Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
13. குலதூ³ஸகஸிக்கா²பத³வண்ணனா
13. Kuladūsakasikkhāpadavaṇṇanā
நக³ரஸ்ஸாபி கா³மவிஸேஸத்தா இத⁴ கா³மக்³க³ஹணேனேவ நக³ரம்பி க³ஹிதந்தி ஆஹ ‘‘நக³ரம்பி கா³மே அந்தோக³த⁴மேவா’’தி, வா-ஸத்³தே³ன வா அனுத்தவிகப்பத்தே²ன க³ஹணந்தி ஏவங் வுத்தங். எத்த² ச அபாகாரபரிக்கே²போ ஸாபணோ நிக³மோ, ஸபாகாராபணங் நக³ரங், தங்தங்விபரீதோ கா³மோதி இமேஸங் திண்ணங் விஸேஸோ த³ட்ட²ப்³போ³. குலானி தூ³ஸேதீதி க²த்தியப்³ராஹ்மணவெஸ்ஸஸுத்³த³வஸேன சத்தாரி குலானி விகாரங் ஆபாதே³தி. தூ³ஸெந்தோ ச ந அஸுசிகத்³த³மாதீ³ஹி தூ³ஸேதி, அத² கோ² அத்தனோ து³ப்படிபத்தியா தேஸங் பஸாத³ங் வினாஸேதி. தேனாஹ ‘‘புப்ப²தா³னாதீ³ஹீ’’திஆதி³. தத்த² ஹரித்வா வா ஹராபெத்வா வா பக்கோஸித்வா வா பக்கோஸாபெத்வா வா ஸயங் வா உபக³தானங் (பாரா॰ அட்ட²॰ 2.436-437) யஸ்ஸ கஸ்ஸசி அத்தனோ ஸந்தகஸ்ஸ புப்ப²ஸ்ஸ குலஸங்க³ஹத்தா²ய தா³னங் புப்ப²தா³னங், தங் ஆதி³ யேஸங் தே புப்ப²தா³னாத³யோ, தேஹி புப்ப²தா³னாதீ³ஹி. ஆதி³ஸத்³தே³ன (பாரா॰ 437) ப²லதா³னசுண்ணமத்திகாத³ந்தகட்ட²வேளுவேஜ்ஜிகாஜங்க⁴பேஸனிகானங் க³ஹணங். ஸத்³த⁴ங் வினாஸெந்தோதி ததா² அகரொந்தேஸு அஞ்ஞேஸு பேஸலேஸு பி⁴க்கூ²ஸு அப்பஸாத³ங் அத³ஸ்ஸனங் க³மெந்தோ. புப்ப²தா³னாதீ³ஹி ச தேஹி கதஸங்க³ஹேஹி அஞ்ஞே பேஸலே ததா² அகரொந்தே தே மனுஸ்ஸா இஸ்ஸந்தி ந அல்லீயந்தீதி ஸோ தேஸங் பஸாத³ங் வினாஸேதி நாமாதி த³ட்ட²ப்³ப³ங். பாபகா ஸமாசாராதி பு³த்³த⁴ப்படிகுட்ட²த்தா லாமகா ஸமாசாரா . தே பன யஸ்மா குலஸங்க³ஹத்த²ங் மாலாவச்ச²ரோபனாத³யோ இத⁴ அதி⁴ப்பேதா, தஸ்மா ‘‘மாலாவச்ச²ரோபனாத³யோ’’தி வுத்தங். ஆராமாதீ³னமத்தா²ய பன கப்பியவோஹாராதீ³ஹி ரோபாபனாதி³கங் வட்டதி. தத்த² மாலாவச்ச²ந்தி தருணபுப்ப²ருக்க²ங். தருணகா ஹி புப்ப²ருக்கா²பி புப்ப²க³ச்சா²பி ‘‘மாலாவச்சா²’’த்வேவ வுச்சந்தி, தஸ்ஸ ரோபனங் மாலாவச்ச²ரோபனங், தங் ஆதி³ யேஸங் தே மாலாவச்ச²ரோபனாத³யோ. ஆதி³ஸத்³தே³ன செத்த² ரோபாபனஸிஞ்சனஸிஞ்சாபனஓசினநஓசினாபனக³ந்த²னக³ந்தா²பனானங் க³ஹணங்.
