Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi |
೫೧೨. ಕುಮ್ಭಜಾತಕಂ (೨)
512. Kumbhajātakaṃ (2)
೩೩.
33.
ಕೋ ಪಾತುರಾಸೀ ತಿದಿವಾ ನಭಮ್ಹಿ, ಓಭಾಸಯಂ ಸಂವರಿಂ ಚನ್ದಿಮಾವ।
Ko pāturāsī tidivā nabhamhi, obhāsayaṃ saṃvariṃ candimāva;
ಗತ್ತೇಹಿ ತೇ ರಸ್ಮಿಯೋ ನಿಚ್ಛರನ್ತಿ, ಸತೇರತಾ 1 ವಿಜ್ಜುರಿವನ್ತಲಿಕ್ಖೇ॥
Gattehi te rasmiyo niccharanti, sateratā 2 vijjurivantalikkhe.
೩೪.
34.
ಸೋ ಛಿನ್ನವಾತಂ ಕಮಸೀ ಅಘಮ್ಹಿ, ವೇಹಾಯಸಂ ಗಚ್ಛಸಿ ತಿಟ್ಠಸೀ ಚ।
So chinnavātaṃ kamasī aghamhi, vehāyasaṃ gacchasi tiṭṭhasī ca;
ಇದ್ಧೀ ನು ತೇ ವತ್ಥುಕತಾ ಸುಭಾವಿತಾ, ಅನದ್ಧಗೂನಂ ಅಪಿ ದೇವತಾನಂ॥
Iddhī nu te vatthukatā subhāvitā, anaddhagūnaṃ api devatānaṃ.
೩೫.
35.
ವೇಹಾಯಸಂ ಗಮ್ಮಮಾಗಮ್ಮ 3 ತಿಟ್ಠಸಿ, ಕುಮ್ಭಂ ಕಿಣಾಥಾತಿ ಯಮೇತಮತ್ಥಂ।
Vehāyasaṃ gammamāgamma 4 tiṭṭhasi, kumbhaṃ kiṇāthāti yametamatthaṃ;
ಕೋ ವಾ ತುವಂ ಕಿಸ್ಸ ವಾ ತಾಯ ಕುಮ್ಭೋ, ಅಕ್ಖಾಹಿ ಮೇ ಬ್ರಾಹ್ಮಣ ಏತಮತ್ಥಂ॥
Ko vā tuvaṃ kissa vā tāya kumbho, akkhāhi me brāhmaṇa etamatthaṃ.
೩೬.
36.
ನ ಸಪ್ಪಿಕುಮ್ಭೋ ನಪಿ ತೇಲಕುಮ್ಭೋ, ನ ಫಾಣಿತಸ್ಸ ನ ಮಧುಸ್ಸ ಕುಮ್ಭೋ।
Na sappikumbho napi telakumbho, na phāṇitassa na madhussa kumbho;
ಕುಮ್ಭಸ್ಸ ವಜ್ಜಾನಿ ಅನಪ್ಪಕಾನಿ, ದೋಸೇ ಬಹೂ ಕುಮ್ಭಗತೇ ಸುಣಾಥ॥
Kumbhassa vajjāni anappakāni, dose bahū kumbhagate suṇātha.
೩೭.
37.
ಗಳೇಯ್ಯ ಯಂ ಪಿತ್ವಾ 5 ಪತೇ ಪಪಾತಂ, ಸೋಬ್ಭಂ ಗುಹಂ ಚನ್ದನಿಯೋಳಿಗಲ್ಲಂ।
Gaḷeyya yaṃ pitvā 6 pate papātaṃ, sobbhaṃ guhaṃ candaniyoḷigallaṃ;
ಬಹುಮ್ಪಿ ಭುಞ್ಜೇಯ್ಯ ಅಭೋಜನೇಯ್ಯಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Bahumpi bhuñjeyya abhojaneyyaṃ, tassā puṇṇaṃ kumbhamimaṃ kiṇātha.
೩೮.
38.
ಅನಾಥಮಾನೋ ಉಪಗಾಯತಿ ನಚ್ಚತಿ ಚ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Anāthamāno upagāyati naccati ca, tassā puṇṇaṃ kumbhamimaṃ kiṇātha.
