| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
9. குலத்தே²ரகா³தா²வண்ணனா
9. Kulattheragāthāvaṇṇanā
உத³கஞ்ஹி நயந்தீதி ஆயஸ்மதோ குலத்தே²ரஸ்ஸ கா³தா². கா உப்பத்தி? அயங் கிர தே²ரோ புப்³பே³பி விவட்டூபனிஸ்ஸயங் ப³ஹுங் குஸலங் உபசினித்வா அதி⁴காரஸம்பன்னோ விபஸ்ஸிங் ப⁴க³வந்தங் ஆகாஸே க³ச்ச²ந்தங் தி³ஸ்வா பஸன்னமானஸோ நாளிகேரப²லங் தா³துகாமோ அட்டா²ஸி. ஸத்தா² தஸ்ஸ சித்தங் ஞத்வா ஓதரித்வா படிக்³க³ண்ஹி. ஸோ அதிவிய பஸன்னசித்தோ ஹுத்வா தேனேவ ஸத்³தா⁴படிலாபே⁴ன ஸத்தா²ரங் உபஸங்கமித்வா பப்³ப³ஜ்ஜங் யாசி, ஸத்தா² அஞ்ஞதரங் பி⁴க்கு²ங் ஆணாபேஸி – ‘‘இமங் புரிஸங் பப்³பா³ஜேஹீ’’தி. ஸோ பப்³ப³ஜித்வா லத்³தூ⁴பஸம்பதோ³ ஸமணத⁴ம்மங் கத்வா ததோ சுதோ ச²பி பு³த்³த⁴ந்தரானி தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஸாவத்தி²யங் ப்³ராஹ்மணகுலே நிப்³ப³த்தி. குலோதிஸ்ஸ நாமங் அஹோஸி. ஸோ வயப்பத்தோ ஸாஸனே லத்³த⁴ப்பஸாதோ³ ப⁴க³வதோ ஸந்திகே பப்³ப³ஜித்வா விக்கே²பப³ஹுலதாய விஸேஸங் நிப்³ப³த்தேதுங் நாஸக்கி². அதே²கதி³வஸங் கா³மங் பிண்டா³ய பவிஸந்தோ அந்தராமக்³கே³ பூ⁴மிங் க²ணித்வா உத³கவாஹகங் கத்வா இச்சி²திச்சி²தட்டா²னே உத³கங் நெந்தே புரிஸே தி³ஸ்வா தங் ஸல்லக்கெ²த்வா கா³மங் பவிட்டோ² அஞ்ஞதரங் உஸுகாரங் உஸுத³ண்ட³கங் உஸுயந்தே பக்கி²பித்வா அக்கி²கோடியா ஓலோகெத்வா உஜுங் கரொந்தங் தி³ஸ்வா தம்பி ஸல்லக்கெ²த்வா க³ச்ச²ந்தோ புரதோ க³ந்த்வா அரனேமினாபி⁴ஆதி³கே ரத²சக்காவயவே தச்ச²ந்தே தச்ச²கே தி³ஸ்வா தம்பி ஸல்லக்கெ²த்வா விஹாரங் பவிஸித்வா கதப⁴த்தகிச்சோ பத்தசீவரங் படிஸாமெத்வா தி³வாவிஹாரே நிஸின்னோ அத்தனா தி³ட்ட²னிமித்தானி உபமாபா⁴வேன க³ஹெத்வா அத்தனோ சித்தத³மனே உபனெந்தோ ‘‘அசேதனங் உத³கம்பி மனுஸ்ஸா இச்சி²கிச்சி²தட்டா²னங் நயந்தி ததா² அசேதனங் வங்கம்பி ஸரத³ண்ட³ங் உபாயேன நமெந்தோ உஜுங் கரொந்தி , ததா² அசேதனங் கட்ட²களிங்க³ராதி³ங் தச்ச²கா நேமிஆதி³வஸேன வங்கங் உஜுஞ்ச கரொந்தி. அத² கஸ்மா அஹங் ஸகசித்தங் உஜுங் ந கரிஸ்ஸாமீ’’தி சிந்தெத்வா விபஸ்ஸனங் பட்ட²பெத்வா க⁴டெந்தோ வாயமந்தோ நசிரஸ்ஸேவ அரஹத்தங் பாபுணி. தேன வுத்தங் அபதா³னே (அப॰ தே²ர 2.51.91-99) –
