಮಿಂ ಸುತ್ತೇ ‘ಯಥೇವ ಲೋಕುತ್ತರಮಗ್ಗೋ ಅಟ್ಠಙ್ಗಿಕೋ, ಪುಬ್ಬಭಾಗವಿಪಸ್ಸನಾಮಗ್ಗೋಪಿ ತಥೇವ ಅಟ್ಠಙ್ಗಿಕೋ’ತಿ ಯಥಾಗತವಚನೇನ ಇಮಸ್ಸತ್ಥಸ್ಸ ದೀಪಿತತ್ತಾ, ಲೋಕಿಯಮಗ್ಗೇನಾಪಿ ಅಟ್ಠಙ್ಗಿಕೇನ ಭವಿತಬ್ಬನ್ತಿ? ನ ಭವಿತಬ್ಬಂ । ಅಯಞ್ಹಿ ಸುತ್ತನ್ತಿಕದೇಸನಾ ನಾಮ ಪರಿಯಾಯದೇಸನಾ। ತೇನಾಹ – ‘‘ಪುಬ್ಬೇವ ಖೋ ಪನಸ್ಸ ಕಾಯಕಮ್ಮಂ ವಚೀಕಮ್ಮಂ ಆಜೀವೋ ಸುಪರಿಸುದ್ಧೋ ಹೋತೀ’’ತಿ (ಮ॰ ನಿ॰ ೩.೪೩೧)। ಅಯಂ ಪನ ನಿಪ್ಪರಿಯಾಯದೇಸನಾ। ಲೋಕಿಯಚಿತ್ತಸ್ಮಿಞ್ಹಿ ತಿಸ್ಸೋ ವಿರತಿಯೋ ಏಕಕ್ಖಣೇ ನ ಲಬ್ಭನ್ತಿ, ತಸ್ಮಾ ‘ಪಞ್ಚಙ್ಗಿಕೋ’ವ ವುತ್ತೋತಿ।
Niyyānaṭṭhena ca hetvaṭṭhena ca pañceva dhammā maggaṅgāni honti. Tena vuttaṃ – pañcaṅgiko maggo hotīti. Kiñcāpi hi aṭṭhaṅgiko ariyamaggo, lokiyacitte pana ekakkhaṇe tisso viratiyo na labbhanti, tasmā pañcaṅgikoti vutto. ‘Nanu ca ‘‘yathāgatamaggoti kho, bhikkhu, ariyassetaṃ aṭṭhaṅgikassa maggassa adhivacana’’nti (saṃ. ni. 4.245) imasmiṃ sutte ‘yatheva lokuttaramaggo aṭṭhaṅgiko, pubbabhāgavipassanāmaggopi tatheva aṭṭhaṅgiko’ti yathāgatavacanena imassatthassa dīpitattā, lokiyamaggenāpi aṭṭhaṅgikena bhavitabbanti? Na bhavitabbaṃ . Ayañhi suttantikadesanā nāma pariyāyadesanā. Tenāha – ‘‘pubbeva kho panassa kāyakammaṃ vacīkammaṃ ājīvo suparisuddho hotī’’ti (ma. ni. 3.431). Ayaṃ pana nippariyāyadesanā. Lokiyacittasmiñhi tisso viratiyo ekakkhaṇe na labbhanti, tasmā ‘pañcaṅgiko’va vuttoti.
ಅಕಮ್ಪಿಯಟ್ಠೇನ ಪನ ಸತ್ತೇವ ಧಮ್ಮಾ ಬಲಾನಿ ಹೋನ್ತಿ। ಮೂಲಟ್ಠೇನ ತಯೋವ ಧಮ್ಮಾ ಹೇತೂ। ಫುಸನಟ್ಠೇನ ಏಕೋವ ಧಮ್ಮೋ ಫಸ್ಸೋ। ವೇದಯಿತಟ್ಠೇನ ಏಕೋವ ಧಮ್ಮೋ ವೇದನಾ। ಸಞ್ಜಾನನಟ್ಠೇನ ಏಕೋವ ಧಮ್ಮೋ ಸಞ್ಞಾ। ಚೇತಯನಟ್ಠೇನ ಏಕೋವ ಧಮ್ಮೋ ಚೇತನಾ। ಚಿತ್ತವಿಚಿತ್ತಟ್ಠೇನ ಏಕೋವ ಧಮ್ಮೋ ಚಿತ್ತಂ। ರಾಸಟ್ಠೇನ ಚೇವ ವೇದಯಿತಟ್ಠೇನ ಚ ಏಕೋವ ಧಮ್ಮೋ ವೇದನಾಕ್ಖನ್ಧೋ। ರಾಸಟ್ಠೇನ ಚ ಸಞ್ಜಾನನಟ್ಠೇನ ಚ ಏಕೋವ ಧಮ್ಮೋ ಸಞ್ಞಾಕ್ಖನ್ಧೋ। ರಾಸಟ್ಠೇನ ಚ ಅಭಿಸಙ್ಖರಣಟ್ಠೇನ ಚ ಏಕೋವ ಧಮ್ಮೋ ಸಙ್ಖಾರಕ್ಖನ್ಧೋ। ರಾಸಟ್ಠೇನ ಚ ಚಿತ್ತವಿಚಿತ್ತಟ್ಠೇನ ಚ ಏಕೋವ ಧಮ್ಮೋ ವಿಞ್ಞಾಣಕ್ಖನ್ಧೋ। ವಿಜಾನನಟ್ಠೇನ ಚೇವ ಹೇಟ್ಠಾ ವುತ್ತಆಯತನಟ್ಠೇನ ಚ ಏಕಮೇವ ಮನಾಯತನಂ। ವಿಜಾನನಟ್ಠೇನ ಚ ಅಧಿಪತಿಯಟ್ಠೇನ ಚ ಏಕಮೇವ ಮನಿನ್ದ್ರಿಯಂ। ವಿಜಾನನಟ್ಠೇನ ಚ ಸಭಾವಸುಞ್ಞತನಿಸ್ಸತ್ತಟ್ಠೇನ ಚ ಏಕೋವ ಧಮ್ಮೋ ಮನೋವಿಞ್ಞಾಣಧಾತು ನಾಮ ಹೋತಿ, ನ ಅವಸೇಸಾ। ಠಪೇತ್ವಾ ಪನ ಚಿತ್ತಂ, ಯಥಾವುತ್ತೇನ ಅತ್ಥೇನ ಅವಸೇಸಾ ಸಬ್ಬೇಪಿ ಧಮ್ಮಾ ಏಕಂ ಧಮ್ಮಾಯತನಮೇವ, ಏಕಾ ಚ ಧಮ್ಮಧಾತುಯೇವ ಹೋತೀತಿ।