೩೯.
39.
ಯಂ ವೇ ಪಿವಿತ್ವಾ ಅಚೇಲೋವ ನಗ್ಗೋ, ಚರೇಯ್ಯ ಗಾಮೇ ವಿಸಿಖನ್ತರಾನಿ।
Yaṃ ve pivitvā acelova naggo, careyya gāme visikhantarāni;
ಸಮ್ಮೂಳ್ಹಚಿತ್ತೋ ಅತಿವೇಲಸಾಯೀ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Sammūḷhacitto ativelasāyī, tassā puṇṇaṃ kumbhamimaṃ kiṇātha.
೪೦.
40.
ಯಂ ಪಿತ್ವಾ ಉಟ್ಠಾಯ ಪವೇಧಮಾನೋ, ಸೀಸಞ್ಚ ಬಾಹುಞ್ಚ 11 ಪಚಾಲಯನ್ತೋ।
Yaṃ pitvā uṭṭhāya pavedhamāno, sīsañca bāhuñca 12 pacālayanto;
ಸೋ ನಚ್ಚತೀ ದಾರುಕಟಲ್ಲಕೋವ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
So naccatī dārukaṭallakova, tassā puṇṇaṃ kumbhamimaṃ kiṇātha.
೪೧.
41.
ಯಂ ವೇ ಪಿವಿತ್ವಾ ಅಗ್ಗಿದಡ್ಢಾ ಸಯನ್ತಿ, ಅಥೋ ಸಿಗಾಲೇಹಿಪಿ ಖಾದಿತಾಸೇ।
Yaṃ ve pivitvā aggidaḍḍhā sayanti, atho sigālehipi khāditāse;
ಬನ್ಧಂ ವಧಂ ಭೋಗಜಾನಿಞ್ಚುಪೇನ್ತಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Bandhaṃ vadhaṃ bhogajāniñcupenti, tassā puṇṇaṃ kumbhamimaṃ kiṇātha.
೪೨.
42.
ಯಂ ಪಿತ್ವಾ ಭಾಸೇಯ್ಯ ಆಭಾಸನೇಯ್ಯಂ, ಸಭಾಯಮಾಸೀನೋ ಅಪೇತವತ್ಥೋ।
Yaṃ pitvā bhāseyya ābhāsaneyyaṃ, sabhāyamāsīno apetavattho;
ಸಮ್ಮಕ್ಖಿತೋ 13 ವನ್ತಗತೋ ಬ್ಯಸನ್ನೋ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Sammakkhito 14 vantagato byasanno, tassā puṇṇaṃ kumbhamimaṃ kiṇātha.
೪೩.
43.
ಯಂ ವೇ ಪಿವಿತ್ವಾ ಉಕ್ಕಟ್ಠೋ ಆವಿಲಕ್ಖೋ, ಮಮೇವ ಸಬ್ಬಾ ಪಥವೀತಿ ಮಞ್ಞೇ 15।
Yaṃ ve pivitvā ukkaṭṭho āvilakkho, mameva sabbā pathavīti maññe 16;
ನ ಮೇ ಸಮೋ ಚಾತುರನ್ತೋಪಿ ರಾಜಾ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Na me samo cāturantopi rājā, tassā puṇṇaṃ kumbhamimaṃ kiṇātha.
೪೪.
44.
ಮಾನಾತಿಮಾನಾ ಕಲಹಾನಿ ಪೇಸುಣೀ, ದುಬ್ಬಣ್ಣಿನೀ ನಗ್ಗಯಿನೀ ಪಲಾಯಿನೀ।
Mānātimānā kalahāni pesuṇī, dubbaṇṇinī naggayinī palāyinī;
ಚೋರಾನ ಧುತ್ತಾನ ಗತೀ ನಿಕೇತೋ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Corāna dhuttāna gatī niketo, tassā puṇṇaṃ kumbhamimaṃ kiṇātha.
೪೫.
45.
