| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
3. гурун̇г̇аваг̇г̇о
3. Kuruṅgavaggo
[21] 1. гурун̇г̇амиг̇аж̇аад̇агаван̣н̣анаа
[21] 1. Kuruṅgamigajātakavaṇṇanā
н̃аад̇амзд̇ам̣ гурун̇г̇ассаад̇и ид̣̇ам̣ сад̇т̇аа взл̣уванз вихаранд̇о д̣̇звад̣̇ад̇д̇ам̣ аараб̣бха гат̇зси. згасмин̃хи самаяз д̇хаммасабхааяам̣ саннибад̇ид̇аа бхигкуу ‘‘аавусо д̣̇звад̣̇ад̇д̇о д̇ат̇ааг̇ад̇асса гхаад̇анад̇т̇ааяа д̇хануг̇г̇ахз баяож̇зси, силам̣ бавиж̇жхи, д̇ханабаалам̣ виссаж̇ж̇зси, саб̣б̣ат̇ааби д̣̇асаб̣аласса вад̇хааяа барисаггад̇ий’’д̇и д̣̇звад̣̇ад̇д̇асса аван̣н̣ам̣ гат̇знд̇аа нисийд̣̇им̣су. сад̇т̇аа ааг̇анд̇ваа бан̃н̃ад̇д̇аасанз нисинно ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчи. бханд̇з, д̣̇звад̣̇ад̇д̇о д̇умхаагам̣ вад̇хааяа барисаггад̇ийд̇и д̇асса аг̇ун̣агат̇ааяа саннисиннаамхаад̇и. сад̇т̇аа ‘‘на, бхигкавз, д̣̇звад̣̇ад̇д̇о ид̣̇аанзва мама вад̇хааяа барисаггад̇и, буб̣б̣зби мама вад̇хааяа барисаггиязва, на жа бана мам̣ вад̇хид̇ум̣ асагкий’’д̇и вад̇ваа ад̇ийд̇ам̣ аахари.
Ñātametaṃkuruṅgassāti idaṃ satthā veḷuvane viharanto devadattaṃ ārabbha kathesi. Ekasmiñhi samaye dhammasabhāyaṃ sannipatitā bhikkhū ‘‘āvuso devadatto tathāgatassa ghātanatthāya dhanuggahe payojesi, silaṃ pavijjhi, dhanapālaṃ vissajjesi, sabbathāpi dasabalassa vadhāya parisakkatī’’ti devadattassa avaṇṇaṃ kathentā nisīdiṃsu. Satthā āgantvā paññattāsane nisinno ‘‘kāya nuttha, bhikkhave, etarahi kathāya sannisinnā’’ti pucchi. Bhante, devadatto tumhākaṃ vadhāya parisakkatīti tassa aguṇakathāya sannisinnāmhāti. Satthā ‘‘na, bhikkhave, devadatto idāneva mama vadhāya parisakkati, pubbepi mama vadhāya parisakkiyeva, na ca pana maṃ vadhituṃ asakkhī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о гурун̇г̇амиг̇о худ̇ваа згасмим̣ аран̃н̃ааяад̇анз палаани каад̣̇анд̇о васад̇и. со згасмим̣ гаалз паласамбаннз сзбан̣н̣иругкз сзбан̣н̣ипалаани каад̣̇ад̇и. ат̇зго г̇аамаваасий аддагалуд̣̇д̣̇аго паларугкамуулзсу миг̇аанам̣ бад̣̇аани убад̇хаарзд̇ваа убариругкз аддагам̣ б̣анд̇хид̇ваа д̇ад̇т̇а нисийд̣̇ид̇ваа палаани каад̣̇ид̇ум̣ ааг̇ад̇ааг̇ад̇з миг̇з сад̇д̇ияаа виж̇жхид̇ваа д̇зсам̣ мам̣сам̣ виггин̣анд̇о ж̇ийвигам̣ габбзд̇и. со згад̣̇ивасам̣ д̇асмим̣ ругкамуулз б̣од̇хисад̇д̇асса бад̣̇авал̣ан̃ж̇ам̣ д̣̇исваа д̇асмим̣ сзбан̣н̣иругкз аддагам̣ б̣анд̇хид̇ваа баад̇ова бхун̃ж̇ид̇ваа сад̇д̇им̣ аад̣̇ааяа ванам̣ бависид̇ваа д̇ам̣ ругкам̣ аарухид̇ваа аддагз нисийд̣̇и. б̣од̇хисад̇д̇оби баад̇ова васанадтаанаа нигкамид̇ваа ‘‘сзбан̣н̣ипалаани каад̣̇иссаамий’’д̇и ааг̇амма д̇ам̣ ругкамуулам̣ сахасаава абависид̇ваа ‘‘гад̣̇аажи аддагалуд̣̇д̣̇агаа ругкзсу аддагам̣ б̣анд̇ханд̇и, ад̇т̇и ну ко зваруубо убад̣̇д̣̇аво’’д̇и бариг̇г̇ан̣ханд̇о б̣аахирад̇ова адтааси.
