| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૯. કુલસુત્તં
9. Kulasuttaṃ
૧૯૯. ‘‘યં, ભિક્ખવે, સીલવન્તો પબ્બજિતા કુલં ઉપસઙ્કમન્તિ, તત્થ મનુસ્સા પઞ્ચહિ ઠાનેહિ બહું પુઞ્ઞં પસવન્તિ. કતમેહિ પઞ્ચહિ? યસ્મિં, ભિક્ખવે, સમયે સીલવન્તે પબ્બજિતે કુલં ઉપસઙ્કમન્તે મનુસ્સા દિસ્વા ચિત્તાનિ પસાદેન્તિ 1, સગ્ગસંવત્તનિકં, ભિક્ખવે, તં કુલં તસ્મિં સમયે પટિપદં પટિપન્નં હોતિ.
199. ‘‘Yaṃ, bhikkhave, sīlavanto pabbajitā kulaṃ upasaṅkamanti, tattha manussā pañcahi ṭhānehi bahuṃ puññaṃ pasavanti. Katamehi pañcahi? Yasmiṃ, bhikkhave, samaye sīlavante pabbajite kulaṃ upasaṅkamante manussā disvā cittāni pasādenti 2, saggasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘યસ્મિં, ભિક્ખવે, સમયે સીલવન્તે પબ્બજિતે કુલં ઉપસઙ્કમન્તે મનુસ્સા પચ્ચુટ્ઠેન્તિ અભિવાદેન્તિ આસનં દેન્તિ, ઉચ્ચાકુલીનસંવત્તનિકં, ભિક્ખવે, તં કુલં તસ્મિં સમયે પટિપદં પટિપન્નં હોતિ.
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā paccuṭṭhenti abhivādenti āsanaṃ denti, uccākulīnasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘યસ્મિં, ભિક્ખવે, સમયે સીલવન્તે પબ્બજિતે કુલં ઉપસઙ્કમન્તે મનુસ્સા મચ્છેરમલં પટિવિનેન્તિ 3, મહેસક્ખસંવત્તનિકં, ભિક્ખવે, તં કુલં તસ્મિં સમયે પટિપદં પટિપન્નં હોતિ.
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā maccheramalaṃ paṭivinenti 4, mahesakkhasaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘યસ્મિં, ભિક્ખવે, સમયે સીલવન્તે પબ્બજિતે કુલં ઉપસઙ્કમન્તે મનુસ્સા યથાસત્તિ યથાબલં સંવિભજન્તિ, મહાભોગસંવત્તનિકં , ભિક્ખવે, તં કુલં તસ્મિં સમયે પટિપદં પટિપન્નં હોતિ.
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā yathāsatti yathābalaṃ saṃvibhajanti, mahābhogasaṃvattanikaṃ , bhikkhave, taṃ kulaṃ tasmiṃ samaye paṭipadaṃ paṭipannaṃ hoti.
‘‘યસ્મિં, ભિક્ખવે, સમયે સીલવન્તે પબ્બજિતે કુલં ઉપસઙ્કમન્તે મનુસ્સા પરિપુચ્છન્તિ પરિપઞ્હન્તિ ધમ્મં સુણન્તિ, મહાપઞ્ઞાસંવત્તનિકં, ભિક્ખવે, તં કુલં તસ્મિં સમયે પટિપદં પટિપન્નં હોતિ. યં , ભિક્ખવે, સીલવન્તો પબ્બજિતા કુલં ઉપસઙ્કમન્તિ, તત્થ મનુસ્સા ઇમેહિ પઞ્ચહિ ઠાનેહિ બહું પુઞ્ઞં પસવન્તી’’તિ. નવમં.
‘‘Yasmiṃ, bhikkhave, samaye sīlavante pabbajite kulaṃ upasaṅkamante manussā paripucchanti paripañhanti dhammaṃ suṇanti, mahāpaññāsaṃvattanikaṃ, bhikkhave, taṃ kulaṃ tasmiṃ samaye paṭipadaṃ paṭipannaṃ hoti. Yaṃ , bhikkhave, sīlavanto pabbajitā kulaṃ upasaṅkamanti, tattha manussā imehi pañcahi ṭhānehi bahuṃ puññaṃ pasavantī’’ti. Navamaṃ.
Footnotes:
Related texts:
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૮-૯. વાચાસુત્તાદિવણ્ણના • 8-9. Vācāsuttādivaṇṇanā