ಇದ್ಧಾನಿ ಫೀತಾನಿ ಕುಲಾನಿ ಅಸ್ಸು, ಅನೇಕಸಾಹಸ್ಸಧನಾನಿ ಲೋಕೇ।
Iddhāni phītāni kulāni assu, anekasāhassadhanāni loke;
ಉಚ್ಛಿನ್ನದಾಯಜ್ಜಕತಾನಿಮಾಯ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Ucchinnadāyajjakatānimāya, tassā puṇṇaṃ kumbhamimaṃ kiṇātha.
೪೬.
46.
ಧಞ್ಞಂ ಧನಂ ರಜತಂ ಜಾತರೂಪಂ, ಖೇತ್ತಂ ಗವಂ ಯತ್ಥ ವಿನಾಸಯನ್ತಿ।
Dhaññaṃ dhanaṃ rajataṃ jātarūpaṃ, khettaṃ gavaṃ yattha vināsayanti;
ಉಚ್ಛೇದನೀ ವಿತ್ತವತಂ 17 ಕುಲಾನಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Ucchedanī vittavataṃ 18 kulānaṃ, tassā puṇṇaṃ kumbhamimaṃ kiṇātha.
೪೭.
47.
ಯಂ ವೇ ಪಿತ್ವಾ ದಿತ್ತರೂಪೋವ 19 ಪೋಸೋ, ಅಕ್ಕೋಸತಿ ಮಾತರಂ ಪಿತರಞ್ಚ।
Yaṃ ve pitvā dittarūpova 20 poso, akkosati mātaraṃ pitarañca;
ಸಸ್ಸುಮ್ಪಿ ಗಣ್ಹೇಯ್ಯ ಅಥೋಪಿ ಸುಣ್ಹಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Sassumpi gaṇheyya athopi suṇhaṃ, tassā puṇṇaṃ kumbhamimaṃ kiṇātha.
೪೮.
48.
ಯಂ ವೇ ಪಿತ್ವಾ ದಿತ್ತರೂಪಾವ ನಾರೀ, ಅಕ್ಕೋಸತಿ ಸಸುರಂ ಸಾಮಿಕಞ್ಚ।
Yaṃ ve pitvā dittarūpāva nārī, akkosati sasuraṃ sāmikañca;
ದಾಸಮ್ಪಿ ಗಣ್ಹೇ ಪರಿಚಾರಕಮ್ಪಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Dāsampi gaṇhe paricārakampi, tassā puṇṇaṃ kumbhamimaṃ kiṇātha.
೪೯.
49.
ಯಂ ವೇ ಪಿವಿತ್ವಾನ 21 ಹನೇಯ್ಯ ಪೋಸೋ, ಧಮ್ಮೇ ಠಿತಂ ಸಮಣಂ ಬ್ರಾಹ್ಮಣಂ ವಾ।
Yaṃ ve pivitvāna 22 haneyya poso, dhamme ṭhitaṃ samaṇaṃ brāhmaṇaṃ vā;
ಗಚ್ಛೇ ಅಪಾಯಮ್ಪಿ ತತೋನಿದಾನಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Gacche apāyampi tatonidānaṃ, tassā puṇṇaṃ kumbhamimaṃ kiṇātha.
೫೦.
50.
ಯಂ ವೇ ಪಿವಿತ್ವಾ ದುಚ್ಚರಿತಂ ಚರನ್ತಿ, ಕಾಯೇನ ವಾಚಾಯ ಚ ಚೇತಸಾ ಚ।
Yaṃ ve pivitvā duccaritaṃ caranti, kāyena vācāya ca cetasā ca;
ನಿರಯಂ ವಜನ್ತಿ ದುಚ್ಚರಿತಂ ಚರಿತ್ವಾ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Nirayaṃ vajanti duccaritaṃ caritvā, tassā puṇṇaṃ kumbhamimaṃ kiṇātha.
೫೧.
51.
ಯಂ ಯಾಚಮಾನಾ ನ ಲಭನ್ತಿ ಪುಬ್ಬೇ, ಬಹುಂ ಹಿರಞ್ಞಮ್ಪಿ ಪರಿಚ್ಚಜನ್ತಾ।
Yaṃ yācamānā na labhanti pubbe, bahuṃ hiraññampi pariccajantā;
ಸೋ ತಂ ಪಿವಿತ್ವಾ ಅಲಿಕಂ ಭಣಾತಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
So taṃ pivitvā alikaṃ bhaṇāti, tassā puṇṇaṃ kumbhamimaṃ kiṇātha.