Udakañhi nayantīti āyasmato kulattherassa gāthā. Kā uppatti? Ayaṃ kira thero pubbepi vivaṭṭūpanissayaṃ bahuṃ kusalaṃ upacinitvā adhikārasampanno vipassiṃ bhagavantaṃ ākāse gacchantaṃ disvā pasannamānaso nāḷikeraphalaṃ dātukāmo aṭṭhāsi. Satthā tassa cittaṃ ñatvā otaritvā paṭiggaṇhi. So ativiya pasannacitto hutvā teneva saddhāpaṭilābhena satthāraṃ upasaṅkamitvā pabbajjaṃ yāci, satthā aññataraṃ bhikkhuṃ āṇāpesi – ‘‘imaṃ purisaṃ pabbājehī’’ti. So pabbajitvā laddhūpasampado samaṇadhammaṃ katvā tato cuto chapi buddhantarāni devamanussesu saṃsaranto imasmiṃ buddhuppāde sāvatthiyaṃ brāhmaṇakule nibbatti. Kulotissa nāmaṃ ahosi. So vayappatto sāsane laddhappasādo bhagavato santike pabbajitvā vikkhepabahulatāya visesaṃ nibbattetuṃ nāsakkhi. Athekadivasaṃ gāmaṃ piṇḍāya pavisanto antarāmagge bhūmiṃ khaṇitvā udakavāhakaṃ katvā icchiticchitaṭṭhāne udakaṃ nente purise disvā taṃ sallakkhetvā gāmaṃ paviṭṭho aññataraṃ usukāraṃ usudaṇḍakaṃ usuyante pakkhipitvā akkhikoṭiyā oloketvā ujuṃ karontaṃ disvā tampi sallakkhetvā gacchanto purato gantvā araneminābhiādike rathacakkāvayave tacchante tacchake disvā tampi sallakkhetvā vihāraṃ pavisitvā katabhattakicco pattacīvaraṃ paṭisāmetvā divāvihāre nisinno attanā diṭṭhanimittāni upamābhāvena gahetvā attano cittadamane upanento ‘‘acetanaṃ udakampi manussā icchikicchitaṭṭhānaṃ nayanti tathā acetanaṃ vaṅkampi saradaṇḍaṃ upāyena namento ujuṃ karonti , tathā acetanaṃ kaṭṭhakaḷiṅgarādiṃ tacchakā nemiādivasena vaṅkaṃ ujuñca karonti. Atha kasmā ahaṃ sakacittaṃ ujuṃ na karissāmī’’ti cintetvā vipassanaṃ paṭṭhapetvā ghaṭento vāyamanto nacirasseva arahattaṃ pāpuṇi. Tena vuttaṃ apadāne (apa. thera 2.51.91-99) –
‘‘நக³ரே ப³ந்து⁴மதியா, ஆராமிகோ அஹங் ததா³;
‘‘Nagare bandhumatiyā, ārāmiko ahaṃ tadā;
அத்³த³ஸங் விரஜங் பு³த்³த⁴ங், க³ச்ச²ந்தங் அனிலஞ்ஜஸே.
Addasaṃ virajaṃ buddhaṃ, gacchantaṃ anilañjase.
‘‘நாளிகேரப²லங் க³ய்ஹ, பு³த்³த⁴ஸெட்ட²ஸ்ஸதா³ஸஹங்;
‘‘Nāḷikeraphalaṃ gayha, buddhaseṭṭhassadāsahaṃ;
ஆகாஸே டி²தகோ ஸந்தோ, படிக்³க³ண்ஹி மஹாயஸோ.
Ākāse ṭhitako santo, paṭiggaṇhi mahāyaso.
‘‘வித்திஸஞ்ஜனநோ மய்ஹங், தி³ட்ட²த⁴ம்மஸுகா²வஹோ;
‘‘Vittisañjanano mayhaṃ, diṭṭhadhammasukhāvaho;
ப²லங் பு³த்³த⁴ஸ்ஸ த³த்வான, விப்பஸன்னேன சேதஸா.
Phalaṃ buddhassa datvāna, vippasannena cetasā.
‘‘அதி⁴க³ச்சி²ங் ததா³ பீதிங், விபுலஞ்ச ஸுகு²த்தமங்;
‘‘Adhigacchiṃ tadā pītiṃ, vipulañca sukhuttamaṃ;
உப்பஜ்ஜதேவ ரதனங், நிப்³ப³த்தஸ்ஸ தஹிங் தஹிங்.
Uppajjateva ratanaṃ, nibbattassa tahiṃ tahiṃ.