Atīte bārāṇasiyaṃ brahmadatte rajjaṃ kārente bodhisatto kuruṅgamigo hutvā ekasmiṃ araññāyatane phalāni khādanto vasati. So ekasmiṃ kāle phalasampanne sepaṇṇirukkhe sepaṇṇiphalāni khādati. Atheko gāmavāsī aṭṭakaluddako phalarukkhamūlesu migānaṃ padāni upadhāretvā uparirukkhe aṭṭakaṃ bandhitvā tattha nisīditvā phalāni khādituṃ āgatāgate mige sattiyā vijjhitvā tesaṃ maṃsaṃ vikkiṇanto jīvikaṃ kappeti. So ekadivasaṃ tasmiṃ rukkhamūle bodhisattassa padavaḷañjaṃ disvā tasmiṃ sepaṇṇirukkhe aṭṭakaṃ bandhitvā pātova bhuñjitvā sattiṃ ādāya vanaṃ pavisitvā taṃ rukkhaṃ āruhitvā aṭṭake nisīdi. Bodhisattopi pātova vasanaṭṭhānā nikkhamitvā ‘‘sepaṇṇiphalāni khādissāmī’’ti āgamma taṃ rukkhamūlaṃ sahasāva apavisitvā ‘‘kadāci aṭṭakaluddakā rukkhesu aṭṭakaṃ bandhanti, atthi nu kho evarūpo upaddavo’’ti pariggaṇhanto bāhiratova aṭṭhāsi.
луд̣̇д̣̇агоби б̣од̇хисад̇д̇асса анааг̇аманабхаавам̣ н̃ад̇ваа аддагз нисиннова сзбан̣н̣ипалаани кибид̇ваа кибид̇ваа д̇асса бурад̇о баад̇зси. б̣од̇хисад̇д̇о ‘‘имаани палаани ааг̇анд̇ваа маяхам̣ бурад̇о бад̇анд̇и, ад̇т̇и ну ко убари луд̣̇д̣̇аго’’д̇и бунаббунам̣ уллогзнд̇о луд̣̇д̣̇агам̣ д̣̇исваа абассанд̇о вияа худ̇ваа ‘‘амбхо, ругка-буб̣б̣з д̇вам̣ оламб̣агам̣ жаарзнд̇о вияа уж̇угамзва палаани баад̇зси, аж̇ж̇а бана д̇з ругкад̇хаммо барижжад̇д̇о, звам̣ д̇аяаа ругкад̇хаммз барижжад̇д̇з ахамби ан̃н̃ам̣ ругкамуулам̣ убасан̇гамид̇ваа маяхам̣ аахаарам̣ бариязсиссаамий’’д̇и вад̇ваа имам̣ г̇аат̇амааха –
Luddakopi bodhisattassa anāgamanabhāvaṃ ñatvā aṭṭake nisinnova sepaṇṇiphalāni khipitvā khipitvā tassa purato pātesi. Bodhisatto ‘‘imāni phalāni āgantvā mayhaṃ purato patanti, atthi nu kho upari luddako’’ti punappunaṃ ullokento luddakaṃ disvā apassanto viya hutvā ‘‘ambho, rukkha-pubbe tvaṃ olambakaṃ cārento viya ujukameva phalāni pātesi, ajja pana te rukkhadhammo pariccatto, evaṃ tayā rukkhadhamme pariccatte ahampi aññaṃ rukkhamūlaṃ upasaṅkamitvā mayhaṃ āhāraṃ pariyesissāmī’’ti vatvā imaṃ gāthamāha –
21.
21.
‘‘н̃аад̇амзд̇ам̣ гурун̇г̇асса, яам̣ д̇вам̣ сзбан̣н̣и сзяяаси;
‘‘Ñātametaṃ kuruṅgassa, yaṃ tvaṃ sepaṇṇi seyyasi;
ан̃н̃ам̣ сзбан̣н̣и г̇ажчаами, на мз д̇з ружжад̇з пала’’нд̇и.
Aññaṃ sepaṇṇi gacchāmi, na me te ruccate phala’’nti.