೫೨.
52.
ಯಂ ವೇ ಪಿತ್ವಾ ಪೇಸನೇ ಪೇಸಿಯನ್ತೋ, ಅಚ್ಚಾಯಿಕೇ ಕರಣೀಯಮ್ಹಿ ಜಾತೇ।
Yaṃ ve pitvā pesane pesiyanto, accāyike karaṇīyamhi jāte;
ಅತ್ಥಮ್ಪಿ ಸೋ ನಪ್ಪಜಾನಾತಿ ವುತ್ತೋ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Atthampi so nappajānāti vutto, tassā puṇṇaṃ kumbhamimaṃ kiṇātha.
೫೩.
53.
ಹಿರೀಮನಾಪಿ ಅಹಿರೀಕಭಾವಂ, ಪಾತುಂ ಕರೋನ್ತಿ ಮದನಾಯ 23 ಮತ್ತಾ।
Hirīmanāpi ahirīkabhāvaṃ, pātuṃ karonti madanāya 24 mattā;
ಧೀರಾಪಿ ಸನ್ತಾ ಬಹುಕಂ ಭಣನ್ತಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Dhīrāpi santā bahukaṃ bhaṇanti, tassā puṇṇaṃ kumbhamimaṃ kiṇātha.
೫೪.
54.
ಯಂ ವೇ ಪಿತ್ವಾ ಏಕಥೂಪಾ ಸಯನ್ತಿ, ಅನಾಸಕಾ ಥಣ್ಡಿಲದುಕ್ಖಸೇಯ್ಯಂ।
Yaṃ ve pitvā ekathūpā sayanti, anāsakā thaṇḍiladukkhaseyyaṃ;
ದುಬ್ಬಣ್ಣಿಯಂ ಆಯಸಕ್ಯಞ್ಚುಪೇನ್ತಿ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Dubbaṇṇiyaṃ āyasakyañcupenti, tassā puṇṇaṃ kumbhamimaṃ kiṇātha.
೫೫.
55.
ಯಂ ವೇ ಪಿತ್ವಾ ಪತ್ತಖನ್ಧಾ ಸಯನ್ತಿ, ಗಾವೋ ಕುಟಹತಾವ ನ ಹಿ ವಾರುಣಿಯಾ।
Yaṃ ve pitvā pattakhandhā sayanti, gāvo kuṭahatāva na hi vāruṇiyā;
೫೬.
56.
ತಂ ಲೋಕೇ ವಿಸಸಮಾನಂ, ಕೋ ನರೋ ಪಾತುಮರಹತಿ॥
Taṃ loke visasamānaṃ, ko naro pātumarahati.
೫೭.
57.
ಯಂ ವೇ ಪಿತ್ವಾ ಅನ್ಧಕವೇಣ್ಡಪುತ್ತಾ, ಸಮುದ್ದತೀರೇ ಪರಿಚಾರಯನ್ತಾ 31।
Yaṃ ve pitvā andhakaveṇḍaputtā, samuddatīre paricārayantā 32;
ಉಪಕ್ಕಮುಂ ಮುಸಲೇಹಞ್ಞಮಞ್ಞಂ, ತಸ್ಸಾ ಪುಣ್ಣಂ ಕುಮ್ಭಮಿಮಂ ಕಿಣಾಥ॥
Upakkamuṃ musalehaññamaññaṃ, tassā puṇṇaṃ kumbhamimaṃ kiṇātha.
೫೮.
58.
ಯಂ ವೇ ಪಿತ್ವಾ ಪುಬ್ಬದೇವಾ ಪಮತ್ತಾ, ತಿದಿವಾ ಚುತಾ ಸಸ್ಸತಿಯಾ ಸಮಾಯ।
Yaṃ ve pitvā pubbadevā pamattā, tidivā cutā sassatiyā samāya;
ತಂ ತಾದಿಸಂ ಮಜ್ಜಮಿಮಂ ನಿರತ್ಥಕಂ, ಜಾನಂ ಮಹಾರಾಜ ಕಥಂ ಪಿವೇಯ್ಯ॥
Taṃ tādisaṃ majjamimaṃ niratthakaṃ, jānaṃ mahārāja kathaṃ piveyya.
