| Library / Tipiṭaka / तिपिटक • Tipiṭaka / थेरगाथापाळि • Theragāthāpāḷi |
४. कुल्लत्थेरगाथा
4. Kullattheragāthā
३९३.
393.
‘‘कुल्लो सिवथिकं गन्त्वा, अद्दस इत्थिमुज्झितं।
‘‘Kullo sivathikaṃ gantvā, addasa itthimujjhitaṃ;
अपविद्धं सुसानस्मिं, खज्जन्तिं किमिही फुटं॥
Apaviddhaṃ susānasmiṃ, khajjantiṃ kimihī phuṭaṃ.
३९४.
394.
‘‘आतुरं असुचिं पूतिं, पस्स कुल्ल समुस्सयं।
‘‘Āturaṃ asuciṃ pūtiṃ, passa kulla samussayaṃ;
उग्घरन्तं पग्घरन्तं, बालानं अभिनन्दितं॥
Uggharantaṃ paggharantaṃ, bālānaṃ abhinanditaṃ.
३९५.
395.
‘‘धम्मादासं गहेत्वान, ञाणदस्सनपत्तिया।
‘‘Dhammādāsaṃ gahetvāna, ñāṇadassanapattiyā;
पच्चवेक्खिं इमं कायं, तुच्छं सन्तरबाहिरं॥
Paccavekkhiṃ imaṃ kāyaṃ, tucchaṃ santarabāhiraṃ.
३९६.
396.
‘‘यथा इदं तथा एतं, यथा एतं तथा इदं।
‘‘Yathā idaṃ tathā etaṃ, yathā etaṃ tathā idaṃ;
यथा अधो तथा उद्धं, यथा उद्धं तथा अधो॥
Yathā adho tathā uddhaṃ, yathā uddhaṃ tathā adho.
३९७.
397.
‘‘यथा दिवा तथा रत्तिं, यथा रत्तिं तथा दिवा।
‘‘Yathā divā tathā rattiṃ, yathā rattiṃ tathā divā;
यथा पुरे तथा पच्छा, यथा पच्छा तथा पुरे॥
Yathā pure tathā pacchā, yathā pacchā tathā pure.
३९८.
398.
‘‘पञ्चङ्गिकेन तुरियेन, न रती होति तादिसी।
‘‘Pañcaṅgikena turiyena, na ratī hoti tādisī;
यथा एकग्गचित्तस्स, सम्मा धम्मं विपस्सतो’’ति॥
Yathā ekaggacittassa, sammā dhammaṃ vipassato’’ti.
… कुल्लो थेरो…।
… Kullo thero….
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरगाथा-अट्ठकथा • Theragāthā-aṭṭhakathā / ४. कुल्लत्थेरगाथावण्णना • 4. Kullattheragāthāvaṇṇanā