д̇ад̇т̇а н̃аад̇анд̇и баагадам̣ ж̇аад̇ам̣. зд̇анд̇и ид̣̇ам̣. гурун̇г̇ассаад̇и гурун̇г̇амиг̇асса. яам̣ д̇вам̣ сзбан̣н̣и сзяяасийд̇и яам̣ д̇вам̣ амбхо сзбан̣н̣иругка бурад̇о палаани баад̇аяамаано сзяяаси висзяяаси висин̣н̣апало хоси, д̇ам̣ саб̣б̣ам̣ гурун̇г̇амиг̇асса баагадам̣ ж̇аад̇ам̣. на мз д̇з ружжад̇з паланд̇и звам̣ палам̣ д̣̇ад̣̇амаанааяа на мз д̇ава палам̣ ружжад̇и, д̇идта д̇вам̣, ахам̣ ан̃н̃ад̇т̇а г̇ажчиссаамийд̇и аг̇амааси.
Tattha ñātanti pākaṭaṃ jātaṃ. Etanti idaṃ. Kuruṅgassāti kuruṅgamigassa. Yaṃ tvaṃ sepaṇṇi seyyasīti yaṃ tvaṃ ambho sepaṇṇirukkha purato phalāni pātayamāno seyyasi viseyyasi visiṇṇaphalo hosi, taṃ sabbaṃ kuruṅgamigassa pākaṭaṃ jātaṃ. Na me te ruccate phalanti evaṃ phalaṃ dadamānāya na me tava phalaṃ ruccati, tiṭṭha tvaṃ, ahaṃ aññattha gacchissāmīti agamāsi.
ат̇асса луд̣̇д̣̇аго аддагз нисиннова сад̇д̇им̣ кибид̇ваа ‘‘г̇ажча, вирад̣̇д̇хо д̣̇аанимхи д̇а’’нд̇и ааха. б̣од̇хисад̇д̇о нивад̇д̇ид̇ваа тид̇о ааха ‘‘амбхо буриса, ид̣̇аанийси гин̃жааби мам̣ вирад̣̇д̇хо, адта бана махаанираяз сол̣асауссад̣̇анираяз бан̃жавид̇хаб̣анд̇ханаад̣̇ийни жа гаммагааран̣аани авирад̣̇д̇хоязваасий’’д̇и. зван̃жа бана вад̇ваа балааяид̇ваа яат̇ааружим̣ г̇ад̇о, луд̣̇д̣̇оби од̇арид̇ваа яат̇ааружим̣ г̇ад̇о.
Athassa luddako aṭṭake nisinnova sattiṃ khipitvā ‘‘gaccha, viraddho dānimhi ta’’nti āha. Bodhisatto nivattitvā ṭhito āha ‘‘ambho purisa, idānīsi kiñcāpi maṃ viraddho, aṭṭha pana mahāniraye soḷasaussadaniraye pañcavidhabandhanādīni ca kammakāraṇāni aviraddhoyevāsī’’ti. Evañca pana vatvā palāyitvā yathāruciṃ gato, luddopi otaritvā yathāruciṃ gato.
сад̇т̇ааби ‘‘на, бхигкавз, д̣̇звад̣̇ад̇д̇о ид̣̇аанзва мама вад̇хааяа барисаггад̇и, буб̣б̣зби барисаггиязва, на жа бана мам̣ вад̇хид̇ум̣ асагкий’’д̇и имам̣ д̇хаммад̣̇зсанам̣ аахарид̇ваа анусанд̇хим̣ гхадзд̇ваа ж̇аад̇агам̣ самод̇хаанзси – ‘‘д̇ад̣̇аа аддагалуд̣̇д̣̇аго д̣̇звад̣̇ад̇д̇о ахоси, гурун̇г̇амиг̇о бана ахамзва ахоси’’нд̇и.
Satthāpi ‘‘na, bhikkhave, devadatto idāneva mama vadhāya parisakkati, pubbepi parisakkiyeva, na ca pana maṃ vadhituṃ asakkhī’’ti imaṃ dhammadesanaṃ āharitvā anusandhiṃ ghaṭetvā jātakaṃ samodhānesi – ‘‘tadā aṭṭakaluddako devadatto ahosi, kuruṅgamigo pana ahameva ahosi’’nti.
гурун̇г̇амиг̇аж̇аад̇агаван̣н̣анаа батамаа.
Kuruṅgamigajātakavaṇṇanā paṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 21. гурун̇г̇амиг̇аж̇аад̇агам̣ • 21. Kuruṅgamigajātakaṃ
