| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೮. ಕುಲಘರಣೀಸುತ್ತವಣ್ಣನಾ
8. Kulagharaṇīsuttavaṇṇanā
೨೨೮. ಓಗಾಹಪ್ಪತ್ತೋತಿ ವಿಸ್ಸಾಸವಸೇನ ಅನುಪ್ಪವೇಸಂ ಪತ್ತೋ। ಅಞ್ಞತರಂ ಕುಲನ್ತಿ ತಸ್ಮಿಂ ಕುಲೇ ಜಾಯಮ್ಪತಿಂ ಸನ್ಧಾಯ ವದತಿ। ‘‘ಬಹೂಪಕಾರಂ ಮೇ ಏತಂ ಕುಲಂ ಚಿರಂ ಸಪ್ಪಾಯಾಹಾರದಾನಾದಿನಾ; ತಸ್ಮಾ ಇಧಾಹಂ ಅಗ್ಗದಕ್ಖಿಣೇಯ್ಯೋ ಜಾತೋ; ಇಮೇಸಂಯೇವ ದೇಯ್ಯಧಮ್ಮಪಟಿಗ್ಗಣ್ಹನೇನ ಪುಞ್ಞಂ ವಡ್ಢೇಸ್ಸಾಮೀ’’ತಿ ಚಿನ್ತೇಸಿ। ತೇನಾಹ ‘‘ಅಞ್ಞತ್ಥ ಗನ್ತ್ವಾ ಕಿಂ ಕರಿಸ್ಸಾಮೀ’’ತಿಆದಿ। ಸಾತಿ ದೇವತಾ। ಉಭೋಪೇತೇತಿ ತಂ ಭಿಕ್ಖುಞ್ಚ ಘರಣಿಞ್ಚ ಸನ್ಧಾಯ ವದತಿ। ಪಟಿಗಾಧಪ್ಪತ್ತಾತಿ ಪಟಿಗಾಧಂ ಪತ್ತಾ ಅಞ್ಞಮಞ್ಞಸ್ಮಿಂ ಪತಿಟ್ಠಿತವಿಸ್ಸಾಸೇನ।
228.Ogāhappattoti vissāsavasena anuppavesaṃ patto. Aññataraṃ kulanti tasmiṃ kule jāyampatiṃ sandhāya vadati. ‘‘Bahūpakāraṃ me etaṃ kulaṃ ciraṃ sappāyāhāradānādinā; tasmā idhāhaṃ aggadakkhiṇeyyo jāto; imesaṃyeva deyyadhammapaṭiggaṇhanena puññaṃ vaḍḍhessāmī’’ti cintesi. Tenāha ‘‘aññattha gantvā kiṃ karissāmī’’tiādi. Sāti devatā. Ubhopeteti taṃ bhikkhuñca gharaṇiñca sandhāya vadati. Paṭigādhappattāti paṭigādhaṃ pattā aññamaññasmiṃ patiṭṭhitavissāsena.
ವಿಸ್ಸಮಪ್ಪತ್ತಿವಸೇನ ಸನ್ತಿಟ್ಠನ್ತಿ ಏತ್ಥಾತಿ ಸಣ್ಠಾನಂ, ವಿಸ್ಸಮನಟ್ಠಾನಂ। ಸಮಾಗನ್ತ್ವಾತಿ ಸನ್ನಿಪತಿತ್ವಾ। ಪಟಿಞ್ಞೂದಾಹರಣೇಹಿ ಮನ್ತಯತೀತಿ ಮನ್ತನಂ, ಞಾಪಕಂ ಕಾರಣಂ। ಪಟಿಲೋಮಸದ್ದಾತಿ ಪಟಿಲೋಮಭಾವೇನ ಪತಿತತ್ತಾ ಅಸಚ್ಚವಿಭಾವನಾ ಪಟಿಕೂಲಸದ್ದಾ। ತೇನ ಕಾರಣೇನಾತಿ ತೇನ ಕಾರಣಪಟಿರೂಪಕೇನ ಮಿಚ್ಛಾವಚನೇನ। ನ ಮಙ್ಕುಹೋತಬ್ಬಂ ಅಕಾರಕಭಾವತೋ। ಸದ್ದೇನ ಪರಿತಸ್ಸತೀತಿ ಪರೇಹಿ ಅತ್ತನಿ ಪಯುತ್ತಮಿಚ್ಛಾಸದ್ದಮತ್ತೇನ ಪರಿತಸ್ಸನಸೀಲೋ। ವತಂ ನ ಸಮ್ಪಜ್ಜತೀತಿ ಯಥಾಸಮಾದಿನ್ನವತಂ ಲಹುಚಿತ್ತತಾಯ ನ ಪಾರಿಪೂರಿಂ ಗಚ್ಛತಿ। ಸಮ್ಪನ್ನವತೋತಿ ಪರಿಪುಣ್ಣಸೀಲಾದಿವತಗುಣೋ
Vissamappattivasena santiṭṭhanti etthāti saṇṭhānaṃ, vissamanaṭṭhānaṃ. Samāgantvāti sannipatitvā. Paṭiññūdāharaṇehi mantayatīti mantanaṃ, ñāpakaṃ kāraṇaṃ. Paṭilomasaddāti paṭilomabhāvena patitattā asaccavibhāvanā paṭikūlasaddā. Tena kāraṇenāti tena kāraṇapaṭirūpakena micchāvacanena. Na maṅkuhotabbaṃ akārakabhāvato. Saddena paritassatīti parehi attani payuttamicchāsaddamattena paritassanasīlo. Vataṃ na sampajjatīti yathāsamādinnavataṃ lahucittatāya na pāripūriṃ gacchati. Sampannavatoti paripuṇṇasīlādivataguṇo
ಕುಲಘರಣೀಸುತ್ತವಣ್ಣನಾ ನಿಟ್ಠಿತಾ।
Kulagharaṇīsuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ಕುಲಘರಣೀಸುತ್ತಂ • 8. Kulagharaṇīsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ಕುಲಘರಣೀಸುತ್ತವಣ್ಣನಾ • 8. Kulagharaṇīsuttavaṇṇanā
