| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੧੦. ਕੁਮੁਦਦਾਯਕਤ੍ਥੇਰਅਪਦਾਨવਣ੍ਣਨਾ
10. Kumudadāyakattheraapadānavaṇṇanā
ਹਿਮવਨ੍ਤਸ੍ਸਾવਿਦੂਰੇਤਿਆਦਿਕਂ ਆਯਸ੍ਮਤੋ ਕੁਮੁਦਦਾਯਕਤ੍ਥੇਰਸ੍ਸ ਅਪਦਾਨਂ। ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਭવੇਸੁ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗવਤੋ ਕਾਲੇ ਹਿਮવਨ੍ਤਸ੍ਸ ਆਸਨ੍ਨੇ ਮਹਨ੍ਤੇ ਜਾਤਸ੍ਸਰੇ ਕੁਕੁਤ੍ਥੋ ਨਾਮ ਪਕ੍ਖੀ ਹੁਤ੍વਾ ਨਿਬ੍ਬਤ੍ਤੋ ਕੇਨਚਿ ਅਕੁਸਲੇਨ ਪਕ੍ਖੀ ਸਮਾਨੋਪਿ ਪੁਬ੍ਬੇ ਕਤਸਮ੍ਭਾਰੇਨ ਬੁਦ੍ਧਿਸਮ੍ਪਨ੍ਨੋ ਪੁਞ੍ਞਾਪੁਞ੍ਞੇਸੁ ਛੇਕੋ ਸੀਲવਾ ਪਾਣਗੋਚਰਤੋ ਪਟਿવਿਰਤੋ ਅਹੋਸਿ। ਤਸ੍ਮਿਂ ਸਮਯੇ ਪਦੁਮੁਤ੍ਤਰੋ ਭਗવਾ ਆਕਾਸੇਨਾਗਨ੍ਤ੍વਾ ਤਸ੍ਸ ਸਮੀਪੇ ਚਙ੍ਕਮਤਿ। ਅਥ ਸੋ ਸਕੁਣੋ ਭਗવਨ੍ਤਂ ਦਿਸ੍વਾ ਪਸਨ੍ਨਚਿਤ੍ਤੋ ਕੁਮੁਦਪੁਪ੍ਫਂ ਡਂਸਿਤ੍વਾ ਭਗવਤੋ ਪਾਦਮੂਲੇ ਪੂਜੇਸਿ। ਭਗવਾ ਤਸ੍ਸ ਸੋਮਨਸ੍ਸੁਪ੍ਪਾਦਨਤ੍ਥਂ ਪਟਿਗ੍ਗਹੇਤ੍વਾ ਅਨੁਮੋਦਨਮਕਾਸਿ।
Himavantassāvidūretiādikaṃ āyasmato kumudadāyakattherassa apadānaṃ. Ayampi thero purimabuddhesu katādhikāro anekesu bhavesu vivaṭṭūpanissayāni puññāni upacinanto padumuttarassa bhagavato kāle himavantassa āsanne mahante jātassare kukuttho nāma pakkhī hutvā nibbatto kenaci akusalena pakkhī samānopi pubbe katasambhārena buddhisampanno puññāpuññesu cheko sīlavā pāṇagocarato paṭivirato ahosi. Tasmiṃ samaye padumuttaro bhagavā ākāsenāgantvā tassa samīpe caṅkamati. Atha so sakuṇo bhagavantaṃ disvā pasannacitto kumudapupphaṃ ḍaṃsitvā bhagavato pādamūle pūjesi. Bhagavā tassa somanassuppādanatthaṃ paṭiggahetvā anumodanamakāsi.