Akampiyaṭṭhena pana satteva dhammā balāni honti. Mūlaṭṭhena tayova dhammā hetū. Phusanaṭṭhena ekova dhammo phasso. Vedayitaṭṭhena ekova dhammo vedanā. Sañjānanaṭṭhena ekova dhammo saññā. Cetayanaṭṭhena ekova dhammo cetanā. Cittavicittaṭṭhena ekova dhammo cittaṃ. Rāsaṭṭhena ceva vedayitaṭṭhena ca ekova dhammo vedanākkhandho. Rāsaṭṭhena ca sañjānanaṭṭhena ca ekova dhammo saññākkhandho. Rāsaṭṭhena ca abhisaṅkharaṇaṭṭhena ca ekova dhammo saṅkhārakkhandho. Rāsaṭṭhena ca cittavicittaṭṭhena ca ekova dhammo viññāṇakkhandho. Vijānanaṭṭhena ceva heṭṭhā vuttaāyatanaṭṭhena ca ekameva manāyatanaṃ. Vijānanaṭṭhena ca adhipatiyaṭṭhena ca ekameva manindriyaṃ. Vijānanaṭṭhena ca sabhāvasuññatanissattaṭṭhena ca ekova dhammo manoviññāṇadhātu nāma hoti, na avasesā. Ṭhapetvā pana cittaṃ, yathāvuttena atthena avasesā sabbepi dhammā ekaṃ dhammāyatanameva, ekā ca dhammadhātuyeva hotīti.
ಯೇ ವಾ ಪನ ತಸ್ಮಿಂ ಸಮಯೇತಿ ಇಮಿನಾ ಪನ ಅಪ್ಪನಾವಾರೇನ ಇಧಾಪಿ ಹೇಟ್ಠಾ ವುತ್ತಾ ಯೇವಾಪನಕಾವ ಸಙ್ಗಹಿತಾ। ಯಥಾ ಚ ಇಧ ಏವಂ ಸಬ್ಬತ್ಥ । ಇತೋ ಪರಞ್ಹಿ ಏತ್ತಕಮ್ಪಿ ನ ವಿಚಾರಯಿಸ್ಸಾಮ। ನಿದ್ದೇಸಪಟಿನಿದ್ದೇಸವಾರೇಸು ಹೇಟ್ಠಾ ವುತ್ತನಯೇನೇವ ಅತ್ಥೋ ವೇದಿತಬ್ಬೋತಿ।
Ye vā pana tasmiṃ samayeti iminā pana appanāvārena idhāpi heṭṭhā vuttā yevāpanakāva saṅgahitā. Yathā ca idha evaṃ sabbattha . Ito parañhi ettakampi na vicārayissāma. Niddesapaṭiniddesavāresu heṭṭhā vuttanayeneva attho veditabboti.
ಸಙ್ಗಹವಾರೋ ನಿಟ್ಠಿತೋ।
Saṅgahavāro niṭṭhito.
ಕೋಟ್ಠಾಸವಾರೋತಿಪಿ ಏತಸ್ಸೇವ ನಾಮಂ।
Koṭṭhāsavārotipi etasseva nāmaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಧಮ್ಮಸಙ್ಗಣೀಪಾಳಿ • Dhammasaṅgaṇīpāḷi / ಕಾಮಾವಚರಕುಸಲಂ • Kāmāvacarakusalaṃ
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಧಮ್ಮಸಙ್ಗಣೀ-ಮೂಲಟೀಕಾ • Dhammasaṅgaṇī-mūlaṭīkā / ಕೋಟ್ಠಾಸವಾರವಣ್ಣನಾ • Koṭṭhāsavāravaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಧಮ್ಮಸಙ್ಗಣೀ-ಅನುಟೀಕಾ • Dhammasaṅgaṇī-anuṭīkā / ಕೋಟ್ಠಾಸವಾರಕಥಾವಣ್ಣನಾ • Koṭṭhāsavārakathāvaṇṇanā