Nagarassāpi gāmavisesattā idha gāmaggahaṇeneva nagarampi gahitanti āha ‘‘nagarampi gāme antogadhamevā’’ti, vā-saddena vā anuttavikappatthena gahaṇanti evaṃ vuttaṃ. Ettha ca apākāraparikkhepo sāpaṇo nigamo, sapākārāpaṇaṃ nagaraṃ, taṃtaṃviparīto gāmoti imesaṃ tiṇṇaṃ viseso daṭṭhabbo. Kulāni dūsetīti khattiyabrāhmaṇavessasuddavasena cattāri kulāni vikāraṃ āpādeti. Dūsento ca na asucikaddamādīhi dūseti, atha kho attano duppaṭipattiyā tesaṃ pasādaṃ vināseti. Tenāha ‘‘pupphadānādīhī’’tiādi. Tattha haritvā vā harāpetvā vā pakkositvā vā pakkosāpetvā vā sayaṃ vā upagatānaṃ (pārā. aṭṭha. 2.436-437) yassa kassaci attano santakassa pupphassa kulasaṅgahatthāya dānaṃ pupphadānaṃ, taṃ ādi yesaṃ te pupphadānādayo, tehi pupphadānādīhi. Ādisaddena (pārā. 437) phaladānacuṇṇamattikādantakaṭṭhaveḷuvejjikājaṅghapesanikānaṃ gahaṇaṃ. Saddhaṃ vināsentoti tathā akarontesu aññesu pesalesu bhikkhūsu appasādaṃ adassanaṃ gamento. Pupphadānādīhi ca tehi katasaṅgahehi aññe pesale tathā akaronte te manussā issanti na allīyantīti so tesaṃ pasādaṃ vināseti nāmāti daṭṭhabbaṃ. Pāpakā samācārāti buddhappaṭikuṭṭhattā lāmakā samācārā . Te pana yasmā kulasaṅgahatthaṃ mālāvaccharopanādayo idha adhippetā, tasmā ‘‘mālāvaccharopanādayo’’ti vuttaṃ. Ārāmādīnamatthāya pana kappiyavohārādīhi ropāpanādikaṃ vaṭṭati. Tattha mālāvacchanti taruṇapuppharukkhaṃ. Taruṇakā hi puppharukkhāpi pupphagacchāpi ‘‘mālāvacchā’’tveva vuccanti, tassa ropanaṃ mālāvaccharopanaṃ, taṃ ādi yesaṃ te mālāvaccharopanādayo. Ādisaddena cettha ropāpanasiñcanasiñcāpanaocinanaocināpanaganthanaganthāpanānaṃ gahaṇaṃ.