੫੧. ਸੋ ਤੇਨ ਪੁਞ੍ਞੇਨ ਦੇવਮਨੁਸ੍ਸੇਸੁ ਉਭਯਸਮ੍ਪਤ੍ਤਿਸੁਖਂ ਅਨੁਭવਿਤ੍વਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾવਤ੍ਥਿਯਂ ਅਞ੍ਞਤਰਸ੍ਮਿਂ ਕੁਲੇ ਨਿਬ੍ਬਤ੍ਤੋ વੁਦ੍ਧਿਮਨ੍વਾਯ ਮਹਦ੍ਧਨੋ ਮਹਾਭੋਗੋ ਰਤਨਤ੍ਤਯੇ ਪਸਨ੍ਨੋ ਸਤ੍ਥੁ ਧਮ੍ਮਦੇਸਨਂ ਸੁਤ੍વਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍વਾ ਨਚਿਰਸ੍ਸੇવ ਅਰਹਾ ਹੁਤ੍વਾ ਅਤ੍ਤਨੋ ਪੁਬ੍ਬਕਮ੍ਮਂ ਪਚ੍ਚਕ੍ਖਤੋ ਞਤ੍વਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮવਨ੍ਤਸ੍ਸਾવਿਦੂਰੇਤਿਆਦਿਮਾਹ। ਪਦੁਮੁਪ੍ਪਲਸਞ੍ਛਨ੍ਨੋਤਿ ਏਤ੍ਥ ਸਤਪਤ੍ਤੇਹਿ ਸਮ੍ਪੁਣ੍ਣੋ ਸੇਤਪਦੁਮੋ ਚ ਤੀਣਿ ਨੀਲਰਤ੍ਤਸੇਤੁਪ੍ਪਲਾਨਿ ਚ ਪਦੁਮੁਪ੍ਪਲਾਨਿ ਤੇਹਿ ਸਞ੍ਛਨ੍ਨੋ ਗਹਨੀਭੂਤੋ ਸਮ੍ਪੁਣ੍ਣੋ ਮਹਾਜਾਤਸ੍ਸਰੋ ਅਹੂਤਿ ਸਮ੍ਬਨ੍ਧੋ। ਪੁਣ੍ਡਰੀਕਸਮੋਤ੍ਥਟੋਤਿ ਪੁਣ੍ਡਰੀਕੇਹਿ ਰਤ੍ਤਪਦੁਮੇਹਿ ਓਤ੍ਥਟੋ ਸਮ੍ਪੁਣ੍ਣੋਤਿ ਅਤ੍ਥੋ। ਸੇਸਂ ਸੁવਿਞ੍ਞੇਯ੍ਯਮੇવਾਤਿ।
51. So tena puññena devamanussesu ubhayasampattisukhaṃ anubhavitvā imasmiṃ buddhuppāde sāvatthiyaṃ aññatarasmiṃ kule nibbatto vuddhimanvāya mahaddhano mahābhogo ratanattaye pasanno satthu dhammadesanaṃ sutvā paṭiladdhasaddho pabbajitvā nacirasseva arahā hutvā attano pubbakammaṃ paccakkhato ñatvā somanassajāto pubbacaritāpadānaṃ pakāsento himavantassāvidūretiādimāha. Padumuppalasañchannoti ettha satapattehi sampuṇṇo setapadumo ca tīṇi nīlarattasetuppalāni ca padumuppalāni tehi sañchanno gahanībhūto sampuṇṇo mahājātassaro ahūti sambandho. Puṇḍarīkasamotthaṭoti puṇḍarīkehi rattapadumehi otthaṭo sampuṇṇoti attho. Sesaṃ suviññeyyamevāti.
ਕੁਮੁਦਦਾਯਕਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Kumudadāyakattheraapadānavaṇṇanā samattā.
ਸੋਲ਼ਸਮવਗ੍ਗવਣ੍ਣਨਾ ਸਮਤ੍ਤਾ।
Soḷasamavaggavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੧੦. ਕੁਮੁਦਦਾਯਕਤ੍ਥੇਰਅਪਦਾਨਂ • 10. Kumudadāyakattheraapadānaṃ