೫೯.
59.
ನಯಿಮಸ್ಮಿಂ ಕುಮ್ಭಸ್ಮಿಂ ದಧಿ ವಾ ಮಧು ವಾ, ಏವಂ ಅಭಿಞ್ಞಾಯ ಕಿಣಾಹಿ ರಾಜ।
Nayimasmiṃ kumbhasmiṃ dadhi vā madhu vā, evaṃ abhiññāya kiṇāhi rāja;
ಏವಞ್ಹಿಮಂ ಕುಮ್ಭಗತಾ ಮಯಾ ತೇ, ಅಕ್ಖಾತರೂಪಂ ತವ ಸಬ್ಬಮಿತ್ತ॥
Evañhimaṃ kumbhagatā mayā te, akkhātarūpaṃ tava sabbamitta.
೬೦.
60.
ನ ಮೇ ಪಿತಾ ವಾ ಅಥವಾಪಿ ಮಾತಾ, ಏತಾದಿಸಾ ಯಾದಿಸಕೋ ತುವಂಸಿ।
Na me pitā vā athavāpi mātā, etādisā yādisako tuvaṃsi;
ಹಿತಾನುಕಮ್ಪೀ ಪರಮತ್ಥಕಾಮೋ, ಸೋಹಂ ಕರಿಸ್ಸಂ ವಚನಂ ತವಜ್ಜ॥
Hitānukampī paramatthakāmo, sohaṃ karissaṃ vacanaṃ tavajja.
೬೧.
61.
ದದಾಮಿ ತೇ ಗಾಮವರಾನಿ ಪಞ್ಚ, ದಾಸೀಸತಂ ಸತ್ತ ಗವಂ ಸತಾನಿ।
Dadāmi te gāmavarāni pañca, dāsīsataṃ satta gavaṃ satāni;
ಆಜಞ್ಞಯುತ್ತೇ ಚ ರಥೇ ದಸ ಇಮೇ, ಆಚರಿಯೋ ಹೋಸಿ ಮಮತ್ಥಕಾಮೋ॥
Ājaññayutte ca rathe dasa ime, ācariyo hosi mamatthakāmo.
೬೨.
62.
ತವೇವ ದಾಸೀಸತಮತ್ಥು ರಾಜ, ಗಾಮಾ ಚ ಗಾವೋ ಚ ತವೇವ ಹೋನ್ತು।
Taveva dāsīsatamatthu rāja, gāmā ca gāvo ca taveva hontu;
ಆಜಞ್ಞಯುತ್ತಾ ಚ ರಥಾ ತವೇವ, ಸಕ್ಕೋಹಮಸ್ಮೀ ತಿದಸಾನಮಿನ್ದೋ॥
Ājaññayuttā ca rathā taveva, sakkohamasmī tidasānamindo.
೬೩.
63.
ಮಂಸೋದನಂ ಸಪ್ಪಿಪಾಯಾಸಂ 33 ಭುಞ್ಜ, ಖಾದಸ್ಸು ಚ ತ್ವಂ ಮಧುಮಾಸಪೂವೇ।
Maṃsodanaṃ sappipāyāsaṃ 34 bhuñja, khādassu ca tvaṃ madhumāsapūve;
ಏವಂ ತುವಂ ಧಮ್ಮರತೋ ಜನಿನ್ದ, ಅನಿನ್ದಿತೋ ಸಗ್ಗಮುಪೇಹಿ ಠಾನನ್ತಿ॥
Evaṃ tuvaṃ dhammarato janinda, anindito saggamupehi ṭhānanti.
ಕುಮ್ಭಜಾತಕಂ ದುತಿಯಂ।
Kumbhajātakaṃ dutiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೫೧೨] ೨. ಕುಮ್ಭಜಾತಕವಣ್ಣನಾ • [512] 2. Kumbhajātakavaṇṇanā