மாதிகாயங் தி³ஸ்ஸந்தீதி யே பச்சக்க²தோ பஸ்ஸந்தி, தேஹி தி³ஸ்ஸந்தி. ஸுய்யந்தீதி யே பரதோ ஸுணந்தி, தேஹி ஸோதத்³வாரேன ஸுத்வா உபதா⁴ரீயந்தி. து³ட்டா²னீதி தூ³ஸிதானி. அலங் தே இத⁴ வாஸேனாதி தவ இத⁴ வாஸேன அலங், மா இத⁴ தவ வாஸோ ஹோதூதி அத்தோ². வாரணத்தோ² ஹி இத⁴ அலங்-ஸத்³தோ³. பப்³பா³ஜனீயகம்மகதோதி சோதெ³த்வா ஸாரெத்வா ஆபத்திங் ஆரோபெத்வா ‘‘ஸுணாது மே, ப⁴ந்தே, ஸங்கோ⁴, இமே அஸ்ஸஜிபுனப்³ப³ஸுகா’’திஆதி³னா (பாரா॰ 434) பத³பா⁴ஜனே வுத்தாய ஞத்திசதுத்த²கம்மவாசாய கதபப்³பா³ஜனீயகம்மோ. யஸ்மிஞ்ச விஹாரே வஸதீதி கா³மதோ ப³ஹிவிஹாரமாஹ. நேவ தஸ்மிங் கா³மே…பே॰… சரிதுங் லப⁴தீதி ஸசேபி கா³மோ வா நிக³மோ வா த்³வாத³ஸயோஜனபரமோ ஹோதி, தியோஜனபரமோ ச விஹாரோ ஹோதி, நேவ தஸ்மிங் கா³மே வா நிக³மே வா பிண்டா³ய சரிதுங் லப⁴தி, ந விஹாரே வஸிதுங். தஸ்மிங் விஹாரே வஸந்தேன ஸாமந்தகா³மேபி பிண்டா³ய ந சரிதப்³ப³ங், ஸாமந்தவிஹாரேபி வஸந்தேன தஸ்மிங் கா³மே பிண்டா³ய ந சரிதப்³ப³ங். ஸாமந்தவிஹாரே வஸந்தேன பன ஸாமந்தகா³மே சரிதுங் வட்டதி. ஆபஜ்ஜிதப்³பா³ ஆபத்தியோதி குலஸங்க³ஹத்த²ங் அத்தனோ ஸந்தகதா³னே து³க்கடங், இஸ்ஸரவதாய ஸங்க⁴ஸந்தகதா³னே து²ல்லச்சயங், பஸய்ஹ தா³னே பாராஜிகந்தி இமா ஆபத்தியோ. மாதிகாயங் ‘‘பக்கமதா யஸ்மா’’தி பப்³பா³ஜனீயகம்மகதஸ்ஸ வத்தவஸேன வுத்தங். ஆதி³ம்ஹி பன பப்³பா³ஜனீயகம்மவஸேன த³ட்ட²ப்³ப³ங். அஸ்ஸஜிபுனப்³ப³ஸுகேதி அஸ்ஸஜிஞ்சேவ புனப்³ப³ஸுகஞ்ச.
Mātikāyaṃ dissantīti ye paccakkhato passanti, tehi dissanti. Suyyantīti ye parato suṇanti, tehi sotadvārena sutvā upadhārīyanti. Duṭṭhānīti dūsitāni. Alaṃ te idha vāsenāti tava idha vāsena alaṃ, mā idha tava vāso hotūti attho. Vāraṇattho hi idha alaṃ-saddo. Pabbājanīyakammakatoti codetvā sāretvā āpattiṃ āropetvā ‘‘suṇātu me, bhante, saṅgho, ime assajipunabbasukā’’tiādinā (pārā. 434) padabhājane vuttāya ñatticatutthakammavācāya katapabbājanīyakammo. Yasmiñca vihāre vasatīti gāmato bahivihāramāha. Neva tasmiṃ gāme…pe… carituṃ labhatīti sacepi gāmo vā nigamo vā dvādasayojanaparamo hoti, tiyojanaparamo ca vihāro hoti, neva tasmiṃ gāme vā nigame vā piṇḍāya carituṃ labhati, na vihāre vasituṃ. Tasmiṃ vihāre vasantena sāmantagāmepi piṇḍāya na caritabbaṃ, sāmantavihārepi vasantena tasmiṃ gāme piṇḍāya na caritabbaṃ. Sāmantavihāre vasantena pana sāmantagāme carituṃ vaṭṭati. Āpajjitabbā āpattiyoti kulasaṅgahatthaṃ attano santakadāne dukkaṭaṃ, issaravatāya saṅghasantakadāne thullaccayaṃ, pasayha dāne pārājikanti imā āpattiyo. Mātikāyaṃ ‘‘pakkamatā yasmā’’ti pabbājanīyakammakatassa vattavasena vuttaṃ. Ādimhi pana pabbājanīyakammavasena daṭṭhabbaṃ. Assajipunabbasuketi assajiñceva punabbasukañca.
குலதூ³ஸகஸிக்கா²பத³வண்ணனா நிட்டி²தா.
Kuladūsakasikkhāpadavaṇṇanā niṭṭhitā.