‘‘ஏகனவுதிதோ கப்பே, யங் ப²லங் அத³தி³ங் ததா³;
‘‘Ekanavutito kappe, yaṃ phalaṃ adadiṃ tadā;
து³க்³க³திங் நாபி⁴ஜானாமி, ப²லதா³னஸ்ஸித³ங் ப²லங்.
Duggatiṃ nābhijānāmi, phaladānassidaṃ phalaṃ.
‘‘தி³ப்³ப³சக்கு² விஸுத்³த⁴ங் மே, ஸமாதி⁴குஸலோ அஹங்;
‘‘Dibbacakkhu visuddhaṃ me, samādhikusalo ahaṃ;
அபி⁴ஞ்ஞாபாரமிப்பத்தோ, ப²லதா³னஸ்ஸித³ங் ப²லங்.
Abhiññāpāramippatto, phaladānassidaṃ phalaṃ.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
ஏவங் யானி நிமித்தானி அங்குஸே கத்வா விபஸ்ஸனங் வட்³டெ⁴த்வா அரஹத்தங் பாபுணி, தேஹி ஸத்³தி⁴ங் அத்தனோ சித்தத³மனங் ஸங்ஸந்தி³த்வா அஞ்ஞங் ப்³யாகரொந்தோ ‘‘உத³கஞ்ஹி நயந்தி நெத்திகா’’தி கா³த²ங் அபா⁴ஸி.
Evaṃ yāni nimittāni aṅkuse katvā vipassanaṃ vaḍḍhetvā arahattaṃ pāpuṇi, tehi saddhiṃ attano cittadamanaṃ saṃsanditvā aññaṃ byākaronto ‘‘udakañhi nayanti nettikā’’ti gāthaṃ abhāsi.
19. தத்த² உத³கங் ஹீதி ஹி-ஸத்³தோ³ நிபாதமத்தங். நயந்தீதி பத²வியா தங் தங் த²லட்டா²னங் க²ணித்வா நின்னட்டா²னங் பூரெத்வா மாதிகங் வா கத்வா ருக்க²தோ³ணிங் வா ட²பெத்வா அத்தனோ இச்சி²திச்சி²தட்டா²னங் நெந்தி. ததா² தே நெந்தீதி நெத்திகா. தேஜனந்தி கண்ட³ங். இத³ங் வுத்தங் ஹோதி – நெத்திகா அத்தனோ ருசியா இச்சி²திச்சி²தட்டா²னங் உத³கங் நயந்தி, உஸுகாராபி தாபெத்வா தேஜனங் நமயந்தி உஜுங் கரொந்தி. நமனவஸேன தச்ச²கா நேமிஆதீ³னங் அத்தா²ய தச்ச²ந்தா தா³ருங் நமயந்தி அத்தனோ ருசியா உஜுங் வா வங்கங் வா கரொந்தி. ஏவங் எத்தகங் ஆரம்மணங் கத்வா ஸுப்³ப³தா யதா²ஸமாதி³ன்னேன ஸீலாதி³னா ஸுந்த³ரவதா தீ⁴ரா ஸோதாபத்திமக்³கா³தீ³னங் உப்பாதெ³ந்தா அத்தானங் த³மெந்தி, அரஹத்தங் பன பத்தேஸு ஏகந்தத³ந்தா நாம ஹொந்தீதி.
19. Tattha udakaṃ hīti hi-saddo nipātamattaṃ. Nayantīti pathaviyā taṃ taṃ thalaṭṭhānaṃ khaṇitvā ninnaṭṭhānaṃ pūretvā mātikaṃ vā katvā rukkhadoṇiṃ vā ṭhapetvā attano icchiticchitaṭṭhānaṃ nenti. Tathā te nentīti nettikā. Tejananti kaṇḍaṃ. Idaṃ vuttaṃ hoti – nettikā attano ruciyā icchiticchitaṭṭhānaṃ udakaṃ nayanti, usukārāpi tāpetvā tejanaṃ namayanti ujuṃ karonti. Namanavasena tacchakā nemiādīnaṃ atthāya tacchantā dāruṃ namayanti attano ruciyā ujuṃ vā vaṅkaṃ vā karonti. Evaṃ ettakaṃ ārammaṇaṃ katvā subbatā yathāsamādinnena sīlādinā sundaravatā dhīrā sotāpattimaggādīnaṃ uppādentā attānaṃ damenti, arahattaṃ pana pattesu ekantadantā nāma hontīti.
குலத்தே²ரகா³தா²வண்ணனா நிட்டி²தா.
Kulattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 9. குலத்தே²ரகா³தா² • 9. Kulattheragāthā
